الأحد، 24 أغسطس، 2008

عودا أحمد ( مين احمد ده؟؟)



خلاص أنا زهقت من وجع الدماغ والوش ده كله .. علشان كده قولت لماما إنى أروح أذاكر فى بيت جدى اللى لازق فى بيتنا على طول .. بس البيت هناك على الأقل فاضى بعد ما جدى وجدتى توفوا .. وهناك بقى محدش هيعرف يكلمنى لا على التليفون ولا على النت.


المهم فضلت قاعدة هناك كام ساعة كده لغاية ما سمعت صوت كده غريب .. انا قولت أكيد دى البت نونا الرخمة جاية ترخم عليا هنا كمان


أنا : يا نووووونااا .. إمشى من هنا أحسنلك .. مش طالباكى دلوقتى خالص


لكن مفيش رد خالص.. أه يا نونا يا ........ ، العيل اللى جوايا قعد يقولى قومى إديها على دماغها وعلميها الأدب .. وفى نفس القت ضميرى اللى بيصحى فى أوقات ملهاش لازمة خالص ده عمال يقولى " يابنتى ده أخر يوم كنى شوية على مذاكرتك الله يرضى عليكى "


ولأول مرة فى كتاب حياتى يا عين أسمع كلام ضميرى .. أه والله قعدت اكمل .. اصل المسرحية شدتنى أوى بصراحة فقولت مبدهاش بقى أقعدى كمان شوية ..فضلت فى الشقة لوحدى .. البيت الكبير .. بيت العيلة .. البيت ده اللى عشت فيه احلى ذكريات طفولتى أنا و أولاد خالاتى وخلانى.. ياااااااااااااااااه .. كانت أيام جميلة .. الله يرحمك يا جدو .. الله يرحمك يا تيتا


الساعة بقت 12 أنا بقى قولت كفاية كده مش هفترى على اعصابى يعنى.. أنا بكرة عندى إمتحان .. مش بس إمتحان ده كمان فيه خناقة بعد الإمتحان وبعدين غدواية بعد الخناقة .. يعنى جدولى مشغول ولازم أنام علشان ابقى فايقة ورايقة كده بكرة إن شاء الله


************************************


بيبا (لاول مرة تخرج مكشرة من الإمتحان): ميوشة يا ميوووووووووشة


انا : أيوة يا بيبا .. مالك ؟؟ فين الإبتسامة العريضة ؟؟ إنتى عكيتى فى الإمتحان ولا إيه؟؟


بيبا : إمتحان إيه وبتاع إيه دلوقتى؟؟ميوشة قولى بقى بجد إنتى جاية معايا ولا لأ؟؟


أنا : يا رب إرحمنى برحمتك .. اسكتى يا بيبا بدل ما أضربك .. عيال هبلة


ميرو : ميوووشة .. بيباااااااااااا .. خدنا الأجازة ..خدنا الاجااااااااااااازة


أنا : أيوة يا ميرو بس بعيد عنك فيه هنا ناس غم وحالفين يغمونا فى عز فرحتنا.


ميرو : أه لسه حكاية الأكل دى .. طيب اللى يحللك المشكلة دى تعمليلو إيه؟؟


أنا : بجد يا ميرو بجد عندك حل ؟



ميرو: بس وطى صوتك لغاية ما كلهم يطلعوا من الإمتحان .. عندى ليكم مفاجاة


أنا : يا مسهل يا رب


بعد حوالى 5 دقايق كانت شلة الانس إجتمعت على خير .. المهم إن مفيش حد جاب سيرة الإمتحان خالص .. وبيبا وإيمو مادين بوزهم شبرين وكل واحدة مدية ضهرها للتانية ومستحلفينلنا .. يا رب يا ميرو يكون عندك حل بجد



موها: شوفوا يا بنات أنا وميرو اكتشفنا إمبارح حاجة مهمة جدا


وقامت موها مطلعة من جيبها ورقة جرنال مطبقة يجى ميت تطبيقة عاملة زى الساحر اللى بيطلع من جيبه كتاكيت .. المهم فردت ورقة الجرنال دى علشان نلاقى خبر مكتوب بالبونط العريض .. الخبر كان بيقول إن فى حملة تفتيش على الوجبات السريعة قفشوا حمار حصاوى أمور وحليوة كده فى تلاجة محلات " أم حمادة للوجبات السريعة "


