الجمعة، 10 أكتوبر، 2008

أول يوم أجازة


الأجازة .. أول يوم اجازة.. هيه هيه هيه
عارف شعور لما تبقى مستنى حاجة بقالك كتييير أوى .. حاجة متوقع إنها فيها الراحة والمتعة وأى حاجة حلوة .. وفجأة الحاجة دى بتيجى أخيرا .. ياااااااااااااه.. عارف بتحس بإيه؟؟؟ بتحس ب.. بتحس ب..هههههه تصدقوا ولا حاجة .. بجد والله ولا حاجة زيي تمام فى أول يوم اجازة

اليوم ده إبتدى بصحيانى من النوم على حلم غريب أوى .. هو ممكن يكون مفزع شوية .. بس بصراحة أنا قمت من النوم مبسوطة ، حلمت بإنى كنت بذاكر تانى الدراما -بعد الشر عليا طبعا- والحرامى جه تانى برضة .. بس المرة دى نزلى


الحرامى : سلام عليكم يا أستاذة


رفعت راسى علشان اشوف مين اللى بيكلمنى ده .. لاقيت راجل واقف قدامى .. راجل عادى جدا .. بس اللى فعلا مش عادى إن رجله كانت كبيرة اوى فكرنى بفطوطة بتاع زمان .. كنت حاسة إنه زى ما يكون واقع من كاريكاتير .. المهم


أنا : وعليكم السلام .. نعم .. مين حضرتك؟


الحرامى : محسوبك الحرامى حضرتك


أنا : بجد والله .. أنا طول عمرى نفسى أشوف حرامى .. بس مش وقته أنا ورايا مذاكرة إتفضل عايز إيه؟؟


الحرامى : هو بصراحة أنا كنت جاى أسرق بس ملاقتش فوق غير تليفزيون ومروحة وسجادة .. فقولت أنزل أكمل سرقة تحت لاقيت حضرتك .. فأنا حاسس إنى المفروض-بعد إذنك يعنى- أقتلك


أنا بقى قومت من مكانى بسرعة ومسكت زمارة رقبته وقولت :

أنا : نعم نعم يا خويا .. بقى عايز تقتلنى دلوقتى بعد ما ذاكرت حوالى نص المسرحية .. ده إنت نهارك زى وشك .. لو كنت جيت قبل ما أذاكر كنت قولت ماشى ممكن .. إنما دلوقتى .. بعينك


الحرامى : لأ طبعا يا أستاذة أنا مش هقتلك بس عايزك تساعدينى .. يعنى أنا مثلا ممكن اسرق إيه تانى .. ساعدينى الله يسترك أنا بجرى على 10عيال


أنا : أصل إنت - أنا أسفة يعنى - عبيط .. جاى تسرق شقة فاضية .. ده غير إن المروحة أصلا بايظة ده إنت هتصرف على تصليحها أكتر من تمنها.. بص يابنى إسمعنى وركز معايا .. الشقة اللى جنب دى على طول .. شقتنا ، إدخل من السطح على المنور وأول أوضة تقابلك إدخلها .. معايا؟؟


الحرامى : معاكى يا استاذة .. معاكى


أنا : هتلاقى جوه الأوضة البت نونا الرخمة إعمل فيا جميلة وإخنقها


الحرامى : عنيا


أنا : وبعدين هتلاقى هناك كمبيوتر معوق كده خده الله يكرمك .. يمكن بابا يحن عليا ويجيبلى كيمو جديدولا حاجة .. ولو لاقيت حاجة تانية فى سكتك خدها حلال عليك بس بالنص .. فاهم ولا لأ ؟؟


الحرامى : أيوة يا أستاذة فهمت .. ألف شكر ربنا يكرمك .. ربنا ينجحك


أنا : نيهااهاهاهاها .. مكتوبالك يا بت يا ميوشة كيمو جديد


ياااااااااااااااااه .. طيب بالله عليك مش حلم جميل جدا .. بعد الحلم ده بقى إبتدى اليوم .. ولا قيتنى لسه متأثرة بالدراما


المشهد الاول : الساعة 9 الصبح و أنا عمالة بتطط فى الشقة كلها وعمالة أقول " الأجازة جت .. الأجازة جت "


