الأربعاء، 16 أبريل، 2008

إجلسا نبكى على الأطلال ( أصلى تعبت من الوقفة )

بعد ما قفلت مع بيبا .. حسيت بإحساس غريب ،إحساس ممكن لأول مرة بحس بيه ..وأول مرة أكتشف إن عندى(ضمير ) وبصراحة الأخ ضمير ده كان واجعنى أوى أوى-لأ أوى واحدة كفاية- إفتكرت ماما حبيبتى (وأكيد شبشب ماما حبيبتى).. وتخيلت منظرها لو عرفت إنى معرفش عن عندى مادة إسمها عربى أصلا ( أكيد ساعتها هأضطر أشتريلها شبشب جديد ، لإن القديم أكيد هيعلن إعتزاله) ... وتخيلت كمان منظر البيج بوس لما يلاقينى جايباله مادة حلوة صغننة كده و أنا لسه فى سنة أولى .. وتخيلت منظرى انا كمان ( إشمعنى أنا يعنى ) بعد النتيجة. وتخيلت إيمو وهى بتتصل بيا علشان تسأل على نتيجتى وردت عليها ماما

إيمو : أهلا يا طنط ..ممكن أكلم ميوشة

ماما حبيبتى : ميوشة راحت فى الوبا يا خال..قصدى يا إيمو

طبعا بعد كمية التخيلات دى إستعنت على الشقا بالله وقررت أدور على كتاب العربى ..اللى لاقيته بين الأطلال ..وغالبا كان (بيسو أذية)- شخصية مهمة جدا فى حياتى كطالبة فاشلة ولازم هحكيلكوا عليها فى يوم من الأيام- بيعمل بورق الكتاب عصافير الجنة.المهم إنتشلت جثة الكتاب وقررت أتصفح الكتاب كده وأعرف أخر الأخبار.. وهنا كانت الطامة الكبرى..أن أن أن أأأن تش .. قصيدة الأطلال دى أولا مطلعتش بتاعة الفنان العاطشفى ريكو، دى أغنية لأم كلثوم ..ثانيا بقى وده الأهم إن المطلوب حفظة فى القصيدة الأمورة الكتكوتة دى حوالى 30 بيت وكلهم حفظ ..

أما شوية الدروس التانية دى فحدث ولا حرج ..قصص لأدباء عمرى ما سمعت عنهم فى حياتى يعنى مثلا (نجيب محفوظ ) فيه حد يعرف مين نجيب محفوظ ده يا جدعان؟؟ ولما سألت ماما عليه..ماما قامت مبرقالى تبريقة يوسف وهبى اللى دايما بتيجى بعديها جملته الشهيرة (ياالهول) وقالتلى (ده أعظم كاتب مصرى ..ده واخد جايزة نوبل فى الأدب ) ..طبعا بعد الجملة دى حسيت إنى وأنا واقفة طلعلى فجأة ودنين حمار فوق دماغى زى بتوع أفلام الكارتون ..ماما بتتكلم عن نجيب محفوظ كأنه جوز خالتى مثلا وشيئ بديهى إنى أعرفه .. فقررت إنى لازم أعرفه..لأ مش هكلم بيبا البت مخنوقة منى خلقة ربنا ...أكلم مين ؟؟ أكلم مين ؟؟ مفيش غيرها أكلم ميرو (عضو هام فى شلة الأنس).البت دى هى اللى بتفهمنى

أنا : ميرو حبيبة هارتى والله

ميرو : ميوشة المرووشة .. إزيك يا بت عاملة إيه ؟؟

أنا : أنا تمام ومية مية ..بقولك إيه يا ميرو أنا مزنوقالك فى حاجة كده ؟؟

ميرو : قولى يا حبيبتشى رقبتى

أنا : متعرفيش مين نجيب محفوظ ده ؟؟

ميرو : أه قصدك على الواد محفوظ بتاع السوبر ماركت اللى قدام الكلية ..ده واد رزل رزاله فى الرايحة والجاية بيعاكس البت إيمو وعمال يقولها أموت فى العيون الزرق..صحيح سمعتى النكتة دى .. مرة واحد راح سوبر ماركت وقال للبقال عندك حلاوة قاله لأ وهو عنده جوه ..نيهاهاها

أنا : ههههه.. يخرب بيت دماغك العالية يا ميرو ..يا بت لأ أنا قصدى نجيب محفوظ الكاتب اللى عندنا فى العربى ..ده ماما بتقولى إنه مشهور أوى وواخد جايزة كبيرة كده

ميرو : جايزة كبيرة إزاى يعنى؟؟ بلاى ستيشن مثلا؟؟

أنا : لأ باين حاجة إسمها جايزة نوبل .

