السبت، 18 أبريل، 2009

مس تربية 2


" تيكا" .. قولتها وفتحت فى الضحك.. يا خبر أبيض .. بقى تيكا مقدمة فى مسابقة ملكة جمال؟؟ أيه اللى جرى فى الدنيا يا ناس؟؟ لو كل اللى مقدمين هنا زى تيكا كده يبقى أكيد أكيد انا الملكة فى المسابقة دى .. نيهاهاهاهاهاهاا
تيكا دى بنت زميلتنا فى الدفعة .. واحدة كده من اللى أول ما تشوفها تعرف هى داخلة الكلية وعايزة إيه بالظبط.. طبعا لو تغاضينا عن النضارة الكعب كوباية اللى لابساها .. والكتاب اللى لازق فى وشها طول ماهى فى الكلية .. وجريها ورا كل دكتور ودكتورة فى الكلية والقعاد فى أول بنش فى وش الدكتور .. ولازم متسيبش أى دكتور يتكلم براحته .. عمرها ما تهنى دكتور على محاضرة.. الراجل كل ما يفتح بقه يقول اى حاجة لازم تقعد تسأله وتناقشه .. طيب دى ليه .. ودى إزاى؟؟ يا ساتر يا رب على الخنقة

لو لاقيت تيكا فى يوم من الأيام بتجرى مثلا فى الكلية تعرف إن فيه محاضرة بدأت من ثانيتين .. ولو لاقيتها زعلانة ومتنرفزة أعرف إنها مجاوبتشى فى المحاضرة غير عشر أسئلة بس
.. بجد نفسى أعرف مين المفترى اللى أقنع تيكا دى إنها تيجى مسابقة ملكة الجمال دى ؟؟ يا هوى يانا .. حتى هنا فى الإختبار ماسكة كتاب بتقرا فيه .. أرحمنى يا رب يا ما نفسى اشوف كسفتك يا تيكا وانا اللى بكسب المسابقة . وانتى بيستبعدوكى من أول جولة .. نيهاهاهاهاهاهاهاها

المهم خير اللهم اجعله خير وانا عمالة ابص لتيكا واسرح بخيالى سمعت أصوات مش غريبة عليا خالص.. وكان فى صوت كده كإنه صوت خناقة ورايا

"ايه ده ؟؟ أيه اللى جابك هنا؟؟"

" إنتوا سجلتوا اساميكم من ورايا .. خياااااااااااانة"

بضرب بعينى كده .. ألاقيلكم شلة الأنس كلها مشرفة .. أه يا .......... العيال كلهم مسجلين أساميهم من غير ما يقولولى ولا حد فيهم يقول للتانى

ايمو : والله البت ميوشة أحسن واحدة فينا .. على الأقل مسجلتش وخبت علينا "

أنا بقى سمعت الجملة دى قمت مدياهم ضهرى وإتسحبت بضهرى ولا البهلوان علشان محدش يشوفنى ويفضلوا محتفظين بفكرة إنى بنت جدعة .. يالا مش مهم التاج قدام الصداقة .. مع السلامة يا تاج

ميرو : معلشى يا إيمو انتى بتتكلمى على مين ؟؟

أيمو: على ميوشة علشان معملتشى زيكم يا أندال

ميرو : اه .. قصدك حيوان البطريق اللى ماشى بضهره هناك ده

كلهم : ميوشة ؟؟!!!