ساسو : حمار .. ياى .. بيعمل ايه الحمار ده فى التلاجة هناك؟؟


ميرو : كان واخد المدام بتاعه وبيتزحلقوا على التلج .. نيهاهاها



أنا : إيه ده يعنى كنتى يا ست إيمو عايزة تغدينا حمير بانية النهاردة



ميرو : لأ انا مش عايزة حمير أنا عايزة كلاب


طبعا كلنا فى الوقت ده كنا مش قادرين نمسك نفسنا من الضحك .. وخصوصا بيبا اللى كان باين عليها كل معالم الإنتصار .. وإيمو كل معالم اليأس والخيبة .. وطبعا بعد الموضوع ده كل الإجماع كان بيأيد (كوك باب) .. أهو قضا أخف من قضا .. وكلنا خدنا بعضينا ورحنا على (كوك باب )



وقفنا تاكسى وقلناله كلنا فى نفس واحد (كوك باب لو سمحت ) .. الراجل بصيلنا بإستغراب كده وقال " مين اللى هيركب " .. قولناله وإحنا بنقتحم التاكسى " كلنا إن شاء الله "



أنا وميرو ركبنا قدام والباقيين إتحشروا ورا مع بعضيهم .. عمو السواق فضل يبص بمنتهى البلاهة وبعد ماركبنا فضل يضحك وقالنا " أنا عمرى ما عملت العاملة دى .. بس والله لا أوصلكم .. فكرتونى بعيالى .. هاهاهاها"

المهم طول السكة كانت بيبا قاعدة على حجر إيمو .. لأ ومش مكفيها كده .. دى زيادة فى الغتاتة كل شوية تبصلها وتنهق .. والسواق يضحك .. وأخييييييييييييييييرا وصلنا .. (كوك باب)



دخلنا كلنا المحل الدافى .. حسينا بجسمنا بيعمل تتتتتتتتش .. تش من كل حاجة .. من البرد ومن المذاكرة ومن الحمار اللى ربنا نجانا من أكله ده .. الحمد لله



أول ما دخلنا إستقبلتنا واحدة كده أمورة وصغنتوتة وإداتنا المنيو .. المهم إحنا لسه بنفتحها من هنا ولاقينا أسماء عجيبة وغريبة من هنا .. قاعدنا نبص على أى سندويتش نقدر نستنبط من إسمه مكوناته إيه .. ابدا مش عارفين.. بصينا لبيبا بصة فيما معناه " حللنا الورطة دى يا هانم " البت تنحت وبلمت .. وبعدين قامت رايحة بكل ثقة للبنت اللى على الكاشير وقالت


بيبا : لو سمحتى إحنا عايزين النهاردة نجرب صنف جديد



البنت (بتتكلم كإنها مبرمجة ) : يا سلام النهاردة يوم حظ حضرتك لإن فيه سندويتش لسه نازل جديد ومكسر الدنيا


بيبا : طيب كويس إيه السندويتش ده ؟؟


البنت : هاجنم



بيبا : مين ؟؟ لا لا يا انسة إحنا مش بناكل المنكر ده



البنت بصت لبيبا من فوق لتحت كده وقالتها بلهجة (إنتى جاية تشتغلى سواقة ) : يا انسة ده سندويتش فراخ بالمايونيز

بيبا : والله .. طيب كويس .. ( وقامت بصلنا وقالت ) حد هياكل الأخ ده؟؟


طبعا كلنا وافقنا على الاقل الفراخ دى حاجة عارفينها ده فيه أسامى ساندويتشات تانية مجرد إسمها يجيب مغص كلوى .. المهم بيبا طلبت 6 هاجنم ده وجريت علينا على طول وإحنا عمالين نهنيها على شجاعتها دى .. والله البت جدعة .. بس لسه بيبا بتاخد نفسها لاقت البنت بتنادى عليها


البنت : يا أنسة لو سمحتى تعالى علشان أكمل الأوردر

أنا : بيبا .. إيه البودر اللى هتكمله ده .. هو إنتى بتحطلها مكياج ولا إيه؟؟


بيبا : بودر إيه بس؟؟ أنا فاكرة اننا خدنا الكلمة دى قبل كده فى الكلية .. المهم أنا مش هروح تانى .. حد تانى يروح


إيمو : يعنى جايبانا هنا وفى الاخر مش عارفة تطلبى ساندويتشين على بعض جتك القرف.


