الأحد، 26 أبريل 2009

مس تربية 3


أول ما ندهوا إسم إيمو وقفنا كلنا على الباب نشجعها ونهتفلها " إيمو .. إيمو ".. بس طبعا كان كل واحدة فى سرها بتتمنى إن إيمو يجيلها برد فجأة ومتعرفشى تغنى الحلم العربى من مناخيرها وتخرج بره المسابقة ونخلص من واحدة .. قولوا أمين

دخلت إيمو بمنتهى العزيمة والإصرار .. وقعدت حوالى عشر دقايق كده وطلعت .. لكن كانت طالعة دماغها مدلدلة لتحت كده وشكلها مكتئب .. جرينا عليها بسرعة وسألناها عملت إيه جوه؟؟ بس سبحان الله البت أول ما شافتنا وشها إتقلب 180 درجة .. والإبتسامة العريضة ملت وشها وقالت

إيمو : مية مية .. كنت متألقة كالعادة

موها : أمال طالعة شكلك متضايق ليه .. قلقتينى أكتر ما انا قلقانة

إيمو : لأ لأ عادى .. أصلى نشزت فى نغمتين .. بس هو كانوا معجبين بيا أوى وقالولى أكيد إنتى الملكة

ميرو : بجد يا إيمو قالولك كده؟؟

إيمو : أيوة يا بنتى طبعا . فنصيحة لوجه الله روحوا

ساسو : نروح .. نروح مين يا قطة .. قال أروح قال .. هم بس قالولك كده علشان لسه مشافونيش

إيمو : إسمعوا كلامى وروحوا

بيبا : مستحييييييييييييل

إيمو : خلاص قد اعذر من أنذر

إسم ورا إسم ورا إسم إتندى وإحنا قاعدين .. بس إحنا كنا محتاسين مع بيبا علشان العرض اللى هتقدموا .. الهانم لاقيناها جايبة علبه ورنيش أسود وعمالة تدهن بيه وشها

أنا : مالك يا بيبا إيه اللى إنتى بتعمليه ده؟؟

بيبا : ده مكياج الشخصية

أنا : شخصية إيه يا بنتى بس اللى تخليكى تعملى فى نفسك كده

بيبا : أنا لما هدخل الإختبار هعمل حتة من مسرحية شكسبير إسمها (مكبس )

أنا : مكبس .. يعنى إيه مكبس دى؟؟

بيبا : دى كلمة بالإنجليزى بس مش عارفة معناها إيه

أنا : طيب وانتى عرفتى المسرحية العجيبة دى منين؟

بيبا : لاقيتها عند أخويا وكنت نفسى اقراها بس نمت ومقدرتش .. بس أنا قريت جملة عجبتنى أوى فى المسرحية دى وناوية أدخل أقولها مع اللون الأسود اللى دهنت بيه وشى ده هبقى الملكة أكييييييييد

أنا : جملة إيه بقى .. احمر على بوية بطيخ ؟؟

بيبا : لأ يا خفة الجملة بتقول .. "لو جبت كل برفانات الشرق مش هعرف أشيل ريحة المقرفة اللى فى إيدى دى .. منك لله يا مراتى يا مؤذية"

انا : يع .. الله يقرفك .. ريحة إيه دى ؟؟

بيبا: مش عارفة بصراحة .. بس هى عجبتنى

ميرو : بس يا جهلة إنتى وهى .. أنا هشرحلكم المسرحية دى.. ده كان ملك كبير أوى كان معزوم فى بلد أرياف .. فعملوله فطير مشلتت بالسمن البلدى .. الراجل ياختى أكل الفطير من هنا وتنح وإتكبس .. وحاول يغسل إيده من السمنة البلدى دى .. بس الريحة فضلت لازقة فى إيده مش عايزة تطلع .. علشان كده المسرحية إسمها ( مكبس ) .. من كبسة الراجل يا عينى لما أكل الفطير المشلتت

بيبا : إنتى متأكده يا ميرو من المعلومات دى ؟؟

ميرو: أيوة طبعا متأكده .. بس على فكرة الراجل مكنش أسود أوى كده .. كان على بيج شوية

بيبا : ربنا يخليكى ليا يا ميرو وميحرمنيش من معلوماتك ابدا

بعد كده ندهوا على إسم ميرو وموها وساسو .. وكلهم خرجوا قالوا نفس كلام ميرو .. إمشوااااااااااااا .. بس طبعا محدش فينا مشى ..كان فاضل من الشلة أنا وبيبا بس اللى كانت بتتمرن على أداء الجملة .. وبتحاول تخلى وشها لونه بيج .. فيييييين إسمى إتندى.. اه دورك يا ميوشة..