أنا : متجمعين عند النبى يا ندلة منك ليها .. بقى دى مناظر ملكات جمال دى؟؟

ساسو : على فكرة لو واحدة فيكم بقت مس تربية . انا مستعدة أسرح بعربية كشرى

إيمو : يا حلوة منك ليها أنا أجمل واحدة فيكم .. ولو مش مصدقينى أسألوا محفوظ

أنا : يا حبيبتى الحلاوة حلاوة الروح .. روح

ميرو: روح يبقى اكيد أنا الأولى .. والتانية والفضائية المصرية كمان .. نيهاهاها

كلنا :--------------

موها : أنا مش عارفة إيه اللى جابنى اصلا .. هو الإختبار ده ليه درجات وكده .. طيب هينضاف للتقدير الكلى ولا حاجة ؟؟

بيبا : يا بنات جمال جوانى ولا برانى .. انا جمالى كامل متكامل .. بصوا لمناظركم المقرفة جنبى .. إنتوا معندكوش مرايات فى بيتكم ولا ايه؟؟

ساسو : ليه يا ست بيبا إن شاء الله .. ده إنتى شكلك عامل زى الكتكوت اليتيم الجربان.. ده إنتى أخرك مس تفاهنة العزب

بيبا : إسم الله عليكى يا هيفاء يا وهبى

ساسو : ودى هيفاء ايه دى إن شاء الله جنبى وجنب حلاوتى؟؟

موها : بس بقى بطلوا خناق .. الموضوع مش مستاهل لإنى أكيد انا اللى هكسب

ميرو : ليه بقى إن شاء الله ؟

موها : إنتى عامية ولا إيه .. مش عارفة تشوفى الجمال اللى قدامى ؟؟

ميرو : بصراحة انا مش شايفة قدامى غير شوال بطاطس عايز يتحمر

إيمو : أصلكوا مش بتفكروا غير فى بطنكوا وبس

بيبا : إسكتوا بقى

أنا : خلااااااااااااااااااااااااااااااااااااااااص

تيكا : هاى يا بنات

كلنا طبعا سكتنا وبصينا لبعض ... واضح إن شلة الأنس أول مرة ياخدوا بالهم إن تيكا معانا فى المسابقة.. هم اصلا بعد ما شافوا تيكا عرفوا واـاكدوا إن التاج مش هيخرج عننا ابدا

كلنا : أهلا يا تيكا

تيكا: جاهزين للإختبار يا جماعة

أنا : انا عن نفسى جاهزة .. وحتى جايبة الفستان معايا علشان ألبسه وأتدرب عليه النهاردة

بيبا : إيه يعنى .. ما أنا كمان جايبة فستانى معايا.. أنا شوفتهم فى التليفزيون بيلبسوا فساتين فى المسابقة بتاعة مس إيجيبت

ساسو : كلنا جايبن فساتينا معانا .. يعنى إنتى يا ست ميوشة مش عاملة حاجة رهيبة ولا حاجة

تيكا : فساتين؟؟

ميرو : ده أنا كمان محضرة شوية نكت جديدة هدخل عليهم اللجنة ابهرهم كلهم وانجح على طول

تيكا : نكت؟؟

إيمو : نكت مين يا ماما .. ده أنا بقالى يومين بتدرب على إنى أغنى اغنية الحلم العربى من مناخيرى

ساسو : يع .. جتك القرف .. انا بقى عرضى يليق بملكة جمال فعلا .. هحط لنفسى ميكياج كامل وانا مغمضة عنيا


بيبا : ههههههه.. كده ضمنا هنشوف فقرة البلياتشو كمان يا ساسو

تيكا : بصراحة يا جماعة أنا مش عارفة إنتوا بتتكلموا عن إيه بالظبط .. بس على العموم ربنا يوفقكم .. سلام

مشيت تيكا . وسابتنا كل واحدة فينا عمالة بتتريق على التانية و على فستانها واللى هى محضراه علشان تعملوا .. أصل برضة من غباء الناس اللى عاملين المسابقة دى إنهم مش محددين حاجة معينة علشان نعملها فى المسابقة .. كل اللى قالوه .. عايزنكم تجهزوا كويس وتحضروا نفسكم للمسابقة .. علشان كده كل واحدة فينا قررت تخرج الإبداع اللى جواه .. منها مثلا إبداع إيمو الدفين غنها تغنى من مناخيرها .. وبرضة موهبة موها اللى مكناش نعرفها اللى هى كتابة الشعر الحر.. لأ وشوفوا الدقة شعر حر . مش أى شعر تانى يعنى
طبعا موها أول ما قرتلنا القصيدة اللى هى كاتباها . عرفنا ليه هو شعر حر .. لإنه حر فى نفسه يبقى شعر يبقى نثر إنشاله حتى يبقى مكرونة بالبشاميل هو حر فى نفسه .. بس القصيدة أول ما تسمعها تحس إنك بتسمع قصيدة الحلزونة ياما الحلزونة بالظبط.

