نداء إنسانى

بسم الله الرحمن الرحيم

إخوانى البلوجرية .. أصحابى وأحبابى فى كل مكان

أى حد على سطح الكرة الأرضية أعرفه أو معرفوش

شلة الأنس بقيادة أفشل أعضائها " ميوشة " تناشدك من صميم وجدانكم

إنكم تفتكروهم بدعواتكم

وبتعتذر عن الفترة اللى جاية لإنها إن شاء الله هتكون فترة إنقطاع تام

نظرا لمرور الشلة كلها بفترة عصيبة جدا .. فترة إمتحانات الترم بعيد عنكم وعن السامعين

هتوحشووووووووووووونى جدا

أشوفكم فى أجازة نص السنة إن شاء الله

إدعولنا الله يخليكم

سلام عليكم

تاج السعادة

ياااااااااااااااااااه ...............عدى شهر بحاله من غير ما أكتب .. بجد وحشتونى جدا جدا .. بس أقول ايه بقى كنت مشغولة موت.. اصل إحنا وصل عندنا فى عيلتنا المتواضعة فرد جديد .. بس واد يجنن زى العسل .. كان واخد كل وقتنا الفترة اللى فاتت دى .. لا لا أنا مش عايزة اسمع مبروك حاف كده ..أنا عايزة عيدية لو سمحتم ولحمة كمان

كل سنة وانتوا طيبين بقى .. والعيد فرحة ... مااااااااء

****************

النهاردة ان شاء الله هجاوب على تاج بعتهولى .. محمد غالية .. اللى للأسف معرفتش أجاوبة غير دلوقتى .. وأنا بجد بعتذرله جدا جدا على التأخير

السؤال الأول:ماهى السعادة من وجهة نظرك؟

-بحس بقمة السعادة يوم الجمعة .. لإنى مش ورايا كلية ولا سكاشن .. ومش مضطرة إنى أظبط الموبايل ويرن وأقوم اطفيه وانام تانى ويضيع منى السيكشن

السؤال الثانى: كيف تصل إلى السعادة؟

-اول ما أخلص الامتحانات بتاع كل سنة

السؤال الثالث: هل السعادة وهم أم أنها حلم صعب؟

-السعادة دى وقت وبيعدى وخلاص.. وبعد ما يخلص ندور عليه تانى .. علشان يجى ويعدى تانى .. وهكذا

السؤال الرابع: هل السعادة طريق للنجاح ؟وضح؟

-بالنسبة للفشلة اللى زى أكيد لأ .. بس ممكن نعتبر النجاح طريق للسعادة

السؤال الخامس: ماهى أكثر اللحظات التى شعرت فيها بالسعادة؟

-بالنسالى لما طلعت نتيجة سنة أولى واكتشفت انى نجحت وهروح سنة تانية

السؤال السادس:هل ممكن أن تحقق كل شىء؟

-أكيد لأ طبعا .. يعنى أنا مثلا نفسى فى دراسة من غير امتحانات .. وأكيد مش هقدر أحقق ده غير لما ابقى وزيرة التربية والتعليم

السؤال السابع: السعادة تجعلك تقبل على الحياة أم لا؟

-أحنا مقبلين على الحياة بأى شكل .. غتاتة يعنى

السؤال الثامن: هل أحسست يوما انك وصلت لقمة السعادة؟

-اى وقت بحس فيه بالسعادة .. اكيد ده بالنسبالى بيبقى قمة السعادة

السؤال التاسع: لماذا تمر أوقات السعادة بسرعة؟

-مش عارفة بصراحة.. بس طول عمرى بعتبرها قلة أدب من السعادة

السؤال العاشر: هل ترى السعادة فى التدين؟

-إيه الإحراج ده؟؟.. بس أكيد كل ما بقرب من ربنا .. كل ما بحس بالسعادة أكتر.. لإن مفيش سعادة أكتر من سعادة قربك من ربك ومعرفتك لدينك

السؤال الحادى عشر: هل أنت متفاؤل وعندك أمل؟ وضح؟

-أكييييييييييييييييد.. أنا مش فاضلى فى الدنيا دى غير الأمل.. ودايما بعتبر نفسى من اكتر الأشخاص المتفائلين اللى قابلتهم فى حياتى

السؤال الثانى عشر: إذا شعرت بالحزن ماذا تفعل؟

-أنا وشلتى الفاشلة كل ما نزعل .. بنااااكل.. بجد والله .. علشان كده صاحب محل زيزو النتن بيدعى ربنا كل يوم إننا نزعل .. مكسب ليه برضة

السؤال الثالث عشر: هل يستمر معك الحزن فترة ام ينقضى فى الحال؟

-فى الحال .. لمجرد إنتهاء سبب الحزن.. زى المحاضرة مثلا..

السؤال الرابع عشر: ما رأيك فى الأفراد المتشائمين؟

ياااااااااااى.. لأ بجد ليه أتشائم .. لما ممكن أبقى متفائلة .. وبعدين لما أتشائم هستفاد إيه يعنى .. غير ان وشى هيكرمش وهعجز بدرى ..ربنا خلقنا فى الدنيا للسعى .. ودايما بحس إن التشاؤم بيوقف السعى ده .

أخر حاجة بقى التاج ده هدية منى لأى حد عايزه .. بس إبقوا بلغونى إنكم جاوبتوه علشان أشوف مقاييس السعادة عندكم

وكل سنة وإنتوا طيبييييييييين

دعى شعرك ياخد نفسه

بعد وقوف فى الصيدلية لحوالى 4 ساعات روحت البيت وأنا مجهدة إجهاد فظيع .. أسمع برضة حد يقولى " ليه يعنى ؟؟ ده إنتى معملتيش حاجة غير إنك كنتى قاعدة بس" .. أرد أنا بقى وأقول لأ يا رزل .. أنا كنت قاعدة على الكتب والمكتب ده فى الدرج .. والدرج يعنى الفلوس .. يعنى أنا اللى مستهدفة فى القعدة دى كلها .. لو أى حرامى دخل علينا الصيدلية هيطلع المطواة فى وشى انا ( باين الحرامية بقى مفيش وراهم غيرى الأيام دى)... روحت البيت يادوب كلت وإتقلبت نمت فى ساعتهاا خخخخخخخخخخ

تانى يوم صحيت وعلى مضض (غالبا مضض ده جوز مضمضة) .. وقمت لبست وإتشيكت .. أنا كان مالى ومال الشغل يعنى الأجازة اللى الواحد المفروض بيصحى فيها المغرب ولا حاجة أصحى أنا الضهر ، والله ده حرام ..المهم نزلت الصيلية .. ولما وصلت هناك لاقيت بابا كان بيعمل حاجات فى المعمل جوة.. وكانت الصيدلية فاضية وقتها

أنا : إستعنا على الشقا بالله .. يافتاح ياعليم يا رزاق يا كريم

البيج بوس : إيه يا معلم حنتيرة.. جاى تفتح ورشتك بدرى كده ليه؟؟ ده العصر لسه مأذنش

انا: أكل العيش مر يا أبو ميوشة .. وربنا بيقول إسعى يا عبد وأنا أسعى معاك

البيج بوس : وهو إنتى كده بتسعى يا حبيبتى .. ده إنتى بتتمخترى .. بتزحفى .. حرام عليكى يا شيخة

أنا : شوف يا بابا أنا فى أجازة .. وبعدين انا مقدرش أنزل قبل الغدا أبدا أبدا

البيج بوس : خلاص لو هتنزلى متأخر كده يبقى هتسهرى معايا الليل كله

أنا : عاااااااااااا.. بس أعمل حسابك هيبقى فيه أوفر تايم

البيج بوس : .........................