ميرو : جايزة نوبل ..ممممممم.. أه ..إفتكرته ..ده كاتب إنما إيه.. أوعى وشك..عارفة يا بت يا ميوشة..الراجل ده ألف إيه؟؟ الفيلم بتاع سى السيد .

أنا : لأ يا شيخة ..سى السيد ..وأمينة..والسوارس.. وسيدنا الحسين نادانى فلبيته يا سى السيد

ميرو : لأ و سيبك من كل ده ..متنسيش أغنية طشت الغسيل الخالدة ( بس قولوا لأمى طب وأنا مالى)

أنا : قشطة عليكى يا ميرو .. أنا شكلى يا بت هحب الراجل ده أوى.

ميرو : ماشى يا جميل ..أى خدعة تانية .

أنا : تسلميلى يا قمر

ميرو : ماشى يا قطة يالا سكتك خضرا يا عسل

أنا : بالسلامة يا شربات .

ميرو : بصى تعالى نعمل زى فيلم ( الوسادة اللى مش لاقيه حد ينام عليها ) نعد واحد إتنين تلاتة وبعدين نقفل السكة..هههه سمعتى دى قبل كده ..مرة واحد-إتنين-تلاتة راحوا أمريكا رجعوا وان -تو -ثرى ...نيهاهاهاها

أنا : ههههههه ..والله مجنونة رسمى ... باى .

بعد ما خلصت مع ميرو.. حسيت إنى فى قمة النشاط والحيوية ..البت دى دايما بتدينى الباور اللى أكمل بيها اليوم ..المهم بعد بريك قعدت أغنى فيه ( طب وأنا مالى..طب وأنا مالى ) بصيت فى الكتاب وإكتشفت إنى حليت مشكلة نجيب محفوظ ..بس لسه مشكلة الأطلال اللى شكلها هتبقى على دماغى فى الاخر.. فبجد بجد قررت إنى أحفظها .. لأ عيب عليك تفكر فيا كده ..أنا قطعت عهد على نفسى إنى أفضل فاشلة دايما ..علشان كده أنا هحفظ أول 10أبيات وأى طلب يطلبه فى الإمتحان هقوم رزعاله الأبيات دول ويحمد ربنا بقى ويبوس إيده شعر ودقن على كده.

************
يافؤادى رحم الله الهوى .. كان صرحا من خيال فهوى
إسقنى وأشرب على أطلاله .. وأروى عنى طالما الدمع روى


***************
متهيألى إن باقى اليوم عدى على خير – طبعا لو تغاضينا عن فكرة إنى حفظت 6 أبيات بس مش10.. روحت الإمتحان تانى يوم وأنا مفيش فى دماغى غير حاجة واحدة مسيطرة على تفكيرى ..الأغنية العظيمة ( بس قولوا لأمى طب وأنا مالى ) .. طبعا لما روحت الكلية لقيت شلة الأنس كلها هناك متجمعين ( ماهم مش بيتجمعوا غير فى حاجتين ..فى المصايب والإمتحانات)
كل واحدة فيهم بتعمل حاجة غير التانية خالص .

خد عندك مثلا الأنسة بيبا ..طبعا ماسكة الكتاب ومبوزة وعمالة تهز راسها زى الفقى اللى بيعلم العيال فى الكتاب .. ومحدش طبعا يقدر يقربلها ولا يكلمها.

الأنسة إيمو طبعا كالعادة بتتعاكس ، أصل إيمو دى بعيد عنكم حاجة كده تسد النفس ..بيضة وعنيها ملونة وأمورة .. يع .. والمصيبة إن الناس بتعاكسها هى وسايبين الجمال المصرى الأصيل اللى زيي ( طبعا بدل جمال مصرى يبقى كله سواد فى سواد لون بشرة وعيون وممكن قلب كمان ) .