المشهد التانى: الساعة 1 الضهر ورجلى وجعتنى من التنطيط .. قعدت على الكنبة قدام التليفزيون وأنا عمالة أقول برضة " الأجازة جت الأجازة جت ".. لغاية ما نمت مكانى


المشهد التالت : وأنا بتغدا وبقى مليان أكل وعمالة أقول لمااما وبابا ونونا " الأجازة جت .. الأجازة جت"


المشهد الرابع : بعد الغدا دخلت الأوضة بتاعتى لاقيت الكتب بتاع الكلية طلعتلها لسانى وأنا بقول " الأجازة جت .. الأجازة جت " .. مسكت سماعة التليفون وأول ما الرقم رد قولت


أنا : الأجازة جت يا بيباااااااااااااااااااااااااااا


بيبا : يا فرحتى .. حمد لله على السلامة


أنا : تعالى نحتفل بقى .. يالا نخرج


بيبا : أنا مش فاضية يا حبيبتى .. أنا مع أختى


أنا : بقى كده طب هكلم ساسو ونخرج


بيبا : هاهاها فى إسكندرية يا قطة .. وموها عندها برد وميرو سافرت مكان مجهول


أنا : جرى إيه يا بت إنتى .. إنتى حالفة تغمينى ولا إيه ؟؟ طب وإيمو؟؟


بيبا : لأ معرفش


أنا : طيب سلام بقى ألحقها قبل ما تروح فى حتة هى كمان


ومع إيمو


أنا : إيمو .. كويس إنى لاقيتك.. تعالى نخرج يا إيمو


إيمو: نعم يا حلوة .. نخرج .. ده أنا ما صدقت أرتاح من خلاقكم .. بت إنتى الإسبوعين الأجازة دول مش عايزة أشوف وش أى حد فيكم نهائى .. فاهمة ولا لأ .. اشوفك الترم التانى يا حبيبتى


أنا : عودة الندلة


المشهد الأخير : وانا داخلة انام بعد يوم من الملل القاتل والتليفزيون الخنيق .. والصحاب الأندال


أنا : ماماااااااااااااا


مااما حيببتى : أيوة يا ميوشة .. عايزة إيه؟؟


أنا : أنا عايزة أروح الكلية .. عاااااااااااااااااااااااااااا

هناك 35 تعليقًا:

FreeKiller يقول...

تقريبا موضوع الحرامي ده مأثر عليكي جدا جدا

لا بس طلع حرامي مؤدب

بالنبة للاجازة
ياريتها كانت دراسة من غير امتحانات
كانت هتبقى احلى

تحياتي

واحدة مفروسة يقول...

هههههههههههههههههههههه
تصدقى فعلا هوه ده اللى بيحصل يا ميوشا
الواحد طول ماهو فى الدراسة او الشغل يقول امتى يجي يوم الاجازه و يبقا بيعد الايام
و اول ما يجي يوم الجمعه الواحد بيبقى بيحس انه حيعمل حاجه يخرج و لا حاجه
فتلاقيكي مش بتعملى حاجه تيجي على آخر اليوم و تبقى بتقولى
امتى الويم بقا ده يخلص عاوزه ارجع الجامعه او الشغل تاني
ههههههههههههههههههههههههههه
هذه هيه الحياة

حد مش فاهم حاجه يقول...

اهي دي الاجازه امال لما تتخرجي هتعملي ايه هتقولي هشتغل اببقي قابليني وان اشتغلتي هتملي من الروتين والايام اللي شبه بعضها وعشان جرعة اليأس والاحباط ما تزيدش عن كده اليك هذه البتاعه
عارفين ايه بيكون احساسي لما بقول وحشاني يا مصر
عارفين ايه بتمني ساعتها وبيكون نفسي اعمل ايه
بيكون نفسي اتمشي شويه تحت القمرا في عز الصيف
بيكون نفسي لو اسمع نكته من واد صاحبي دمه خفيف
بيكون نفسي اقعد في البيت
انا وروان نحكـــي حواديت
بيكون نفسي اخدها في حضني واقولها ع الصياد والسمكه
وما تسمعش اللي انا حكيته وتزعل مني وتعمل دبكه
"هو السمك بيتكلم يا عمووو"
ايوه يا توته بيتكلم في الحدوته
استني المدونه بتاعتي الجديده اللي لسه ما اخترتش الاسم بس مبدئيا مسميها
(كلام فاضي ....حرق جاز يعني ) ايه رأيك في الاسم

أبو أسامة - مدونة كباية شاي يقول...