فضلت قاعدة هناك أتفرج على الدنيا .. وكل شوية يجى عيان ويمشى عيان .. أصحاب بابا وزمايله .. أشكال كتير من البشر مكنتش أتوقع إنى أقابلها أبدا .. ياعينى عليك يا بوس ده إنت طلعت بجد حمال القسية .. فبعد كام عيان كده ورا بعض الصيدلية رجعلها الهدوء تانى .. وحبيت أعمل فى بابا حركة جدعنة كده فقولتله " تشرب شاى" .. قالى " ياريت" .. وفى طريقى للمعمل جوه علشان أعمل شاى .. شميت ريحة غريبة جدا .. ريحة فكرتنى ب"أسنس شادية " بتاع أحمد زكى .. طول عمرى بتفرج على الفيلم ده ونفسى أعرف إيه الريحة دى.. وأخيرا عرفتها

تماسكت شوية وسندت على الحيطة لإن تأثير الريحة دى كان قوى اوى .. وبصيت ورايا تانى علشان اعرف الريحة دى جاية منين؟؟ لاقيت واحدة داخلة الصيلية ضاربه شعرها أحمر ومسيباه علشان تعاقب بيه خلق ربنا اللى مش بيغضوا بصرهم .. لأ ومش بس كده دى حتى البرفان الرائع ده كمان علشان تبقى الحكاية(صوت وريحة) .. مش دى المشكلة .. المشكلة اللى بجد إنها سابت بابا اللى كانت جاتله صاعقة من هول ما رأى وجاتلى أنا وقاعدت تنادى عليا " لو سمحتى يا أنسة "

أنا : مين انا؟

هى : أيوة إنتى

أنا : لأ أنا مش دكتورة .. أنا هنا بكنس الصيدلية

هى : نيهاهاهاهاها.. شربات .. مع إن مش باين عليكى .. نيهاهاها

أنا : خلاص بطلى ضحك الله يكرمك أنا أسفة .. الدكتور واقف يعنى

هى : حضرتك الدكتور .. على فكرة إنت فيك شبة من حسين فهمى

البيج بوس : متشكر يا فندم .. أخجلتم تواضعنا

أنا : تواضع مين اللى خدلتيه ده يا ست إنتى إنتى بتبصبصى لأبويا

هى : هو باباكى .. مع إنه شكله مش مرتبط

أنا بصيت على بابا .. لاقيته هو هو متغيرش .. شكله مش مرتبط إزاى .. ده شكله مرتبط رباط أزلى أبدى .. المهم خدت بابا على جنب كده وقلتله يروح هو يعمل الشاى لغاية ما أشوف الست دى عايزة إيه .. وقمت راجعلها تانى

هى : لو سمحتى أنا كنت عايزة شامبو ( ليف سلك ) للشعر الدهنى

أنا : حاضر يا مدام .. بس هو لحضرتك

هى : أيوة ليا

أنا : شوفى حضرتك إختيارك للشامبو ده ممتاز إنتى مينفعكيش غير شامبو ليف سلك فعلا .. أما حكاية شعر دهنى دى فإفترى .. إنتى شعرك جاف وناشف وحالته حالة .. يعنى محتاجة شامبو للشعر الجاف

هى : انا شعرى جاف؟؟

أنا : أيوة طبعا دى حاجة يحس بيها اى كفيف .. وبعدين هو أنا بشتمك يعى إيه المشكلة لما شعرك يكون جاف؟

هى : أوووه على فكرة إنتى متعبة أوى هتيلى الدكتور اللى شبة حسين فهمى ده أتفاهم معاه

أنا : لأ معلشى ملكيش دعوة بحسين فهمى ده .. أصله عنده مسلسل وراح يكمل تصويره .. هتخدى للشعر الجاف ولا لأ؟

هى : لأ .. يا ساتر ده أنا هتحجب ولا اخد منك حاجة .. يا ساتر

الست قامت سايبانى وماشية.. ولا كإنى كلبة .. ولما بابا طلع سألنى عملت إيه ؟؟ وحكيتله على اللى حصل .. المهم قعد طبعا يهزئنى علشان مسمعتش كلامها ومجبتلهاش اللى هى عايزاه .. وإنى لو إستعملت الموضوع ده مع كل الناس هنقفل الصيديلة بعد ساعة الا ربع والكلام ده كله

أنا : يا بابا ما تضايقش بص للجانب المشرق فى الموضوع

البيج بوس : إللى هو إيه؟؟

أنا : إنى عقدت الست دى .. وهتسيبنى من هنا وتروح تتحجب من هنا .. يالا خدنا ثواب.. دى البشرية كلها هتدعيلى

البيج بوس : يا رب صبرنى .. خلفتى يا رب مش خلفة حد تانى .. أنا اللى عملت كده فى نفسى

قطيعة .. محدش بياكلها بالساهل

فى الأول لينا كلام تانى

.............................

فى الأول أحب اقدم كل شكرى وإحترامى وتقديرى للفقيد إلى رحمة الله الكمبيوتر بتاعى .. اللى الطب الشرعى أثبت إنه من ساعة ما إتكتب عليه البوست بتاع حلم الحرامى وإنى عايزة أخلص منه وهو حالته النفسية فى النازل .. لغاية ما قرر يعلن إعتزاله وينفجر .. والهارد يتحرق بكل اللى عليه .. بحلوه ومره وكل ذكريتنا الجميلة

وكل كيمو وإنتوا طيبين

....................................

بعد ما أول يوم فى الأجازة عدى وراح.. وإفتكرت إن الملل خلاص هيبدا لمدة إسبوعينلغاية ما يبدأ الترم التانى .. إكتشفت إن الحياة مش بمبى بمبى على رأى طنط (سعاد حسنى) .. وإن البيج بوس كان محضرلى فى دماغه مشاريع تانية خاااااااالص

تانى يوم الأجازة على الغدا لاقيت بابا جايبنى من فوقى لتحتى بعينه وبيقولى

البيج بوس : ياااااااااه .. كبرتى يا ميوشة

أنا : أيوة يا بابا .. ما أنا عايشة فى الدنيا بقالى كتير

البيج بوس : وأنا برضة كبرت أوى يا ميوشة

أنا : معلشى يا بابا .. ما إنت برضة كنت شاب وكنت عامل العمايل يعنى

البيج بوس : وخلاص مش قادر وعايز ارتاح

أنا : إيه يا بابا المقدمة دى كلها .. عايز إيه يعنى؟

البيج بوس : يا حبيبتى أنا تعبت من الشغل وعايز أرتاح

أنا : نعم .. طيب ولما تبطل شغل يا بابا أكل أنا منين؟؟

البيج بوس : يا ساتر يا رب

أنا : بس اقولك يا بابا فكرة حلوة .. مش إنت عايز ترتاح ؟ إيه رأيك تبيع الصيدلية بتاعك دى .. وناخد فلوسها ونعيش بقى

البيج بوس : أبيع إيه يا بت إنتى .. هى دى أفكارك المنيلة؟ طيب ما فيه فكرة أحسن

أنا : هى إيه؟

البيج بوس : إنك تنزلى معايا فى الأجازة تساعدينى

أنا : نعم .. إزاى يعنى ؟ أنا مدرسة

البيج بوس: مدرسة إيه؟ إنتى صدقتى ؟ هو علشان حضرتى ترم فى كلية تربية تبقى خلاص مدرسة

أنا : بس يا بابا أنا مش بفهم حاجة فى الكيميا

البيج بوس : يا بنتى كيميا إيه ؟ هو أنا بقولك روحى ساعدى أحمد زويل .. الموضوع أبسط من كده بكتير .. ده أنا بقالى 30 سنة صيدلى .. ومرنت صيادلة بعدد شعر راسك .. مش هعرف أعلم بنتى؟؟

