الخميس، 20 أغسطس 2009

المكافأة


بسم الله الرحمن الرحيم


الأول قبل اى حاجة أحب أهنى كل أصحابى واخواتى المدونين بشهر رمضان الكريم .. واقولكم كلهم واحد واحد وواحدة واحدة .. رمضان كرييييييييم.. يعنى متنسوناش بأى حاجة كده.. ربنا يخليكم

تانى حاجة بقى .. انا لاقيتنى لسه لغاية دلوقتى محكيتش على يوم المكافأة .. سامعة حد بيقول مكافأة .. هو إنتى كنتى عملتى حاجة عدلة فى دنيتك علشان تتكافئى.. احب اقولك بقى يا سيدى ايوة طبعا عملت .. عملت حاجة جامدة جدا.. دخلت كلية تربية.. تعالوا ناخد الحكاية من اولها

فى يوم من ذوات الأيام سمعنا كلام كتير فى كليتنا العزيزة عن مكافأة .. ولما سألنا بقى إحنا طلبة سنة أولى الغلابة اللى مش فاهمين حاجة إيه المكافأة دى .. قالولنا دى مكافأة الثانوى

موها : عاااااااااا.. محدش يجيبلى سيرة الثانوية دى تانى انا ما صدقت إنى طلعت من السنتين دول وانا لسه بعقلى

بيبا : إنتى متأكده إنك لسه بعقلك؟؟

أنا: بس يا بت منك ليها وإسمعوا الاخبار اللى جبتهالكم .. المفروض إن الطلبة اللى هم إحنا يعنى لما بيخرجوا من الثانوية العامة ويدخلوا كليات محترمة الدولة بتديهم مبلغ كحافز ليهم يعنى يشجعهم

إيمو: دولة وحافز.. أنا الكلام ده سمعته فى إعلانات لجنة السياسات والضرايب بس .. إيه اللى جابهم الكلية هنا؟؟

ميرو : يا ستى حافز حافز .. هو هيحفز إيه يعنى يا حسرة .. المهم يا ميوشة المبلغ كام ؟؟

أنا: بيقولوا هيبقى 85 جنيه

ساسو : بس .. لا المبلغ ده مش من مستوايا خالص

بيبا : مستوى مين يا بتاعة المستوى .. ده إنتى اكتر مبلغ مسكتيه فى إيدك كان خمسة جنيه إلا ربع

ميرو : ميوشة .. سيبك من العيال دول بقى وهاتى الفلوس

انا : اجيب الفلوس؟ .. على أساس إن ابويا عميد الكلية يعنى وإدانى الفلوس أوزعها انا على الطلبة

إيمو: بجد والنبى يا ميوشة إنتى اللى هتدينا الفلوس.. طيب إصحابك بقى ملهومش فلوس زيادة

أنا : عاااااااااااااااااااااااا

طبعا على ما فهمتهم إنى مش أنا اللى بوزع الفلوس .. وإن ابويا صيدلى مش عميد كلية التربية ولا حاجة .. وإننا عايزين نروح الخزنة نسأل على المكافأة دى علشان كل دفعة ليها أيام محددة بتستلم فيها .. ومش كل الدفعات بتستلم المكافأة مع بعض ..
حد يقولى طيب إنتوا بتاخدوا مكافأة علشان الثانوى .. طيب سنة تانية وتالتة بياخدوها ليه بقى .. علشان الثانوى برضه ؟؟ هرد واقول اكيد لأ يعنى .. ماهى إن كانت الثانوية عسل متلحسهاش كلها .. إنما اللى بينجح فى سنة اولى ويجيب جيد جدا او امتياز يباخد مكافأة برضه وهكذا فى باقى السنين ( بعد الشر عننا طبعا)

خدنا بعضنا إحنا الستة وروحنا الخزنة علشان نسأل لاقينا كل الشبابيك مقفولة ولاقينا راجل بس قاعد بجلابية كده جنب الشبابيك

ميرو : يا عمو لو سمحت .. هى خزنة الكلية اتسرقت ولا ايه؟؟

عمو : نعم ؟؟!!