الأنسة ميرو أول ما روحت لاقيتها مستقبلانى على الباب وعمالة تغنى ( طب وأنا مالى ..طب وأنا مالى ) .. وقامت لحقانى بنكتة من نكتها الجبارة ..سمعتى دى يا ميوشة ..مرة واحد ماشى فى الصحرا لقى كنز ففرح أوى وقال الحمد لله لقيت الكنز فاضل الخريطة ..نيهاهاها.

الأنسة موها ( عضو جديد أول مرة تقابلوه ) قرقضت ظوافر إيديها كلها ودخلت على صوابع إديها ..والحمد الله لحقناها وهى داخلة على كوعها .. طيب يا ختى بدل التوتر ده كنتى ذاكريلك كلمتين ينفعوكى أحسن .. موها كمان عندها ميزة غريبة جدا إنها لازم تنزل من بيتها مرتين فى اليوم .. يعنى إيه؟؟.. يعنى تنزل وبعدين بعد ماتوصل الكلية تكتشف إنها ناسية أى حاجة فى البيت ..فتقوم راجعة تانى وتجيب حاجتها وبعدين ترجع الكلية تانى .. وده أصلا بيزود توترها أكيد ماهى متوترة أصلا .. أنا خايفة فى يوم من الأيام البت تنسى تلبس جذمتها مثلا وتيجى الكلية بالشبشب أبو وردة بتاع الحمام.. ربنا يكملك بعقلك يا موها يا حبيبتى.

نوصل بقى لختام الشلة الست ساسو ياعينى على ساسو ..الشهادة لله هى كانت جاية زعلانة شوية ..بس انا طبعا ما إقتنعتش إن ممكن فى يوم من ذوات الايام ساسو تزعل وتضايق نفسها علشان حتة إمتحان لا راح ولا جه ..وطبعا ما هنش عليا أشوف ساسو زعلانة كده ..ولما سألتها مالك يا ساسو ..ردت عليا وهى مقهورة والدمعة هتفر من عنيها.

" محفوظ المقرف خلص كرانشى اللى بالشطة اللى عنده ومش لاقيه غير كرانشى بالجبنة بس .. مليش دعوة أنا لازم أكل كرانشى بالشطة ..أنا كده مش هعرف أحل فى الإمتحان ..إلحقونى يا إخوانا ..صاحبتكم ماشية من غير إصطباحة .... عاااااااااااااااااااا"

دخلنا الإمتحان وكل واحد بيدعى لنفسه ولصاحبه .. وحلينا والحمد لله .. وكتبنا أى حاجة نعرفها.
وبعد ما طلعنا لاقيت بيبا كالعادة فرحانة ومنشكحة وقالتلى

بيبا : أيوة يا عم مين قدك ..ربنا سترها معاكى والدكتور جاب تسميع أول ست أبيات بس .

أنا : الله يخليكى يا بيبا متفكرنيش .. أنا لاقتنى نسيت الابيات أصلا ومكتبتهومش .

بيبا : يخرب عقلك ليه كده ياميوشة مش إنتى كنتى حفظاهم؟ يادى النيلة يعنى سيبتى السؤال ده فاضى

أنا : لأ طبعا ..كتبت

بيبا : كتبتى إزاى ؟؟ مش بتقولى مش حفظه الأبيات .

أنا : أيوة بس سلكت أمورى وكتبت اللى حفظاه .. ( بس قولوا لأمى طب وأنا مالى )

طب وأنا مالى ..طب وأنا مالى .. طيب يا غزالى

هناك 17 تعليقًا:

a jewel among women يقول...

قمر قمر قمر فوق الفظيع يا جيميل
موهبة فزة فى عالم الكتابة ربنا يحفظك من عيون ميرو و ايمو و ساسو و بيبا و موها ومن عينى يا قمر يوميات رائعه بجد ان شاء الله هتوصلى للى انتى عايزاة يا ميوش يا قمر
تقبلى مرورى ولكى منى كل تقدير واحترام

CrY2DaY يقول...