أنا : والله حرام .. يعنى الأجازة اللى الواحد واخدها علشان يروش ويعيش بقى أخيرا .. أنزل أشتغل فيها

البيج بوس : يا نهار أبيض .. هو إنتى كنتى لسه محتاجة الأجازة علشان تعيشى .. اومال بتعملى إيه طول الترم ده .. ده أنا مشفتكيش ماسكة كتاب غير ليلة الإمتحان .. وهم يادوب ساعتين مفيش غيرهم

أنا : عااااااااااااااا .. مليش دعوة .. مش هروح الصيدلية دى .. عااااااااااااااا.. أنا مش عايزة أشتغل

البيج بوس : على فكرة .. أنا هديكى مرتب

أنا : هنبتدى الشغل إمتى يا باشا؟؟

*******************

تانى يوم بابا صحانى الساعة 2 الضهر على وشى علشان أنزل الصدلية لإنه كان مستنينى هناك من الساعة 9 الصبح .. وطبعا بعد كورس التهزيق لبست وإتشيكت .. أه دكتورة بقى .. وقمت نزلت الصيدالية .. وهناك بقى

أنا : بابا الصيدلية دى عاملة كده ليه؟ دى لونها يجيب المرض .. أنا عايزة أعملها نيو لوك

البيج بوس : نعم !!!!

أنا : أيوة أنا عايزة أعمل الحيطان قطيفة حمرا .. وأدهن علب الدوا روز فى موف

البيج بوس : تدهنى الدوا؟؟ طب ما تغيرى لونى بالمرة

أنا : لا يا بابا إنت كده أمور .. بس هنعمل تعديلات بسيطة .. عايزاك تعمل دقنك دوجلاس .. ونلبس أنا وإنت يونيفورم .. هنلبس ابيض فى أحمر

البيج بوس : طيب إيه رأيك نحط على القميص أسامينا كمان ونمسك فوط ونقدم الدوا على صوانى .. إخرسى يا بت إنتى خالص .. وتقعدى هنا زى الكرسى ده .. وتشوفينى وتتعلمى وإنتى ساكتى .. إنتى فاهمة ولا لأ؟؟

أنا : خلاص يا بابا الحق عليا .. كنت عايزة أخليلك الصيدلية روشة

البيج بوس : صيدلية مين بقى .. دى بقت ديسكو

**********************

من هنا بقى هنقضى كام يوم مع مغامرات الدكتورة ميوشة على ما الأجازة تخلص والترم التانى يبدأ .. يا مسهل يا رب

أول يوم أجازة

الأجازة .. أول يوم اجازة.. هيه هيه هيه
عارف شعور لما تبقى مستنى حاجة بقالك كتييير أوى .. حاجة متوقع إنها فيها الراحة والمتعة وأى حاجة حلوة .. وفجأة الحاجة دى بتيجى أخيرا .. ياااااااااااااه.. عارف بتحس بإيه؟؟؟ بتحس ب.. بتحس ب..هههههه تصدقوا ولا حاجة .. بجد والله ولا حاجة زيي تمام فى أول يوم اجازة

اليوم ده إبتدى بصحيانى من النوم على حلم غريب أوى .. هو ممكن يكون مفزع شوية .. بس بصراحة أنا قمت من النوم مبسوطة ، حلمت بإنى كنت بذاكر تانى الدراما -بعد الشر عليا طبعا- والحرامى جه تانى برضة .. بس المرة دى نزلى

الحرامى : سلام عليكم يا أستاذة

رفعت راسى علشان اشوف مين اللى بيكلمنى ده .. لاقيت راجل واقف قدامى .. راجل عادى جدا .. بس اللى فعلا مش عادى إن رجله كانت كبيرة اوى فكرنى بفطوطة بتاع زمان .. كنت حاسة إنه زى ما يكون واقع من كاريكاتير .. المهم

أنا : وعليكم السلام .. نعم .. مين حضرتك؟

الحرامى : محسوبك الحرامى حضرتك

أنا : بجد والله .. أنا طول عمرى نفسى أشوف حرامى .. بس مش وقته أنا ورايا مذاكرة إتفضل عايز إيه؟؟

الحرامى : هو بصراحة أنا كنت جاى أسرق بس ملاقتش فوق غير تليفزيون ومروحة وسجادة .. فقولت أنزل أكمل سرقة تحت لاقيت حضرتك .. فأنا حاسس إنى المفروض-بعد إذنك يعنى- أقتلك

أنا بقى قومت من مكانى بسرعة ومسكت زمارة رقبته وقولت :

أنا : نعم نعم يا خويا .. بقى عايز تقتلنى دلوقتى بعد ما ذاكرت حوالى نص المسرحية .. ده إنت نهارك زى وشك .. لو كنت جيت قبل ما أذاكر كنت قولت ماشى ممكن .. إنما دلوقتى .. بعينك

الحرامى : لأ طبعا يا أستاذة أنا مش هقتلك بس عايزك تساعدينى .. يعنى أنا مثلا ممكن اسرق إيه تانى .. ساعدينى الله يسترك أنا بجرى على 10عيال

أنا : أصل إنت - أنا أسفة يعنى - عبيط .. جاى تسرق شقة فاضية .. ده غير إن المروحة أصلا بايظة ده إنت هتصرف على تصليحها أكتر من تمنها.. بص يابنى إسمعنى وركز معايا .. الشقة اللى جنب دى على طول .. شقتنا ، إدخل من السطح على المنور وأول أوضة تقابلك إدخلها .. معايا؟؟

الحرامى : معاكى يا استاذة .. معاكى

أنا : هتلاقى جوه الأوضة البت نونا الرخمة إعمل فيا جميلة وإخنقها

الحرامى : عنيا

أنا : وبعدين هتلاقى هناك كمبيوتر معوق كده خده الله يكرمك .. يمكن بابا يحن عليا ويجيبلى كيمو جديدولا حاجة .. ولو لاقيت حاجة تانية فى سكتك خدها حلال عليك بس بالنص .. فاهم ولا لأ ؟؟

الحرامى : أيوة يا أستاذة فهمت .. ألف شكر ربنا يكرمك .. ربنا ينجحك

أنا : نيهااهاهاهاها .. مكتوبالك يا بت يا ميوشة كيمو جديد

ياااااااااااااااااه .. طيب بالله عليك مش حلم جميل جدا .. بعد الحلم ده بقى إبتدى اليوم .. ولا قيتنى لسه متأثرة بالدراما

المشهد الاول : الساعة 9 الصبح و أنا عمالة بتطط فى الشقة كلها وعمالة أقول " الأجازة جت .. الأجازة جت "

المشهد التانى: الساعة 1 الضهر ورجلى وجعتنى من التنطيط .. قعدت على الكنبة قدام التليفزيون وأنا عمالة أقول برضة " الأجازة جت الأجازة جت ".. لغاية ما نمت مكانى

المشهد التالت : وأنا بتغدا وبقى مليان أكل وعمالة أقول لمااما وبابا ونونا " الأجازة جت .. الأجازة جت"

المشهد الرابع : بعد الغدا دخلت الأوضة بتاعتى لاقيت الكتب بتاع الكلية طلعتلها لسانى وأنا بقول " الأجازة جت .. الأجازة جت " .. مسكت سماعة التليفون وأول ما الرقم رد قولت