أول ما دخلت لاقيت دكتورين من بتوعنا ودكاترة تانيين معرفهومش .. سلمت ودخلت عادى . وكنت محضرة معايا شوية بلالين طويلة . بنفخهم وبعمل بيهم اشكال .. حصان وطيارة وحاجات كده ، أنا يا دوب لسه بطلع البلونه وبنفوخها لاقيت دكتور بيقول

دكتور 1 : يا فتاح يا عليم يا رزاق يا كريم

دكتور 2 : هى العيال دى فاكرينها مسابقة للمتخلفين عقليا ولا إيه ؟؟

أنا بنفخ البلونة

دكتور 3 : لأ كله كوم واللى داخلة تغنى من مناخيرها دى كوم .. هههههههههه

دكتور 4 : امال اللى داخلة تحطلنا مكياج دى .. فاكرانا عاملين مسابقة فى قناة أمينة شلباية

أنا مستمرة فى النفخ

دكتور 2 : ولا البت المجنونة اللى داخلة تقول نكت وتضحك عليها فى نفس الوقت دى .. صبرنى يا رب

دكتور 1 : إنتى يا بت ياللى بتنفخى البلونة إنتى .. مذاكرة ولا جاية تضيعى وقتنا ؟؟

وعند الكلمة دى وطاااااااااااااااخ.. البلونة فرقعت

دكتور 2 : يا مجنونة .. لمى يا بنتى بلالينك دى وامشى من هنا

أنا : لحظة بس هى دى مش مسابقة ملكة جمال كلية تربية

دكتور 3 : إستغفر الله العظيم يا رب .. لأ ده اكيد إشاعة مشت فى الكلية ولا وباء تفشى ولا حاجة .. يا بنتى دى مسابقى نختار بيها الطلبة المتفوقين اللى هيمثلوا الكلية قدام لجنة جاية من الوزارة

أنا : متفوقين ؟؟

دكتور 4 : ايوة متفوقين .. بعد الشر عنك يعنى

انا : أيوة يادكتور .. الف مرة .. طيب سلام عليكم بقى.. طيب اخر سؤال .. يعنى مفيش تاج؟؟

دكتور 1,2,3,4 : برررررررررررررررررره

طلعت لبيبا لاقيتها لسه محتاسة مع المسرحية .. يا عينى عليكى يا بيبا .. هتعملى إيه لما تعرفى إن الجزم التانين خدعونا وضحكوا علينا .. لا يا بيبا أنا مش ممكن أحطك فى الموقف الزبالة اللى كنت فيه ده .. عمرى ما هتخلى عنك يا صاحبة عمرى .. أبدا .. أبدا

بيبا : عملتى إيه يا ميوشة ؟


أنا : تمام .. عجبتهم البلالبن جدا لدرجة إنهم خلوا بلونة العصفورة معاهم .. مردوش يدوهالى تانى.. بس بقولك إيه .. مينفعشى تروحى؟؟

***********************


طبعا بعد ما بيبا طلعت .. وإكتشفت هدف المسابقة الحقيقى

وبعد ما إكتشفت إن المسرحية إسمها ( ماكبث ) والراجل ماكنش بيج ولا حاجة

وبعد ما إكتشفت إنه كان عايز يغسل الدم الملك اللى قتله .. مش السمن البلدى اللى فى الفطير

وبعد وصلة رديييييح جامد جدا كلنا ردحناها لبعض .. وكل واحد بان على أصله لتانى مرة


قررنا كلنا إننا نروح نضربلنا أى حاجة من عند زيزو النتن .. وخصوصا بعد مجهود الرديح العظيم اللى عملناه

بس لما جينا نخرج من الكلية لاقينا ورقة نتيجة المسابقة متعلقة فى نفس مكان إعلان المسابقة بالظبط .. طبعا محدش فينا إهتم لإننا كنا عارفين نتيجتنا أكيد .. بس اللى يغيظ بقى


تيكا : باركولى يا بنات .. أنا طلعت الأولى

هناك 40 تعليقًا:

MǿиY El-Shreef يقول...