والله انتو البنات كده دايما ... ميعجبكوش العجب .
وتقريبا زي ما نهال فري كيلر قالت :
واضح إن تأثير الحرامي يمتد وينتشر
كان الله في العون

bota يقول...

السلام عليكم

ههههههههههههههه

هو دايما الواحد بيبقى هيموت وياخد الاجازه واول ما تيجي يمل منها ويكتشف ان الكليه ارحم كفايه انه بيغير مناظر

وبجد حلم الحرامي ده جامد اوي

ربنا يوفقك

blue-wave يقول...

ههههههههههههههههههههههههه
والله انتى عسل

شفقة هانم واحسان بك يقول...

مفيش فايدة فى خفة دمك تحفة وشربات
بس قوليلى ايه حكاية الحرامى معاكى ماثر عليكى ولا ايه اوعى يكون عملك عمل ولا سحر
بس تعرفى حرامى بجح
هههههههههههههههه
تحياتى

mohamed ghalia يقول...

هههههههههههههه
بقى يوم متحلمى تحلمى بالحرامى واضح فعلا إنه حلم حلو وكمان صعب عليكى
لا وإلى غيظك منه( عايز تقتلنى دلوقتى بعد ما ذاكرت حوالى نص المسرحية .. ده إنت نهارك زى وشك .. لو كنت جيت قبل ما أذاكر كنت قولت ماشى ممكن .. إنما دلوقتى .. بعينك))
دى المذاكرة شكلها أثرت عليكى جامد.
بس فعلا إحنا بنبقى نفسنا الأجازة تيجى وبعد كام يوم بنحس بملل
هو بصى ياريت يبقى فيه دراسه من غير إمتحنات ونقضيها كده على طول
تحياتى
وحشتنا كتير خفة دمك
مطوليش الغياب عننا تانى

انا ودماغي يقول...

ههههههههههههههههههههههههههه

بجد تحياتى للحرامى لأ الراجل محترم و ساعدك عشان بابا يجبلك كيمو جديد
عندك تانى منه ده


و على فكرة دايما اول يوم اجازة بيبقى رخم كدة بس انها توصل انى أقول عايزة أروح الكلية اهوه ده اللى مش ممكن ابدا

ذو الوجه المبتسم يقول...

السلام عليكم
تعرفى انا فطست من الضحك
تخيلت شكلك وانتى بتحكى كل كلمة مكتوبة بجد انتى فظيعة فظعنة وخطيرة خطرنة
ربنا يوفقك يارب
تقبلى مرورى
تحياتى

maiosha يقول...

freekiller
..............
فعلا الحرامى ده مأثر فيا جدا
صحيح أنا مشفتوش .. بس حكاية لو دى بقى ممكن تعمل ألف قصة
لو كنت قابلته كان ممكن يحصل إيه؟؟

أنا الدراسة لو كانت نت غير إمتحانات

لا تعليق!!!

maiosha يقول...

واحدة مفروسة
................
يا واد يا فيلسوف إنت يا جامد
أيوة يا مفروستى هذه هى الحياة بتاعة الفشلة اللى زى حلاتى

maiosha يقول...

حد مش فاهم حاجة
................
لأ عادى كورس الكأبة ده أنا متعودة عليه من أيام ما كنت فى الإعدادى
وعارفة إنى لما هتخرج مش هلاقى المدارس الأجنبية بقى مستنيانى أتخرج مثلا ولا حاجة

بس أنا مش من النوع اللى بيستسلم بسهولة

أنا فى الموضوع ده بالذات رخمة جدا

maiosha يقول...

أبو أسامة -كباية شاى
.....................
يا عينى على البنات والإضطهاد اللى فى البنات

نورتنى

maiosha يقول...

bota
..........
عندك حق والله أنا فعلا حسيت بالموضوع ده جدا
وبقيت حاملة هم أجازة أخر السنة

maiosha يقول...

blue-wave
.................
منورنى

maiosha يقول...

شفقة هانم وإحسان بيه
...................
يا لهوى ممكن يكون فعلا عاملى عمل

إستر يا رب

يارب بس العمل ده ميكونش هيأثر على جوازى ولا حاجة

PrInCeSS BeRy يقول...