بيبا : طب روحى إنتى يا ختى يا بتاعة الحمير

إيمو تقدمت من البنت دى وقالتلها

إيمو : أيوة انا مع حضرتك


البنت : حضرتك عايزة الطلبات عادى ولا كومبو


إيمو : خليها كومبو .. بس الله يخليكى إبقى إبعتى مع السندوتشات بطاطس وبيبسى


البنت ( بعد ما تنحت شوية ) : حاضر .. وياترى تحبو البطاطس عادية ولا فريتس


إيمو : ها.. هى البطاطس كمان بقت مش عادية .. ويخلق مالا تعلمون


أنا لاقيت إيمو متنحة كده قولت أروح أساندها .. أهو تلاقى حد جنبها .. انا وبقيت الشلة رحنا وقفنا وراها


البنت : الفراخ عادى ولا سبايسى ؟؟


إيمو : ااااااااااااه..مممممممم


البنت : مسطردة ولا لأ ؟


البنت : عايزين بيكالز؟؟


البنت : هنا ولا تيك أواى ؟؟ تحبوا ديزيرت؟؟


البنت دى كانت بتسأل بسرعة رهيبة حتى مش مديالنا فرصة نجاوب .. ده لو كنا فاهمين الكلام اللى بتقوله ده أصلا .. بس المشكلة إنى بضرب بعينى كده على إيمو لاقيت البنت يا عينى بتنهار وخلاص هيغمن عليها .. ومفيش على لسانها غير كلمة واحدة.." حد يسكت الست دى"


بعد ما لمينا أشلاء المعركة .. وقومنا إيمو من على الأرض .. لا قينا إننا عندنا خساير تقدر بفتاتين ( بيبا وإيمو )


المهم خرجنا من (كوك باب ) ده بخفى حنين .. يعنى من الاخر لا طولنا ام حمادة ولا كوك باب .. سبحان الله .. المشكلة إتحلت من تلقاء نفسنا .. لإننا بعد ما طلعنا من (كوك باب ) .. بيبا وإيمو إترموا فى حضن بعض وقعدوا يبوسوا بعض.. يا سلام على الصداقة .. طبعا كلنا إتأثرنا بالمنظر ده وبعض فاصل من المحبة والأخوة لاقونى بقولهم .. يالا بينا .. قالولى " على فين؟؟"



أنا : انا بقى هغديكم غدواية من اللى هى



موها : فين يا ميوشة؟؟


أنا : تعالوا ورايا .. تااااااااكسى .. مطعم (زيزو النتن ) لو سمحت



كلهم : عاااااااااااااااااااااااااااااااااااااااااا



المشكلة إن بعد الصرخة الجماعية دى سواق التاكسى إتخض وسابنا وجرى .. وخبطنا المشوار كله مشى على رجلينا.. بس اللى مجننى بجد إن ماما حبيبتى .. فى أثناء المشوار ده بعتتلى رسالة على الموبايل بتقولى " كلمينى أول ما توصلك الرسالة .. حالاااااااااااااااااااااا" .. خير يا ماما .. ياترى فيه إيه؟؟


يتبع...................

هناك 46 تعليقًا:

almasry يقول...

أول تعليق شويه وراجع ......

almasry يقول...

ياشلة مجانين



على الطلبات وانتم عليكم الحساب انتم شله أى كلام بس زى العسل ايه ده حمير وكلاب وجهاليم ده ولا اسمه ايه وكمان مش مكفيكوا تغتتوا على البنت اللى فى المطعم جبتوا للراجل بتاع التاكسى هطل؟


تحيـــــــاتى
المصـــــرى

صباح الصباح يقول...

هوة انتوا مافيش مرة تروحوا تاكلوا برة وتستروا ابدا
فضحتوناااااااااا
ههههههههههههههههههههههه
بجد انتى كارثة على رجلين يا ميووووشة
ههههههههههههههههههههههه

appy يقول...

يا ربى استروا مره بس من غير فضايح ههههههههه
كل سنه وانتم طيبين

saso يقول...