تاتاتاتاتاتتاااااااااااااااااااااتش

دقت ساعة الصفر وابتدى الإختبار وبدأوا ينادوا على أسامينا واحد واحد ويدخلونا أوضة قدام لجنة التحكيم .. وندهوا أول اسم والتانى والتالت .. وبعدين ندهوا إيمو ...


يتبع...

هناك 28 تعليقًا:

أحمـــــــــــــد أبو العلا يقول...

هههههههههه
متخيل مناظركم وانتم واقفين تتناقروا أدام باب اللجنه وأنتم مش عارفين ايه اللي جوا

ياترى ايه اللي جوا؟
ياترى تيكا كانت مستغربه ليه؟

مستني

maiosha يقول...

احمد أبو العلا
...............
انت مراقب المدونة ولا ايه؟؟

على العموم منورنى ومنور المدونة دايما

نعكشة يقول...

والله انتو عالم مسخرة

ههههههه

اية الفضايح دية يا بنتي
بوظتي منظر الشلة قدام تيكا و انتيكا

مش قولتلك في الحلقة اللي فاتت هيطلع كدة


اعتقد والله اعلم
ان مس ايجبت
قصدي مس تربية
هتطلع مسابقة في التربية
يعني العلوم التربوية
معلومات
ثقافة
كدة يعني
و هتطلع تيكا الكسبانة
ومنظركوا هيبقى فجلة

ههههههههه
حلوة فجلة دية

يلا خير

منتظرة البقية

سلام عليكِ

mohamed ghalia يقول...

ههههههههههههههههه
ايمو؟؟؟؟؟؟؟؟؟
أكيد سمعتى غلط

MǿиY El-Shreef يقول...

هههههههههههه

والله مت من الضحك عند المكرونه بالشاميل دي هههههههههههه

والله انتوا شله جامده نااار

لا وايه حيوان البطريق الي ماشي بضهره ههههههههههه

مستنيه الباقي

مش تتأخري ياميووشه

blue-wave يقول...

هههههههههههههههههههههههه
انتى مصممه تجننينا لحد ماتخلصى الحكايه؟؟؟

maiosha يقول...

نعكشة
..........
بصراحة أحنا منظرنا بقى فجلة فعلا بينا وبين نفسنا .. كل واحدة فينا ظهرت بوشها الحقيقى

إنتظرونا فى الحلقة الجاية إن شاء الله

مننورانى يا نعكوشتى

maiosha يقول...

mohamed ghalia
................
لا لا لا
هى إيمو ..

ههههههههههههههه

متقلقشى

maiosha يقول...

MǿиY El-Shreef
................
إن شاء الله الجديد نازل قريبا جدا

منورانى دايما يا مونى

maiosha يقول...

blue-wave
............
معلشى أنا عارفة إن الموضوع خرج من إيدى على الأخر وبقى فى رجلى كمان

بس البوست لو طول أكتر من كده هيبقى ممل جدا

معلشى أستحملونى شوية

dramaqueen يقول...

عايزة اعرف التفاصيل ضرورىىىىىىىىىىىىىىىىىىىىى
واضح ان كل كلية وكل قسم فيه بنت شبه تيكا

ربنا يوفقكم ونشوف مين اللى هترفع راسنا

المـــفـــــــقــــــــوعـــــة مــرارتـهــا يقول...

