الأربعاء، 1 يوليو 2009

تاج إتأخر كتيـــــــــــــــــــــر

سلام عليكم
فيه كلمتين كده لازمن ولابد أقولهم قبل ما أنزل البوست الجديد
طبعا فى الأول أحب أعتذر عن الإنقطاع المفاجئ الطويــــــــــــــــــــــــــــــل ده .. وده طبعا بسبب الإمتحانات وبلاويها السودة .. منها لله
تانى حاجة عايزة أشكر كل اللى سألوا عليا .. وأقولهم كلهم بجد بجد وحشتوووووونى موووووووووووت.. بس والله العين بصيرة والودان سميعة .. هعمل إيه فى الكلية بقى ؟؟
*********************
التاج ده جايلى هدية من أخويا فى التدوين.. أبو العريف.. ولا أقولك الحرامى.. لأ بجد بجد رغم تخاريفة الكتيرة إلا إنه من الناس اللى ببقى مستنية كل بوست جديد ليه ..وبفرح أوى لما ينزل جديد .. وبزعل أوعى لما بيغيب فجأة كده أو ميعلقشى على اى بوست جديد ليا.. واحد عرف يثبت وجوده بين المدونين فى وقت قصير جدا .. وقدر يخلى المدونة بتاعته فى قائمة المدونات المفضلة لناس كتييييير.
يلا نبدأ التاج..... بإسم الله
اسمك....؟

ميوشة هانم المرووشة ( وركزوا أوى مع هانم دى)

المشهور بيه وسط اصحابك..؟

أصحابى بيقولولى يا ميوش .. أما اى حد تانى فبسمعهم بيقولوا ( البت المجنونة أهى)

سنٍٍٍٍٍٍٍِِك...؟
عيب جدا على فٍٍٍٍٍٍٍٍٍِِِِِِِـكرة تسأل سؤال زى ده .. بس على العموم هو 21 سنة .. بس يا ريت يبقوا 20 بس فى حالة وجود عريس

مجال دراستك ؟

تربية إنجليزى (عاااااااااااا)

اسم مدونتك ..؟

على أساس إنك مكسل تبص فوق يعنى (يوميات طالبة فاشلة )


الصوره الرمزيه لمدونتك بتعبر عن ايه ...؟

الصورة الرمزية بتعبر ببساطة جدا عن كل واحد فينا ..
اى واحد فينا إتعرض فى حياته إنه يبقى عليه إمتحان بعد كام ساعة وهو لسه وراه بلاوى يذاكرها .. وده بيخليه ينام على الكتب بالمنظر ده بعد ما كان بيسهر باليومين والتلاتة على النت بيشيت مع أصحابه

هل فكرت في اغلاق المدونه ؟ والسبب ..؟

يااااااااااااااااااااااااه .. كتير
غالبا بعد كل بوست بكتبه بحس عن ده هيبقى أخر حاجة حلوة أعرف أكتبها
زى ما تقول كده عندى عقدة إنى أبقى مملة .. وأنا عندى أقفل المدونة وهى ناجحة ، أحسن ما تبعتولى تقولولى كفاية حرااااااااااااام

ايه رد فعلك لو حد قل ادبه عليك في تعليق ...؟

لأ بصراحة لحد دلوقتى محدش عمل كده ..بس أنا فاكرة والمدونة لسه فى أولها خالص .. شهر إبريل السنة اللى فاتت .. يوم إضراب 6 إبريل .. واحد دخل على الشات بوكس وشتم فى الحكومة والإخوان .. وغالبا شتم نفسه كمان .. المهم قعد خبط كتير اوى فى 3 أو 4 تعليقات .
أنا اللى كان مضايقنى حاجة واحدة إنى مش مدونة سياسية ولا حاجة .. أنا مالى بقى بالكلام ده

اسوء مدونه...؟

فيه مدونة مرة دخلتها وندمت إنى دخلتها أصلا .. ونسيت إسمها ومش عايزة إفتكره

هيحصل ايه للايميل بتاعك لما تموت...؟

إيميل؟؟ إيميل إيه وبتاع إيه؟؟
هو أنا هبقى فاضية للإيميل .. أنا هموت بقى ولا أقعد أدور على الإيميل من بعدى
وبعدين أنا مشتركة فى مدونة كلام رومانتيكى مع شاهينو وروشة .. يعنى لو مت هم بقى هيبلغوكوا بموتى ويتصرفوا هم بقى

اما بقى لو إحنا التلاتة موتنا مع بعض !!!!!!!!!