أنا : معلشى يا عمو هى قصدها شبابيك الخزنة مقفولة ليه؟؟

عمو : الخزنة قفلت.. الساعة 4 العصر يا سادة

إيمو : 4 العصر ؟؟ دى ساعة الصفر دى ولا ايه؟؟ هنعبر يعنى؟؟

عمو: نعبر ايه بس يا ابلة .. الخزنة بتقفل الساعة 12 الضهر

بيبا : يا لهوى .. امال بتفتح امتى اصلا؟؟

عمو : 9 الصبح

كلنا : عااااااااااااااااااااااااااااااا


اليوم التانى كان يوم جديد فى تاريخك يا كلية التربية.. لأول مرة من ساعة ما دخلنا الكلية شلة الأنس كلها متجمعة فى الكلية الساعة 8.5 الصبح .. سابقة لم تحدث من قبل واكيد مش هتحصل تانى .. بس الحكاية فيها قبض بقى يبقى لازم نيجى بدرى.
طبعا حكاية إننا نصحى بدرى بالمنظر ده خلانى أشوف حاجات عمرى ما شوفتها من شلة الأنس
يعنى مثلا إيمو اللى جاية الكلية وتحت عينها أسود جدا .. ولا أجدع مدمنة مخدرات
وموها اللى جاية ناسية كل حاجتها ومش فاكره إلا حاجة واحدة .. البطاقة بتاعها اللى كانت نايمة فى حضنها من إمبارح علشان تستلم بيها المكافأة
ولا الست بيبا .. اللى مبتطلش كلام عن المكافأة واللى هتعمله بالمكافأة واللى هتشتريه بالمكافأة .. كان بس ناقص تقولنا إنها هتشترى فيلا فى دمنهور ويخت فى بركة السبع
المفاجاة بجد كانت ميرو .. لإنها لاول مرة من اول ما عرفناها تقول نكتة وبجد تكون نكتة جديدة لدرجة إننا كلنا ضحكنا .. وده اللى اكدلنا غنها اكيد لسه نايمة ومصحيتشى لسه
وطبعا ساسو كالعادة كانت ضاربة النضارة الشمس.. وبتاكل كرانشى بالشطة واللمون فى صمت واستكانة

طبعا إكتشفنا بعد طووووووول إنتظار عند الشباك بتاع الخزنة إن الشباك بيفتح 10 الصبح مش 9 على ما الموظفين يفطروا ويشربوا الشاى والحاجة الساقعة ويناقشوا امورهم العائلية .. المهم فيييييييييييييييين الشباك اتفتح .. وظهر منه كده راجل شكله باين عليه طيب .. ايوة يا وش السعد تعالى وقبضنا يالا.. يا مسهل يا رب

وش السعد : نعم ؟؟

انا: صباح الخير .. لو سمحت احنا كنا جايين علشان المكافأة

وش السعد: مكافأة إيه؟؟

بيبا : إحنا فى سنة اولى وسمعنا إن فيه مكافأة الثانوية العامة

وش السعد : مش النهاردة

موها : الله .. مش النهاردة ازاى؟؟ امال إمتى؟؟

بصيلنا الراجل شوية كده وسرح وقالنا : مممممممم.. سنة اولى .. سنة اولى .. اه إفتكرت .. ان شاء الله يوم القيامة العصر

كلنا:!!!!!!!!!!!!

الراجل الشرير ( اللى كان وش السعد) : مش خلاص عرفتوا يالا مع السلامة

ميرو : طيب يا عمو ممكن سؤال لو سمحت ربنا يخيلك

الراجل الشرير : نعم؟؟

ميرو: انا لو مش فاضية بعد العصر ممكن أجى على المغرب كده ؟؟

الراجل الشرير : امشى يا بت انتى وهى من هنا

إيمو : حرام عليك يا عمو .. امى عايزة تحج .. الفلوس دى هى أملنا الوحيد علشان تلحق الحج السنة دى..هنجمع مبلغ زى ده منين دلوقتى؟؟

الراجل الشرير : أما إنتوا صحيح جيل منيل وفاقد هو حد فيكم هينجح ابدا

ساسو : بقولك ايه يا عم انت .. انا مش بهزر .. ما هو انا مش هصحى النهاردة بدرى وهصحى كمان يوم القيامة .. هو انا فاضيالك .. وبعدين بعد العصر ده هيبقى قبل الحساب ولا بعد الحساب؟؟

الراجل الشرير : والله لو ما مشيتوا من هنا لهجيبلكوا الأمن .. يا امن .. يا امن

ميرو : هدى أعصابك يا باشا .. ده إنت لسه وراك شغل لغاية يوم القيامة .. عالله بقى بعد كل ده تدخل النار فى الأخر

كلنا فى نفس واحد : حسبى الله ونعم الوكيل.. لينا رب اسمه الكريم

هناك 42 تعليقًا:

كــركــبــة دمـــاغ ㋡ يقول...