أنا : الأجازة جت يا بيباااااااااااااااااااااااااااا

بيبا : يا فرحتى .. حمد لله على السلامة

أنا : تعالى نحتفل بقى .. يالا نخرج

بيبا : أنا مش فاضية يا حبيبتى .. أنا مع أختى

أنا : بقى كده طب هكلم ساسو ونخرج

بيبا : هاهاها فى إسكندرية يا قطة .. وموها عندها برد وميرو سافرت مكان مجهول

أنا : جرى إيه يا بت إنتى .. إنتى حالفة تغمينى ولا إيه ؟؟ طب وإيمو؟؟

بيبا : لأ معرفش

أنا : طيب سلام بقى ألحقها قبل ما تروح فى حتة هى كمان

ومع إيمو

أنا : إيمو .. كويس إنى لاقيتك.. تعالى نخرج يا إيمو

إيمو: نعم يا حلوة .. نخرج .. ده أنا ما صدقت أرتاح من خلاقكم .. بت إنتى الإسبوعين الأجازة دول مش عايزة أشوف وش أى حد فيكم نهائى .. فاهمة ولا لأ .. اشوفك الترم التانى يا حبيبتى

أنا : عودة الندلة

المشهد الأخير : وانا داخلة انام بعد يوم من الملل القاتل والتليفزيون الخنيق .. والصحاب الأندال

أنا : ماماااااااااااااا

مااما حيببتى : أيوة يا ميوشة .. عايزة إيه؟؟

أنا : أنا عايزة أروح الكلية .. عاااااااااااااااااااااااااااا

فى بيتنا ... حرااااااامى

"يا ترى يا ماما عايزانى فى إيه؟"

الجملة دى فضلت تلعب فى دماغى طول ما إحنا ماشيين رايحين زييزو النتن.. وأول ما وصلنا هناك كلمت ماما على طول.. بس اللى بجد إستغربتله صوت ماما الغريب.. كان صوتها كإنها كانت بتعيط

أنا : أيوة يا ماما يا حبيبتشى

ماما حبيبتى : أيوة يا ميوشة إنتى بتتكلمى كده ليه؟

أنا : معلشى يا ماما أصلى باكل.. المهم فيه إيه؟

ماما حبيبتى : مفيش يا ميوشة .. أنا بس بطمن عليكى .. إنتى كويسة؟؟

أنا : الحمد لله باكل زى الفل أهو.. مالك يا ماما .. أوعى يكون فيه حد كلمك وقالك إنه خطفنى وعايز فدية ولا حاجة

ماما حبيبتى : هو حد يقدر يخطفك .. ده هو اللى هيدفع لنا فلوس علشان نرضى ناخدك تانى.. بس الحمد لله بدل الظرف شغال عندك كده تبقى كويسة

أنا : طب مش هتقوليلى فيه إيه بقى؟

ماما حبيبتى : يووووووه.. إنتى بتتكلمى كتير كده ليه .. رصيدى هيخلص

أنا : يا ستى أنا اللى متصلة

ماما حبيبتى : ماهو لما رصيدك بيخلص أنا اللى بشحنلك.. مع السلامة بقى وخلى بالك من نفسك

إيه ده إيه ده.. من إمتى دش الحنية ده يا ماما .. هو الشبشب أعلن إعتزاله بجد ولا إيه؟؟

*****************************

بيتى حبيبى .. اللى بحس فيه بالدفا والأمان.. أه صحيح بمناسبة الدفا .. البيت المرة دى كان فيه دفا زيادة عن اللزوم .. لا لا مجبناش دفاية ولا حاجة.. بس البيت كان فيه ناس كتير اليوم ده ، أول ما دخلت الصالة لاقيت ماما قاعدة فى الصالة هى وإتنين من خالاتى وولاد خالاتى معاهم .. وبابا قاعد متنرفز .. من الأخر القاعدة كده شكلها ميطمنش

أنا : سلام عليكم

صوت جماعى: سلام عليكم ورحمة الله وبركاته

أنا : متجمعين عند النبى إن شاء الله .. إيه اللمة الجميلة دى.. ده أنا لو قعدت سلمت عليكم وبوست واحد واحد بقى هيورم

خالتى (1) : بقى ليكى نفس يا ميوشة تهزرى فى الظروف دى؟؟

أنا : ظروف إيه؟؟ هو حد مات؟؟

خالتى(2) : بعد الشر عليكى يا حبيبتى

أنا : عليا !!! هو انا مت وأنا مش واخدة بالى ولا إيه؟

البيج بوس : بس يا ميوشة .. قفلى على السيرة دى .. إدخلى يالا غيرى هدومك

دخلت على أوضتى - يا سلام عليكى يا ميوش مؤدبة من يومك وبتسمعى الكلام- لاقيت الواد عمور إبن خالتى عمال ينادى عليا

أنا: عايز إيه يا واد إنت ؟ مش كفاية أمك موتتنى من كلمتين

عمور ( وهو مسخسخ من الضحك) : ما إنتى مش فاهمة .. مش إنتى كنتى بتذاكرى إمبارح فى بيت جدى؟

أنا : أيوة مظبوط كل ده علشان كنت هناك إمبارح ؟ طيب ما أنا هناك على طول إيه المشكلة يعنى؟

عمور : تعالى معايا وأنا أقولك

روحنا أنا وعمور على بيت جدى وهو كالتالى .. البيت كله 3 أدوار الدور الأول صالونات وسفرة وحركات من دى.. الدور التانى أوض النوم بسلم داخلى للدور الأول .. أما الدور الأخير فهو السطح اللى فيه بقى اللعب والمرجيحة

روحنا البيت لاقيته عادى جدا مفيش فيه حاجة مش طبيعية .. لكن لما طلعنا الدور التانى لاقينا المأساة..
أولا الأوضة الكبيرة بتاعة جدو الله يرحمة كانت مفتوحة على الأخر وكل حاجة فى الأوضة مقلوب كيانها .. أنا كنت حاسة إنى بتفرج على برنامج خلف الأسوار .. وكنت أنا الكاميرا فى مسرح الجريمة

طبعا الدور التانى ده بعد وفاة جدو وتيتا نادرا ما بنطلعه فلما طلعنا أنا وعمور أول حاجة خدت بالى منها أثار رجلين كوتشى مقاسه لا يقل بأى حال من الأحوال عن 49 أبدا أبدا.. يا لهوى لو دى رجل بنى أدم أمال جسمه عامل إزاى؟
المهم عمور خد دور المحقق كونان وقعد يشرحلى الموقف

عمور :شوفى يا ستى فيه واحد نزل من السطح على المواسير لغاية ما وصل لشباك أوضة جدو .. وبعدين كسر الشباك بالطوبة دى زى ما إنتى شايفة .. ودخل الأوضة .. وكان فاكر إن فيه فلوس علشان كده مطلع كل الإدراج والدواليب بالمنظر ده

أنا : يا عم بطل برنامج لكى يا سيدتى ده .. لخص .. سرق إيه؟؟

عمور : سرق التليفزيون والسجادة الكبيرة والمروحة .. وبعدين فتح باب الدور هنا وطلع السطح من السلم بمنتهى الإحترام .. ولا كإنه صاحب البيت .. وكل الشواهد بتقول إن الكلام ده حصل إمبارح بليل لإن خالتو اللى هى مامتك كانت هنا إمبارح الصبح ومكنش فيه حاجة .. ميوشة إنتى سرحانه فى إيه؟؟

(فضلت قاعدة هناك كام ساعة كده لغاية ما سمعت صوت كده غريب .. انا قولت أكيد دى البت نونا الرخمة جاية ترخم عليا هنا كمان
أنا : يا نووووونااا .. إمشى من هنا أحسنلك .. مش طالباكى دلوقتى خالص )

