الخميس، 20 أغسطس، 2009

المكافأة


بسم الله الرحمن الرحيم


الأول قبل اى حاجة أحب أهنى كل أصحابى واخواتى المدونين بشهر رمضان الكريم .. واقولكم كلهم واحد واحد وواحدة واحدة .. رمضان كرييييييييم.. يعنى متنسوناش بأى حاجة كده.. ربنا يخليكم

تانى حاجة بقى .. انا لاقيتنى لسه لغاية دلوقتى محكيتش على يوم المكافأة .. سامعة حد بيقول مكافأة .. هو إنتى كنتى عملتى حاجة عدلة فى دنيتك علشان تتكافئى.. احب اقولك بقى يا سيدى ايوة طبعا عملت .. عملت حاجة جامدة جدا.. دخلت كلية تربية.. تعالوا ناخد الحكاية من اولها

فى يوم من ذوات الأيام سمعنا كلام كتير فى كليتنا العزيزة عن مكافأة .. ولما سألنا بقى إحنا طلبة سنة أولى الغلابة اللى مش فاهمين حاجة إيه المكافأة دى .. قالولنا دى مكافأة الثانوى

موها : عاااااااااا.. محدش يجيبلى سيرة الثانوية دى تانى انا ما صدقت إنى طلعت من السنتين دول وانا لسه بعقلى

بيبا : إنتى متأكده إنك لسه بعقلك؟؟

أنا: بس يا بت منك ليها وإسمعوا الاخبار اللى جبتهالكم .. المفروض إن الطلبة اللى هم إحنا يعنى لما بيخرجوا من الثانوية العامة ويدخلوا كليات محترمة الدولة بتديهم مبلغ كحافز ليهم يعنى يشجعهم

إيمو: دولة وحافز.. أنا الكلام ده سمعته فى إعلانات لجنة السياسات والضرايب بس .. إيه اللى جابهم الكلية هنا؟؟

ميرو : يا ستى حافز حافز .. هو هيحفز إيه يعنى يا حسرة .. المهم يا ميوشة المبلغ كام ؟؟

أنا: بيقولوا هيبقى 85 جنيه

ساسو : بس .. لا المبلغ ده مش من مستوايا خالص

بيبا : مستوى مين يا بتاعة المستوى .. ده إنتى اكتر مبلغ مسكتيه فى إيدك كان خمسة جنيه إلا ربع

ميرو : ميوشة .. سيبك من العيال دول بقى وهاتى الفلوس

انا : اجيب الفلوس؟ .. على أساس إن ابويا عميد الكلية يعنى وإدانى الفلوس أوزعها انا على الطلبة

إيمو: بجد والنبى يا ميوشة إنتى اللى هتدينا الفلوس.. طيب إصحابك بقى ملهومش فلوس زيادة

أنا : عاااااااااااااااااااااااا

طبعا على ما فهمتهم إنى مش أنا اللى بوزع الفلوس .. وإن ابويا صيدلى مش عميد كلية التربية ولا حاجة .. وإننا عايزين نروح الخزنة نسأل على المكافأة دى علشان كل دفعة ليها أيام محددة بتستلم فيها .. ومش كل الدفعات بتستلم المكافأة مع بعض ..
حد يقولى طيب إنتوا بتاخدوا مكافأة علشان الثانوى .. طيب سنة تانية وتالتة بياخدوها ليه بقى .. علشان الثانوى برضه ؟؟ هرد واقول اكيد لأ يعنى .. ماهى إن كانت الثانوية عسل متلحسهاش كلها .. إنما اللى بينجح فى سنة اولى ويجيب جيد جدا او امتياز يباخد مكافأة برضه وهكذا فى باقى السنين ( بعد الشر عننا طبعا)

خدنا بعضنا إحنا الستة وروحنا الخزنة علشان نسأل لاقينا كل الشبابيك مقفولة ولاقينا راجل بس قاعد بجلابية كده جنب الشبابيك

ميرو : يا عمو لو سمحت .. هى خزنة الكلية اتسرقت ولا ايه؟؟

عمو : نعم ؟؟!!

أنا : معلشى يا عمو هى قصدها شبابيك الخزنة مقفولة ليه؟؟

عمو : الخزنة قفلت.. الساعة 4 العصر يا سادة

إيمو : 4 العصر ؟؟ دى ساعة الصفر دى ولا ايه؟؟ هنعبر يعنى؟؟

عمو: نعبر ايه بس يا ابلة .. الخزنة بتقفل الساعة 12 الضهر

بيبا : يا لهوى .. امال بتفتح امتى اصلا؟؟

عمو : 9 الصبح

كلنا : عااااااااااااااااااااااااااااااا


اليوم التانى كان يوم جديد فى تاريخك يا كلية التربية.. لأول مرة من ساعة ما دخلنا الكلية شلة الأنس كلها متجمعة فى الكلية الساعة 8.5 الصبح .. سابقة لم تحدث من قبل واكيد مش هتحصل تانى .. بس الحكاية فيها قبض بقى يبقى لازم نيجى بدرى.
طبعا حكاية إننا نصحى بدرى بالمنظر ده خلانى أشوف حاجات عمرى ما شوفتها من شلة الأنس
يعنى مثلا إيمو اللى جاية الكلية وتحت عينها أسود جدا .. ولا أجدع مدمنة مخدرات
وموها اللى جاية ناسية كل حاجتها ومش فاكره إلا حاجة واحدة .. البطاقة بتاعها اللى كانت نايمة فى حضنها من إمبارح علشان تستلم بيها المكافأة
ولا الست بيبا .. اللى مبتطلش كلام عن المكافأة واللى هتعمله بالمكافأة واللى هتشتريه بالمكافأة .. كان بس ناقص تقولنا إنها هتشترى فيلا فى دمنهور ويخت فى بركة السبع
المفاجاة بجد كانت ميرو .. لإنها لاول مرة من اول ما عرفناها تقول نكتة وبجد تكون نكتة جديدة لدرجة إننا كلنا ضحكنا .. وده اللى اكدلنا غنها اكيد لسه نايمة ومصحيتشى لسه
وطبعا ساسو كالعادة كانت ضاربة النضارة الشمس.. وبتاكل كرانشى بالشطة واللمون فى صمت واستكانة

طبعا إكتشفنا بعد طووووووول إنتظار عند الشباك بتاع الخزنة إن الشباك بيفتح 10 الصبح مش 9 على ما الموظفين يفطروا ويشربوا الشاى والحاجة الساقعة ويناقشوا امورهم العائلية .. المهم فيييييييييييييييين الشباك اتفتح .. وظهر منه كده راجل شكله باين عليه طيب .. ايوة يا وش السعد تعالى وقبضنا يالا.. يا مسهل يا رب

وش السعد : نعم ؟؟

انا: صباح الخير .. لو سمحت احنا كنا جايين علشان المكافأة

وش السعد: مكافأة إيه؟؟

بيبا : إحنا فى سنة اولى وسمعنا إن فيه مكافأة الثانوية العامة

وش السعد : مش النهاردة

موها : الله .. مش النهاردة ازاى؟؟ امال إمتى؟؟

بصيلنا الراجل شوية كده وسرح وقالنا : مممممممم.. سنة اولى .. سنة اولى .. اه إفتكرت .. ان شاء الله يوم القيامة العصر

كلنا:!!!!!!!!!!!!

