الثلاثاء، 29 أبريل 2008

حكاية كل يوم

ياااااااااه..البيت أخيرا .. مفيش فى الدنيا أحسن من إنك تروح البيت فى يوم ساقعة زى ده وخصوصا بعد ما إتهد حيلك فى إمتحان كتبت فيه أغنية كاملة مع إن الإمتحان كان عايز ست ابيات بس ..بس تقول إيه بقى على التفوق اللى أنا فيه.. يعنى أنا والحمد لله حافظة الأغنية كلها أبخل على المصحح ليه بقى وأكتب ست أبيات بس .. المهم طبعا أول ما روحت ماما سألتنى السؤال المعتاد

ماما حبيبتى : ها يا ميوشة عملتى إيه فى الإمتحان بتاع النهاردة؟

أنا : الحمد لله يا ماما الإمتحان كان سهل خالص وأنا حليته كله صح

ماما حبيبتى : يعنى إن شاء الله تنحجى فيه ؟؟

أنا : أنجح بس!! أنا على الإمتياز يا ماما على طول ( شوف الكدب يا أخى )

المهم اليوم عدى عادى جدا يعنى الأكل والمسلسل ..الروتين الطبيعى وقمت داخلة نايمة .. لكن اللى حصل تانى يوم هو فعلا اللى يستاهل إنى أحكى عنه .. صلوا على النبى .. كان يا ماكان ..فى بيت هادى زى بيتنا .. كانت الأميرة ميوشة نايمة فى سريرها ومستنية أميرها وهو جاى على حصانه الأبيض علشان ينقذها من أى حاجة يلاقيها فى سكته .. صحت الأميرة ميوشة من نومها الهادئ على صرخة مفزعه ..قامت الأميرة الجميلة ميوشة على وشها علشان تكتشف إن دى مجرد خناقة جديدة ..أو نقدر نقول إنها المواجهة اليومية بين ماما وأم صلاح.

( أم صلاح ) دى يا جماعة ست عجوزة جدا وغلبانة جدا زى ستات كتير بنشوفهم كل يوم..الست دى مع ماما من أول ما أمى وأبويا إتجوزوا .. هى بتيجى كل يوم الصبح علشان تجيب لماما الخضار و طلبات البيت من السوق .. المهم أول ما أم صلاح توصل البيت عندنا بيبتدى الحوار كالأتى :

أول حاجة وصلة دعا لماما ولولادها الدكاترة –اللى هى مجبتهومش أصلا، وبعدين تسأل ماما عن حباية للصداع أو للمغص أو أى حباية بتعمل أى حاجة .. المرحلة التالتة بقى إن ماما تبدأ تحفظ أم صلاح الحاجات اللى هتجيبها كل حاجة لوحدها وبكميتها –وغالبا المرحلة دى لوحدها بتاخد نص ساعة –.. بعد كده بتبدأ أم صلاح رحلتها بالإقلاع من باب شقتنا للسوق .. بس للأسف لما أم صلاح بتروح السوق ماما بتفقد الامل فى رجوعها تانى لإن مرحلة السوق دى بالذات بتاخد من ساعتين لتلات ساعات .. وتفضل ماما حبيبتى رايحة جاية وهى بتقول : " لا حول ولا قوة إلا بالله ، يا ترى إنتى فين يا ام صلاح ؟؟" .. وأخيرا تيجى أم صلاح .. وتبدأ المواجهه :

ماما حبيبتى : إيه ده يا أم صلاح ؟

أم صلاح : دى طلباتك يا حاجة

ماما حبيبتى : أنا قولتلك هاتى إيه يا أم صلاح ؟

أم صلاح :أنا فاكرة يا حاجة ..اللى لاقيته فى السوق جبته ، أهى كلها نعمة ربنا .