هههههههههههههههههههههههههههههههههه
هههههههههههههههههههههههههههههههههه
هههههههههههههههههههههههههههههههههه
ههههههههههههههههههههههههههههههههه
هههههههههههههههههههههههههههههههههه

مش قاااااااااااااااااااااااااااااادرة


انتو عيال مجررررررررررررررررررررررررررمة

بجد مش قاااااااااااااادرة

ههههههههههههههههههههههههههههه
ههههههههههههههههههههههههههههه
والله الراجل ده مسخرررررة

ال يوم القيامة بعد العصر ال

ههههههههههههههههههههههههههه
هههههههههههههههههههههههههه


ميوووش المرووووووووش

ضحكتيني قوووووي والله ربنا يسعدك انتي والبناتيت العسل دول

ربنا يخليكم لبعض ومش يحرمكم من بعض ابداااااااااا ابدااااااااااا

وكل سنه وانتو طيبين وبالف خير وصحة وسلامة وربنا يعود عليكي وعليهم الايام بكل خيييييييييييير

رمضان كريم يا قمر

موااااااااااااااااااااه كبيرة ليكي

كــركــبــة دمـــاغ ㋡ يقول...

وبما اني اول تعليق لاول مرة عندك يا ميوشه ..

وروحت قرات البوست تاني فـ انا جايه عشان

هههههههههههههههههههههههههههههههه
هههههههههههههههههههههههههههههههه
ههههههههههههههههههههههههههههههههه


ايوه عشان اضحك

بجد انتي زي السكررررررررر

ربنا يحميكي ياااااااااااااارب

دكـــــتور جدا يقول...

ههههههههههههههههه

رمضان كريم

Darsh Basha يقول...

ههههههههههههههههههههه

كل دة علشان المكافأة
يالا ..كل سنة وانتى طيبة وبألف خير

mohamed ghalia يقول...

هههههههههههههههههههههههههههههههههههههههههههههههههههههههههههههههههههههههههههههههه
خلينا فى رمضان احسن
كل سنة وانتى طيبة وبخير وفى سعادة

رحلتنا في الحياة يقول...

ههههههههههه
ايه فكرتنى بااااايام حلوة ايام المكافاة دى كل الكلية فى حالة تحفز اللى عايزة يروح ياخدها واللى مش هياخدها بيقر على اللى هياخدها وطوابير طوابير هههههه
اخدتها مرتين فى سنة اولى وفى سنة تالتة لما جبت تقدير جيد جدا :)
بس وكفاية عليا كده وكانت فلوس طلعه عنين اهلها خالص ازبل فلوس وزعوها على الطلبة بس كتر خيرهم يعنى

كل سنة وانتى طيبة


ايووووووشة

رحلتنا في الحياة يقول...

هو انتى تقريبا هتسالى انا ليه كتبت اسمى تانى من تحت للاسف كنت ناوية اعلق بغير معرف علشان بكسل اسجل دخول وانتى مش عاملة الحكاية دى ومينفعش يعلق عندك اى حد بغير معرف
واضطريت ازيح شوية الكسل اللى عندى واسجل دخول بقى :(

المتبهدلون في الأرض يقول...

يعيني ..لسه ما اتصدموش


فعلا الفقر مر ., بكره تتخرجوا وتبقوا أساتة قد الدنيا وتقبضوا مية وخمسين جنيه حته واحدة ., ما يكفيكوش شيبسي

أبو العريف يقول...

الوووووووووو

ازيك يا ميوووووووو

كل سنه وانتت طيبه

تصدقوا انتو عيال فقر

ايه اللي فكرك بالمكافأة

انا سخسيا مش فاكر عملتبها ايه

بس فاكر المكافأة بتاعت حسين صاحبي كويس قوي

عشان قسمناها بالنص

وانا صرفت النص بتاعي

ورجعنا صرفنا النص بتاعه مع بعض

ياااااااااه

كانت ايام

بس اللي غايظني هو الراجل كل عليكوا المكافأة ليه

بس تستاهلوا والله


عاشر مره

كل سنه وانت طيبه يا بت يا مي

( وش شرير)

maiosha يقول...

شقاوة مراهقة
.............
والله إنتى اللى زى العسل
ده انا ضحكت من التعليقات بتاعتك اكتر ما ضحكت من البوست نفسه

منورانى دايما


رمضاااااااان كرييييييييييم

maiosha يقول...

ضكتور جدا
.............. كل سنة وانت طيب يا ضكتور
ملقيش معاك حاجة للصداع؟؟

Eman يقول...