عمور : يا ميوووووووووووووشة

أنا :أيوة يا عمور إفتكرت حاجة حصلتلى إمبارح .. الحرامى ده يا عمور كان هنا إمبارح وأنا سمعت المعمعة دى كلها.. وكنت فاكرة نونا هى اللى بتعمل الأصوات دى

(العيل اللى جوايا قعد يقولى قومى إديها على دماغها وعلميها الأدب .. وفى نفس الوقت ضميرى اللى بيصحى فى أوقات ملهاش لازمة خالص ده عمال يقولى " يابنتى ده أخر يوم كنى شوية على مذاكرتك الله يرضى عليكى " )

عمور: أيوة ما إحنا عرفنا

أنا : عرفتوا منين؟

عمور : بصى كده

ببص على السلم لاقيت أثار رجلين عمو الحرامى على السلم .. عمو الأمور ده كا ناوى ينزل .. ونزل فعلا حوالى 6 سلمات .. بس واضح إنه سمعنى وأنا بنده على نونا إمبارح لما كنت فاكراها هى اللى عاملة الصوت فقام غير رأية وقرر إنه يسرق الدور التانى بس ويسيب الدور الأول ليوم تانى

عمور : شوفتى يا ميوشة .. لسه ربنا كاتبلك تعيشى و تزهقينا فى عيشيتنا شوية

أنا : لأ يا عمور هو واضح إن الحرامى ده خريج معهد مجرمين قسم سرقة .. لو كان كمل بقى كان قتل كمان

عمور : أو ممكن يا ميوشة إنه لما شافك قرر يتوب لربنا .. هو إنتى بقى اللى بيقولوا عليها وشها علم إبليس الفضيلة.. نيهاهاهاها

أنا : عاااااااااااااا .. حتى الحرامى .. إخص عليك يا حرامى شمت الأعادى فيا.. إهئ إهئ

عودا أحمد ( مين احمد ده؟؟)

خلاص أنا زهقت من وجع الدماغ والوش ده كله .. علشان كده قولت لماما إنى أروح أذاكر فى بيت جدى اللى لازق فى بيتنا على طول .. بس البيت هناك على الأقل فاضى بعد ما جدى وجدتى توفوا .. وهناك بقى محدش هيعرف يكلمنى لا على التليفون ولا على النت.

المهم فضلت قاعدة هناك كام ساعة كده لغاية ما سمعت صوت كده غريب .. انا قولت أكيد دى البت نونا الرخمة جاية ترخم عليا هنا كمان

أنا : يا نووووونااا .. إمشى من هنا أحسنلك .. مش طالباكى دلوقتى خالص

لكن مفيش رد خالص.. أه يا نونا يا ........ ، العيل اللى جوايا قعد يقولى قومى إديها على دماغها وعلميها الأدب .. وفى نفس القت ضميرى اللى بيصحى فى أوقات ملهاش لازمة خالص ده عمال يقولى " يابنتى ده أخر يوم كنى شوية على مذاكرتك الله يرضى عليكى "

ولأول مرة فى كتاب حياتى يا عين أسمع كلام ضميرى .. أه والله قعدت اكمل .. اصل المسرحية شدتنى أوى بصراحة فقولت مبدهاش بقى أقعدى كمان شوية ..فضلت فى الشقة لوحدى .. البيت الكبير .. بيت العيلة .. البيت ده اللى عشت فيه احلى ذكريات طفولتى أنا و أولاد خالاتى وخلانى.. ياااااااااااااااااه .. كانت أيام جميلة .. الله يرحمك يا جدو .. الله يرحمك يا تيتا

الساعة بقت 12 أنا بقى قولت كفاية كده مش هفترى على اعصابى يعنى.. أنا بكرة عندى إمتحان .. مش بس إمتحان ده كمان فيه خناقة بعد الإمتحان وبعدين غدواية بعد الخناقة .. يعنى جدولى مشغول ولازم أنام علشان ابقى فايقة ورايقة كده بكرة إن شاء الله

************************************

بيبا (لاول مرة تخرج مكشرة من الإمتحان): ميوشة يا ميوووووووووشة

انا : أيوة يا بيبا .. مالك ؟؟ فين الإبتسامة العريضة ؟؟ إنتى عكيتى فى الإمتحان ولا إيه؟؟

بيبا : إمتحان إيه وبتاع إيه دلوقتى؟؟ميوشة قولى بقى بجد إنتى جاية معايا ولا لأ؟؟

أنا : يا رب إرحمنى برحمتك .. اسكتى يا بيبا بدل ما أضربك .. عيال هبلة

ميرو : ميوووشة .. بيباااااااااااا .. خدنا الأجازة ..خدنا الاجااااااااااااازة


أنا : أيوة يا ميرو بس بعيد عنك فيه هنا ناس غم وحالفين يغمونا فى عز فرحتنا.

ميرو : أه لسه حكاية الأكل دى .. طيب اللى يحللك المشكلة دى تعمليلو إيه؟؟

أنا : بجد يا ميرو بجد عندك حل ؟

ميرو: بس وطى صوتك لغاية ما كلهم يطلعوا من الإمتحان .. عندى ليكم مفاجاة

أنا : يا مسهل يا رب


بعد حوالى 5 دقايق كانت شلة الانس إجتمعت على خير .. المهم إن مفيش حد جاب سيرة الإمتحان خالص .. وبيبا وإيمو مادين بوزهم شبرين وكل واحدة مدية ضهرها للتانية ومستحلفينلنا .. يا رب يا ميرو يكون عندك حل بجد

موها: شوفوا يا بنات أنا وميرو اكتشفنا إمبارح حاجة مهمة جدا

وقامت موها مطلعة من جيبها ورقة جرنال مطبقة يجى ميت تطبيقة عاملة زى الساحر اللى بيطلع من جيبه كتاكيت .. المهم فردت ورقة الجرنال دى علشان نلاقى خبر مكتوب بالبونط العريض .. الخبر كان بيقول إن فى حملة تفتيش على الوجبات السريعة قفشوا حمار حصاوى أمور وحليوة كده فى تلاجة محلات " أم حمادة للوجبات السريعة "


ساسو : حمار .. ياى .. بيعمل ايه الحمار ده فى التلاجة هناك؟؟

ميرو : كان واخد المدام بتاعه وبيتزحلقوا على التلج .. نيهاهاها

أنا : إيه ده يعنى كنتى يا ست إيمو عايزة تغدينا حمير بانية النهاردة

ميرو : لأ انا مش عايزة حمير أنا عايزة كلاب

طبعا كلنا فى الوقت ده كنا مش قادرين نمسك نفسنا من الضحك .. وخصوصا بيبا اللى كان باين عليها كل معالم الإنتصار .. وإيمو كل معالم اليأس والخيبة .. وطبعا بعد الموضوع ده كل الإجماع كان بيأيد (كوك باب) .. أهو قضا أخف من قضا .. وكلنا خدنا بعضينا ورحنا على (كوك باب )

وقفنا تاكسى وقلناله كلنا فى نفس واحد (كوك باب لو سمحت ) .. الراجل بصيلنا بإستغراب كده وقال " مين اللى هيركب " .. قولناله وإحنا بنقتحم التاكسى " كلنا إن شاء الله "

أنا وميرو ركبنا قدام والباقيين إتحشروا ورا مع بعضيهم .. عمو السواق فضل يبص بمنتهى البلاهة وبعد ماركبنا فضل يضحك وقالنا " أنا عمرى ما عملت العاملة دى .. بس والله لا أوصلكم .. فكرتونى بعيالى .. هاهاهاها"

المهم طول السكة كانت بيبا قاعدة على حجر إيمو .. لأ ومش مكفيها كده .. دى زيادة فى الغتاتة كل شوية تبصلها وتنهق .. والسواق يضحك .. وأخييييييييييييييييرا وصلنا .. (كوك باب)