اديت الباسوورد بتاعك لحد ...؟
لأ..ده باسورد خاص جدا

السفر بالنسبالك ايه ...؟

السفر بالنسبالى أحلى وقت بقضيه فى حياتى .. بس لما بيبقى لأماكن معينة
يعنى مثلا لما بسافر لشاهينو وروشة .. وباقى أفراد العائلة الكريمة فى الاعياد والمناسبات الرسمية

والسفر كمان معناه تغيير مناظر غير مناظر شلة الأنس والكلية

ومعناه إن لا فيه كلية ولا إمتحانات ولا أى قرف تانى

ومعناه إنى ممكن أنااااااااااااااام من غير ما أقوم على وشى علشان المحاضرة

معناه حاجات كتير جامدة أخر حاجة

المود بتاعك ؟

مود مجنون زى صاحبته .. كل ساعة بحال

بتعمل ايه في وقت فراعك..؟

القراية .. وأصدعكم على البلوج شوية .. وأرغى مع شلة الأنس فى التليفون
وبعد ما أقفل معاهم نرغى شوية على النت
وبعد ما أخلص منهم ومن قرهم ودوشتهم أكتشف إنى لازم أنام شوية علشان أصحى الصبح أقابلهم فى الكلية

الأكلة المفضله؟

الله على الأسئلة اللى تفتح النفس
أنا وبلا فخر كل الأكل عندى مفضل .. الأكل ده نعمة من نعم ربنا
ده أحلى نعمة ( واللى يكرها يعمى ) .. وأنا مش بحب أتعمى بصراحة

الصفات اللي أخدتيها عن والدك.؟
أخدت إيه من بابا .. أخدت إيه من بابا.. ممممم
أخدت منه إسمه .. وعملته إسمى
أخدت منه مراته .. وخليتها أمى
أخدت منه فلوسه .. وجبتلى بيها اللى نفسى فيه
أخدت منه عمره وشبابه.. وعشت انا حياتى
وأخيرا أخدت منه الكمبيوتر بتاعه لما كيمو باظ وإنفجر ( يا حبيبى يا كيمو)

الصفات اللي أخديتها عن والدتك ..؟
ياااااااااااااه.. أنا مسبتش حاجة لماما مأخدتهاش أصلا
طول عمرى بحلم إنى أبقى أم زى أمى.. وإن ربنا لو رزقنى بأولاد يحبونى زى ما أنا بحبها
بيقولوا إنى ورثت عنها شكلها .. مع انها أجمل منى بكتير .. جينات بابا برضه دخلت عندى وبوظت الدنيا
وبرضه بيقولوا إنى أخدت عنها حنيتها (يعنى فى الشدة شديد .. وفى الحنية حنين)
وبيقولوا كمان ( مين اللى عمالين بيقولوا دول ؟؟) إنى خدت منها خفة دمها وروحها الجميلة

يمكن؟؟ أنا مليش دعوة .. هم اللى بيقولوا

اكتر ست حاجات بتكرهها...؟

المذاكرة

الإمتحانات

يوم النتيجة

محاضرة الساعة 9 الصبح

القعاد على الأرض لما البنشات بتتملى

الدكتور الممل

ها .. زهقتوا ولا إيه؟؟ خلاص كفاية عليكم كده

اكتر ست حاجات بتحبها...؟

ربنا سبحانه وتعالى .. والرسول عليه الصلاة والسلام

أمى وابويا وعيلتى كلها ( وعلى رأسهم بيسو أذية)