هههههههههههههههههههه

والله العظيم صعبتوا عليا

ههههههههههههههه

وبعدين مش هما يوضحوا ده ايه النيله دي

يعني كبسوكم كبسه زباله :D

واديكوا انت الي طلعتوا مكبس ههههههههههه

معلش معلش يا ميوشه

تتعوض ياختي :D:D

beba يقول...

بوست جامد اخر حاجه بجد يا ميوشه مش عشان انتي صحبتي ولا حاجه انتي عارفاني ابيعك بربع جنيه بس بجد هتبقي كاتبه جامده اخر حاجه انا رايي سيبك من التعليم وخليكي ف الكتابه احسن عشان بتكتبي حلو اوي عقبال ما اشوفك كده ف التلافازيون واقول لعيالي دي صحببببببببببتي وكانت معفنه زمان حظوظ... صدقيني التعليم مفيش منه فايده واهو ابقي اتخلصت من احد اعدائي وانفرد بالترتيب هاهاهاهاهاهاهاها

Mafrousa يقول...

ههههههههههههههههههههههههههههههه
انا مش رضيت اعلق على ميس تربية 2 لغاية لما اشوف آخرها
ههههههههههههههههههه
و ااهي يا فالحة منك ليها تيكا هيه اللى كسبت
هههههههههههههههههههه

وااااااااكسفاه
بس تتكسفوا ليه يا بنات خيرها فى غيرها بكرة تجيلكو مسابقة على حسب مؤهلاتكم
هههههههههههههههههههههه

Ahmed يقول...

هههههههههههههه
تيكا ؟!!
ماطبعا كان لازم ده اللي يحصل
ههههههههههههه

بس حلوه أوي المسابقه ديه
وخصوصا أنه واضح أنها على مستوى المشاركين
ههههههههههههههه

mohamed ghalia يقول...

ههههههههههههههههههه
الأولى أشك
هههههههههههههههههههه

دينا حامد يقول...

هههههههههههه
فضحتونا حرام عليكي
بس والله انا فرحت للبت تيكا :-p
شفتي مش قلت لك شكل البت تيكا هي اللي هتاخدها في الاخر :D
مبروك ياتوك توك :-p بدلعها

تحياتي

koketa يقول...

هى دى نهايتكم





انا توقعت كدا




كويس انكم مش موتوا بالسكتة ولا حاجة



بس بجد يا ميوووووووشة



انتى فظيعة

نعكشة يقول...

والله ساعات بحس إني بفهم

حلاوتك يا نعكش

مش قولتلك
تيكا اللي هتكسب

بس انتو ليه بتستندلوا مع بعض
مع انكوا كنتوا في الحلقات اللي فاتت بتفيدوا بعض

عين وص ابتكوا ولا إيه

ارقي المدونة سبع مرات

سلاام عليكِ

maiosha يقول...

MǿиY El-Shreef
...................
اسكتى يا مونى على اللى حصلنا
كان شكلنا زبالة

إهئ إهئ

يالا الله يسامحهم على اللى عملوه فينا

maiosha يقول...

beba
............
بيبتى حبيتى
يا سلام يا جدعان بيبا دخل فى بيتها التكنولوجيا وبقت تعلق على البوستات وتدخل على النت
منه لله الدى إس ال اللى خلى كل من هب ودب يدخل ويعلق عندنا

الله يرحم لما كنتى فاكره القلة دش بست أخرام

هههههههههههههه

المهم إنى أول ما قريت التعليق قولت إيه اللى حصل للبت .ز مالها بقت نعمة وطرية وكلها حنية كده ليه؟؟

أتاريكى حاطة عينك على الترتيب يا جزمة
بقى داخلة مدونتى وبتسيحيلى .. ماشى يا بيبا .. ياأنا ياانتى

وقاعدة على قلبك

maiosha يقول...

واحدة مفروسة
.................
معلشى يا مفروستى
أصلا المسابقة متلقشى بينا ولا بقدرتنا الفذة

هم بس عايزين ناس زى تيكا يحفظوا ويصموا الكتاب وخلاص

إحنا مواهبنا أرقى من المسابقات دى بكتيييييييييير

maiosha يقول...

أحمد أبو العلا
...............
لأ دى مش حلوة ولا حاجة
دى مسابقة وحشة جدا جدا
قال مسابقة فى المذاكرة قال

كفاية هيافة بقى

maiosha يقول...

mohamed ghalia
...................
ههههههههههههههههههه

وأنا اشك اكتر منك

maiosha يقول...