الراجل الشرير ( اللى كان وش السعد) : مش خلاص عرفتوا يالا مع السلامة

ميرو : طيب يا عمو ممكن سؤال لو سمحت ربنا يخيلك

الراجل الشرير : نعم؟؟

ميرو: انا لو مش فاضية بعد العصر ممكن أجى على المغرب كده ؟؟

الراجل الشرير : امشى يا بت انتى وهى من هنا

إيمو : حرام عليك يا عمو .. امى عايزة تحج .. الفلوس دى هى أملنا الوحيد علشان تلحق الحج السنة دى..هنجمع مبلغ زى ده منين دلوقتى؟؟

الراجل الشرير : أما إنتوا صحيح جيل منيل وفاقد هو حد فيكم هينجح ابدا

ساسو : بقولك ايه يا عم انت .. انا مش بهزر .. ما هو انا مش هصحى النهاردة بدرى وهصحى كمان يوم القيامة .. هو انا فاضيالك .. وبعدين بعد العصر ده هيبقى قبل الحساب ولا بعد الحساب؟؟

الراجل الشرير : والله لو ما مشيتوا من هنا لهجيبلكوا الأمن .. يا امن .. يا امن

ميرو : هدى أعصابك يا باشا .. ده إنت لسه وراك شغل لغاية يوم القيامة .. عالله بقى بعد كل ده تدخل النار فى الأخر

كلنا فى نفس واحد : حسبى الله ونعم الوكيل.. لينا رب اسمه الكريم

الأربعاء، 1 يوليو، 2009

تاج إتأخر كتيـــــــــــــــــــــر

سلام عليكم
فيه كلمتين كده لازمن ولابد أقولهم قبل ما أنزل البوست الجديد
طبعا فى الأول أحب أعتذر عن الإنقطاع المفاجئ الطويــــــــــــــــــــــــــــــل ده .. وده طبعا بسبب الإمتحانات وبلاويها السودة .. منها لله
تانى حاجة عايزة أشكر كل اللى سألوا عليا .. وأقولهم كلهم بجد بجد وحشتوووووونى موووووووووووت.. بس والله العين بصيرة والودان سميعة .. هعمل إيه فى الكلية بقى ؟؟
*********************
التاج ده جايلى هدية من أخويا فى التدوين.. أبو العريف.. ولا أقولك الحرامى.. لأ بجد بجد رغم تخاريفة الكتيرة إلا إنه من الناس اللى ببقى مستنية كل بوست جديد ليه ..وبفرح أوى لما ينزل جديد .. وبزعل أوعى لما بيغيب فجأة كده أو ميعلقشى على اى بوست جديد ليا.. واحد عرف يثبت وجوده بين المدونين فى وقت قصير جدا .. وقدر يخلى المدونة بتاعته فى قائمة المدونات المفضلة لناس كتييييير.
يلا نبدأ التاج..... بإسم الله
اسمك....؟

ميوشة هانم المرووشة ( وركزوا أوى مع هانم دى)

المشهور بيه وسط اصحابك..؟

أصحابى بيقولولى يا ميوش .. أما اى حد تانى فبسمعهم بيقولوا ( البت المجنونة أهى)

سنٍٍٍٍٍٍٍِِك...؟
عيب جدا على فٍٍٍٍٍٍٍٍٍِِِِِِِـكرة تسأل سؤال زى ده .. بس على العموم هو 21 سنة .. بس يا ريت يبقوا 20 بس فى حالة وجود عريس

مجال دراستك ؟

تربية إنجليزى (عاااااااااااا)

اسم مدونتك ..؟

على أساس إنك مكسل تبص فوق يعنى (يوميات طالبة فاشلة )


الصوره الرمزيه لمدونتك بتعبر عن ايه ...؟

الصورة الرمزية بتعبر ببساطة جدا عن كل واحد فينا ..
اى واحد فينا إتعرض فى حياته إنه يبقى عليه إمتحان بعد كام ساعة وهو لسه وراه بلاوى يذاكرها .. وده بيخليه ينام على الكتب بالمنظر ده بعد ما كان بيسهر باليومين والتلاتة على النت بيشيت مع أصحابه

هل فكرت في اغلاق المدونه ؟ والسبب ..؟

يااااااااااااااااااااااااه .. كتير
غالبا بعد كل بوست بكتبه بحس عن ده هيبقى أخر حاجة حلوة أعرف أكتبها
زى ما تقول كده عندى عقدة إنى أبقى مملة .. وأنا عندى أقفل المدونة وهى ناجحة ، أحسن ما تبعتولى تقولولى كفاية حرااااااااااااام

ايه رد فعلك لو حد قل ادبه عليك في تعليق ...؟

لأ بصراحة لحد دلوقتى محدش عمل كده ..بس أنا فاكرة والمدونة لسه فى أولها خالص .. شهر إبريل السنة اللى فاتت .. يوم إضراب 6 إبريل .. واحد دخل على الشات بوكس وشتم فى الحكومة والإخوان .. وغالبا شتم نفسه كمان .. المهم قعد خبط كتير اوى فى 3 أو 4 تعليقات .
أنا اللى كان مضايقنى حاجة واحدة إنى مش مدونة سياسية ولا حاجة .. أنا مالى بقى بالكلام ده

اسوء مدونه...؟

فيه مدونة مرة دخلتها وندمت إنى دخلتها أصلا .. ونسيت إسمها ومش عايزة إفتكره

هيحصل ايه للايميل بتاعك لما تموت...؟

إيميل؟؟ إيميل إيه وبتاع إيه؟؟
هو أنا هبقى فاضية للإيميل .. أنا هموت بقى ولا أقعد أدور على الإيميل من بعدى
وبعدين أنا مشتركة فى مدونة كلام رومانتيكى مع شاهينو وروشة .. يعنى لو مت هم بقى هيبلغوكوا بموتى ويتصرفوا هم بقى

اما بقى لو إحنا التلاتة موتنا مع بعض !!!!!!!!!