هههههههه مين زيزو النتن ده؟ بيبيع ايه؟

بس انتوا طلعوتوا من كوك باب ليه بعد مطلبتوا ؟؟؟؟

وحلوه اوى منظروكوا في التاكسي متخيلاه لاننا بنعمله كتير خمسه او سته في تاكسي

بنركب ادوار

ههههههههه بس عايزين الباقي بسرعه

باى ميوشه انتى زى العسل والله

Amgad يقول...

ههههههههههههههههههه
مش عارف اقولك ايه والله يا ميوشة
في مدونات كده الواحد بياخد موقف معين
منها وبيكون فكره عنها بتبقي ثابته معاه
لا والله دي بتزيد كمان
فعلا موهبتك في كوميديا الموقف اكبر من انك تعملي مدونه
وفعلا الواحد بعد لما قرا مدونتك دي كلها من الاول بيحتاج كل شوية يدخل يقرا البوست تاني
خالص شكري علي البوست

Amgad يقول...

اه صح
بمناسبة الحمار اللي عند ام حماده
ادعوكي لقراية البوست اللي انا منزلة
بخصوص لحم الحمار لا مؤاخذه
اللي هو قبل الاخير

maiosha يقول...

almasry
.................
بذمتك شوفت شلة بتعمل كل الكلام ده فى وقت واحد كده

ناس جتمدة جامدة يعنى

وصلك التاج؟؟

maiosha يقول...

صباح الصباح
................
يعنى نعمل إيه ماهى أسامى الأكل هى اللى غريبة
أنا كنت عايزة فتة وممبار وملقتش

أموت نفسى يعنى

maiosha يقول...

appy
.............
وانتى طيبة يا قمر

رمضان كرييييييييييييييييييم

maiosha يقول...

saso
.............
يا ستى زيزو النتن ده محل سندوتشات فول زطعمية جنب الكلية عندنا

وده ملجأنا الوحيد فى أيام الدراسة العادية .. على طول هناك

maiosha يقول...

أمجد
........
بجد يا أمجد أنا بحب ردك جدا

إيه يا عم الكلام ده والله أنا مش قده خالص .. بجد إنت متعرفش كلامك ده بيشجعنى اد ايه
ألف شكر على أهتمامك بمتابعة مدونتى وبردودك اللى زى العسل

أما بوست الحمير ده .. أنا قريته طبعا .. بوست جامد جامد يعنى .. كالعادة طبعا

محمد الكومي يقول...

كل عام و انتم بخير بمناسبة شهر رمضان الكريم

رمضان كريم و اعاده الله عليكم بالخير و اليمن و البركات

رمضان كريم


ليكي فانوس عندي يالا تعالي خديه بسرعة

maiosha يقول...

وإنت طيب يا محمد

هيه هيه
يا جدعان جاى فانوس

أنا رايحة حالا أهو

دعاء على يقول...

ههههههههههههههههههههههههههههه
بيكالز ... مخلل يعنى (:
شفتى أنا مثقفه ازاى ... بس البت بنت اللذينا دى ما تقول مخلل و تخلصكوا
ههههههههههههههههههههههههههههه
خير خير ... بس المهم برضه مكلتوش فى الاخر
على فكره انتى عسوووووله جدا و البوست دمه خفييييييف جدا و منتظره الجزء التانى عشان أعرف عملتوا ايه عند الأخ زيزو النتن ده (:
سلام و كل سنه و انتى طيبه

كيارا يقول...

ههههههههههههههههههه

تحففففففه يالهوي بجد ايه يبنتي اللي كاتباه ده :)

كل سنه وانتي طيبه

ومنتظررره الباقي مش تتاخري بقي

maiosha يقول...

دعاء على
..............
ماشاء الله عليكى يا دعاء.. طيب ما إنتى مثقفة أهو
يا ريتنا كنا خدناكى معانا اليوم ده كنتى هترجميلناالكلام الغريب اللى الست دى بتقوله

نورتينى

maiosha يقول...

كيارا
...................
الحمد لله إن فيه ناس جديدة بتدخل المدونة وبتعجبهم

نورتينى يا جميل

دكتور بهــدوء يقول...

ههههههههههههه
مالكوش حل
يارتني اسمي سليمان

Lady E يقول...

خير خير ان شاء الله خير

يمكن نونا عايزة تيجي معاكو عند زيزو النتن ولا حاجة علشان كده طنط بعتتلك المسج

كل سنة وانتي طيبة وبخير وصحة وسعادة يا قمرايا

وانا مش زعلانه علشان عارفه انك مشغولة وكمان علشان رمضان كريم

ربنا يعينك يا ميوشة
ومتتأخريش علينا بقى في تكملة البوست

كيكى يقول...