ههههههههههههههههههههههاااااااااااااايييييييييييييييييييييييي

دامدة ددا ددا ددا
انتو عيال زي العسل والله

اكيد كان شقـلقـو وحش اوي P:

بس الراجل ده شكله بيوفي بوعده ديما
بلطوا عنده يوم القيامة من الفجر P:P:P: وقولوله يا احنا يا خالتي
قصدي يا انت

ولو فقدتوا الامل
انا ممكن ابعتلكو ربع جنيه
اللي حيلتي يعني مش خسارة فيكو :$


جامدة اوي يا ميوشة

يوميات شاب منوفى يقول...

ههههههههههههههههههههههههههههههههههههههههههههههههههههههه كل سنة وانتى طيبة بس اية الغيبة الطويلة دى وحشتنى والله
وبعدين انتى مالك ومال بركة السبع بقى احنا هنخبط فى المنايفة دول يعوروك
بس انا ضحكت من قلبى ربنا يسعدك ويكرمك وبلاش الغيبة الطويلة دى

maiosha يقول...

darsh basha
...........
طبعا علشان المكافأة نعمل اكتر من كده

اهم حاجة اننا نقبض وخلاص

رمضان كريم

maiosha يقول...

mohamed ghalia
.................
كل سنة وانت طيب يا محمد
منورنى دايما يا غالى

maiosha يقول...

أيوشة
..........
دايما بتلغبطينى يا أيوشة .. اسمك ميفرقشى عن إسمى غير حرف واحد بس

ياااااااااه خدتى المكافأة مرتين بحالهم.. وش بيحقد.. يا بختك اوعدنا يا رب
اما حكاية غير معرف دى .. فأنا اكيد لاغيتها لسبب ما حصل فيا قبل كده.. بس والله لو عايزانى ارجعها تانى .. ارجعها علشان خاطر عيونك يا ايوشة والله

رمضان كريييييييم

maiosha يقول...

المتبهدلون فى الأرض
.....................
ههههههههههههههه
يااااااه 150 جنيه مرة واحدة
يسمع من بقك ربنا

رمضان كريييييم

maiosha يقول...

أبو العريف
.............
( وش متنح ومذبهل)
يا بت .. يا مى!!

انا مش قلتلك بدل المرة مرتين متقوليش الاسم ده تانى
عااااااااااااااا

اموت واعرف عرفته منين؟؟
حسبى الله ونعم الوكيل

بس هعمل ايه .. واحد استولى على تلتين مكافأة صاحبه ممكن يعمل اكتر من كده كمان
هنقول ايه بقى؟؟ مفترى

والله لأسلط عليك عمو الغتيت بتاع المكافأة ده

هههههههههههههه
هو اللى هيجيبلى حقى منك

يالا بقى رمضان كرييييييييم

maiosha يقول...

وحبى لك لن يموت
................
اولا الف اهلا وسهلا بيكى فى المدونة

ثانيا .. والله انتى الوحيدة اللى عملتى حركة الجدعنة دى معايا .. شوفى كام واحد دخل رد قبلك محدش عزم بساندوتيش حتى وانتى بتعزمى عليا بكل اللى معاكى .. ربع جنيه بحاله
ياترى هعمل بيه ايه ولا ايه ولا ايه؟؟

على العموم ربنا يخليكى لينا ولشلة الانس ولمصر كلها

رمضان كريييييييييم

maiosha يقول...

يوميات شاب منوفى
....................
حبيبتى يا منوفيه

لا لا عيب عليك تشك فى إخلاصى وحبى للمنوفيه

ونسمع سلام بلادى بلادى لكى حبى وفؤادى

اما بخصوص الغياب الطويل فعندك حق
وان شاء الله مش هتأخر تانى

نورتنى

ورمضان كرييييم

عاشق الحور يقول...

فكرتينى بأيام الكلية اصل كنت بكره الكلية والمزاكرة انا كمان بس الحمد لله خلصت وانا لسة بعقلى
اتمنى ان تنضمى لفريقى الجديد فريق الى الجنة عاوزين نعيش بقى لله وان شاء الله هاتحبى كل حاجة حتى المزاكرة

أبو العريف يقول...

ازيك يا ست ميوشه

( ياللي مانتيش مي )

انا عايز اعرف هو الاسم ده مضايقك ليه

دا بالعكس يا عم الحج

دا حتي الاسم ده من ضمن خمس اسماء انا بحبهم جدااااااااااااااااا

وهسمي الخمس بنات الاولانين في بناتي

بيهم


ومن الاخر يعني

انا كنت قاصدها

وعارف انك هتتعفرتي

ههههههههههههه

maiosha يقول...