تقعد ماما حبيبتى تقلب فى الحاجة ..تلاقى الطماطم اللى كانت طلباها بقت بطاطا ..بطاطا يا أم صلاح .. ده أنا مكلتهاش من الإعدادية .. ده غير إن أم صلاح كمان عندها هواية غريبة جدا .. عارفين الناس اللى بتجمع طوابع واللى بتجمع غطيان قزايز ..أم صلاح بقى هوايتها تجميع أى حاجة خضرا فى السوق.. شبت بقدونس جرجير فجل خس ..ولا كأننا بنربى أرانب ، والمصيبة إن أم صلاح بتكون منشكحة جدا وفرحانة كأنها قاصدة تغيظ ماما .. وتقوم قايلالها بمنتهى السعادة " أهى حاجة تفرح العيال يا حاجة " .. ربنا يخليكم نفسى حد يقولى إيه اللى يفرح واحدة زى بفجل وجرجير .. أم صلاح بتتكلم عن فرحتنا بالخضار كأنها هتاخدنا دريم بارك مثلا.

طبعا بعد كل الأحداث دى كلها ماما حبيبتى طبعا بيجيلها إنهيار عصبى وتقعد تزعق وبعدين تعرف فى الأخر عن مفيش فايدة ..فتحط إيديها على خدها وتعيد جدولة الغدا على أساس اللى أم صلاح جابته .. يعنى محشى البتنجان اللى ماما وعدانى بيه بقالها شهر.. يتقلب كوسة بالباشميل فى ثانية.

الكارثة الكبيرة بقى بجد .. إنى كذا مرة قولت لماما يا ست الكل سيبك من أم صلاح .. وإنشاله أنا أبقى أجيبلك الخضار بعد كده ..لكن ماما بترفض جدا .. كأن أم صلاح دى هى مج الكابتشينو اللى بيعمل لماما الإصطباحة بتاعها .

طبعا صحيت على صوت ماما وهى بتزعق علشان أم صلاح جابتلها قرنبيط علشان تخلله .. واضح إن مجلس الأمن بعت لأم صلاح شكوى بتقول إن بيتنا عنده نقص فى مخلل القرنبيط ( تخيل بقى مش كفاية إنه قرنبيط لأ وكمان مخلل ) ..المهم إن أم صلاح قررت تصلح الغلط ده وجابت لماما ب10 جنيه قرنبيط علشان تخلله .. أخيرا الحمد لله قدرت أهدى ماما وفى الأخر باسوا بعض وقعدوا يشربوا الشاى وكأن شيئا لم يحدث ، إضطريت بقى أدخل أغسل وشى .. وأبدأ يومى المعتاد .. أبص باصة على الجدول كده يا ترى بكرة مخبيلى مادة إيه ؟؟ لأ ..مستحيل .. أحمدك يا رب .. مادتى المفضلة .. بكرة عندى قصة.

حد يسألنى ويقولى.. إيه ده؟؟ معقولة إنتى عندك مادة مفضلة .. تيجى إزاى دى؟؟ الحقيقة وكلام فى سركم يعنى هى المادة مش مادتى المفضلة ولا حاجة أهى أى مادة زى التانين وخلاص لكن الدكتور اللى بيدينى المادة دى بصراحة هو الدكتور المفضل بتاعى بصراحة .. من أول ما دخلت الكلية وأنا بسمع إسم الدكتور ده ..هو أصلا رئيس قسم الإنجليزى.. لكن الدكتور ده فيه حاجة مش طبيعية حاجة كده زى كاريزما .. عارفين الكاريزما بتاعة عبد الناصر كده .. المهم إن الدكتور ده يعتبر أول إنسان فى الدنيا يشدنى وهو بيدينى معلومة علشان كده مفوتلوش ولا محاضرة ( أه ملحوظة للناس اللى دماغهم راحت لبعيد الدكتور ده عنده أكتر من 50 سنة )
وبعدين جمال المادة كمان إنها قصة يعنى هاخد الحكاية وأعرف إيه النظام والمواضيع ماشية إزاى وبعد كده بقى اسلك أمورى بالطريقة المعتادة.. المهم إنى عرفت إن عندنا قصة إسمها ألة الزمن ( the time machine) .