شلة الانس

مدونتى

سلم الكلية

زيزو النتن


شخصيتك نوعها ايه....؟

يا ساتر يا رب شخصية ربنا ما يحكم عليك تقعد معاها

شخصية برجوازية إمبريالية إنبعاثقية مهلبية بالملوخية والطعمية

فهمتوا حاجة من كل اللى فوق ده ؟؟ بالظبط كده أهى دى شخصيتى
انا لغاية دلوقتى مش فاهماها اصلا

لماذا دخلت عالم التدوين ...؟

ههههههههههههههههههه
غتاتة
ليه مأغتتش عليكم ..لما ممكن أغتت
كنت مخنوقة ومفروسة من الكلية والإمتحانات وقرفها .. طيب مقرفكوش معايا ليه؟؟

وبعد ما خلصت كلام على الإمتحانات لاقيتنى لسه عندى شوية غتاتة عايزين يطلعوا . . قولت حرام أكبتهم جوايا طلعيهم يا بت يا ميوشة

وفى إنتظار إنتهاء مخزون الغتاتة

اجمل كلمه اتقالت في وصف مدونتك.....؟

أجمل كلام دايما . . أنا بسمعه من ماما .. لإنى عارفة إن هى الوحيدة اللى بتقولى الرأى التمام
وكمان بيبا .. لإنها مدب وبترمى طوب وزلط من بقها

فلما بتكلمنى وتقولى البوست ده جامد أخر حاجة .. بعرف إن البوست حلو جدا

غير كده بتدينى من المنقى يا كوسة

أهمية التعليق بالنسبه ليك ؟

بفرح بالتعليقات جدا .. وبحس انها نبض المدونة
يعنى المدونة من غير تفاعل وتعليقات المدونين التانين.. تبقى مدونة ميتة

احسن بوست كتبته ....؟

مش عارفة
أنا كل بوست بخلص كتابته بحس انه أحسن بوست كتبته
بس شلة الأنس بتحب جدا بوست مس تربية بأجزاؤه التلاتة

افضل بوست قرأته ...؟

كتيييييييييييييير
كل الناس اللى عندى على الريدر هم أحسن مدونات قريتها ودخلت دماغى
وكلهم بوستاتهم تجنن

بس أنا فاكرة إنى قريت بوست للبت كيكى ( البنت دى كارثة زمنية متنقلة ) كنت هموت على روحى من الضحك فيه

البوست إسمه ( إعترافات ليلية )

تمرر التاج لمين...؟

هو فيه حد لسه موصلوش التاج ده

أنا متهيألى التاج ده وصل لكل الناس

طيب من موقعى هذا أهدىِِ لشاهينو وروشة أول تاج فى حياتهم التدوينية

يالا يا شباب ورونى هتقولوا ايه؟؟

وأى حد عايزو ياخد التاج يتفضل بالهنا والشفا
*************************
ملحوظة أخيرة : لو عايز تخس .. لو عايزة تخسى .. عندى ليكم الحل الاكيد .. هنا فى كلام رومانتيكى
يلا سلاااااااااام

هناك 23 تعليقًا:

mohamed ghalia يقول...

حمدا لله على السلامة نورتى مدونتك من جديد
الإجابات جميلة أووووووووووووى
ربنا يسعدك دايما

أبو العريف يقول...

ايه يا عم محمد لحقت تعلق امتي
دانا جاي جري علي اساس اني انا اللي كنت باعت التاج دم من ييجي تلت سنين كده ومعبرتنيش وجايه دلوقت تفتكر تجاوب

عموما حمدالله عالسلامه يا شيخه
ايه الغيبه دي

هقرأ واجي تاني بس حبينا نرحب بيكي الاول

أبو العريف يقول...