ميوشة يا عثولة ازيك يا قمر مبروك الاجازة اللى شكلها مش اجازة دى ههههههههه معلش بكرة ترجعى الكلية

محمد يقول...

المشهد الاول
00000000000
مبوشه فى الامتحان
بتحاول تجاوب

المشهد التانى
00000000000

ميوشه فى الكليه


المشهد التالث
00000000000
ميوشه بعد الشر فى القسم بعد أعتراف
الحرامى المؤدب


هههههههههههههههههههه


المشهد الرابع
0000000000000
أنا سعيد بقرأة بوست أول يوم أجازة

ريم يقول...

هههههههههههههههههههه
حلوة قوي
طب انا في ثانوية عامة و عندي اجازة 3 ايام ورا بعض كمان اسبوع و هموت نفسي ييجو
يااااااا رب بقى الاسبوع يعدي بسرعة
بس عارفة متهيألي انا مش هحب ارجع المدرسة ولا حاجة لأني عارفة القنابل الذرية اللي مستنياني :):):)
ربنا معاكي و تنجحي و تجيبي امتياز :)

حد مش فاهم حاجه يقول...

اخوانا يا شلة متقاطيع
لو تسمحو بس ثوانــــي
انا حد معجب بيكو جــدا
افكاركو حلوه وعجبانـي
عامل مدونه مجنونــــــه
علشانكو برضه وعلشاااني
بس اسمحولي انضملكــــــو
وابقي معاكو وانا مكاني
هنعمل معا شله جميلــــه
ميوشه
هبدأ بميوشه ويالـــــــة
اسمع كلامي ومزازيكـــــي
وهقولها يا انجح فاشلــــه
ياللي الفشل مخلوق ليكــي
اما انت من بين الشلــــه
تسلملنا كده حكاويكــــي
وخديها من اخوكي نصيحـــه
اصل الشهامه وخدانـــــي
لو مره قاعدة جوه كتــاب
والدنيا مضيقه عليكــــي
فورا قومي قالعه الشرااب
وشمي ريحة رجليــــــــــكي
هتلاقي احساسك اتخـــــــدر
والدنيا وسمعت حواليكــــي
ويجوز كمان عقلك يقـــــدر
يفهم ماد صعبة عليكـــــي
ويفك طلاسيم مناهجهـــــــا
و علي المذاكرة يقويكـــــي
وبلاش تشمي مره كمـــــــان
اصل الزيادة وحشه عليكـــي
يزيد عالفشل حبة ادمــــان
عليه العوض يا اختي عليكــي
درش
وانت يا درش يا درووووشه
اوعاك تبطل يوم دوووشـــه
ادوشنا يا ابني كمان وكمـان
واسمع نصيحتي المرووشـــــــه
لو مره قاعد في الاوتوبيــس
عمال بتدوش في الركــــاااب
وعدي جنبك جوز نسانيــــس
بيبصو ليك بصة اعجـــــــاب
روّح اوااام غير شكــــــلك
او استخبي في اي دولاااااااب
دول فكرووك تامر حسنــــــي
جمهوره بقي- والشوووق غلااااب
من ما حكيتلنا عنـــــــــه
بهت عليك شكله الجذاااااااب
بس اوعي تزعل يوم منــــــي
بتمني اننا نبقي اصحااااااب
نعكووووشعه
نعكوشه بقي دي حدوتـــــــه
حكايتها كده مش طبيعيـــــه
في طيبتها طفله صغنطوطـــــه
وفي الشقاوة معديــــــــــه
احلامها شخابيط رسمتهـــــــا
ورسومها احلام مرئيــــــــه
تسلملنا وليها شخابيطهــــا
والشخبه في طبعها غيـــــــه
بس اسمعيني يا نعكوشــــــــه
وانتبهي للفقرة الجايــــــه
لو مره عاكستك الايـــــــام
و اتنعكشت بس شويـــــــــة
و القطر داس علي احلامـــــك
والدنيا رزعاكي بنيــــــــه
اوعاك تبطلي شخابيطــــــــك
وافعي علي الدنيا قضيــــــة

بصوا يا جماعة دي غنوه انا بهديهالكم
وبقتريح عليكم فكرة اننا نعمل مدونه مشتركه لاننا تقريبا نفس الافكار والاسلوب والدمااااغ مدوانتكم عجباااني جدا لذلك بقترح نشترك في مدونه مع بعض ونسميهامبدئياا ( شلة المقاطيع)ودي هتفيدنا جدااا لان كل واحد مننا هيعملها دعايه علي المدونه بتاعته وقراءة هيدخلوها وبالتالي هيتعرفوا علي الباقيين وعلي مدوناتهم وافكارهم واسف اني طولت بس يا ريت الفكره تعجبكوم وماتزعلوش من الاغنيه لو كانت ساخره شويه

ردو عليه

funckydoctor يقول...