عووووووووووووووووو انا جيت اتخديتى
................................
هههههههههههههههههههههههه
هههههههههههههههههههههههههه
يالهوووووووووووووووووووووى
على الفاضيح
فضحتونا
العااااااااااااار ولا الطااااااااار
يا جعايدى
!
جعايدى مييييييييين
ياجرعان
؟
كل سنة وانتى بالف صحة ياقمر
عوووووووووووووووووووووووووو

bar2ash يقول...

السلام عليكم يا احلي ميوشه

ايه يابنتي الجمال ده
انتو شله بجد لذيذه
مش عارف ليه نفسي يكون عندي اصحاب شباب زي العسل زسكم كده
حركات الجنان دي بتوحشني
بس الدنيا تلاهي


بس بجد انتي عملتي فيا حركه عشانها انا اصلا بكره المسلسلات وعمري ماتابعت مسلسل
تعرفي لما المخرج ييجي علي حته مهمه ويقولك الي اللقاء ونقعد نستني الحلقه الجايه

ده اللي انتي عملتيه
ياتري ماما عايزه ايه

ده اللي هنشوفه مع بعض البوست الجاي

اتمني تكون الحلقه الاخيرة
لاني مبحبش المسلسلات

maiosha يقول...

دكتور بهدوء
.................
منور يا دكتور إتفضل معانا الشاى

maiosha يقول...

lady e
.................
إلا إنتى يا ثمر أنا مقدرش على زعلك أبدا أبدا

من عنيا إن شاء الله هكمل البوست قريب

منورانى دايما

maiosha يقول...

كيكى
.................
كل رمضان وإنتى بتخضينا دايما يا أجمل كيكى

دعاء مواجهات يقول...

ازيكي يابنتى فينك؟؟

وحشانى جدا اوى خااص بشكل مش عادى

ومفتقدة وجودك عندى

وحشااانى ا وى

طمنينى عليكى

سلام

عازف الناى الحزين يقول...

هههههههههههههههه
يخرب بيت دماغكوا
ايه الدماغ دى
بس و الله شلة زى العسل

CAIROCOMPUTER يقول...

تحيه طيبه وكل عام وانت بخير
فكرة المدونه جيده ونحن سعداء بها وبك وسيكون لنا لقاءات ان شاء الله مع افكارك فى برنامجنا الأذاعى وهو اول برنامج اذاعى عن النت والمدونات فى الشرق الأوسط ويذاع يوميا عدا الجمعه صباحا من الأذاعه الرئيسيه لمصر
وكافة التفاصيل فى مدونتنا وموقعنا
والبرنامج متوقف طوال شهر رمضان
المدونه
http://netonradio.blogspot.com
الموقع
http://dear.to/cairo
والدعوه موجهه ايضا لزوار مدونتك

September 14, 2008 8:55 AM

تحيه طيبه وكل عام وانت بخير
فكرة المدونه جيده ونحن سعداء بها وبك وسيكون لنا لقاءات ان شاء الله مع افكارك فى برنامجنا الأذاعى وهو اول برنامج اذاعى عن النت والمدونات فى الشرق الأوسط ويذاع يوميا عدا الجمعه صباحا من الأذاعه الرئيسيه لمصر
وكافة التفاصيل فى مدونتنا وموقعنا
والبرنامج متوقف طوال شهر رمضان
المدونه
http://netonradio.blogspot.com
الموقع
http://dear.to/cairo
والدعوه موجهه ايضا لزوار مدونتك

September 14, 2008 8:55 AM

شفقة هانم واحسان بك يقول...

انتى واللهى دمك ده مش دم طبيعى ده معجون بميه عفاريت
بس انا زعلانة منك لانك ما بتساليش علينا يا وحشة

انا ودماغي يقول...

هههههههههههههههه

لا بجد أنا هلكت من الضحك إيه ده بجد أنتوا فضيحة بذمتك مش الحمار كان أحسن انا متهيألى الست بتاعت الاوردر جالها كساح....يا رب أسترها فى الخروجة اللى جاية

على فكرة مدونتك حلوة آخر حاجة بجد و عجبانى مووووووووووووت

تقبلى مرورى

Amgad يقول...