ميوشه
حمدالله عالسلامه

اولا متشنكر علي الدعايه المجانيه اللي عاملاها في الاول دي
ثانيا
ايه اللي جاب سيرة الحرامي بقي
بتفكريني بالذي مضي
وانا اساسا الشيطان عمال
يوازن ( واخد بالك يا عمر ) علي دماغي
عشان ارجع للاجرام تاني
وانا مش راضي
مع اني علي وشك اصل السرقه دي حاجه ممتعه جدا وكان فيه ناس كتيره نفسي اسرقها قبل ما اتوب
اولهم ميوشه لانها السبب في دخولي عالم التدوين
وعالم السرقه برضه


ايه ده
انا كنت باعتلك التاج ده ومتأكد ان اجاباتك هتبقي فظيعه

عجبني اوي كمان الحاجات اللي اخدتيها من والدك
دانتي يا شيخه ما خليتيلوش حاجه

والحاجات اللي بتكرهيها
لما مكنتش دي كنت قلت دي مش ميوشه دي حد تالت

تحياتي ليكي بجد
اخوكي في التدوين

الحرامي سابقا

maiosha يقول...

mohamed ghalia
..................
الله يسلمك يا محمد
والله كلكم واحشنى جدا

نورتنى

المتبهـدلـون فـي الأرض يقول...

بالنسبة للتخسيس ,, بالحجز ولا دي قرعة

:: تاج حلووو مرة

maiosha يقول...

أبو العريف
.............
يا خبر ابيض
ده تعليق ولا عمود فى جرنال

اولا الله يسلمك يا سيدى
ثانيا .. ايوة شوف بقى الدعاية دى المفروض تدينى عليها كام دلوقتى .. أنا اللى الشيطان بيوزان على دماغى دلوقتى

ثالثااه صحيح .. انا مش ناسيالك إنك مسرقتنيش .. يالا يالا .. هقول ايه ولا إيه؟؟ بس بينى وبينك .. يا ريت ترجع للسرقة تانى.. المدونة كانت حلوة جدا على فكرة

رابعا.. متشكرين ألف شكر على التاج الجميل .. وإن شاء الله مش هتأخر تانى .. يالا أى خدعة

خامسا .. لأ مفيش انا بغتت بس

منور يا باشا

maiosha يقول...

المتبهدلون فى الأرض
................
لأ التخسيس ده مجانا للجميييييييع

shahieno يقول...

مبروك يا ميوشة على التاج
تستحقية والله
وبما أنى جديد فى عالم التدوين هو إية فكرة التاج أصلا
بما أنك أدتيهولى يعنى
ومستنيين بوستاتك بقى
ومبرووووك على بوستك فى كلام رومانتيكى
روووووووووووعة
وبالمناسة أنا رأى من رأى شلة الأنس
مس تربية بالتلات أجزاء
جاااااااامد أخر حاجة
الثلاثية

MǿиY El-Shreef يقول...

حمدلله ع السلاااااااااااامه

سألت عليكي والله

وحشاني يابت

واسألتك عسوله وشكلك مجنونه انتي واجاباتك كده :))

ربنا معاكي

dramaqueen يقول...

ميوشة
ازيك يا قمر
واحشانى جدا
نورتى المدونة من تانى
التاج حلو اوى عليكى

شقاوة مراهقة يقول...

ياااااااااااااااه

واخيرا نزلتي بوست جديد من بعد حكاية مس تربية الجاااااااامدة ..

اجاباتك توووحفه خالث وزي السكر بجد ..

ودمك شربااات والله ..

حمد لله عـ سلامتك ونورتي مدونتك .. وياريت تنوري مدونتي انا كمان :d

تحياتي يا قمر

انا ودماغي يقول...

منورة يا ميوشاااااااا

هههههههههههههههههه
بجد إجاباتك تهلك من الضحك و عجبنى اوى كلامك على مامتك ربنا يخليكوا لبعض و يقدرها على إحتمالك

يللا سلام بقى عشان انا عايزة اخس..اروح اشوف البوست التانى

محمد يقول...