اديت الباسوورد بتاعك لحد ...؟
لأ..ده باسورد خاص جدا

السفر بالنسبالك ايه ...؟

السفر بالنسبالى أحلى وقت بقضيه فى حياتى .. بس لما بيبقى لأماكن معينة
يعنى مثلا لما بسافر لشاهينو وروشة .. وباقى أفراد العائلة الكريمة فى الاعياد والمناسبات الرسمية

والسفر كمان معناه تغيير مناظر غير مناظر شلة الأنس والكلية

ومعناه إن لا فيه كلية ولا إمتحانات ولا أى قرف تانى

ومعناه إنى ممكن أنااااااااااااااام من غير ما أقوم على وشى علشان المحاضرة

معناه حاجات كتير جامدة أخر حاجة

المود بتاعك ؟

مود مجنون زى صاحبته .. كل ساعة بحال

بتعمل ايه في وقت فراعك..؟

القراية .. وأصدعكم على البلوج شوية .. وأرغى مع شلة الأنس فى التليفون
وبعد ما أقفل معاهم نرغى شوية على النت
وبعد ما أخلص منهم ومن قرهم ودوشتهم أكتشف إنى لازم أنام شوية علشان أصحى الصبح أقابلهم فى الكلية

الأكلة المفضله؟

الله على الأسئلة اللى تفتح النفس
أنا وبلا فخر كل الأكل عندى مفضل .. الأكل ده نعمة من نعم ربنا
ده أحلى نعمة ( واللى يكرها يعمى ) .. وأنا مش بحب أتعمى بصراحة

الصفات اللي أخدتيها عن والدك.؟
أخدت إيه من بابا .. أخدت إيه من بابا.. ممممم
أخدت منه إسمه .. وعملته إسمى
أخدت منه مراته .. وخليتها أمى
أخدت منه فلوسه .. وجبتلى بيها اللى نفسى فيه
أخدت منه عمره وشبابه.. وعشت انا حياتى
وأخيرا أخدت منه الكمبيوتر بتاعه لما كيمو باظ وإنفجر ( يا حبيبى يا كيمو)

الصفات اللي أخديتها عن والدتك ..؟
ياااااااااااااه.. أنا مسبتش حاجة لماما مأخدتهاش أصلا
طول عمرى بحلم إنى أبقى أم زى أمى.. وإن ربنا لو رزقنى بأولاد يحبونى زى ما أنا بحبها
بيقولوا إنى ورثت عنها شكلها .. مع انها أجمل منى بكتير .. جينات بابا برضه دخلت عندى وبوظت الدنيا
وبرضه بيقولوا إنى أخدت عنها حنيتها (يعنى فى الشدة شديد .. وفى الحنية حنين)
وبيقولوا كمان ( مين اللى عمالين بيقولوا دول ؟؟) إنى خدت منها خفة دمها وروحها الجميلة

يمكن؟؟ أنا مليش دعوة .. هم اللى بيقولوا

اكتر ست حاجات بتكرهها...؟

المذاكرة

الإمتحانات

يوم النتيجة

محاضرة الساعة 9 الصبح

القعاد على الأرض لما البنشات بتتملى

الدكتور الممل

ها .. زهقتوا ولا إيه؟؟ خلاص كفاية عليكم كده

اكتر ست حاجات بتحبها...؟

ربنا سبحانه وتعالى .. والرسول عليه الصلاة والسلام

أمى وابويا وعيلتى كلها ( وعلى رأسهم بيسو أذية)

شلة الانس

مدونتى

سلم الكلية

زيزو النتن


شخصيتك نوعها ايه....؟

يا ساتر يا رب شخصية ربنا ما يحكم عليك تقعد معاها

شخصية برجوازية إمبريالية إنبعاثقية مهلبية بالملوخية والطعمية

فهمتوا حاجة من كل اللى فوق ده ؟؟ بالظبط كده أهى دى شخصيتى
انا لغاية دلوقتى مش فاهماها اصلا

لماذا دخلت عالم التدوين ...؟

ههههههههههههههههههه
غتاتة
ليه مأغتتش عليكم ..لما ممكن أغتت
كنت مخنوقة ومفروسة من الكلية والإمتحانات وقرفها .. طيب مقرفكوش معايا ليه؟؟

وبعد ما خلصت كلام على الإمتحانات لاقيتنى لسه عندى شوية غتاتة عايزين يطلعوا . . قولت حرام أكبتهم جوايا طلعيهم يا بت يا ميوشة

وفى إنتظار إنتهاء مخزون الغتاتة

اجمل كلمه اتقالت في وصف مدونتك.....؟

أجمل كلام دايما . . أنا بسمعه من ماما .. لإنى عارفة إن هى الوحيدة اللى بتقولى الرأى التمام
وكمان بيبا .. لإنها مدب وبترمى طوب وزلط من بقها

فلما بتكلمنى وتقولى البوست ده جامد أخر حاجة .. بعرف إن البوست حلو جدا

غير كده بتدينى من المنقى يا كوسة

أهمية التعليق بالنسبه ليك ؟

بفرح بالتعليقات جدا .. وبحس انها نبض المدونة
يعنى المدونة من غير تفاعل وتعليقات المدونين التانين.. تبقى مدونة ميتة

احسن بوست كتبته ....؟

مش عارفة
أنا كل بوست بخلص كتابته بحس انه أحسن بوست كتبته
بس شلة الأنس بتحب جدا بوست مس تربية بأجزاؤه التلاتة

افضل بوست قرأته ...؟

كتيييييييييييييير
كل الناس اللى عندى على الريدر هم أحسن مدونات قريتها ودخلت دماغى
وكلهم بوستاتهم تجنن

بس أنا فاكرة إنى قريت بوست للبت كيكى ( البنت دى كارثة زمنية متنقلة ) كنت هموت على روحى من الضحك فيه

البوست إسمه ( إعترافات ليلية )

تمرر التاج لمين...؟

هو فيه حد لسه موصلوش التاج ده

أنا متهيألى التاج ده وصل لكل الناس

طيب من موقعى هذا أهدىِِ لشاهينو وروشة أول تاج فى حياتهم التدوينية

يالا يا شباب ورونى هتقولوا ايه؟؟

وأى حد عايزو ياخد التاج يتفضل بالهنا والشفا
*************************
ملحوظة أخيرة : لو عايز تخس .. لو عايزة تخسى .. عندى ليكم الحل الاكيد .. هنا فى كلام رومانتيكى
يلا سلاااااااااام

الأحد، 26 أبريل، 2009

مس تربية 3


أول ما ندهوا إسم إيمو وقفنا كلنا على الباب نشجعها ونهتفلها " إيمو .. إيمو ".. بس طبعا كان كل واحدة فى سرها بتتمنى إن إيمو يجيلها برد فجأة ومتعرفشى تغنى الحلم العربى من مناخيرها وتخرج بره المسابقة ونخلص من واحدة .. قولوا أمين