ياااااااااااه
يا ميوشة انتي فين يا بنتي بقالك تمن ايام
مدخلتيش نت
هههههههههههههههههههه
عموما انا كل لما استغيبك اقول هانت
كلها يومين والدراسة تبدا
ويبدا الفشل
هاااااااااااااانت ووقتها ملكيش حجج

maiosha يقول...

دعاء مواجهات
...............
ازيك انتى يا دودو
أنا الحمد لله تمام .. بس انتى عارفة بقى الظروف

أنا بعتيلك كل حاجة على العموم

ها وصلت ولا لسه؟؟

maiosha يقول...

عازف الناى الحزين
...................
ربنا يخليك

منور المدونة كلها

maiosha يقول...

cairocomputer
...............
ألف شكر على دعوتكم ليا وإظهار إعجابكم بمدونتى المتواضعة

وإن شاء الله هيكون ليا زيارة قريبة جدا ومشاركات معاكم كتير

نورتونى

maiosha يقول...

شفقة هانم وإحسان بيه
......................
عاااااااااااااااا
والله حرام الناس كلها بقت واخدة منى موقف كده

يا جماعة والله علشان رمضان بس الواحد مشغول
مش بلحق أتابع المدونة بتاعتى أصلا

وساعات بقرا موضوعاتكم على السريع كده ومش بعرف أرد والله

بالله عليكم محدش يزعل بقى

كل سنة وانتوا طيبين
ورمضاااااااان كريييييييييييييم

maiosha يقول...

أنا ودماغى
.................
ما أنا حسيت أن كل اللى حصلنا ده كان من دعوة الحمار علينا

نورت المدونة

maiosha يقول...

أمجد
...........
طيب تصدق بالله أنا فعلا مستنية الدراسة تبدأ .. ساعتها هفضى وأعرف أكتب

انت اللى فاهمنى يا امجد

bar2ash يقول...

علي فكرة يا ميوشا
انا زعلان بجد

اولا لانك مجيتيش قلت يا واد جايز مشغوله

اجي الاقي مفيش بوستات قلتيا واد يمكن ردت علي تعليقك الاول
ادخل الاقيكي رديتي علي كل الناس الا انا

ايه مفتكرتيش ان ليكي اخ كده مستني سؤالك


ينفع كده


ربنا يسامحك

سلام

برقش

maiosha يقول...

برقش
.................
عااااااااااااا
الرد راح فين؟؟ والله والله رديت
حتى قولت فى الرد انى هتأخر فى تنزيل البوستات فى رمضان .. والله دى أكيد مشكلة فى كيمو وأنا أصلا مليش فى التكنولوجيا الحديثة دى
أنا أخر تكنولوجيا وصلتلى الراديو ابو بطارية

يا جماعة .. انا الشهر اللى فات ده أكتر شهر فى حكايتى اعتذرت فيه
يا شباب اعذرونى بجد بجد مشغولة جدا فى رمضان
والله أنا بزعل جدا لما بلاقى حد زعلان منى
وبعدين الريدر الغبى مش بيقولى على جديدك خالص مش عارفة ليه؟؟

بجد متزعلشى منى .. عارفة انها حركة غبية بس والله ردييييييييييييييييييييت

وكل سنة وانت طيب

عبدالتواب محمود يقول...

مقال جميل ودمة خفيف واجمل ما فيه ان هو واقعى ..


بس طلب بس صغير

ابقى سلمى لى على ام حمادة

ولو عزمتكم على حمير مشويه ابقى اعملى حسابى معاااااك



دعواتك

Amgad يقول...

كلها بكرة بس وبعده واللي واعدني هيوفي بوعده

maiosha يقول...

عبد التواب محمود
..................
يا سلام بس كده من عنيا الإتنين

طيب لو فيه كلاب أعمل حسابك برضة؟؟

maiosha يقول...

amgad
..........
إن شاء الله

يا مسهل يا رب

blue-wave يقول...

ايه يا بنتى
فينك كل دا؟

عبده الرايق يقول...

كل سنه وانتى طيبه يا ميوشه
وكل شلتك بخير وسعاده
والامه الاسلاميه جميعا برخاء وسلام

maiosha يقول...

أنا أسفة يا شباب على التأخير .. وإن شاء الله البوست الجديد قريبا جدا

كل سنة وإنتوا طيبين