أسلوبك فى الكتابه دمه خفيف جدا خصوصا
فى أجابتك على سؤال أخدتى ايه من باباكى ومامتك (ربنا يخليهم ويسعدوكى وتسعدى كمان بيهم) عموما أنا دايما بقراء مدونتك
أنا مدونتى اسمها شوية كلام ومعلومه تفيدك , مشاعر وأفكار وخبر وتعليق
http://kalamfekalamm-mohamed.blogspot.com/

http://informationtoknow-mohamed.blogspot.com/


http://kalamfekalamm.blogspot.com


http://comentonnews.blogspot.com

كيكى عوووووو يقول...

عبيبى عبيبى
عاااااااااااااااااا
وحشاااااااااااااااانى يابنتى فينك؟؟
وايه كمية ال اااااااااا الى عاااامله اكتبها دى؟؟
يخربيت التاجات وسنينها تاج يعمل فيكى كل دة يخليكى تختفى سنين!!!!
ارجعى احسنلك ارجعى ياحمديه الاحسن اتويكى فى الدره واخليكى ذكرى فى اعتراافاتى
**مرسى بيدور عليكى وش بيغمز**

المهاجر يقول...

عوده حميدة لعالم التدوين رغم إن الغيبة طولت

اقصوصه يقول...

مبرووك التاج

اجابات جميله :)

واحدة مفروسة يقول...

ميووووووووووووووووووووووووووووشة
ازيك يا قمرة و حشتيني
مين اللى يقدر يزعلنى ده يا ماما ده انا افرسة على طول
هههههههههههههه
وحشتيني يا جميلة و كل رمضان و انتى طيبة و بخير
و اوعي تنسي الفانوس
حالو يا حالو رمضان كريم يا حالو
و بلاش النص التاني بتاع الاغنية لا يقولوا علينا شحاتين
هههههههههههههههههه
سلام

أبو العريف يقول...

مىىىىىىىىىىىىىىىىىىىىىىىىىىىىىىى

فينك يا شيخه

انا متغاظ منك

بتغيبي كتيييييييييييير

ولا وسلة للاطمئنان عليكي

ها بتاكل كويس

ولا يا عيني خسيت

طبعا دا اول سؤال امي بتطمن عليه بيه

لذلك انا بقولك

ها بتاكلي كويس

ولا ربنا كرمك وخسيتي

وش بيلعب حواجبه

بيعاكس م الاخر

ابقي طمنينا

ودا رقم اللفلفوووون

25344242453532412465424524635463463464646346546465454654654654654546546544

Darsh يقول...

اكتر ست حاجات بتكرهها...؟

محاضرة الساعة 9 الصبح

القعاد على الأرض لما البنشات بتتملى

---------------------------

طب و ليه اصلا تتعبي نفسك و تحضري المحاضرة لما ممكن تصوريها من زميلتك :)

دي حكمة خلتني اتخرج و بتقدير:)

حمد لله على السلامة يا ميوشا

أبو العريف يقول...

والله انتي يا بت يا ميوشه اللي عسل

وانا بقعد استي تعليقك من السنه للسنه

وبفرح قوي لما تعلقي عندي في المدونه

مع اني بحس انك هتعلقي حاجه وانت ماشيه

بس ولا يهمني

بس بتغيبي وبتقهر

علي ما تظهري

بالنسبه لموضوع الخسسان ده ولا يهمك

انا عندي ليكي عريس لقطه

وهيقبلك بعيبك

ابوياااااااااااااااااااااااا

هو مش كبير قوي

اكبر مني بسنتين تلاته ......تلاتين كده














ايه بهزر

وبعدين هو ابويا وحش ولا ايه

Uouo Uo يقول...



thx

كشف تسربات المياة
غسيل خزانات
شركة نظافة عامة

Uouo Uo يقول...


thx

كشف تسربات المياة
غسيل خزانات
شركة نظافة عامة

Uouo Uo يقول...

thank you

سعودي اوتو