عاشق الحور
..............
نورت المدونة
وان شاء الله ازور مدونتك قريب

maiosha يقول...

أبو العريف
.............
بقى كده
يعنى إنت قاصد تغيظنى

مااااااااشى يا ابو العريف الايام بيننا

وبعدين ايه الامال الواسعة دى.. هتسمى الخمس بنات الأولانين.. ما شاء الله ... انت ناوى تخلف قد ايه بالظبط؟؟

والله لأبلغ عنك وزارة الصحة والإسكان

هههههههههههههه
ويانا يا إنت يا ابو العريف

نيهاهاهاهاهاها ( ضحكات شريرة )

عاشق الحور يقول...

انا سعيد جدا بزيارتك لمدونتى وان شاء الله هتكونى مستفيدة منها كتير واتمنى لكى التوفيق فى حياتك كلها

حلم بيعافر يقول...

هههههههههههههههههههههههههههه
انا اخدت المكافأة دى ومن بعدها ملطشة معايا وبقى لى 6 سنين فى تربية ولسه ما طلعتش منها
حذااار
المكافأة بها فشل دااااااائم
لا تاخذ الكافأة المكافأة بها فشل دائم
ههههههههههههههههههههههه
فكرتينى بالذى مضى

maiosha يقول...

عاشق الحور
..........
ألف شكر على زيارتك .. وبجد مدونتك جميلة جدا

وثوابها إن شاء الله يبقى فى ميزان حسناتك

كل سنة وانت طيب

maiosha يقول...

حلم بيعافر
.................
يا لهوتى .. 6 سنين
امال هم ضحكوا عليا وبيقولولى إنها 4 سنين بس ليه؟؟

وبعدين إنت جاى تقولى دلوقتى.. يا لهوى يانا.. مكنتش عارف تيجى بدرى شوية

انا خلاص خدتها واللى كان كان

عاااااااااا

غير معرف يقول...

D:

ههههههههههههههههههههههههههه

بجد مش قادرة اصدق اللى حصل ده

ضحكتينى يا ميوشة و انا ماليش نفس

حلو اوى يوم القيامة قبل الحساب ولا بعد الحساب

D:

فجر يقول...

إيه دة ولا الأفلام والله

almasry يقول...

اولا ازيك


بقالك كيتر مش بتزورينى


بس انا عازرك


انا مدونتى كلها سياسه ووش وصداع مش فرفشه وكلام دمه خفيف زى ده



لكن صدقينى ............ اسلوبك جميل جدا وكمان مواقفك جامده جدا




لكن هى صحيح ايه حكاية المكافئه دى


انا بقالى 4 سنين فى الكليه واسمع عنها لكن بكبر


دمتى بخير


تحياتى


المصرى

أبو العريف يقول...

ازيك يا عم الحج

فينك

ايه


ليه

أميرة علي كوكب مهجور يقول...

بجد انتي بنوتة زي العسل واصحابك دمهم خفيف جدا ومدونتك عسل عسل بجد انا تقربيا قرات كل البوستات وبجد ضحكت من قلبي ياريت تنوري مدونتي يا قمر ومتتأخريش في الكتابة

funckydoctor يقول...

هههههههه فيه مكافأة فعلا
بس يوم القيامة العصر بتوقيت طوكيو ؟ :]

اقصوصه يقول...

كل عام وانتم بخير

أبو العريف يقول...

ياتري انت فين يا زناااااااااااااتي

قصدي يا ميوشه

فينك من ييجي خمشاشر سنه مظهرتيش

هو اللي يصيف يعمل في البشر كده وما يظهرش

اللي اداك يدينا يا سيدي



يا رب تكوني بخير

لمياء ممدوح يقول...

ههههههه
جامدة جدااا
زى العسل و الله

فين الجديد
رمضان خلص و الكحك اتاكل
و الخرفان قربت تدبح
انتى فين يا ميوووووش

كيكى عوووووو يقول...

ترجعى بالسلامة يا غاليه

Unknown يقول...


thx

كشف تسربات المياة
غسيل خزانات
شركة نظافة عامة

almthaly يقول...


شركة المثالية للتنظيف

ركن الامثل للخدمات المنزلية يقول...



شركة تسليك مجارى بالدمام
شركة تسليك مجارى بالخبر
شركة تسليك مجارى بالقطيف
شركة تسليك مجارى بالجبيل
شركة تسليك مجارى بالاحساء

fdsfsdd يقول...

http://student-dairy.blogspot.com/2009/08/blog-post.html