دينا حامد
.............
توك توك؟؟

طيب على جنب يا اسطى لو سمحت
ههههههههههه

أنا من البوست اللى فات يا دينا وقلبى حاسس غنك متفقة مع تيكا ضدنا

على العموم الله يسامحكم .. ولا تيكا بقى لا مؤاخذة ولا ألف توك توك ولا حتى موقف ميكروباصات بحالة يقدر عليا

ده انا ميوشة والاجر على الله

maiosha يقول...

koketa
...........
لا لا لا
لا سكتة قلبية ولا حاجة

انا بس جالى شلل نصفى وايمو بله مغولى .. وميرو مجلهاش حاجة علشان هى بسم الله ما شاء الله مفيش عبط مش عندها

وغير كده كلنا تقبلنا الصدمة بصدر رحب

maiosha يقول...

نعكووووووشة
..............
رقيتك واسترقيتك من كل عين نظرتك وبصتلك ولا صلتش على النبى

صلى الله على محمد صلى الله عليه وسلم

بس معلشى يا نعكشة يعنى إحنا طول عمرنا اندال مع بعض

اصحاب اه وحبايب أه .. بس الندالة دى مبدأ عندنا كلنا

يعنى انا اتكسف كده ويتحرق دمى وهم يروحوا عادى
ليه يعنى ان شاء الله؟؟

خليهم يتكبسوا زى .. اشمعنى انا؟؟

معلشى يا زهر يقول...

مش عارفة أكتبلك إيه يا ميوشة أصل مفيش حاجة دلوقتى

بصراحة أنا عايزة أجرب حساب جوجل الجديد وخلاص

امشى بقى علشان خنقتينى

سلاام

أبو العريف يقول...

مسابقه للمتفوقين
هي دي اخرتها
وانا قاعد بقالي شهر مستني
عايز اعرف مين مس ولا حتي مستر تربيه دي
عموما الف مبروح لتيكا
الا هي الناس دي مافيهمش حد ليه اسم زي الناس
انتي بتجيبي الاسامي دي منين

بس امانه يا ميوشه
المره الجاتيه تاكليلي اي حاجه من عند
زيزو النتن
وتقولي دي لابو العريف
معلش
وحيات كل ازايز الدوا اللي عندكو في الصيدليه
انا عايز اكل اي كبده تلوث ولا سدوووق
ولا اي حاجه من اللي في مصر دي

معلشى يا زهر يقول...

إيه بعلق تانى فيها حاجة؟؟

بشوف الصورة طلعت ولا لأ

فى حاجة ؟؟

maiosha يقول...

معلشى يا زهر
...............
ولا عليه يا ستى مش مشكلة

ولا يهمك جربى براحتك
ماهى التعليقات دى أصلها ببلاش

بكرة أحط على كل تعليق ربع جنيه

وورونى بقى هتعلقوا ازاى

maiosha يقول...

أبو العريف
..............
هههههههههههههههههه

مالها الأسامى بقى يا ابو العريف
ماهو معلشى يعنى اللى بيته من إزاز ميغيرشى هدومه فى الصالون

يعنى إنت شفت قبل كده أى بنى أدم ماشى فى الدنيا بطاقته مكتوب فيها عند الإسم " أبو العريف "؟؟

ههههههههههههه

وبعدين تيكا كده هتاخد منك موقف .. ولو تيكا دخلت فى الموضوع مش هترحمك
هههههههههههههه

يا حرام والله يا أبو العريف هتخلينى أعيط
بس تعرف إنت لو كلت مرة واحدة بس من عند زيزو النتن هتاخد أول طيارة وتسافر تانى .. بس على رأى المثل .. إيه اللى رماك على المر قال مش عارف بصراحة

ههههههههههههههههه

maiosha يقول...

معلشى يا زهر
...............
جرى أيه يا بت انتى موريش غيرك ولا ايه؟؟

وايه صورة الوردة المخنوقة اللى انتى فرحانة بيها دى

خلاص يا ستى مبروك على الحساب والصورة

MǿиY El-Shreef يقول...

مي انا مش عارفه اكتب عندك ف الشات بوكس

مش لاقيه مكان اكتب منه :D

بس البت تيكا دي

لازم ماتسيبهاش تكتب فيه كده :D

واديها من الملون يا ايحاجه بقى

هههههه

maiosha يقول...

