الاثنين، 11 أغسطس، 2008

إمتحان الدراما .. هيسيب علامة فى معدتك


ملحوظة مهمة أوى :

أنا حسيت إنى طولت فى الإمتحانات دى .. وإنتوا زهقتوا كمان .. علشان كده قررت أختصر وأدخل على أخر إمتحان على طول .. أخر يوم مذاكرة

*****************


أخييييييييييييراا.. خلاص .. فاضلى زلطة وأخلص من الإمتحانات ودوشتها .. هيه هيه.. لأ وكمان إيه . مسألتش عن إسم المادة .. ماهى أخر مادة بقى فلازم أبقى عارفاها هى بالذات دونا عن كل المواد التانية

عندى بكرة إمتحان دراما .. الدراما دى يعنى المسرحيات بتاعة شكسبير بقى وبرنارد شو وكل الناس اللى مجرد حفظ أساميهم عايز مخ على مخى .. أصلا المادة إسمها دراما .. يعنى كمان خد هم وغم للركب ..بس بجد مش مصدقة نفسى .. معقولة بكرة خلاص هخلص أخر أيام الكبت والخنقة .. خلاص هندخل حقبة زمانية تانية ننعم فيها بالحرية والسلام ( متسألونيش جايبة الكلام ده منين) .. أخيرا بكرة هقدر أتفرج على (سبيس تون) براحتى .. وحشنى توم وجيرى مووت .. جايالك يا محقق كونان .. رونى مش هتعرف تبعدنى عنك تانى .. تيمون وبومبا وحشتونى وحشتونى وحشتوونى .. ياااااااااه .. أخيرا هقعد على كيمو حبيبى براحتى .. من غير نظرات ماما حبيبتى الذرية .. بكرة الأجازة .. بكرة الأجاااااااااااااااازة


تررررررررن ترررررررررررن ( الرنة دى مش غريبة عليا)


أنا : ألو


ميرو : ميوشة .. بكرة الأجازة يا ميوشة


أنا : أيوة يا ميرو اخيرا .. أنا مش مصدقة نفسى


أنا وميرو فى نفس واحد : هيييييييييييييييييييييييييييييييييييييييه


ميرو : ميوشة سيبك من الكلام ده دلوقتى وركزى معايا


أنا : معاك يا كبير خير .. فيه حاجة؟


ميرو : طبعا إحنا متفقين من قبل الإمتحانات ما تبدأ أصلا إننا هنتغدى مع بعض أخر يوم إمتحان اللى هو بكرة إن شاء الله


أنا : أيوة طبعا .. ده أنا رايحة إمتحان بكرة ده اصلا علشان الغدواية دى


ميرو : طب حضرى نفسك للخناقة بقى


أنا : خناقة إيه يا ميرو كفى الله الشر ؟


ميرو : بصى يا قطة .. طبعا إنتى عارفة إن بيبا بتحب التيك اواى تضرب أى سندوتشين كده على السريع ونخلص


أنا : ايوة عارفة


ميرو : أما إيمو بقى فميدخلش دماغها غير المحمر والمشمر ومحشى البتنجان


أنا : اموت أنا فى البتنجان


ميرو : لذلك فيه خناقة قوية بين الفريقين بيبا عايزة تروح (كوك باب) وإيمو عايزة تروح ( أم حمادة )


أنا : أوبا .. صحيح .. طب وهنعمل إيه؟؟


ميرو : أنا قولت أكلمك علشان أنبهك لإن الموضوع ده من الصبح .. وكلموكى لاقوكى لسه نايمة


أنا : إيه الورطة دى ؟ طيب أنا أعمل إيه دلوقتى ؟ دبرينى يا ميرو


ميرو : يا ختى لما أدبر نفسى انا الأول .. أنا بلغتك وخلاص .. يلا سلام


أه يا ميرو يا .............. لأ بلاش شتيمة .. البت طيبة برضة ونبهيتنى .. أعمل إيه أعمل إيه ؟؟ المصيبة إنى فى الأكل معنديش ياما إرحمينى .. أنا لو عليا نفسى أكل فى الإتنين بصراحة.. يا سلام ده يبقى قشطة جدا

هتعملى إيه يا ميوشة؟؟ هتروحى ( كوك باب) مع بيبا .. ولا ( أم حمادة ) مع إيمو .. طبعا دى إمخاخ ضلمة وأنا عارفاها كويس .. لو إخترت مكان يبقى إخترته علشان واحدة فيها .. يبقى بحب واحدة فيهم ومش بحب التانية .. إيه الزنقة دى بس يا ربى .. هو أنا ناقصة.. أعمل إيه ؟؟

تررررررررررررررررررررن


أنا : ألو


بيبا : أيوة يا ميوشة .. بقولك إيه عايزاكى فى موضوع مهم


أنا ( من غير ما أحس ): معاكى يا بيبا طبعا .. لو روحتى فين أنا معاكى


بيبا: بجد يا ميوشة يا حبيبتى .. ربنا يخليكى ليا هى دى الأصحاب ولا بلاش .. أمووووووه


أنا : عيب يا بيبا تشكى فى إخلاصى ليكى .. إنتى الحب الحب .. إنتى الأنتيخ


بيبا : خلاص بقى يا ميوش علشان بتكسف .. سلام بقى


يا لهوى .. إيه اللى أنا عملته ده .. أنا وعدت بيبا ولا إيه .. عااااااااااا.. اعمل إيه بس يا خواتى


تررررررررررررررن


أنا : ألو


إيمو ( بجعورة عالية) : ميووووشة إنتى هتروحى مع بيبا بجد


انا : يا دى النيلة هى لحقت تقولك ؟؟


إيمو : ردى عليا إنتى هتروحى مع بيبا ؟


أنا : يا هبلة .. أنا بقولها كده وخلاص .. أنا معاك طبعا يا باشا .. (كوك باب )إيه وكلام فارغ إيه ؟؟ مفيش غير ( أم حمادة) ده أنا حتى لو خلفت ولد هسميه حمادة .. يتربى فى عزو حمادة عزو


إيمو : اه كنت بحسب ماشى سلام


لأ مش معقول .. إيه الجنان ده ؟؟ العيال إتهبلت مرة واحدة كده .. لأ بجد فيه حاجة مش طبيعية حصلتلنا .. إحنا إتحسدنا ولا إيه ؟؟


تررررررررررررن .. طيب والله ما أنا رده .. وأدى سلك التليفون كمان

إستغفر الله العظيم حتى الغدواية مش هنعرف نتهنى بيها .. نهايتة .. قررت أنا بقى اهرب من الأزمة دى بالمذاكرة .. قمت سميت الله كده ودورت على الكتاب .. الحمد لله لاقيته.. أتارى المادة دى كتابين.. كل كتاب فيه مسرحية.. واحدة لشكسبير (إستغلستها بصراحة ) والتانية أصغر منها شوية إسمها ( بيت الدمية )

والله قصة لذيذة ناهيك عن بطلة المسرحية نورا اللى طول المسرحية بيعاملوها على إنها عيلة صغيرة وهى زى الشحطة عندها كام عيل .. وناهيك كمان على إنها كانت هتودى نفسها فى داهية علشان تنقذ حياة جوزها اللى طلع ندل فى الاخر .. بس عجبنى أوعى أخر فصل لما إدت لجوزها الكلمتين الجامدين فى جنابه وسابتله البيت ومشت .. هى دى الست القوية .. أصل بصراحة جوزها ده ندل ندل يعنى.


المهم بقى وأنا فى قمة الإنسجام مع المسرحية ألاقى تنتنتنتنتنننننننن كام رسالة على الموبايل من نمر الشلة كلها بصيغة واحدة

( إدخلى على النت حالا ) .. يا ولاد اللذينا .. معرفوش يطولونى فى التليفون هيزنقونى فى النت

دخلت على النت علشان أشوف الأزمة الكونية اللى حصلت علشان كلهم يتلموا اللمة دى .. أستر يا رب


دخلت على النت لاقيت الحلوين كلهم مترصدين زى الأسد ما بيترصد للفريسة بتاعه


بيبا : ميووووشة .. دلوقتى وإنتى قدامنا كلنا حددى موقفك


أنا : موقفى من إيه بالضبط؟؟


إيمو : هتروحى معايا ولا مع بيبا ؟؟


موها : هو إنتوا خلاص إتقاسمتوا حزبين؟؟


بيبا : إيمو هى اللى مصممة


إيمو : لأ بيبا هى اللى راكبة دماغها


ميرو : طيب إنزلى من على دماغك يا بيبا لحسن يوجعك .. هههههههههه


كلنا فى نفس الوقت حطينا سمايلى وش أحمر


ميرو : إيه يا إخوانا ؟ أنا قولت اطرى القعدة يعنى


أنا : بصى أنا مع الاغلبية


بيبا : مفيش أغلبية .. كل واحد هيقول رأيه من دماغة .. ده غير إن ميرو وموها وساسو مش هيقولوا غير لما تقولى إنتى الأول


أنا : إيه ده .. إنتوا بتلوا دراعى ولا إيه .. طب إيه رأيكم بقى إنى مش هروح لا ده ولا ده


ساسو : أمال هتروحى فين ؟


أنا : هناكل زى ما بناكل كل يوم .. عند حبيبنا وعشرة عمرنا ( زيزو النتن )


كلهم : إييييه ؟؟


موها : حتى أخر يوم هيبقى فول وطعمية


ميرو : أنا اصلا عمرى ما كلت من عند الراجل ده ولا عمرى هاكل عندى .. برستيجى ميسمحليش


موها : برستيج مين يا حلوة .. ده إحنا قاتلينو سوا بالأمارة رميناه فى الترعة


ساسو : هو مين ده اللى رميتوه؟؟


أنا : ببببببببببببببببببببس.. يا ساتر عليكم .. إسكتوا


إيمو : لا نتن ولا معفن .. هى ( أم حمادة )


بيبا : لأ ( كوك باب )


أنا : بقولكم إيه إنتوا خنقتونى .. من أخر بقى أنا مش عايزة قلبة دماغ .. يا إيما ترسوا على بر .. يا إما بلاها الأكلة دى اصلا .. يا هبلة منك ليها إحنا علينا إمتحان بكرة


ساسو :أه صحيح . هو إحنا علينا إمتحان إيه ؟؟


موها : بدل ما تفكروا فى الأكل فكروا فى علاج الزهايمر بتاع ساسو ده الاول


أنا : إنتوا باين عليكم فايقين ورايقين ..انا ماشية.. النت ده بفلوس .. سلام


أكيد هيتبع بعنى .. أمال هنتعلق كده

هناك 43 تعليقًا:

blue-wave يقول...

ههههههههههههه
شله خلل خلل يعنى
المهم طمنينا بس
رسيتوا على ايه فى الموضوع العويص دا؟

بطوط حبوب يقول...

على فكره انتوا شله عشره على عشره

اذا ظبطوا الاكل فالباقى سهل

امتحان ايه ووجع دماغ ايه
المهم الاكل
:)

maiosha يقول...

blue-wave
..................
هو عويص بعقل ده عويص بهبل
وإن كان على الخلل مفيش أكتر منه عندنا

إصبر للبوست الجاى وإنت تكمل معانا

maiosha يقول...

بطوط حبوب
..................
ما أنا بقول كده برضة
بلا إمتحان بلا وجع قلب
المهم نااااااااااااااااااكل

aliaawwe يقول...

هههههههههه
طيب فى الاخر روحتوا كلتوا و لا الموضوع باظ

wa7ed 2ensan wnsan يقول...

هي دي الشله ولا بلاش والله دماغ عاليه ويتحرق اونكل شكسبير في داهيه بقى


والله الواحد عايز شله زي دي ..

سلامي ليكي وللشله كلها نفرايه نفرايه ونفر نفر

maiosha يقول...

aliaawwe
.................
ههههههه
كلكو مستعجلين ليه؟؟
إنتظرونا الحلقة القادمة

maiosha يقول...

wa7ed 2ensan
.................
عبد الله
بقى عايز شلة زى دى .. ده إنت لوحدك دماغ تكفى عشر شلل فى بعض

حاضر يا سيدى هسلملك عليهم .. مع إنك مش هتتبسط كتير بالمعرفة دى

Amgad يقول...

اوووووووووووووف
فظيعة بجد يا ميوشة
ايه يا بنتي الروعة دي
بجد والله مدونتك دي زي متكون ريفرش كده للخنقة والاراء الفلسفية اللي الواحد بيتشنكل فيها في المدونات التانية
مش عارف اقولك ايه
بس بلاش تعملي فينا زي المسلسلات العربي وتقطعي الحلقة عند اخر مشهد مهم
خالص تحياتي

almasry يقول...

والله اانتم شله أى كلام حد يتغدى محمر ومشمر فى مطعم؟
؟
؟


فين أيام زمان ايام مطاعم البغل للفول والفلافل


يلا بقى حسن الختام


لكن لعى فكره امتحان الدراما لو كان جه بدرى حبه كنا قلبنا شكسبير يحيى الفخرانى وشارلى شابلن اسماعيل يس وكده يعنى المهم انا عارف انك خرعتى فى الامتحان وخرعتى يعنى اخترعتى لكن بحزف بعض الحروووووووووووف


تحيــــــاتى
المصـــــــــــرى

Amgad يقول...

تعقيب لزم وضعة
ردي مش عاجب المصري وجالي علي المدونة معترض عليه
انا فعلا بعد لما قريته اكتشفت انو ممكن يوصل لبعض الناس بشكل خاطيء لذا وجب الاستدراج
انا لما بقصد الخنقة طبعا مش بقصد المدونات او كلام اصحاب المدونات وان كنت اقصد الخنقة لبعض الاحدائ السياسية الجارية كغرق العبارة اما بالنسبة للاراء الفلسفية فانا قصدت ان هنا لا احتاج للتفكير لفهم المراد
وانما تكون كوميديا الموقف هي المسيطرة علي كل اليوميات وبالتالي فهي كالريفريش في طريق اصفحنا للمدونات اتمني يكون قصدي وصل
واسف للتطويل علي صاحبة المدونة اللي ملهاش ذنب

maiosha يقول...

amgad
.............
كل بوست يا أمجد بتحرجنى بذوقك بجد
يا سيدى انا مفهمتش غلط ولا حاجة وأظن إن كلامك واضح.. وأنا زى ما أنا فى البلوج بالضبط واخدة الحياة ببساطة خالص ودايما ببص للنص المليان من المج ( الكوباية سابقا)
ولا يهمك يا سيدى قول اللى إنت عايزة
إحنا هنا للفضفة الحرة المستقلة

وبعدين إسلوب المسلسلات لابد منه
علشان يبقى فيه إثارة وتشويق

نورتنى يا أمجد

Habiba يقول...

ياخبر
انتى دمك سكر خالص
ماشاء الله عليكى لا وعاقله بتقوليلهم ان عندكوا امتحان
عسوله
ربنا يكرمك
دمت بخير

maiosha يقول...

المصرى
..........
ما هو أنا قولتلهم كده فى الأول
الفووووووول منه وإليه نعود
إنما هم بقى عايزين ياكلو حاجات غريبة
قال إيه عايزين كباب ومكرونة بالبشاميل وحاجات بيئة كده

إنما الفول هو ده

أه صحيح
براحة على أمجد شوية يا مصرى .. أكيد هو قصده خير يعنى ومش قصده حاجة وحشة

ماشى يا باشا ؟؟
منورنى

maiosha يقول...

habiba
................
نورتينى يا قمر
ربنا يخليكى يا رب على تعليقك الجميل
نورتى المدونة
وأتمنى متكونش أخر زيارة

صباح الصباح يقول...

بجد مش ممكن
دماغك دى والا دماغ اللى جانبك
يسلم ايديكى بجد عالبوست التحفة دو
انا قريتة لحححححححد اخر قطمة.. اصدى حرف.

تجربه المحب يقول...

انا عايزه اعرف انتوا مستعجلين ع الاجازه اوى كده ليه من حلاوتها اوى يعنى ما انا مدعوكه فيها اهه الاجازه يعنى ملل وزهق وارف وقاعده قدام التليفزيون لحد ما نخلل
او الخروجات الرخمه لنفس الاماكن الممله حتى لو اتغيرت الصحبه الى هى اساسا ارخم ولا شغل البيت الكتير الى يقطم الوسط ولا الملل والى نبات فيه نصبح فيه
اجازه ايه بلا ارف دى حاجه تغم القرد
دأنا بحلم باليوم الى ارجع فيه لايام الجامعه هو صحيح بتكون رخمه بس بس ايام الامتحانات بس انما هى برضه مسليه ولذيذه
وأخيرا اتمنى لكى اجازه سعيده ولذيذه
اتمسى بالخير
امضاء
متفائله

SeNdReLLa يقول...

على فكرة جامده جدا
وانا مستنيه اعرف الباقى بسرعه بقي
بس انا من رايي تروحو عند كوك باب بقي وخلاص
سيبكو من ام حماده دى مين حماده ده اصلا ههههههههههههههههههههههههههههه

maiosha يقول...

صباح الصباح
................
هههههههههههه
بالهنا والشفا

نورتنى

maiosha يقول...
أزال المؤلف هذا التعليق.
maiosha يقول...

تجربة المحب
...............
لأ فعلا عندك حق
أجازة إيه وممل إيه ..
ياى خروج وتليفزيون .. حاجات بيئة
يا ستى مش مهم الخروج والفسح كفاية إنى هعرف أناااااااااااام
وأنا فى النوم جبارة

نورتينى يا قمر

maiosha يقول...

سندريلا
...............
بقى مش عارفة حمادة يا سندريلا
لا لا ده كده يزعل منك
حمادة ابن طنط ام حمادة
أحسن ناس بيعملو كباب وفراخ مشوية
فكرينى فى يوم أبقى أخدك وتبقى تعزمينى عنده
معلشى أصلى مفلسة خالص

نورتينى

دكتور بهــدوء يقول...

يااااه
انا ارجح تجيبو اكل م عند كوك باب
وتروحو تاكلوه عند ام حماده
مش هتسأل أوي عن مصدر الأكل
طالما هتطلبو م عندها
ولو سألت إعملو مستعبطين ومش عارفين
انا اللي هحل لشله العفاريت دي ولا إيه
بعمل كده عند الاخ مؤمن
بدخل بكانزتي ولا يهمني حد
واطلب سندوتش وبطاطس م غير كانز

شفقة هانم واحسان بك يقول...

انتى فين وحشتينا موت موت موت

maiosha يقول...

دكنور بهدوء
....................
ياااااااااااااه
إنت فينك من زمان يا راجل .. وحشت المدونةوالله
ايه حركات الخباثة دى أحنا بنعمل كده فى بيتزا هات.. انما مجربناش الحكاية دى فى مؤمن قبل كده
والله لهجربها .. ولو حد اتكلم هديهم عنوان مدونتك يتصرفوا معاك بقى

maiosha يقول...

شفقة هانم وإحسان بك
...................
انا هنا هنا يا ابن الحلال
لأ أنا فعلا كنت مشغولة اليومين اللى فاتوا دول جدا جدا جدا

ربنا يخليكوا ليا وميحرمنيش من سؤالكم عليا

afew good men يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

mohamed ghalia يقول...

هو حد بيشيل هم إمتحنات فى الزمن ده
أهم حاجة الصحة خدى بالك من صحتك وتغذى كويس أهم حاجة ههههههههه
تحياتى
كل سنة وانتى طيبة

maiosha يقول...

A FEW GOOD MEN
.................
ربنا يبسطك كمان وكمان
ههههههههههههههههه

maiosha يقول...

mohamed ghalia
.................
ما انا قولت كده برضة
صحتى بالدنيا
بلا مذاكرة بلا خنقة

نورت المدونة

واحدة مفروسة يقول...

كده انا جيت متأخر
خلصتوا اكل و خلصتوا امتحناااات
كل رمضان و انتي طيبه

Zanooba (Zeinab sab9n) يقول...

إيه الشلة الجامدة دي ؟هههه و عجبني أوي حبك للمجقق كونان يعني و أنا زغنونة كنت ممكن أطلع تحرية بسببه من كتر حبي فيه ههههه أول زيارة و إنشاء الجيات أكتر من الريحات

funckydoctor يقول...

هههه
صباح المزاااج والروقان
المهم بس أنا عرفت مين كووك دوور قصدى باب ايه بقى أم حمادة ده أوعى تكونو قاصدين أبو شقرة :D

maiosha يقول...

أه الحمد لله قربنا نخلص إمتحانات أهو بس لسه موال الأكل ده

وإنتى طيبة يا مفروستى يا حبيبتى

maiosha يقول...

zanooba
.............
المدونة نورت والله العظيم

appy يقول...

لا بجد ايه اللى بتعملوه فى نفسيكوا ده ههههههههه

المهم ربنا يخليكوا لبعض وعامله ايه فى الامتحان

شفقة هانم واحسان بك يقول...

انتى فين وحشتينا

دعاء مواجهات يقول...

قمرى الجميل

ازيك ياباشا

هههههههههههههههههههههههه

انتى يابنتى مقضياها مكالمات مفيش مزاكرة يعنى

قولنا اطلع منها بقى احنا فاهمينك والامتياز فضحك ياعم

بحبك اوى

ووحشاانى اوى اوى

بيس

زيزو الشقى يقول...

دى اول زيارة
ولو زورتينى مدونتى تنور
اتمنالك التوفيق
والنجاح
تحياتى
سلاااااام

شفقة هانم واحسان بك يقول...

انتى فين عمالة ادور عليكى
ليكى عندنا تاج تعالى خديه قبل ما احسان يطمع فيه

Rannon يقول...

ليه بس خليتيني أتعلق واندمج :@::@هنستنى نشوف رحتي مع مين في الآخر

مدونة جميلة
وبوست حلو بس مستنيين الباقي
تحياتي:)

maiosha يقول...

يا جماعة والله أنا مش لاقية وقت خالص أرد
عارفة إنى مقصرة جدا بس أعزرونى اليومين دول بس

بجد ربنا ميحرمنيش من تعليقاتكم أبدا

يا شفقة يا حبيبتى أنا موجووووووودة أهو

التاج وصل ألف ألف شكر عليه

لأ متخافيش إحسان كان عايزة بس على مين هخده يعنى هخده

تسلميلى يا جميل

البنت الشقيه يقول...

ربنا معاكى ياجميل المشكله انكوا صحاب اوى ومش هتعرفى تزعلى حد منهم


بجد ربنا معاكى وانا هقرفك هناههههههههه لغايه مااعرف رسيتوا على ايه
تحياتى
البنوته الشقيه
لينا