هاها
الكلية تانى
بس مش البوست ده متأخر كتير برضه :D
المهم مختفية من زمان فين الزيارات

اقصوصه يقول...

هههههههههههههههههه

هاي نهاية الاجازه

هذا حال بني ادم دايما

فالاجازه يطمح للدراسه وفالدراسه يستنى الاجازه

بس بصراحه تدوينه جميله

سعدت بقرائتها:)

maiosha يقول...

mohamed ghalia
..............
يا سلام من بقك لباب السما
دى لو الدراسة تبقى من غير إمتحانات ده أنا أقعد أدرس طول عمرى

إن شاء الله البوست الجديد قريب

maiosha يقول...

أنا ودماغى
................
يا ريته ساعدنى .. ده للأسف كان حلم .. وبابا لا جبلى كيمو جديد ولا حاجة .. كيمو القديم لسه موجود

إهئ إهئ

maiosha يقول...

ذو الوجه المبتسم
.................
شكرا على تعليقك الجميل جدا جدا

ونورت المدونة وأتمنى متكونش الزيارة الأخيرة

maiosha يقول...

princess perry
...................
ماهى مشكلة الكلية برضة إن فيه إمتحانات .. أنا ساعات لما بفكر فى الكلية بحس إنى بفكر فى معضلة

هى الفرخة الأول ولا البيضة؟

maiosha يقول...

محمد
...........
نورت المدونة يا محمد وألف شكر على تعليقك

maiosha يقول...

ريم
............
ثانوية عامة وعايزة ترجعى المدرسة؟؟

لأ ده إنتى بطلة على كده وإن شاء الله لما تدخلى الكلية هتنجحى بإمتياز

ربنا يوفقك

نورتينى

maiosha يقول...

حد مش فاهم حاجة
...............
على فكرة إنت بجد دمك خفيف جدا وإسلوبك زى العسل
وأنا مش معترضة أبدا على فكرة مدونة مشتركة .. بالعكس أنا بحب العمل الجماعى جدا

وياريت لو الموضوع ده يتنفذ فعلا وبطريقة مظبوطة أكيد هيبقى جميل جدا

وألف شكر على الأبيات الجميلة

maiosha يقول...

funckydoctor
.................
إن شاء الله هقولكم سبب التأخير فى البوست الجاى

maiosha يقول...

اقصوصة
...............
نورت المدونة كلها

وأنا أسعد بتشريفك ليا

DR.HAMAS يقول...

ههههههههههه

تخيل ظريف فعلا

و بعدين ليه بتقولى على نفسك فاشلة !!!

التفاؤل حلو برضه






د.حماس

حد مش فاهم حاجه يقول...

طيب انا بفترح اننا نبدأ التنفيذ علي طول ونعمل المدونه المشتركه وبدايه انا اخترت نعكوشه ودرش بس لسه معرفش هما وافقو ولا لسه وبداية برضه نبدأ باختيار الاسم والشكل اللي المدونه ممكن تظهر بيه و بالنسبه للاسم انا بقترح ( المقاطيع ) او ( العفاريت) مستني اقتراحاتكم --- علي فكره جايز اسمي يتغير علشان المدونه بتاعتي لسه في طور التنفيذ والتغيير ولسه شكلها بيكتمل في دماغي حتي الاسم لسه هغيره

FreeKiller يقول...

freekiller
..............
فعلا الحرامى ده مأثر فيا جدا
صحيح أنا مشفتوش .. بس حكاية لو دى بقى ممكن تعمل ألف قصة
لو كنت قابلته كان ممكن يحصل إيه؟؟

أنا الدراسة لو كانت نت غير إمتحانات

لا تعليق!!!

............................

اشمعنا؟؟؟