ههههههههه جميل قوى الامتحان دة على فكرة انا بقع فى نفس المشكلات دى . (بس قولى لآمى طب وانا مالى ) .
طريقتك فى الكتابة هى اكتر حاجة لفتت نظرى بتكتبى بإنسدال للافكار جميل جدا
سى يو

s@gi يقول...

السلام عليكم
انتى تقريبا نموذج لكتير منا
بس بتعرف تعبر عن نفسها .. وعنا
يعنى زى ماما كده
وأحمد عرابى بقه وبتاع
عجبتنى أوى الشله ببميزاتها الخلابه
بيبا بالإكتئاب العالى
ساسو بالكرانشى بالشطه
موها .. المتوتره
ولا الدماغ الكبيره أوى بتاعه النكت الحمضانه .. مش عارف الشله دى بتتوفر ازاى .. بجد يا بختك بيهم
نفسى فى شله كده دماااغ ..
معاكى فى كل لفظه
السيفليزيشن .. صورايخ المحشى
التنيمل .. اللزقه ف الكنبه
الأفلام العربى الحمضانه
وشويه حاجات تانيه كده كتير
بس .. على الرغم من الاسلوب الساخر الخرافه بتاعك
شيق جدا .. خفه دم طبيعيه مش مجرد استخفاف
فى نقطه كده .. بلاش تقللى من الرمزو بتاعتنا . .بالسخريه كده
وتستخدميهم أدوات من باب
بص حواليك .. وهتلاقى حاجات تثير ضحكك
يعنى نجيب محفوظ .. صلاح الدين الأيوبى
رموز جميله .. وأكيد نفخر بيها
وبحب أقرى لنجيب أوى
انما حفظ النصوص بقه
والشعر
ده ربنا يكون ف عونك
6 أبيات .. ده انتى فحيته وش يعنى
بجد مدونه تجبرك انك تضيفها للمفضله
ربنا يباركلك .. بس كل ده ف ترم واحد
ومادتين ..
وجدول عبقرينو .. اينشتيان كان هيغير اكيد منو
E= mc2
بردو .. كنت بارع ف حوار الجداول ده بس يلا
ياريت بقه تكملى المآساه بتاع السنتين
والترم التانى
واوبقى طمنينا ع النتيجه
والورقه اتبلت ولا فضلت ناشفه
طب وانا مالى ... اهو كلو من ده
سلام كتير ومربع

maiosha يقول...

السلام عليكم
أولا أنا بحب أشكر كل واحد علق على مدونتى المتواضعة لإن ده كان تشجيع كبير جدا ليا
ثانيا شكر خاص ل s@gi إنت مش ممكن تتخيل الرد بتاعك أثر فيا إزاى بكل ما فيه من نقد سلبى وإيجابى .. وطبعا شيئ يشرفنى إنك تتابع المدونة بتاعتى لإنى بكتب الكلام ده لناس زييك إنت ..ناس حاسة بالمعاناه ومتفهمة الظروف .
وأوعدك إنى إن شاء الله هحاول أصلح أخطائى اللى قولتلى عليها وأحاول أطور من نفسى.. ومن إسلوبى
ولتانى مرة ألف شكر لكل واحد دخل عندى المدونة ويشرفنى بالزيارة والتعليق.

دكتور بهــدوء يقول...

بصي
انتي موهوبه بجد
بس اقري شويه لنجيب محفوظ
وكتبي كتير عشان احنا عاوزين نقرالك ع طول مش بس


عشان ان شاء الله نشوفك واخده جايزه نوبل زات يوم

لان انتي اسلوبك جميل

واحدة مفروسة يقول...

شلة الانس ديه لاسعه جداا ...ايه الروقان ده.....بس الاسلوب فعلا ظريف...بتكتبى باسلوب ساخر لطيف.....بس بزمتك ماتعرفيش مين نجيب محفوظ؟حرجعلك تانى حاخد الاسانسير و انزل اشوف المدونه من اولها

واحدة مفروسة يقول...

انا رجعت تانى اههه
اسلوبك حلو جدا ..اكملى سيرى على بركة الله يانورمندى تو ....قصدى سا مايوش

دكتور بهــدوء يقول...