دخلنا كلنا المحل الدافى .. حسينا بجسمنا بيعمل تتتتتتتتش .. تش من كل حاجة .. من البرد ومن المذاكرة ومن الحمار اللى ربنا نجانا من أكله ده .. الحمد لله

أول ما دخلنا إستقبلتنا واحدة كده أمورة وصغنتوتة وإداتنا المنيو .. المهم إحنا لسه بنفتحها من هنا ولاقينا أسماء عجيبة وغريبة من هنا .. قاعدنا نبص على أى سندويتش نقدر نستنبط من إسمه مكوناته إيه .. ابدا مش عارفين.. بصينا لبيبا بصة فيما معناه " حللنا الورطة دى يا هانم " البت تنحت وبلمت .. وبعدين قامت رايحة بكل ثقة للبنت اللى على الكاشير وقالت

بيبا : لو سمحتى إحنا عايزين النهاردة نجرب صنف جديد

البنت (بتتكلم كإنها مبرمجة ) : يا سلام النهاردة يوم حظ حضرتك لإن فيه سندويتش لسه نازل جديد ومكسر الدنيا

بيبا : طيب كويس إيه السندويتش ده ؟؟

البنت : هاجنم

بيبا : مين ؟؟ لا لا يا انسة إحنا مش بناكل المنكر ده

البنت بصت لبيبا من فوق لتحت كده وقالتها بلهجة (إنتى جاية تشتغلى سواقة ) : يا انسة ده سندويتش فراخ بالمايونيز

بيبا : والله .. طيب كويس .. ( وقامت بصلنا وقالت ) حد هياكل الأخ ده؟؟

طبعا كلنا وافقنا على الاقل الفراخ دى حاجة عارفينها ده فيه أسامى ساندويتشات تانية مجرد إسمها يجيب مغص كلوى .. المهم بيبا طلبت 6 هاجنم ده وجريت علينا على طول وإحنا عمالين نهنيها على شجاعتها دى .. والله البت جدعة .. بس لسه بيبا بتاخد نفسها لاقت البنت بتنادى عليها

البنت : يا أنسة لو سمحتى تعالى علشان أكمل الأوردر

أنا : بيبا .. إيه البودر اللى هتكمله ده .. هو إنتى بتحطلها مكياج ولا إيه؟؟

بيبا : بودر إيه بس؟؟ أنا فاكرة اننا خدنا الكلمة دى قبل كده فى الكلية .. المهم أنا مش هروح تانى .. حد تانى يروح

إيمو : يعنى جايبانا هنا وفى الاخر مش عارفة تطلبى ساندويتشين على بعض جتك القرف.

بيبا : طب روحى إنتى يا ختى يا بتاعة الحمير

إيمو تقدمت من البنت دى وقالتلها

إيمو : أيوة انا مع حضرتك

البنت : حضرتك عايزة الطلبات عادى ولا كومبو

إيمو : خليها كومبو .. بس الله يخليكى إبقى إبعتى مع السندوتشات بطاطس وبيبسى


البنت ( بعد ما تنحت شوية ) : حاضر .. وياترى تحبو البطاطس عادية ولا فريتس


إيمو : ها.. هى البطاطس كمان بقت مش عادية .. ويخلق مالا تعلمون


أنا لاقيت إيمو متنحة كده قولت أروح أساندها .. أهو تلاقى حد جنبها .. انا وبقيت الشلة رحنا وقفنا وراها


البنت : الفراخ عادى ولا سبايسى ؟؟


إيمو : ااااااااااااه..مممممممم


البنت : مسطردة ولا لأ ؟


البنت : عايزين بيكالز؟؟


البنت : هنا ولا تيك أواى ؟؟ تحبوا ديزيرت؟؟


البنت دى كانت بتسأل بسرعة رهيبة حتى مش مديالنا فرصة نجاوب .. ده لو كنا فاهمين الكلام اللى بتقوله ده أصلا .. بس المشكلة إنى بضرب بعينى كده على إيمو لاقيت البنت يا عينى بتنهار وخلاص هيغمن عليها .. ومفيش على لسانها غير كلمة واحدة.." حد يسكت الست دى"


بعد ما لمينا أشلاء المعركة .. وقومنا إيمو من على الأرض .. لا قينا إننا عندنا خساير تقدر بفتاتين ( بيبا وإيمو )


المهم خرجنا من (كوك باب ) ده بخفى حنين .. يعنى من الاخر لا طولنا ام حمادة ولا كوك باب .. سبحان الله .. المشكلة إتحلت من تلقاء نفسنا .. لإننا بعد ما طلعنا من (كوك باب ) .. بيبا وإيمو إترموا فى حضن بعض وقعدوا يبوسوا بعض.. يا سلام على الصداقة .. طبعا كلنا إتأثرنا بالمنظر ده وبعض فاصل من المحبة والأخوة لاقونى بقولهم .. يالا بينا .. قالولى " على فين؟؟"

أنا : انا بقى هغديكم غدواية من اللى هى

موها : فين يا ميوشة؟؟


أنا : تعالوا ورايا .. تااااااااكسى .. مطعم (زيزو النتن ) لو سمحت

كلهم : عاااااااااااااااااااااااااااااااااااااااااا

المشكلة إن بعد الصرخة الجماعية دى سواق التاكسى إتخض وسابنا وجرى .. وخبطنا المشوار كله مشى على رجلينا.. بس اللى مجننى بجد إن ماما حبيبتى .. فى أثناء المشوار ده بعتتلى رسالة على الموبايل بتقولى " كلمينى أول ما توصلك الرسالة .. حالاااااااااااااااااااااا" .. خير يا ماما .. ياترى فيه إيه؟؟

يتبع...................

فاصل ... ونواصل

سلام عليكم

أنا عارفة إن فيه ناس كتير مقروفة منى علشان إتأخرت فى كتابة البوست الجديد .. بس بجد بجد بجد كان عندى ظروف وكنت مشغولة موووت .. معلشى بقى خلاص مش هنعملها زعلة يعنى .. إنتوا ما صدقتوا ولا إيه؟؟

المهم بقى إن اللى رجعنى تانى بسرعة جدا وخرجنى من مشغولياتى الكتيرة ( ولا يا بت يا ميوشة وبقى عندك مشغوليات) إن شفقة هانم وإحسان بك بعتولى تاج .. إنتوا طبعا عارفين البكوات والهوانم دول .. محدش يقدر يأخرلهم طلبات وإلا هنروح ورا الشمس يا ولدى

ماشى.. يا سعادة البيه .. يا ستو هاااانم .. انا بجاوب على التاج أهو .. ربنا يخليكو لينا وميحرمناش منكم أبدا

بسم الله .. نبتدى الجلسة

1_بدأت التدوين من إمتى؟ودخلت العالم ده إزاى؟

أنا فاكرة اول يوم بدأت فيه الكتابة فى المدونة كان أخر يوم فى شهر مارس .. لأ اليوم اللى قبل الأخير باين .. شوفوا هو كان بالظبط يوم 30/3 .. تقدروا تقولوا إنى دخلت العالم ده بالصدفة .. لإن الدكتورة / غادة عبد العال صاحبة مدونة ( عايزة أتجوز ) هى اللى طلعت الموضوع ده فى دماغى .. وفضلت تقولى مفيش أسهل من عمل مدونة و إنتى دمك خفيف والكلام ده .. المهم اليوم اللى إتقابلنا فيه قالتلى على موقع (بلوجر ) قالتلى إدخلى الموقع وهتلاقى كل حاجة سهلة بعد كده .. بعد ما روحت دخلت على النت ولاقيت الخطوات بتشدنى خطوة ورا خطوة لاقيت عندى مدونة جميلة .. وكمان ماما شجعتنى تشجيع رهيب وهى اللى كانت عمالة تقولى إكتبى على النت إعملى مدونة .. بس للأسف ماما كانت رافضة إسم المدونة فى الأول .. بس إقتنعت بعد كده