دخلت إيمو بمنتهى العزيمة والإصرار .. وقعدت حوالى عشر دقايق كده وطلعت .. لكن كانت طالعة دماغها مدلدلة لتحت كده وشكلها مكتئب .. جرينا عليها بسرعة وسألناها عملت إيه جوه؟؟ بس سبحان الله البت أول ما شافتنا وشها إتقلب 180 درجة .. والإبتسامة العريضة ملت وشها وقالت

إيمو : مية مية .. كنت متألقة كالعادة

موها : أمال طالعة شكلك متضايق ليه .. قلقتينى أكتر ما انا قلقانة

إيمو : لأ لأ عادى .. أصلى نشزت فى نغمتين .. بس هو كانوا معجبين بيا أوى وقالولى أكيد إنتى الملكة

ميرو : بجد يا إيمو قالولك كده؟؟

إيمو : أيوة يا بنتى طبعا . فنصيحة لوجه الله روحوا

ساسو : نروح .. نروح مين يا قطة .. قال أروح قال .. هم بس قالولك كده علشان لسه مشافونيش

إيمو : إسمعوا كلامى وروحوا

بيبا : مستحييييييييييييل

إيمو : خلاص قد اعذر من أنذر

إسم ورا إسم ورا إسم إتندى وإحنا قاعدين .. بس إحنا كنا محتاسين مع بيبا علشان العرض اللى هتقدموا .. الهانم لاقيناها جايبة علبه ورنيش أسود وعمالة تدهن بيه وشها

أنا : مالك يا بيبا إيه اللى إنتى بتعمليه ده؟؟

بيبا : ده مكياج الشخصية

أنا : شخصية إيه يا بنتى بس اللى تخليكى تعملى فى نفسك كده

بيبا : أنا لما هدخل الإختبار هعمل حتة من مسرحية شكسبير إسمها (مكبس )

أنا : مكبس .. يعنى إيه مكبس دى؟؟

بيبا : دى كلمة بالإنجليزى بس مش عارفة معناها إيه

أنا : طيب وانتى عرفتى المسرحية العجيبة دى منين؟

بيبا : لاقيتها عند أخويا وكنت نفسى اقراها بس نمت ومقدرتش .. بس أنا قريت جملة عجبتنى أوى فى المسرحية دى وناوية أدخل أقولها مع اللون الأسود اللى دهنت بيه وشى ده هبقى الملكة أكييييييييد

أنا : جملة إيه بقى .. احمر على بوية بطيخ ؟؟

بيبا : لأ يا خفة الجملة بتقول .. "لو جبت كل برفانات الشرق مش هعرف أشيل ريحة المقرفة اللى فى إيدى دى .. منك لله يا مراتى يا مؤذية"

انا : يع .. الله يقرفك .. ريحة إيه دى ؟؟

بيبا: مش عارفة بصراحة .. بس هى عجبتنى

ميرو : بس يا جهلة إنتى وهى .. أنا هشرحلكم المسرحية دى.. ده كان ملك كبير أوى كان معزوم فى بلد أرياف .. فعملوله فطير مشلتت بالسمن البلدى .. الراجل ياختى أكل الفطير من هنا وتنح وإتكبس .. وحاول يغسل إيده من السمنة البلدى دى .. بس الريحة فضلت لازقة فى إيده مش عايزة تطلع .. علشان كده المسرحية إسمها ( مكبس ) .. من كبسة الراجل يا عينى لما أكل الفطير المشلتت

بيبا : إنتى متأكده يا ميرو من المعلومات دى ؟؟

ميرو: أيوة طبعا متأكده .. بس على فكرة الراجل مكنش أسود أوى كده .. كان على بيج شوية

بيبا : ربنا يخليكى ليا يا ميرو وميحرمنيش من معلوماتك ابدا

بعد كده ندهوا على إسم ميرو وموها وساسو .. وكلهم خرجوا قالوا نفس كلام ميرو .. إمشوااااااااااااا .. بس طبعا محدش فينا مشى ..كان فاضل من الشلة أنا وبيبا بس اللى كانت بتتمرن على أداء الجملة .. وبتحاول تخلى وشها لونه بيج .. فيييييين إسمى إتندى.. اه دورك يا ميوشة..

أول ما دخلت لاقيت دكتورين من بتوعنا ودكاترة تانيين معرفهومش .. سلمت ودخلت عادى . وكنت محضرة معايا شوية بلالين طويلة . بنفخهم وبعمل بيهم اشكال .. حصان وطيارة وحاجات كده ، أنا يا دوب لسه بطلع البلونه وبنفوخها لاقيت دكتور بيقول

دكتور 1 : يا فتاح يا عليم يا رزاق يا كريم

دكتور 2 : هى العيال دى فاكرينها مسابقة للمتخلفين عقليا ولا إيه ؟؟

أنا بنفخ البلونة

دكتور 3 : لأ كله كوم واللى داخلة تغنى من مناخيرها دى كوم .. هههههههههه

دكتور 4 : امال اللى داخلة تحطلنا مكياج دى .. فاكرانا عاملين مسابقة فى قناة أمينة شلباية

أنا مستمرة فى النفخ

دكتور 2 : ولا البت المجنونة اللى داخلة تقول نكت وتضحك عليها فى نفس الوقت دى .. صبرنى يا رب

دكتور 1 : إنتى يا بت ياللى بتنفخى البلونة إنتى .. مذاكرة ولا جاية تضيعى وقتنا ؟؟

وعند الكلمة دى وطاااااااااااااااخ.. البلونة فرقعت

دكتور 2 : يا مجنونة .. لمى يا بنتى بلالينك دى وامشى من هنا

أنا : لحظة بس هى دى مش مسابقة ملكة جمال كلية تربية

دكتور 3 : إستغفر الله العظيم يا رب .. لأ ده اكيد إشاعة مشت فى الكلية ولا وباء تفشى ولا حاجة .. يا بنتى دى مسابقى نختار بيها الطلبة المتفوقين اللى هيمثلوا الكلية قدام لجنة جاية من الوزارة

أنا : متفوقين ؟؟

دكتور 4 : ايوة متفوقين .. بعد الشر عنك يعنى

انا : أيوة يادكتور .. الف مرة .. طيب سلام عليكم بقى.. طيب اخر سؤال .. يعنى مفيش تاج؟؟

دكتور 1,2,3,4 : برررررررررررررررررره

طلعت لبيبا لاقيتها لسه محتاسة مع المسرحية .. يا عينى عليكى يا بيبا .. هتعملى إيه لما تعرفى إن الجزم التانين خدعونا وضحكوا علينا .. لا يا بيبا أنا مش ممكن أحطك فى الموقف الزبالة اللى كنت فيه ده .. عمرى ما هتخلى عنك يا صاحبة عمرى .. أبدا .. أبدا

بيبا : عملتى إيه يا ميوشة ؟


أنا : تمام .. عجبتهم البلالبن جدا لدرجة إنهم خلوا بلونة العصفورة معاهم .. مردوش يدوهالى تانى.. بس بقولك إيه .. مينفعشى تروحى؟؟

***********************


طبعا بعد ما بيبا طلعت .. وإكتشفت هدف المسابقة الحقيقى

وبعد ما إكتشفت إن المسرحية إسمها ( ماكبث ) والراجل ماكنش بيج ولا حاجة

وبعد ما إكتشفت إنه كان عايز يغسل الدم الملك اللى قتله .. مش السمن البلدى اللى فى الفطير

وبعد وصلة رديييييح جامد جدا كلنا ردحناها لبعض .. وكل واحد بان على أصله لتانى مرة


قررنا كلنا إننا نروح نضربلنا أى حاجة من عند زيزو النتن .. وخصوصا بعد مجهود الرديح العظيم اللى عملناه

بس لما جينا نخرج من الكلية لاقينا ورقة نتيجة المسابقة متعلقة فى نفس مكان إعلان المسابقة بالظبط .. طبعا محدش فينا إهتم لإننا كنا عارفين نتيجتنا أكيد .. بس اللى يغيظ بقى


تيكا : باركولى يا بنات .. أنا طلعت الأولى

السبت، 18 أبريل، 2009

مس تربية 2


" تيكا" .. قولتها وفتحت فى الضحك.. يا خبر أبيض .. بقى تيكا مقدمة فى مسابقة ملكة جمال؟؟ أيه اللى جرى فى الدنيا يا ناس؟؟ لو كل اللى مقدمين هنا زى تيكا كده يبقى أكيد أكيد انا الملكة فى المسابقة دى .. نيهاهاهاهاهاهاا
تيكا دى بنت زميلتنا فى الدفعة .. واحدة كده من اللى أول ما تشوفها تعرف هى داخلة الكلية وعايزة إيه بالظبط.. طبعا لو تغاضينا عن النضارة الكعب كوباية اللى لابساها .. والكتاب اللى لازق فى وشها طول ماهى فى الكلية .. وجريها ورا كل دكتور ودكتورة فى الكلية والقعاد فى أول بنش فى وش الدكتور .. ولازم متسيبش أى دكتور يتكلم براحته .. عمرها ما تهنى دكتور على محاضرة.. الراجل كل ما يفتح بقه يقول اى حاجة لازم تقعد تسأله وتناقشه .. طيب دى ليه .. ودى إزاى؟؟ يا ساتر يا رب على الخنقة

لو لاقيت تيكا فى يوم من الأيام بتجرى مثلا فى الكلية تعرف إن فيه محاضرة بدأت من ثانيتين .. ولو لاقيتها زعلانة ومتنرفزة أعرف إنها مجاوبتشى فى المحاضرة غير عشر أسئلة بس
.. بجد نفسى أعرف مين المفترى اللى أقنع تيكا دى إنها تيجى مسابقة ملكة الجمال دى ؟؟ يا هوى يانا .. حتى هنا فى الإختبار ماسكة كتاب بتقرا فيه .. أرحمنى يا رب يا ما نفسى اشوف كسفتك يا تيكا وانا اللى بكسب المسابقة . وانتى بيستبعدوكى من أول جولة .. نيهاهاهاهاهاهاهاها

المهم خير اللهم اجعله خير وانا عمالة ابص لتيكا واسرح بخيالى سمعت أصوات مش غريبة عليا خالص.. وكان فى صوت كده كإنه صوت خناقة ورايا

"ايه ده ؟؟ أيه اللى جابك هنا؟؟"

" إنتوا سجلتوا اساميكم من ورايا .. خياااااااااااانة"

بضرب بعينى كده .. ألاقيلكم شلة الأنس كلها مشرفة .. أه يا .......... العيال كلهم مسجلين أساميهم من غير ما يقولولى ولا حد فيهم يقول للتانى

ايمو : والله البت ميوشة أحسن واحدة فينا .. على الأقل مسجلتش وخبت علينا "

أنا بقى سمعت الجملة دى قمت مدياهم ضهرى وإتسحبت بضهرى ولا البهلوان علشان محدش يشوفنى ويفضلوا محتفظين بفكرة إنى بنت جدعة .. يالا مش مهم التاج قدام الصداقة .. مع السلامة يا تاج

ميرو : معلشى يا إيمو انتى بتتكلمى على مين ؟؟

أيمو: على ميوشة علشان معملتشى زيكم يا أندال

ميرو : اه .. قصدك حيوان البطريق اللى ماشى بضهره هناك ده

كلهم : ميوشة ؟؟!!!

أنا : متجمعين عند النبى يا ندلة منك ليها .. بقى دى مناظر ملكات جمال دى؟؟

ساسو : على فكرة لو واحدة فيكم بقت مس تربية . انا مستعدة أسرح بعربية كشرى

إيمو : يا حلوة منك ليها أنا أجمل واحدة فيكم .. ولو مش مصدقينى أسألوا محفوظ

أنا : يا حبيبتى الحلاوة حلاوة الروح .. روح

ميرو: روح يبقى اكيد أنا الأولى .. والتانية والفضائية المصرية كمان .. نيهاهاها

كلنا :--------------

موها : أنا مش عارفة إيه اللى جابنى اصلا .. هو الإختبار ده ليه درجات وكده .. طيب هينضاف للتقدير الكلى ولا حاجة ؟؟

بيبا : يا بنات جمال جوانى ولا برانى .. انا جمالى كامل متكامل .. بصوا لمناظركم المقرفة جنبى .. إنتوا معندكوش مرايات فى بيتكم ولا ايه؟؟

ساسو : ليه يا ست بيبا إن شاء الله .. ده إنتى شكلك عامل زى الكتكوت اليتيم الجربان.. ده إنتى أخرك مس تفاهنة العزب

بيبا : إسم الله عليكى يا هيفاء يا وهبى

ساسو : ودى هيفاء ايه دى إن شاء الله جنبى وجنب حلاوتى؟؟

موها : بس بقى بطلوا خناق .. الموضوع مش مستاهل لإنى أكيد انا اللى هكسب

ميرو : ليه بقى إن شاء الله ؟

موها : إنتى عامية ولا إيه .. مش عارفة تشوفى الجمال اللى قدامى ؟؟

ميرو : بصراحة انا مش شايفة قدامى غير شوال بطاطس عايز يتحمر

إيمو : أصلكوا مش بتفكروا غير فى بطنكوا وبس

بيبا : إسكتوا بقى

أنا : خلااااااااااااااااااااااااااااااااااااااااص

تيكا : هاى يا بنات

كلنا طبعا سكتنا وبصينا لبعض ... واضح إن شلة الأنس أول مرة ياخدوا بالهم إن تيكا معانا فى المسابقة.. هم اصلا بعد ما شافوا تيكا عرفوا واـاكدوا إن التاج مش هيخرج عننا ابدا