عسسسسسسسسسسسسسسسسل
انتي سكر انتي شربات
انا ضحكت وانا كان عندي اكتئاب خطير مزمن
بصي ياجميل انا كنت سعيدة جدا اني هااشوفك في حفل التوقيع بتاع المنصورة بس هو اتأجل للاسف شوية واحنا لأننا مصمصمين علي انه يكون يوم جمعة فأجلناه فبصي لما يتحدد اليوم الجديد هاابقي ابلغك لاني فعلا فعلا فعلا نفسي اشوفك
اشوفك علي خير ياقمر
سحر غريب
حماتي ملاك

maioya يقول...

ههههههههههههههه
والله هموت من الضحك
المهم بقي ايه اللي حصل

أبو العريف يقول...

مي
مع انه مش راكب
لازم ميوشه
اولا انا بشكرك جدااا علي سؤالك علي الفتره اللي فاتت
واسف اني ما كنتش متابع
بس عموما
انا برضه مش هتنازل عن التاج ايه
اول ما تخلص مس تربيه هما كام حلقه
30 ولا عامله حساب يومين العيد

maiosha يقول...

dramaqueen
..............
متستعجليش يا قمر
قرييييييبا إن شا ءالله

maiosha يقول...

المفقوعة مرارتها
................
ربنا يخليكى ليا يا سحر يارب

أنا كمان هموووووووت واشوفك

مستنية المعاد الجديد

maiosha يقول...

maioya
..........
حصل وطجينة

هههههههههههههه
الصبر فى الملاحات

maiosha يقول...

أبو العريف
............
مى؟؟ عرفت الإسم ده منين؟؟
عاااااااااااا
أوعى تقولى مى دى تانى

وبعدين سيادتك كنت فين كل المدة دى يا استاذ من غير لا رد ولا اى كلام .. والله كنت قلقانة عليك جدا
الإختفاء الغامض

هههههههههههههههه

المهم حمد لله على السلامة
والتاج هيجى بعد البوست اللى جاى إن شاء الله
أخر حلقات مس تربية
شوف مسلسلاتنا صغيرة إزاى؟؟ مش زى مسلسل نور اللى قعد شهرين يتذاع

دينا حامد يقول...

والنعمة شكل تيكا اللي انتي مشرداها في البلوج هي اللي هتاخدها في الاخر :D

koketa يقول...

ههههههههههههههه
هههههههههههههههه
والله شكلها كدا مسابقة للمتفوقين وهيبقا مناظركم وحشة اوووووووووى
تحياتى

انا ودماغي يقول...

ههههههههههههههههه

و الله العظيم شكلكوا فاهمين المسابقة غلط و حتتشوا لما تتدخلوا مستنية البوست التانى بفارغ الصبرر

Lady E يقول...

انا جيت قبل كده وقرأت البوست الكميل ده

بس سؤال يطرح نفسه كتبت تعليق ومش لاقياه ولا مكتبتش تعليق وبرضه مش لاقياه عاااااااااا

انتي تستحقي تكوني مس تربيه من غير مسابقات يا ميوشة هو انتي شوية ولا ايه :)

maiosha يقول...

دينا حامد
...........
إنتوا كلكم عليا ولا أيه؟

maiosha يقول...

koketa
...........
مش بقولكم كلكم عليا
ربنا يسترها معانا

maiosha يقول...

أنا ودماغى
..........
البوست الجاى نازل قريبا

من عنيا الجوز ومناخيرى النوز

maiosha يقول...

lady e
..............
جميل بصراحة السؤال اللى بيجمع نفسه ده .. بس إحنا منه نقدر نوصل لحقيقة جامدة اخر حاجة

إنك فى الحالتين مش لاقياه

عاااااااااااااااااااااا

بنت الغربة يقول...

ايه العسل ده..؟؟؟
بجد ياميوشا دمك زى العسل..
انتى واصحابك عايزين فيلم لوحدكم ..
كملى ياجميل انا متابعاكى
تحياتى ياقمر

Teawater يقول...

ده انتو شويه شوي وهتضربوا بعض بالجزمة