القصة وما فيها بتدور عن واحد مخترع من التمنينات كان عايش فى إنجلترا ونفسه يسافر عبر الزمن.. الراجل ده أخيرا عرف يخترع ألة الزمن ودخل وجواها وقام مشغلها .. بس واضح إنه شغلها أوى زيادة عن اللزوم قامت الألة دى مودياه زمن بعييييييييييييد بعد حوالى 8 مليون سنة .. فى الزمن ده لقى البشر بقوا نوعين نوع نضيف وكويس وإبن حلال وعايش فوق الأرض ( ودول غالبا كانوا العيال النضاف اللى بيذاكروا أول بأول ).. والنوع التانى نوع ما يعلم بيه إلا ربنا وشكلوا عامل زى القرود وعايش تحت الأرض ( ومن واقع خبرتى فى الحياة أنا حاسة إن النوع التانى ده هو شلة الأنس والشلل اللى شبهها) .. وأحلى حاجة بقى إن النوع اللى فوق الأرض ده كان نوع رقيق خالص بياكل الفاكهة والخضار السوتيه.. أما النوع اللى تحت الأرض فده كان بياكل حاجة تانية خالص ..عارفين كان بياكل إيه؟؟ كان بياكل إخواته اللى فوق الأرض .نيهاهاها .. هنقضى عليكم ياللى عاملنلى فيها فالحين وبتنجحوا .

المهم أنا بقى لقيت القصة كده فرحت أوى وجت على هوايا وقعدت أقرا فيها وقلت يالا يا بت يا ميوشة إعمليها مرة وهاتى تقدير فى مادة ..مش علشان خاطر المادة حتى علشان خاطر الدكتور تروحيلو كده بعد الإمتحان وإنتى رافعة راسك وتقوليله أنا نجحت فى مادة حضرتك يا دكتور وجبت مقبول.. غمضت عينى كده وسرحت بخيالى وشوفت نفسى وأنا بستلم جايزة أحسن واحدة جايبة تقدير فى مادة القصة .. ودى جايزة هيخترعوها بس علشان أنا أخدها وبعدين تتلغى تانى .. بس هل فعلا ممكن ده يحصل فى يوم من الأيام.

هناك 28 تعليقًا:

2ensan wnsan يقول...

صباح الخيييييييييير يا سبحان الله عندك ماده مفضله وده من ايه اكيد من القرنبيط بتاع الحاجه ام صلاح لا حول ولا قوة الا بالله القرنبيط بهدل الدنيا خالص يا جماعه ربنا يستر بقى عليكوا وعلى اخواتك الدكاتره ( اللي ما جوش ) يا رب بس بالمناسبه يوم ساقعه ازاي واحنا في ابريل

maiosha يقول...

wa7ed 2ensan wnsan
.......................
صباح النور ياسدى. شوفت القرنبيط عمل عمايلة معايا على الأخر
يا بنى إبريل إيه بس .. إحنا بنمتحن الترم الأولانى يعنى أواخر شهر 12 وأول 1 ..خليك عايش معايا الأحداث متروحش بعيد

2ensan wnsan يقول...

خلاص دلوقتي مساء الخييييير

اه يعني البوستات دي من زمان سوري عشان مهيس من 3 ايام ما نمتش

خلاص هعيش الاحداث بالمناسبه عملتي ايه الترم الاول ؟؟؟؟

Mafrousa يقول...

ايه يا بنتى العفرته ديه ..
حلوه حكاية ام صلاح انا عاوزه واحده زيها و مش مهم تجبلى ايه اهى تجبلى اى حاجه و السلام ....و بعدين هوه احنا لسه حنستنى الناس اللى تحت الارض لما تطلع و تاكلنا ....صباح الخير احنا اصلا مخلصين على بعضنا اول باول مش مستنين حد......زاكرى كويس يا مايوش علشان اختك مفروسه تجبلك حاجه حلوه

امل يقول...

بوست جناااااان
دمك خفيف قوي يا ميوشة
فكرتيني بالجامعة وايامها الحلوة

Miss. Sosa يقول...