كلنا : أهلا يا تيكا

تيكا: جاهزين للإختبار يا جماعة

أنا : انا عن نفسى جاهزة .. وحتى جايبة الفستان معايا علشان ألبسه وأتدرب عليه النهاردة

بيبا : إيه يعنى .. ما أنا كمان جايبة فستانى معايا.. أنا شوفتهم فى التليفزيون بيلبسوا فساتين فى المسابقة بتاعة مس إيجيبت

ساسو : كلنا جايبن فساتينا معانا .. يعنى إنتى يا ست ميوشة مش عاملة حاجة رهيبة ولا حاجة

تيكا : فساتين؟؟

ميرو : ده أنا كمان محضرة شوية نكت جديدة هدخل عليهم اللجنة ابهرهم كلهم وانجح على طول

تيكا : نكت؟؟

إيمو : نكت مين يا ماما .. ده أنا بقالى يومين بتدرب على إنى أغنى اغنية الحلم العربى من مناخيرى

ساسو : يع .. جتك القرف .. انا بقى عرضى يليق بملكة جمال فعلا .. هحط لنفسى ميكياج كامل وانا مغمضة عنيا


بيبا : ههههههه.. كده ضمنا هنشوف فقرة البلياتشو كمان يا ساسو

تيكا : بصراحة يا جماعة أنا مش عارفة إنتوا بتتكلموا عن إيه بالظبط .. بس على العموم ربنا يوفقكم .. سلام

مشيت تيكا . وسابتنا كل واحدة فينا عمالة بتتريق على التانية و على فستانها واللى هى محضراه علشان تعملوا .. أصل برضة من غباء الناس اللى عاملين المسابقة دى إنهم مش محددين حاجة معينة علشان نعملها فى المسابقة .. كل اللى قالوه .. عايزنكم تجهزوا كويس وتحضروا نفسكم للمسابقة .. علشان كده كل واحدة فينا قررت تخرج الإبداع اللى جواه .. منها مثلا إبداع إيمو الدفين غنها تغنى من مناخيرها .. وبرضة موهبة موها اللى مكناش نعرفها اللى هى كتابة الشعر الحر.. لأ وشوفوا الدقة شعر حر . مش أى شعر تانى يعنى
طبعا موها أول ما قرتلنا القصيدة اللى هى كاتباها . عرفنا ليه هو شعر حر .. لإنه حر فى نفسه يبقى شعر يبقى نثر إنشاله حتى يبقى مكرونة بالبشاميل هو حر فى نفسه .. بس القصيدة أول ما تسمعها تحس إنك بتسمع قصيدة الحلزونة ياما الحلزونة بالظبط.

تاتاتاتاتاتتاااااااااااااااااااااتش

دقت ساعة الصفر وابتدى الإختبار وبدأوا ينادوا على أسامينا واحد واحد ويدخلونا أوضة قدام لجنة التحكيم .. وندهوا أول اسم والتانى والتالت .. وبعدين ندهوا إيمو ...


يتبع...

الأحد، 12 أبريل، 2009

مس تربية 1



أخيرا وبعد طول معاناه .. أقدر اعلن إن شلتنا المبجلة راحت الكلية أخيرا وبعد مرور حوالى إسبوعين -إذاماكنش أكتر يعنى- من بداية الدراسة .. أصل إحنا لاقينا إن حرام الأجازة تبقى إسبوعين بس. ليه يعنى؟؟ ده إحنا قاعدنا نمتحن حوالى شهر .. يعنى على الاقل لازم ناخد قدهم أجازة كده وراحة

نزلت أول يوم الكلية ورحت على هناك على طول علشان أنا باقى الشله كنا متفقين إننا نتقابل هناك . اول ما دخلت الكلية لاقيت إعلان غريب اوى!!كان إعلان عن مسابقة إسمها ( مستر&مس تربية) .. فى المسابقة دى هيختاروا بنت من الكلية تبقى مس تربية وشاب يبقى مستر تربية .. طبعا أنا تنحت قدام الإعلان كده شوية واستغربت إن محدش بيبص عليه غيرى .. وطلع إنه محطوط كده بقاله حوالى 3 أيام وإحنا قاعدين فى البيت.

بصراحة رغم غرابة اللقب ( مس تربية) إلا إنى عرفت إن الإعلان ده معمول عشانى .. طبعا لو أنا مبقتش ملكة جمال كلية تربية مين اللى هيبقى يعنى؟؟ أكيد أنا الملكة .. أنا اتخلقت علشان ابقى ملكة أصلا .. وقعدت أبص للوشوش حواليا كده .. لا لا لا .. كلها وشوش كئيبة كده ومقروفة .. والنبى دى مناظر ملكات دى .. دول أخرهم ملكات مملكة النحل .. خلاص انا قررت .. هدخل المسابقة وهبقى الملكة .. نيهاهاهاهاها

جريت فى الخباثة على مكتب رعاية الشباب علشان أسجل أسمى واخد التعليمات ومعاد الإختبار وكده يعنى.. وهناك قالولى إن فيه بكره حاجة كده زى إختبار اولى .. الله أكبر .. إختبار كمان.. شكل الموضوع بجد وجدانى يا بت يا ميوشة.. وبعدين إحنا بقى لا يهمنا إختبارات ولا الكلام ده خاااااالص .. أنا وثيقة من الفوز.. وثيقة من الفوز
بعد ما سجلت إسمى .. رحت للسلم -مكاننا المفضل فى الكلية.. لازم دايما نبقى قاعدين زى الشحاتين كده- وملقتش هناك غير بيبا وموها .. ولما سألتهم الباقيين فين قالولى إنهم كلموهم دلوقتى وزمانهم فى السكة ..فضلنا مستنيين شوي لغاية ما كلهم اتجمعوا.. ايه ؟؟ بتقول ايه؟؟ انا سامعة واحد فيكم بيقولى مقلتيش على المسابقة ليه لشلة الانس؟؟ عيب عليك تسألنى سؤال زى ده على فكرة.. واقولهم ليه اصلا.. عايزهم يحقدوا على جمالى الفتاك .. وبعدين محدش فيهم كلهم جاب سيرة الإعلان يبقى الحمد لله مفيش حد فيهم خد باله منه, وبصراحة بقى كل ما كان العدد اقل كل ما الواحد فرصته فى الفوز تكبر.. لازم افاجئهم لما يلاقونى جايلهم فى يوم من الأيام لابسة التاج على راسى ومعايا لقب رسمى إنى ملكة .. ومش اى ملكة .. لأ ملكة جماااااال.