اقتداءا بالاخت مفروسه
انا كمان عديت ع البلوج بسرعه
بس يا ميوش
انتي هايله
ايه خفه الدم دي


كملي كملي كملي

عبده الرايق يقول...

مين نجيب محفوظ ؟؟؟؟؟؟؟؟؟؟؟؟
يا خرابى
مش عارفه مين نجيب محفوظ ؟؟
ربى رحماك ربى
حد يفوقنى يا عالم
العيب مش عليكى ..العيب على التعليم البايظ فى البلد
نجيب محفوظ يا ابله هداف كاس افريقيا فى السبعينات ولا عب بالنادى الاهلى
ربنا يقدرنا وننور معلوماتكم

Miss. Sosa يقول...

السلام عليكم

دنك خفيف بجد واسلوبك ساخر جميل

عجبتني اوى قصيدة الطشت الخالد :D

بس بلاش موضوع طالبة فاشلة ديه

انا عندي ارتكاريا من كلمة فشل مابطقهاش ولا هى بتطقنى

تحياتى كتيرر

سلاااام

صبرني يارب يقول...

يخرب عقلك هههههههههههههههههههههههههههه
فكرتيني بايام زماااااااان هييييييييييييه كانت ايام والله

بس ايه ده بتهرجي مش عارفه تحفظي الاطلال دي جميله يا شيخه حرام عليكى ده انا كنت حافظه منها شويه كده محبه يعنى مش دراسه ولا بتاع كنتى اسمعيها لام كلثوم
انا كنت فى ثانوي حافظه اراك عصي الدمع وراام كلثوم هيييييييييه كانت ايام باقولك

بس لحد يوم الامتحان ولسه جايين تحفظوا ؟؟

الله يمسيها بالخير واحده صاحبتى كانت جايه قبل امتحان البورصه بيومين تقولي الا قوليلي هى البورصه دي الا اونا الا دو الا تريه كده يعنى ولا ايه ؟؟؟؟!!!!

جميله انتى وشلة الانس واسلوبك خفيف وجميل جووووووو اون يا جميل

maiosha يقول...

دكتور بهدوء
..................
أنا أخد جايزة نوبل .. جايزة نوبل مرة واحدة .. أنا أخرى أخد جايزة نوفل للمعوقين

maiosha يقول...

واحدة مفروسة
......................
لأ متقلقيش أنا عرفت مين نجيب محفوظ خلاص.. عبده الرايق ربنا يخليه نورنى وعرفنى هو مين ؟؟
شكرا على زيارتك لمدونتى المتواضعة ويارب تتكرر

maiosha يقول...

عبده الرايق
....................
بصراحة مش عارفة أرد عليك وأقولك إيه.. إنت خليتنى فى نص هدومى .. على العموم إنت مرجع رائع جدا وإن شاء الله بعد كده لازم أسألك عن الشخصيات المهمة دى .. ده إنت طلعت موسوعة يا أخى
ربنا يزيدك من علمه

wa7ed 2ensan wnsan يقول...

سلام عليكم يا حاجه ميوشه

مش عارف تحظي الاطلال الاطلال مش عارفه تحفظيها الاطلال الا طلال طلال دا واحد صاحبي على فكره طول ماهو ماشي عمال يقول الست غنتلي الا طلال الا طلال

اما بالنسبه للقصيده الخالده الطشت الخالد طب وقولوا لامي طب وانا مالي طب وانا مالي احلى ما في الاغنيه طشة الملوخيه اللي هيا كانت بتخرطها فظيعه اكيد دا هو اللي خلاكي تحبي الاغنيه بالمناسبه في اكشن بالشطه احسن من كرانشي بالشطه نصيحه لصاحبتك ساسو وابعدوا عن محفوظ بتاع كرانشي دا احسن

Randa El- Adawi يقول...
أزال المؤلف هذا التعليق.
Randa El- Adawi يقول...

انا فاكرة ان شفت المدونة زمان ومكنش فى وقت اقرا كلامك.
وقد حان الوقت لذلك يا فتاة!

اسلوبك مميز والاداء رائع
فكرتينى بجملة عبقرية بتتقال فى المواقف دى ودا مدح طبعا ;)

يا فاشل ...يا فاشل!p: