الخميس، 30 أكتوبر، 2008

قطيعة .. محدش بياكلها بالساهل


فى الأول لينا كلام تانى


.............................


فى الأول أحب اقدم كل شكرى وإحترامى وتقديرى للفقيد إلى رحمة الله الكمبيوتر بتاعى .. اللى الطب الشرعى أثبت إنه من ساعة ما إتكتب عليه البوست بتاع حلم الحرامى وإنى عايزة أخلص منه وهو حالته النفسية فى النازل .. لغاية ما قرر يعلن إعتزاله وينفجر .. والهارد يتحرق بكل اللى عليه .. بحلوه ومره وكل ذكريتنا الجميلة


وكل كيمو وإنتوا طيبين


....................................


بعد ما أول يوم فى الأجازة عدى وراح.. وإفتكرت إن الملل خلاص هيبدا لمدة إسبوعينلغاية ما يبدأ الترم التانى .. إكتشفت إن الحياة مش بمبى بمبى على رأى طنط (سعاد حسنى) .. وإن البيج بوس كان محضرلى فى دماغه مشاريع تانية خاااااااالص



تانى يوم الأجازة على الغدا لاقيت بابا جايبنى من فوقى لتحتى بعينه وبيقولى



البيج بوس : ياااااااااه .. كبرتى يا ميوشة



أنا : أيوة يا بابا .. ما أنا عايشة فى الدنيا بقالى كتير




البيج بوس : وأنا برضة كبرت أوى يا ميوشة


أنا : معلشى يا بابا .. ما إنت برضة كنت شاب وكنت عامل العمايل يعنى


البيج بوس : وخلاص مش قادر وعايز ارتاح


أنا : إيه يا بابا المقدمة دى كلها .. عايز إيه يعنى؟




البيج بوس : يا حبيبتى أنا تعبت من الشغل وعايز أرتاح


أنا : نعم .. طيب ولما تبطل شغل يا بابا أكل أنا منين؟؟


البيج بوس : يا ساتر يا رب


أنا : بس اقولك يا بابا فكرة حلوة .. مش إنت عايز ترتاح ؟ إيه رأيك تبيع الصيدلية بتاعك دى .. وناخد فلوسها ونعيش بقى


البيج بوس : أبيع إيه يا بت إنتى .. هى دى أفكارك المنيلة؟ طيب ما فيه فكرة أحسن


أنا : هى إيه؟


البيج بوس : إنك تنزلى معايا فى الأجازة تساعدينى


أنا : نعم .. إزاى يعنى ؟ أنا مدرسة


البيج بوس: مدرسة إيه؟ إنتى صدقتى ؟ هو علشان حضرتى ترم فى كلية تربية تبقى خلاص مدرسة


أنا : بس يا بابا أنا مش بفهم حاجة فى الكيميا


البيج بوس : يا بنتى كيميا إيه ؟ هو أنا بقولك روحى ساعدى أحمد زويل .. الموضوع أبسط من كده بكتير .. ده أنا بقالى 30 سنة صيدلى .. ومرنت صيادلة بعدد شعر راسك .. مش هعرف أعلم بنتى؟؟


أنا : والله حرام .. يعنى الأجازة اللى الواحد واخدها علشان يروش ويعيش بقى أخيرا .. أنزل أشتغل فيها


البيج بوس : يا نهار أبيض .. هو إنتى كنتى لسه محتاجة الأجازة علشان تعيشى .. اومال بتعملى إيه طول الترم ده .. ده أنا مشفتكيش ماسكة كتاب غير ليلة الإمتحان .. وهم يادوب ساعتين مفيش غيرهم


أنا : عااااااااااااااا .. مليش دعوة .. مش هروح الصيدلية دى .. عااااااااااااااا.. أنا مش عايزة أشتغل


البيج بوس : على فكرة .. أنا هديكى مرتب


أنا : هنبتدى الشغل إمتى يا باشا؟؟


*******************


تانى يوم بابا صحانى الساعة 2 الضهر على وشى علشان أنزل الصدلية لإنه كان مستنينى هناك من الساعة 9 الصبح .. وطبعا بعد كورس التهزيق لبست وإتشيكت .. أه دكتورة بقى .. وقمت نزلت الصيدالية .. وهناك بقى


أنا : بابا الصيدلية دى عاملة كده ليه؟ دى لونها يجيب المرض .. أنا عايزة أعملها نيو لوك


البيج بوس : نعم !!!!


أنا : أيوة أنا عايزة أعمل الحيطان قطيفة حمرا .. وأدهن علب الدوا روز فى موف


البيج بوس : تدهنى الدوا؟؟ طب ما تغيرى لونى بالمرة


أنا : لا يا بابا إنت كده أمور .. بس هنعمل تعديلات بسيطة .. عايزاك تعمل دقنك دوجلاس .. ونلبس أنا وإنت يونيفورم .. هنلبس ابيض فى أحمر


البيج بوس : طيب إيه رأيك نحط على القميص أسامينا كمان ونمسك فوط ونقدم الدوا على صوانى .. إخرسى يا بت إنتى خالص .. وتقعدى هنا زى الكرسى ده .. وتشوفينى وتتعلمى وإنتى ساكتى .. إنتى فاهمة ولا لأ؟؟


أنا : خلاص يا بابا الحق عليا .. كنت عايزة أخليلك الصيدلية روشة


البيج بوس : صيدلية مين بقى .. دى بقت ديسكو


**********************


من هنا بقى هنقضى كام يوم مع مغامرات الدكتورة ميوشة على ما الأجازة تخلص والترم التانى يبدأ .. يا مسهل يا رب

هناك 36 تعليقًا:

shahieno يقول...

والله بعودة يا ميوش
إلى يشوف كيمو غيرة يهون علية كيموهيتوة
معلش ياما حرقنا هاردات أنا عارف أن حرق الهارد كان بمثابة تجربة قاسية بالنسبالك
أما موضوع البوست الجديد فهو جامد جدا ويعتبر بمثابة أنطلاقة فى سلسلة جديدة يوميات صيدلانية فاشلة
وفى إنتظار يوميات مدرسة فاشلة
بس إن شاء الله بوست ناجح جدا
وحلوة أوى فكرة تقديم الدوا على صوانى
جااااااامدة
وياريت كمان تنزلى دوا بنكهات يعنى مثلا دوا صداع بطعم الكاتشب ودوا إسهال بطعم الشطة واللمون
ربنا يكون فى عون البيج بوس
سلام يا عسل

blue-wave يقول...

ههههههههههههههههههههههههههههههههههه
والله عسل
افكارك تجنن اصلا
انا هاعرضها على الواد صحبى اللى فاتح صيدليته قريب:))
وتيجى تشتغلى معاة ومهانديلك مرتب اكتر من مرتب باباكى
ايه رأيك؟:)))

واحدة مفروسة يقول...

مايوشه يا قمرة
الكلام ده بجد و لا تأليف؟
ما هو انا عارفاكي انتى ممكن تسرحي بينا ده انتى عفريته
بس لو الكلام ده صحيح
ترم ايه التاني اللى انتى بتتكلمي عنه؟ هوه الترم الاول لحق يخلص؟؟؟
ديه الجامعات دخلت فى رمضان
يعنى يا دوبك عدى شهر وشوية
شكلك بياكل بعقلنا حلاوة
المهم لو الكلام ده بجد.....اعملى نيو لوك للصيدليه
بس بلاش الاحمر اللى ممكن يعصب العيان
هههههههههه
ممكن اسود تحسبا انه ممكن يكون بيسلم نمر
او ممكن تعمليها ابيض...تبقى احلى


حنشوف مغامراتك يا دكتورة
و ربنا يستر مش تدى حد دوا غلط
انا مستنية بفارغ الصبر المغامرات الشقية

عارفه انا متهيالى فى الآخر حتجيبي ضرفها
هههههههههههههههههههههه

mohamed ghalia يقول...

ياااااااااااااه اتأخرتى علينا قوى
أول مسمعتى كلمة المرتب طبعا ولا همك صح ههههههههههه
شكلنا هنشوف مغامرات عجب
عايزة تعملى نيو لوك للصيدلية يا مفترية
انا بقول تبنيها من جديد أحسن
تحياتى
دمتى بود
بوست هااااااااااااايل

ojg يقول...

قوليلي بسرعه الصيدلية بتاعتكو فين بالضبط
عشان مش اعدي من هناك ولا اجيب دوا
انا كده اطمنت على مستقبل العيانين في المنطقه بتاعتكو
ياخوفي منك
:))
وخااااصه بعد النيو لوك الفظيع اللي ناوية تعمليه
ربنا الستاااار
نستني الحلقات الجايه والامر لله
:))

maiosha يقول...

shahieno
...........
بجد يا شاهينو إنت مش عارف ردك ده أثر فيا قد إيه!

بس إيه الكلام الجامد ده .. بمثابة .. وإنطلاقة

بس بجد تسلم إيديك على الرد الجميل

والدوا اللى بالنكهات ده أنا فعلا حاطة جوه خطتى الخمسية الجاية

إنتظرونى قريبا

maiosha يقول...

blue-wave
.............
شوف يا سيدى .. أنا عندى مبدأ فى الحياة

أنا بشجع المرتب الأعلى .. زودلى المرتب تلاقينى عندك على طول

maiosha يقول...

واحدة مفروسة
..............
لا والله يا مفروسة بابا فعلا نزلنى علشان أشتغل معاه فى الصيدلية

لأ يا مفروستى أنا بحكى الكلام اللى حصلى فى سنة أولى .. يا جميل أنا إتخرجت من سنة أولى خلاص .. يعنى تقدرى تقولى دى حكايات من الماضى القريب

أما بقى الصيدلية .. وضرفها دى .. فمقدرش أوعدك بحاجة
إحنا هنعمل اللى علينا والباقى على ربنا- دكتورة دكتورة يعنى-

maiosha يقول...

mohamed ghalia
.................
معلشى والله على التأخير .. ما أنا زى ما قولتلكم كيمو إنفجر .. وكنت عايشة لاجئة عند كيموهات الناس لغاية ما بابا رضى عليا وجابلى كيمو جديد


إن شاء الله التأخير ده ميتكررش تانى

maiosha يقول...

ojg
............
بقى كده

بدل ما تعملولى دعاية وسط البلوجرية

ده أنا ناوية أشغل الصيدلية دى شغل نار

إستنوا عليا بس وإنتوا هتشوفوا العجب كله

شفقة هانم واحسان بك يقول...

هههههههههههههههههه
معقولة يا ميوشة هتتجننى على باباكى كمان واللهى انتى مطيورة
عايزة تعملى نيو لوك للصيدلة بس تصدقى فكرة روشة
تسلم دماغك

2ensan wnsan يقول...

بيتهيألي هنسمع عن مرضى ارتيكاريا وكده بقى

صباح الديتول والمطهرات يا ضاكتورة ميوشه ربنا يكون في عو ن البيج بوس دا مش هيستحملك بس لا دا كمان هيدفع تعويضات لمرضى البرد اللي هياخدو هدية واحد مرض شلل مع كل علبة دوا .. شوفتي بقى .

maiosha يقول...

شفقة هانم وإحسان بيه
....................
والله يا جماعة النيو لوك ده كان هيبقى جامد أخر حاجة .. بس الله يسامحه بابا بقى مش راضى

وبالمناسبة يا شوشو فيه عندى خبر كويس

أنا ناوية أعمل عرض كل واحدة تاخد سم فران بغرض إنها تحطه لجوزها فى المسقعة ليها عندى علبة سم تانية هدية

يالا يا جماعة متفوتوش العرض

maiosha يقول...

2ensan wnsan
...............
متستعجلش يا عبود

كله جاى فى السريع .. أرتيكاريا تلاقى .. زهايمر تلاقى

هنا معايا مش هتقدر تغمض عنيك

Miss. Sosa يقول...

ميوشة العسل سامحيني ع الغياب

بس ايه خفة الدم الفظيعة ديه بجد انتي رهيبة

عجبني اوي التغير المحوري اللي حصل اول ما سمعتي كلمة مرتب .. هو ده الكلام يا باشا :d

ولا افكارك اللاوذعية لروشنة الصيدلية

هو ده الكلام :))

في انتظار مغامراتك يا قمر

mohamed ghalia يقول...

ليكى تاج عندى
تجوبيه بالذوق أحسنلك ههههههههههه
فى إنتظار إجاباتك
تحياتى

dramaqueen يقول...

عسل يا ميوشة
واحشانى اوى يا قمر وواحشنى كلامك اللى زى السكر
ربنا يخليكى لبابا

funckydoctor يقول...

هههه
عملتى دكضورة عموما هتنفعى أكيد
واشمعنى الألوان البناتى ده
ماله الموف يعنى :P

maiosha يقول...

miss.sosa
................
سوووووووووسة
وحشتينى مووووت ووحشتنى ردودك الجميلة

يا ستى خفة الدم دى من بعض ما عندكم .. إحنا نيجى جنبك إيه يا باشا

maiosha يقول...

mohamed ghalia
..................
ألف شكر على التاج
وإن شاء الله أرد عليه فى أقرب فرصة

maiosha يقول...

dramaqueen
...........
بجد والله كلكم وحشتونى أكتر

وغيابى ده والله كان غصب عنى وربنا هو اللى يعلم

maiosha يقول...

funckydoctor
...............
يا سلام
ربنا يطمنك يا دكتور
ده أنا لما كتبت البوست ده قولت أكيد كلية الطب والصيدلية هترجمنى رميا بالطوب

شكرا على التشجيع

The Führer يقول...