**********************

2- إيه كان إنطباعك فى البداية؟

بصراحة انا كنت فرحانة جدا .. وفى نفس الوقت مخضوضة جدا .. مش عارفة هيبقى إيه رد فعل الناس على اللى هكتبه .. كانت حياتى مجموعة من الأسئلة .. ياترى هيعجبهم ؟؟ ياترى حد هيقرا اللى أنا بكتبه أصلا؟؟ طيب لو قروه ومعجبهومش هيعملوا فيا إيه؟؟ إيه اللى أنا عملته ده إنتى عبيطة ولا ايه تعملى مدونة إنتى فاكرة نفسك زى د/ غادة؟؟

بس بصراحة مع أول تعليقات جاتلى حسيت بتشجيع كبير الحمد لله مفيش نقد وصلنى فى الأول كان كله تشجيع وده اللى خلانى الحمد لله أستمر فى التدوين

***************************

3- مين أول واحد بتهتمى بتعليقاته على بوستك الجديد؟

ممممممممم.. والله انا كل تعليق بيتكتب عندى فى أى بوست جديد بيعملى علامة فى بيتى .. قصدى علامة فى مدونتى .. بحب أوى التعليقات اللى بتبقى لسه لأول مرة بتزونى .. بحب أى تعليق يضحكنى .. عبد الله غنيم .. ودعاء مواجهات .. واحدة مفروسة .. مس سوسة .. شفقة وإحسان .. blue -wave..ياااااه كتير بجد لو عديت هظلم ناس كتير بحبهم وغاليين عليا جدا

**************************

4-إيه أهم حاجة إتعلمتيها فى عالم التدوين؟

إتعلمت إن مش انا لوحدى اللى مكبوتة .. وفيه زيى كتير فى عالم المكابيت .. إتعلمت كمان إن الفضفضة دى شيئ جميل .. مفيش أحسن من إن الواحد يلاقى ناس يتكلم معاهم ويحكى الكوارث اللى هو عمالها على طبيعته .. والأحلى إنه يلاقى مشاركة من الناس دى .. ده كويس، ده جميل .. أنا كل بوست بكتبه بحس إنى قولت زيادة عن اللزوم وببقى مستنية أول تعليق على احر من الجمر علشان على الأقل أشوف الإنطباع الأول هيبقى عامل إزاى؟

************************

5- إيه أكتر حاجة كرهتيها؟

هههههههههههه.. لا انا الحمد لله مكرهتش أى حاجة فى التدوين أو بسبب التدوين لغاية دلوقتى .. رغم إن المدونة عملتلى مشاكل كتيرة مع أصحابى.. يعنى مثلا لما أنزل بوست مع بيبا .. إيمو تتصل " إنتى مكتبتيش عنى ليه؟؟" .. أو يتصلوا بيا يشتمونى .. يعنى مرة بعد بوست بتاع إمتحان العربى.. لا قيت ميرو بعتالى مسج بتقولى "بقى أنا نكتى بايخة يا زباااالة" .. أدى أخرة اللى جرالى من التدوين والمدونة .. عاااااااااااااااااااااا

**********************

6-حاسس إن التدوين له تأثير عليك ؟

يااااااااااااه.. أكيد له تأثير وتأثير كبير كمان.. أنا لسه قريب كان حد بيسألنى وبيقولى المدونة بتمثلك إيه؟؟ ملقتش رد أرد بيه غير إنى قولت "دى بنتى " .. أيوة فعلا أنا حسيت إنى أم ومسؤلة عن كائن حى .. بلبسه وأسرحله شعره وأمكيجه وأطمن عليه كل يوم .. حتى اليوم اللى مش بعرف أدخل فيه على البلوج ببقى عاملة زى المجانين ( هو أنا مجنونة أصلا .. بس الحالة بتزيد أكتر شوية) .. ربنا يخليلى مدونتى حبيبتى .. قولوا أمين

*********************

7- تهدى التاج لمين ؟

أه .. أصعب سؤال .. أهديه ل

عبد الله غنيم ( واحد إنسان ونسان )

(دعاء مواجهات)

أمجد ( محدش فاهم حاجة)

blue-wave ( كلام من القلب )

***********************

تحديث

أهدى التاج كمان لأخويا المصرى (مش عاجبنى)

كفاية كده بقى دلوقتى .. صدعتكم بما فيه الكفاية

سلام بقى

إمتحان الدراما .. هيسيب علامة فى معدتك

ملحوظة مهمة أوى :

أنا حسيت إنى طولت فى الإمتحانات دى .. وإنتوا زهقتوا كمان .. علشان كده قررت أختصر وأدخل على أخر إمتحان على طول .. أخر يوم مذاكرة

*****************

أخييييييييييييراا.. خلاص .. فاضلى زلطة وأخلص من الإمتحانات ودوشتها .. هيه هيه.. لأ وكمان إيه . مسألتش عن إسم المادة .. ماهى أخر مادة بقى فلازم أبقى عارفاها هى بالذات دونا عن كل المواد التانية

عندى بكرة إمتحان دراما .. الدراما دى يعنى المسرحيات بتاعة شكسبير بقى وبرنارد شو وكل الناس اللى مجرد حفظ أساميهم عايز مخ على مخى .. أصلا المادة إسمها دراما .. يعنى كمان خد هم وغم للركب ..بس بجد مش مصدقة نفسى .. معقولة بكرة خلاص هخلص أخر أيام الكبت والخنقة .. خلاص هندخل حقبة زمانية تانية ننعم فيها بالحرية والسلام ( متسألونيش جايبة الكلام ده منين) .. أخيرا بكرة هقدر أتفرج على (سبيس تون) براحتى .. وحشنى توم وجيرى مووت .. جايالك يا محقق كونان .. رونى مش هتعرف تبعدنى عنك تانى .. تيمون وبومبا وحشتونى وحشتونى وحشتوونى .. ياااااااااه .. أخيرا هقعد على كيمو حبيبى براحتى .. من غير نظرات ماما حبيبتى الذرية .. بكرة الأجازة .. بكرة الأجاااااااااااااااازة

تررررررررن ترررررررررررن ( الرنة دى مش غريبة عليا)

أنا : ألو

ميرو : ميوشة .. بكرة الأجازة يا ميوشة

أنا : أيوة يا ميرو اخيرا .. أنا مش مصدقة نفسى

أنا وميرو فى نفس واحد : هيييييييييييييييييييييييييييييييييييييييه

ميرو : ميوشة سيبك من الكلام ده دلوقتى وركزى معايا

أنا : معاك يا كبير خير .. فيه حاجة؟

ميرو : طبعا إحنا متفقين من قبل الإمتحانات ما تبدأ أصلا إننا هنتغدى مع بعض أخر يوم إمتحان اللى هو بكرة إن شاء الله

أنا : أيوة طبعا .. ده أنا رايحة إمتحان بكرة ده اصلا علشان الغدواية دى

ميرو : طب حضرى نفسك للخناقة بقى

أنا : خناقة إيه يا ميرو كفى الله الشر ؟

ميرو : بصى يا قطة .. طبعا إنتى عارفة إن بيبا بتحب التيك اواى تضرب أى سندوتشين كده على السريع ونخلص