السلام عليكم

ههههههههه حلوة حكاية ام صلاح ديه اوي وازاى بتفرحكم بالحاجات الخضرا غالبا هي متخيلاكم شوية ارانب :D

عجبتني قصة اله الزمن ديه اوى ياريتها موجودة كنا دخلنا فيها الكائنات الغير مرغوب فيها ترميهم في اي عصر والسلام

تحياااتى كتيررر :)

maiosha يقول...

wa7ed 2ensan wnsan
.....................
متستعجلش عترف كل حاجة فى وقتها أكيد يعنى هقولكم فى يوم أنا عملت إيه فى الترم ده إدعيلى إنت بس

maiosha يقول...

واحدة مفروسة
........................
ربنا يخليكى ليا يا رب وميحرمنيش منك أبدا .. مفروسة هتجيبلى حاجة حلوة
هيه هيه هيه

maiosha يقول...

أمل
.............
شكرا على زيارتك للمدونة وإن شاء الله تتكرر تانى


miss sosa
..................
متهيألى أنا أول واحدة غير مرغوب فيها كنتم هتحطونى فى ألة الزمن
بس ياترى كنتى هتودينى فين؟؟

almasry يقول...

انا لبيت الدعوه وجيت وعمرى ما أتأخر بس ياريت انتى مش تتأخرى علينا ونسيبنا من الكلام اللى مش جايب همه وأقولك انا عاوز حد زى ام صلاح دى للى مفروض هتبقى حماتى بالله عليكى شوفيلى الموضوع ده انا عاوز حد يخنقها بس مش يضايقها علشان انا بحب بنتها موت ؟؟ هه


تحيـــاتى
المصــــــــــرى

دكتور بهــدوء يقول...

اله الله الله
يا ميوشه
والله وجه الزمن اللي نحب مواد ونجب تقدير وبتاع


عودي لرشدك واهدي كده
وركزي انتي ايه ناويه تتغيري

maiosha يقول...

المصرى
........................
حماتك زى أم صلاح!!!!!! يبقى إستحمل بقى كل يوم مخلل القرنبيط
ده إنت هتبقى ريحتك جنان

maiosha يقول...

دكتور بهدوء
....................
لأ يا راجل عيب إنت بتتكلم فى إيه؟؟ أنا عاهدت نفسى إنى فاشلة وهفضل فاشلة للأبد .. متقلقشى خالص
بس يعنى خلينى أحلم .. شوية كده تفاريح

Unknown يقول...

يا جمالك يا ميوشه
بوست اكثر من رائع
ويارب لأمام دائما

اه وحيات اغلي حاجه عندك تسلميلي علي ام صلاح


انا برقش
زيارتي الاولي ومش هتكون الاخيره ان شاء الله

اتمني تشرفيني

bar2ash

maiosha يقول...

نورت المدونة يا برقش .. وأتمنى تكرار الزيارة
أما بخصوص أم صلاح حاضر من عنيا هسلم عليها .. أم صلاح بقى عندها معجبين أكتر من بتوع براد بيت هههههههه

فرنسا هانم يقول...

تحيا ام صلاح
عندها ثقافه غذائيه ممتازه
فعلا الخضروات مفيده جدا جدا
خليكم مع ام صلاح وانتوا تكسبوا

2ensan wnsan يقول...

ايه هو دا ليه علاقه بثقافة الوقوف في البلكونات يعني من ثقافة الوقوف في البكونه انك تاكل خضار مثلا اكيد الراجل اللي مات دا مكنش بياكل خضار في البكونه

maiosha يقول...

ههههههههههههه
بجد يا فرنسا ده ليه علاقة فعلا بثقافة الدخول للبلكونات
الواحد بقى جاهل على الأخر يا أخى
ثقافة بلكونات .. وثقافة غذائية .. ياترى مين وراهم ؟؟!!

2ensan wnsan يقول...

اكيد اللي وراهم الهيئه العامه ل(قصور) الثقافه وليست القصور كل ما يسكن في قصور لا تسكن

سلام

مسلم يقول...

والله أنا قريت البوست بتاعك جميييييل بس يا خساره مفهمتش منه حاجه .. قصدي يا ست ميوشه أنتي تعبتي نفسك و قعدتي تكتبي البوست ده ليه ؟؟ عشان تعرفينا علي الست أم صلاح؟؟
متزعليش دي بس وجهة نظر...
وسلامي لأم صلاح وصلاح كمان........

Eldebug يقول...

هههههههههههه...انا بحسبك هتقولى رجع بالة الزمن لقى ام صلاح قاعدة تاكل خضار هناك ... بس الواضح انها بتحبكوا اوى ... عاوز تاكلكوا خضار علشان تبقوا من الناس النضيفة اللى فوق ... اللى بيتاكلوا

maiosha يقول...

مسلم
.......................
أولا أحب أشكرك على زيارة المدونة بتاعتى وأتمنى إنها متكونش أخر زيارة.

ثانيا المدونة إسمها يوميات طالبة فاشلة .. لكن مش معنى كده إنها كلها تبقى عن المذاكرة والإمتحانات ..أنا مش طالبة 24 ساعة .. برضة فيه ميوشة الإنسانة اللى بتعيش مع ناس غير شلة الأنس
وبعدين أم صلاح معانا كل يوم من يوم ما فتحت عينى على الدنيا وأنا بشوف أم صلاح كل يوم فطبيعى إنها تبقى موجودة فى حياتى وأكتب عنها فى يومياتى

وأخيرا مفيش زعل ولا حاجة والموضوع كله زى ما إنت بتقول .. وجهات نظر

maiosha يقول...

eldebug
...................
ياااااااااه ..ممكن أم صلاح تكون بتفكر لبعيد كده .. والله فيها الخير

ياماما ربنا يخليكى قولى لأم صلاح تضاعف كمية الخضار بكرة

مسلم يقول...

شكرا للرد..........
بس انتي فهمتي وجهة نظري غلط . أنا مش قصدي انك كتبتي عن حد معين بعيد عن عنوان المدونه .. لكن قصدي ان طلاما المدونه دي بيقراها ناس(ماشاء الله كتير) يبقي لازم تخدي بالك من الفكر اللي انتي بتقدميه للناس بمعني ان المدونه دي ما بقتش مدونه شخصيه.. يعني لازم يبقى فيه سؤال تسأليه لنفسك قبل ما تنشري البوست بتاعك ( يا ترى البوست ده ايه الفكره اللي انا عايزه أوصلها للناس )
أرجو انك تكوني فهمتي قصدي

maiosha يقول...

مسلم
..................
واضح إنك مهتم جدا بالنقطة دى ..لكن فيه حاجة أحب أوضحها
أنا لما عملت مدونة .. عملتها ليا أنا يعنى فعلا مدونة شخصية..ومش معنى إن فيه ناس بيدخلوا يشاركونى فى أفكارى إنى أغير منهجى فى الكتابة وأكتب كلام يرضى الناس ..أنا مش بكتب عمود فى جورنال .. أنا بكتب عن نفسى وعن الناس اللى موجودين معايا فى حياتى .. بإسلوب كوميدى ساخر .. بس هو ده اللى كنت عايزه أوضحه

mohamed يقول...

صباح النور الصراحه خليكي نايمه على طول لو هتكتبي زي كده كتير

maiosha يقول...

cenotaph
..................
دى وجهات نظر

Darsh يقول...

The Time Machine

المبدع جورج ويلز

أول رواية أدب عالمي قريتها في حياتي

و الفيلم برضوا كان كويس ... شغال يعني

لأ لأ يا بختك يا بختك

كان نفسي تتاح ليا الفرصة أقرا القصص زي ما كتبها صاحبها

مش الترجمة الغريبة .... أموت و اعرف أديب الأصول منين

يعني بتدرسي لجورج ويلز و بتاكلي كوسة بالبشاميل

ربنا يخليلك أم صلااااح يااااا رب

ههههههههه

على فكرة بدل هي بتحب كل حاجة خضرا

استفيدوا بالخيار ... محشي الخيار رائع و مفيد جدا للبقدونس

البلوج جميل قوي قوي يا ميوشا

مستني أشوف اللي هيحصل بعد كده