بعد ما شلتنا كلها إتجمعت والحمد لله .. عملنا أول حاجة أى طلبة بيعملوها اول ما يروحوا الكلية بتاعهم.. طلعنا على طول على زيزو النتن علشان الفطار.. وبعد الفطار طلعنا على محفوظ علشان البيبسى اللى سابنا طبعا - محفوظ مش البيبسى- وقعد يعاكس ايمو .
خلص اليوم الطوييييل المتعب الشاااااق فى الكلية بجولة بين محلات الطرح علشان نلاقى طرحة حلوة للبس ساسو الجديد .. واللى متعرفهوش عن ساسو بقى إن هى مش بس بطيئة فى قرارتها فى المذاكرة والنزول للكلية .. لكن فى اختيار الطرح كمان.. عااااااااااااااااااا

اخيرا روحت البيت.. واول ما وصلت قولت لماما حبيبتى على المسابقة

ماما حبيبتى : يا سلام عليكى يا ميوشة .. والله لما شوفتك فرحانة كده قولت البت جابت النتيجة أكيد

انا :
نتيجة!! بقى انا بقولك هبقى ملكة .. ملكة جمال الكلية وإنتى يا ماما بتقوليلى نتيجة؟

ماما حبيبتى :
ملكة .. جتها نيلة اللى عايزة خلف

نمت يومها وانا فى دماغى كل احلامى عن المملكة بتاعتى .. وفستانى اللى هلبسه فى الحفلة .. ياترى هيلبسونا مايوهات فى الحفلة دى ولا ايه؟؟ يا لهوى اهو ده يبقى مقلب بقى.. خلاص ابقى اجيب مايوه شرعى بقى وخلاص.. هموت نفسى يعنى
أتخيل نفسى وانا داخلة على لجنة التحكيم وانا لابسه المايوه الشرعى بتاعى.. ايه يا بت يا ميوشة الجمال ده .. عسل والله..بس الطرحة دى مش لايقة على المايوه .. ممكن أبقى اجيبله طرحة ..خخخخخخخخخخخخخ
تانى يوم روحت الكلية .. وانا رائعة ومتألقة وجاهزة ومتجهزة تجهيز تام للاختبار بتاع المسابقة .. رحت المسرح بتاع الكلية وانا على وشى ابتسامة مشرقة .. بس للأسف الإبتسامة دى
إختفت وحل محلها تعبير الصدمة والصاعقة لما شوفت

"تيكا..!!؟؟"
يتبع...

الاثنين، 30 مارس، 2009

كل سنة وانت طيب يا جميييييييل


سنة حلوة يا جميل .. سنة حلوة يا جميل


سنة حلوة يا مدونتى حبيبة قلبى


سنة حلوة يا جمييييل

يااااااااااااااااااااه .. سنة.. سنة كاملة .. اه والله .. مدونة يوميات طالبة فاشلة تمت النهاردة سنة كاملة


سنة كاملة وأنا بكتب يومياتى الفاشلة أنا وشلة الأنس

سنة عرفت فيها أصحاب بجد .. أحلى اصحاب .. ناس اتعرفت عليهم شخصيا .. وناس همووووت واشوفهم واقابلهم ..ناس أتأثرت بيهم جدا جدا.. وناس عجبتنى دماغهم .. وناس لغاية دلوقتى مش عارفة ايه الحل فى دماغهم دى بالظبط


المهم إنى أقدر اقول إنها كانت فعلا .. سنة حلوة يا جمييييييييل



وبالمناسبة دى شلة الأنس كانت عايزة تقول كام كلمة كده للمدونة اللى كانت مكان تجمعنا التانى (بعد سلم الكلية طبعا)


ميرو :عيد ميلاد البلوج ؟؟ يعنى المفروض أعمل ايه يعنىبمناسبة عيد ميلاد البلوج ده .. اقوم أرقص عشرة بلدى؟؟ ده أنا مبحتفلش بعيد ميلاد أبويا.. احنا يابنتى ناس على قد حالنا ومنعرفشى الكلام ده .. بس على العموم لو فيه تورتة ولا حاجة ساقعة أكيد هاجى يعنى..نيهااهاهاهاهااهاها


إيمو : كل سنة والبلوج طيب وعقبال ما أشوفه عريس .. وبرده هفضل اكتب فيه وهفضل زى القمر وعيونى " اللى هى أجمل عيون" هتفضل زى ما هى .. ملحوظة " أنا متواضعة جدا ..وإن شاء الله هنزل صورتى علشان تعرفوا بنفسكم" وأخيرا ربنا يخلينى ليكم.. لإنكم من الأخر من غيرى ما تساوش حاجة " تواضع .. تواضع يعنى"

الإمضاء: أجمل بنات العالم " مطلوب عريس ضرورى"


موها: كل سنة والمدونة طيبة.. وعقبال مليووووون سنة.. وأنا طبعا هبقى لسه برشاقتى وصحتى إن شاء الله .. وأكون السنة الجاية أتجوزت على طول كده .. ويكون عندى 6 عيال وانتى هتعنسى طبعا انتى والشلة كلها.. اه صحيح أنا شعارى دايما فى الحياة " من تواضع لله رفعه"


بيبا: بلوج ايه وبتاع ايه ؟؟ انا فاضية للكلام الفارغ ده ؟؟ يا بنتى انا ورايا ابحاث ومذاكرة بالهبل.. بس برضة اهو عشرة سنة.. كل سنة وانت طيب يا بلوج .. مع إننا طلعنا فيك متخلفين و أخرنا غدا من عند زيزو النتن وحاجات تانية كتير.. بس برضة كنت لذيذ وساعات بتضحك.. متهيألى عطلتينى بما فيه الكفاية يا ست ميوشة .. امشى بقى أنا مش فاضية .. وعلى فكرة متتوقعيش هدية يعنى.


أما عن ساسو : بلوج ؟؟ بلوج ايه؟؟ مادة عندنا دى ولا ايه؟؟

يوووووووووه انا ناقصة مواد على دماغى .. يا شيخة امشى بقى أنا عايزة أروح .. هموووووت واناااااااااااااام


وأخيرا .. كل سنة وأبنى حبيبى .. اول فرحتى طيب وعقبال السنة الجاية ان شاء الله


*******************************


بمناسبة عيد ميلاد المدونة .. احب اعزمكم كلكم على أول بوست باللغة العربية ليا منشور على مدونة


وياريت تراعوا إنى مش سيبويه يعنى .. وان دى محاولتى الاولى


لو عايز تقراه ادخل هنا

الأربعاء، 18 فبراير، 2009

أه يا نوم يا نوم.. يا نوووووم



ادعوكم كلكم يا شباب فى بيتى التانى(كلام رومانتيكى ) حيث نتناول الرومانسيةمن منظور تانى خالص