ههههههههههههه

الله يرحمك يا ريس متقال لما قلت"ولا كل من ركب الفرس خيال"!!
ربنا يستر ومنلاقيش عربية نجدة بتلف وتنادي"فلان الفلاني القاطن بالحتة الفلانية لا تأخذ الدواء اللي ادتهولك ميوشة ، الدواء فيه سم قاتل"

أسلوبك مرح وجميل في انتظار البقية وكمان أسماء الضحايا!

برجاء تقبل مروري الأول
دمت بكل الخير

اقصوصه يقول...

ههههههههههههههه

تجربه حلوه

واحسن من قعدة البيت

ع الاقل استثمار مفيد للاجازه

بس ما خبرتينا

الراتب كم؟

صباح الصباح يقول...

ايوا ايوا

عشان الموضوع فية مرتب

هههههههههههههههههههههههههههه

maiosha يقول...

The Führer
............
ههههههههههههه
والله إنت اللى دمك زى العسل

إحذر لا تشرب هذا الدواء .. الدواء فيه سم قاتل

بجد نورتنى

maiosha يقول...

أقصوصة
..........
إيه ده بقى هنبتدى قر من أولها

عايزين تعرفوا المرتب ليييييييه؟؟

وبعدين هو أنا لسه إشتغلت علشان أخد حاجة

ربنا يستر بس و مش أطرد من أول يوم

maiosha يقول...

صباح الصباح
...............
طبعا كله إلا الفلوس

حد مش فاهم حاجه يقول...

والله انا معجب بأفكارك يا ميوشه وبأسلوبك وربنا يكملك بكتبك
ويا ريت تزوريني
ونكمل مشروع المدونه المشتركه
وانا عندي مواضيع وافكار كتير لو اتكلمنا فيها هتعمل شغل

دينا حامد يقول...

تعرفي انا معاكي ان فعلا الواحد مش بيحس بقيمة الدراسة غير في الاجازة!!

وحلوة فكرة النيولوك معاكي حق شكل الصدلية التقليدي والدوا يجيب المرض اصلا
اعملي نيولوك ماحدش واخد منها حاجة

bar2ash يقول...

ميوشا

هو انا ليه بحس دايما ان الزمن سابق عندك

يابنتي البوست معمول يوم 30 اكتوبر
عمري ماشفت اجازة ترم في الوقت ده

دايما المواعيد في مدونتك متلخبطه ليه

ولا هو في فرق توقيت ولا ايه


ع العموم يا ستي انا هعمل نفسي مصدقك واقول ان اجازة نص السنة ابتدت


بس عايز اطلب طلب الحجات اللي قلتي لبابا عليها اللي هتخلي الصيدلية روشة دي عايزك تيجي تعمليها في صيدليتي مهي صيدلية اخوكي برضه ولا ايه؟

وكمان عايزك تبقي شطوره كدا في الدوا والكيميا عشان عايزك تبقي تساعديني في صيدليتي
ههههههه


اه من الحق

انا زعلان
عشان الجميل مقصر تقصير فظيع

معتش حتي بيقول السلام


سلام

بررررررررقش

.:.-=- ELGaZaLy-=-.:. يقول...

ههههههههههههههههههههههههههههه..


ياه يا مى بقالى كتير مجتش هنا وبقالى كتير مضحكتش كدة اضحك الله ثغرك بجق

maiosha يقول...

حد مش فاهم حاجة
..............
بجد والله أنا متحمسة للفكرة .. بس إنت قلت الفكرة وخلاص .. يعنى ملقتش حماس للتنفيذ

وبجد لو فيه حماس ولاقيت متطوعين تانين أنا معاكم

maiosha يقول...

دينا حامد
...........
أيوة كده يا دينا أنا عايزة مشجعين .. لحسن بابا كاسر نفسى خالص

متعرفيش نمرة مهندس ديكور مجنون يعملى الديكورات دى؟؟

maiosha يقول...

bar2sh
...........
هههههههههههههه

والله يا برقش إنت عسل .. يا سيدى الموضوع لا فيه فرق توقيت ولا حاجة .. كل الحكاية إنى كنت عديت سنة أولى لما قررت أكتب فى البلوج .. ولما جيت أكتب قولت معقولة هبدأ من سنة تانية يعنى.. لازم أجيب الموضوع من أوله

يعنى الكلام ده حصل من زمان - مش زمان أوى يعنى

تمام كده

منورنى يا باشااااااااااااااا

maiosha يقول...

.:.-=- ELGaZaLy-=-.:
......................
ربنا يبارك فيك يا غزالى
وميحرمنيش من زياراتك أبدا