MǿиY El-Shreef
...................
متقلقيش يا مونى

أنا ظبطها خااااالص

يوميات شاب منوفى يقول...

والله انتى دمك زى السكر وانتى الاحق بالتاج طبعا وعلشان متزعليش هجبلك انا التاج من المنوفية علشان متقلوش علينا بخلة

عمك ياض يقول...

هههههههههههههههههههههههههههههههههههههههههههههههههههه

حلو اوي الموقف بتاع ماكبث دي والفتي اللي اتقال :D

mimi يقول...

المهم طلعتوا من المشوار ده بخروجه ... وأكلة من عند زيزو نتانة ...
مصائب قوم عند قوم ......
انتي بنت عسولة

maiosha يقول...

يوميات شاب منوفى
.................
ياااااااااه هتجيبلى تاج من المنوفية شخصيا

والله ربنا يخليك يا رب
تعالى قول للناس اللى عندنا فى الكلية دول

بعيد عنك معندهومش نظر

maiosha يقول...

عمك ياض
............
إذا كان فى الفتى
فإحنا مخترعينه

نورتنا

maiosha يقول...

mimi
...........
أه طبعا

أنا بحس إن زيزو النتن ده كل يوم بيصحى الصبح يدعى ربنا إننا نتخانق ولا تحصلنا مصيبة ولا أى حاجة علشان عارف إنه ملجأنا الوحيد

نورتينى

كيكى عوووووو يقول...

ميرو : بس يا جهلة إنتى وهى .. أنا هشرحلكم المسرحية دى.. ده كان ملك كبير أوى كان معزوم فى بلد أرياف .. فعملوله فطير مشلتت بالسمن البلدى .. الراجل ياختى أكل الفطير من هنا وتنح وإتكبس .. وحاول يغسل إيده من السمنة البلدى دى .. بس الريحة فضلت لازقة فى إيده مش عايزة تطلع .. علشان كده المسرحية إسمها ( مكبس ) .. من كبسة الراجل يا عينى لما أكل الفطير المشلتت

***********************
اموووووووووووووووووووووووت انا فى الثقافة الصينى دى!!!
الا اهم حاجة عندك وانتى بتفرعقى البلالين التااااااااااااااااااج
دة على اساس ان التاج علينا حق
***اخبار زيزو اييييييية؟؟
عوووووووووووووووووو

حماده زيدان يقول...

جروب جريدة الصباح العربي بيت المدّونين العرب
http://www.facebook.com/group.php?gid=62330213815#/group.php?gid=78080770039

ومازلتُ أتعلم يقول...

ههههههههه
ايه ده
بجد لذيذة
اول زيارة ليا وان شاء الله مش الاخيرة
تقبلى مرورى

NaiRa يقول...

ههههههههههههههههههههههههههههههههههه بجد مشكله وبجد انتى زى الثكر انتى وصحباتك

والحجه تيكا خادتها على الجاهز تقبلى مرورى على بوستاتك الجميله يا حبيبتى

وربنا يوفقك يارب فى اى مسابقات تانيه بس بعيد عن تيكا ههههههههههههههه

ويارب تقبلى انى اضيف مدونتك

أبو العريف يقول...

ميوشه

فينك من زمان
ايه الغيبه دي
وحشتنا اللماضه بتاعتك

غير معرف يقول...

ههههههههههههههههههههههههههههههههههههه

و الله هلكت من الضحك
يخرب عقلكوا

أكتر حاجة عجبتنى فيكوا روحكوا الحلوة و خوفكوا على بعض...حاجة نادرة اننا نلاقى الكلام ده اليومين دول يا بنتى


هههههههههههههههههههههه

أبقى سلميلى على البت بيكا

MǿиY El-Shreef يقول...

انتي فيييييييييييين يامي

Teawater يقول...

طبعا اومال ايه
هههههههههههههه

أبو العريف يقول...

ايه دا يا شيخه ده
كل ده غياب
دانتي قربتي تتفصلي
من المدونه

فينك من زمان
دانا مصدقتش شاشتي لما لقيتك معلقه عندي
وقلت البت رجعت
جيت لقيت الوضع كما هو عليه

مستنيين الجديد
وحشتينا بجد

abo3ali يقول...

هههههههههههههههههههههههههههههههه
بجد البوست ده جامد اخر حاجه
طريقة كتابتك رائعه واسلوبك مالوش حل
انا مش قادر ابطل ضحك
هههههههههههههههههههههههههههههه