أتمنى انكم تشرفونا هناك


*************************


بكرة الكلية .. بكرة الكلية

فضلت اقول الجملة دى طول ما انا فى الصيدلية ولغاية ما روحت البيت .. وانا عمالة افكر إن الكلية بكرة .. مش عارفة إيه الفرحة العارمة اللى كنت فيها دى.. صحيح إنى بعترف إن المذاكرة عدوى الأول والأخير .. لكن برضة ده ميمنعش ان اصحابى ودكاترتى اللى غالبا لسه معرفشى اساميهم لغاية دلوقتى وحشونى برضة.. ده غير إنى قررت قرار حاسم جازم كاظم حاتم.. إنى ناوية إن شاء الله إنى ادخل الترم ده دخلة جد.. أيوة يا جماعة .. أنا ميوشة زى ما أنا .. بس من بعد الزنقة الزرقة اللى اتزنقتها فى امتحانات الترم الاول.. قررت إنى ادخل الترم التانى وانا بكامل لياقتى الذهنية وابقى مستعدة لمواجهة كل تحديات العصر .. من أجل مستقبل أفضل لأولادنا ( والله ولا بتوع الإنتخابات يا بت يا ميوشة)

بس بينى وبينكم .. أنا قولت أذاكر من الأول علشان لما النتيجة تطلع ولما ماما حبيبتى والبيج بوس يكتشفوا الخيبة التقيلة اللى هتظهر فى النتيجة إن شاء الله.. يبقى عزائهم الوحيد (حلوة عزائهم دى) إنى بحاول اشد حيلى اهو فى الترم التانى علشان أعوض.


المهم قبل ما أنام .. قعدت اوضب حاجتى ولا كإنى رايحة المدرسة .. وطلعت طقم كده باين عليه العلم والوقار -متسألوش ازاى؟- بس انا كل ما البس الطقم ده الكل يقولى انتى شكلك كده مدرسة.. قشطة هو ده التأثير المطلوب.. لا لا بلاش طرحة فاتحة.. ده احنا بكرة رايحين لزيزو النتن .. وهنعوض كل اللى فاتنا فى الأجازة .. من الأخر هتبقى مدبحة.. ولو رحت بطرحة فاتحة هيبقى منظرى مش ظريف خالص.

تمام كله تمام . وضبت شنطتى وكل حاجة .. وايه كمان قدامى حوالى 6 ساعات علشان أنام واقوم بكرة فايقة.. تمام.. تصبحوا على خير يا أهل الداااااااااار.. حد عايز منى حاجة قبل ما انام؟؟ يا ريت محدش يطلب منى حاجة لإنى تعابانة ومش قادرة افتح عينيا خاااالص


نونا الرخمة: ميوشة إلحقى .. الفيلم اللى انتى كنتى مستنياه طلع النهاردة .. مش بكرة.. هيبدأ اهو


أنا : بجد.. أنا جاية أهو


تانى يوم صحيت .. ده لو كنت نمت اصلا..وانا مفعمة بالطاقة والحيوية وعلى اتم الإستعداد لبداية الترم التانى.. لبست واتشيكت على الأخر.. وقمت لبست النظارة النظر اللى من ساعة ما عملتها ملبستهاش 3 مرات على بعض.. بصراحة انا عايناها للمناسبات اللى بحب ابان فيها مثقفة بقى وكده.. وبعدين فجأة يا اخى متعرفش ايه اللى حصلى..خير اللهم اجعله خير.. اللى جالى فى ودنى وقالى:

كلمى بيبا يا ميوشة وشوفيها صحيت ولا لأ .. لحسن تكون راحت عليها نومة


جريت على التليفون .. وطلبت بيبا.. التليفون فضل يرن .. ويرن .. ويرن .. ويررررررررررن.. فين لاقيت الست هانم بترد وهى نايمة


بيبا: الووو


أنا : ايوة يا بيبا.. شوفتى كان قلبى حاسس إنك راحت عليكى نومة


بيبا : راحت عليا نومة.. هو احنا ورانا حاجة اصلا.. توزيع اللبن علينا النهاردة ولا ايه؟؟


انا : هى هى هى.. لأا يا ظريفة عندنا كلية


بيبا : كلية ايه؟؟ انتى عبيطة ؟؟ هو انتى فاكرة نفسك لسه فى الاعدادية ولا ايه.. هو حد بيروح الكلية ى اول يوم ده.. ده الدكاترة نفسهم مش بيروحوا


انا : ايه ده .. يعنى مش هتروحى النهاردة؟


بيبا: عاااااااااااااااا.. منك لله صحتينى من النوم.. اجرى نامى يا بت .. واياكى تتصلى هنا تانى .. فاهمة؟

طاخ


الله الله الله .. ايه ده بقى؟؟ مش هنروح ازاى يعنى؟؟ لا مش ممكن .. ما هو انا مش هصحى بدرى والبس واجهز نفسى علشان منزلشى .. واذا بيبا مش عايزة تروح فى خمسة تانيين لسه فى الشلة هيروحوا.. يالا بقى عليا وعلى اعدائى


تررررررررررررررررررن


أنا : الو


موها : ايوة يا ميوشة.. كويس انك صاحية


انا : ايوة طبعا .. مش عندنا كلية النهاردة .. ده النهاردة اول يوم


موها :ما أنا بقول كده برضة .. بس ميرو وايمو مصممين ميروحوش النهاردة.. وانا خايفة مروحش الاقى عندنا محاضرة .. وانا اصلا عايزة انام ومش قادرة اروح الكلية وفى نفس الوقت قلقانة لحسن حد من الدكاترة ياخد الغياب ولا يدينا بحث ولا امتحان ولا..


أنا : بس يا بت يا مجنونة انتى.. امتحان ايه اللى فى اول يوم ده.. يادى النهار.. يعنى انتوا كمان مش رايحين؟؟


موها : شكلنا كده


أنا : عاااااااااااااااا. انا بكرهكم.. روحى نامى احسن.. لو رحتى الكلية كده اكيد هيطردوكى اصلا.. سلام


طب انا اعمل ايه استسلم يعنى.. لا .. لا هوان ولا استسلام .. نازلة الكلية يعنى نازلة الكلية .. خلاص .. انا مش فاضلى غير انى البس حاجة فى رجلى وانزل السلم واروح الكلية .. يالا يا ميوشة تشجعى.. ميوشة ميوشة .. اوه اوه


بس قولت اعمل اخر محاولة قبل ما انزل كده .. يمكن يا عالم.. اتصلت بنمرة ساسو على الموبايل .. ولاقيت زى ما توقعت بالظبط اللى بيرد عليا بيقول " الهاتف الذى طلبته ربما يكون مغلقا "


مستحيل .. انا نازله .. نازلة .. انا نااااااااااااااااااااااااااااااااااايمة.. خ خ خ خ خ خ خ خ خ خ


تصبحوا على خير.. بلا كلية بلا بتاع