أنا : ايوة عارفة

ميرو : أما إيمو بقى فميدخلش دماغها غير المحمر والمشمر ومحشى البتنجان

أنا : اموت أنا فى البتنجان

ميرو : لذلك فيه خناقة قوية بين الفريقين بيبا عايزة تروح (كوك باب) وإيمو عايزة تروح ( أم حمادة )

أنا : أوبا .. صحيح .. طب وهنعمل إيه؟؟

ميرو : أنا قولت أكلمك علشان أنبهك لإن الموضوع ده من الصبح .. وكلموكى لاقوكى لسه نايمة

أنا : إيه الورطة دى ؟ طيب أنا أعمل إيه دلوقتى ؟ دبرينى يا ميرو

ميرو : يا ختى لما أدبر نفسى انا الأول .. أنا بلغتك وخلاص .. يلا سلام

أه يا ميرو يا .............. لأ بلاش شتيمة .. البت طيبة برضة ونبهيتنى .. أعمل إيه أعمل إيه ؟؟ المصيبة إنى فى الأكل معنديش ياما إرحمينى .. أنا لو عليا نفسى أكل فى الإتنين بصراحة.. يا سلام ده يبقى قشطة جدا

هتعملى إيه يا ميوشة؟؟ هتروحى ( كوك باب) مع بيبا .. ولا ( أم حمادة ) مع إيمو .. طبعا دى إمخاخ ضلمة وأنا عارفاها كويس .. لو إخترت مكان يبقى إخترته علشان واحدة فيها .. يبقى بحب واحدة فيهم ومش بحب التانية .. إيه الزنقة دى بس يا ربى .. هو أنا ناقصة.. أعمل إيه ؟؟

تررررررررررررررررررررن

أنا : ألو

بيبا : أيوة يا ميوشة .. بقولك إيه عايزاكى فى موضوع مهم

أنا ( من غير ما أحس ): معاكى يا بيبا طبعا .. لو روحتى فين أنا معاكى

بيبا: بجد يا ميوشة يا حبيبتى .. ربنا يخليكى ليا هى دى الأصحاب ولا بلاش .. أمووووووه

أنا : عيب يا بيبا تشكى فى إخلاصى ليكى .. إنتى الحب الحب .. إنتى الأنتيخ

بيبا : خلاص بقى يا ميوش علشان بتكسف .. سلام بقى

يا لهوى .. إيه اللى أنا عملته ده .. أنا وعدت بيبا ولا إيه .. عااااااااااا.. اعمل إيه بس يا خواتى

تررررررررررررررن

أنا : ألو

إيمو ( بجعورة عالية) : ميووووشة إنتى هتروحى مع بيبا بجد

انا : يا دى النيلة هى لحقت تقولك ؟؟

إيمو : ردى عليا إنتى هتروحى مع بيبا ؟

أنا : يا هبلة .. أنا بقولها كده وخلاص .. أنا معاك طبعا يا باشا .. (كوك باب )إيه وكلام فارغ إيه ؟؟ مفيش غير ( أم حمادة) ده أنا حتى لو خلفت ولد هسميه حمادة .. يتربى فى عزو حمادة عزو

إيمو : اه كنت بحسب ماشى سلام

لأ مش معقول .. إيه الجنان ده ؟؟ العيال إتهبلت مرة واحدة كده .. لأ بجد فيه حاجة مش طبيعية حصلتلنا .. إحنا إتحسدنا ولا إيه ؟؟

تررررررررررررن .. طيب والله ما أنا رده .. وأدى سلك التليفون كمان

إستغفر الله العظيم حتى الغدواية مش هنعرف نتهنى بيها .. نهايتة .. قررت أنا بقى اهرب من الأزمة دى بالمذاكرة .. قمت سميت الله كده ودورت على الكتاب .. الحمد لله لاقيته.. أتارى المادة دى كتابين.. كل كتاب فيه مسرحية.. واحدة لشكسبير (إستغلستها بصراحة ) والتانية أصغر منها شوية إسمها ( بيت الدمية )

والله قصة لذيذة ناهيك عن بطلة المسرحية نورا اللى طول المسرحية بيعاملوها على إنها عيلة صغيرة وهى زى الشحطة عندها كام عيل .. وناهيك كمان على إنها كانت هتودى نفسها فى داهية علشان تنقذ حياة جوزها اللى طلع ندل فى الاخر .. بس عجبنى أوعى أخر فصل لما إدت لجوزها الكلمتين الجامدين فى جنابه وسابتله البيت ومشت .. هى دى الست القوية .. أصل بصراحة جوزها ده ندل ندل يعنى.

المهم بقى وأنا فى قمة الإنسجام مع المسرحية ألاقى تنتنتنتنتنننننننن كام رسالة على الموبايل من نمر الشلة كلها بصيغة واحدة

( إدخلى على النت حالا ) .. يا ولاد اللذينا .. معرفوش يطولونى فى التليفون هيزنقونى فى النت

دخلت على النت علشان أشوف الأزمة الكونية اللى حصلت علشان كلهم يتلموا اللمة دى .. أستر يا رب

دخلت على النت لاقيت الحلوين كلهم مترصدين زى الأسد ما بيترصد للفريسة بتاعه

بيبا : ميووووشة .. دلوقتى وإنتى قدامنا كلنا حددى موقفك

أنا : موقفى من إيه بالضبط؟؟

إيمو : هتروحى معايا ولا مع بيبا ؟؟

موها : هو إنتوا خلاص إتقاسمتوا حزبين؟؟

بيبا : إيمو هى اللى مصممة

إيمو : لأ بيبا هى اللى راكبة دماغها

ميرو : طيب إنزلى من على دماغك يا بيبا لحسن يوجعك .. هههههههههه

كلنا فى نفس الوقت حطينا سمايلى وش أحمر

ميرو : إيه يا إخوانا ؟ أنا قولت اطرى القعدة يعنى

أنا : بصى أنا مع الاغلبية

بيبا : مفيش أغلبية .. كل واحد هيقول رأيه من دماغة .. ده غير إن ميرو وموها وساسو مش هيقولوا غير لما تقولى إنتى الأول

أنا : إيه ده .. إنتوا بتلوا دراعى ولا إيه .. طب إيه رأيكم بقى إنى مش هروح لا ده ولا ده

ساسو : أمال هتروحى فين ؟

أنا : هناكل زى ما بناكل كل يوم .. عند حبيبنا وعشرة عمرنا ( زيزو النتن )

كلهم : إييييه ؟؟

موها : حتى أخر يوم هيبقى فول وطعمية

ميرو : أنا اصلا عمرى ما كلت من عند الراجل ده ولا عمرى هاكل عندى .. برستيجى ميسمحليش

موها : برستيج مين يا حلوة .. ده إحنا قاتلينو سوا بالأمارة رميناه فى الترعة

ساسو : هو مين ده اللى رميتوه؟؟

أنا : ببببببببببببببببببببس.. يا ساتر عليكم .. إسكتوا

إيمو : لا نتن ولا معفن .. هى ( أم حمادة )

بيبا : لأ ( كوك باب )

أنا : بقولكم إيه إنتوا خنقتونى .. من أخر بقى أنا مش عايزة قلبة دماغ .. يا إيما ترسوا على بر .. يا إما بلاها الأكلة دى اصلا .. يا هبلة منك ليها إحنا علينا إمتحان بكرة

ساسو :أه صحيح . هو إحنا علينا إمتحان إيه ؟؟

موها : بدل ما تفكروا فى الأكل فكروا فى علاج الزهايمر بتاع ساسو ده الاول

أنا : إنتوا باين عليكم فايقين ورايقين ..انا ماشية.. النت ده بفلوس .. سلام

أكيد هيتبع بعنى .. أمال هنتعلق كده