السبت، 27 سبتمبر 2008

فى بيتنا ... حرااااااامى




"يا ترى يا ماما عايزانى فى إيه؟"


الجملة دى فضلت تلعب فى دماغى طول ما إحنا ماشيين رايحين زييزو النتن.. وأول ما وصلنا هناك كلمت ماما على طول.. بس اللى بجد إستغربتله صوت ماما الغريب.. كان صوتها كإنها كانت بتعيط

أنا : أيوة يا ماما يا حبيبتشى

ماما حبيبتى : أيوة يا ميوشة إنتى بتتكلمى كده ليه؟

أنا : معلشى يا ماما أصلى باكل.. المهم فيه إيه؟

ماما حبيبتى : مفيش يا ميوشة .. أنا بس بطمن عليكى .. إنتى كويسة؟؟

أنا : الحمد لله باكل زى الفل أهو.. مالك يا ماما .. أوعى يكون فيه حد كلمك وقالك إنه خطفنى وعايز فدية ولا حاجة

ماما حبيبتى : هو حد يقدر يخطفك .. ده هو اللى هيدفع لنا فلوس علشان نرضى ناخدك تانى.. بس الحمد لله بدل الظرف شغال عندك كده تبقى كويسة

أنا : طب مش هتقوليلى فيه إيه بقى؟

ماما حبيبتى : يووووووه.. إنتى بتتكلمى كتير كده ليه .. رصيدى هيخلص

أنا : يا ستى أنا اللى متصلة

ماما حبيبتى : ماهو لما رصيدك بيخلص أنا اللى بشحنلك.. مع السلامة بقى وخلى بالك من نفسك

إيه ده إيه ده.. من إمتى دش الحنية ده يا ماما .. هو الشبشب أعلن إعتزاله بجد ولا إيه؟؟

*****************************

بيتى حبيبى .. اللى بحس فيه بالدفا والأمان.. أه صحيح بمناسبة الدفا .. البيت المرة دى كان فيه دفا زيادة عن اللزوم .. لا لا مجبناش دفاية ولا حاجة.. بس البيت كان فيه ناس كتير اليوم ده ، أول ما دخلت الصالة لاقيت ماما قاعدة فى الصالة هى وإتنين من خالاتى وولاد خالاتى معاهم .. وبابا قاعد متنرفز .. من الأخر القاعدة كده شكلها ميطمنش

أنا : سلام عليكم

صوت جماعى: سلام عليكم ورحمة الله وبركاته

أنا : متجمعين عند النبى إن شاء الله .. إيه اللمة الجميلة دى.. ده أنا لو قعدت سلمت عليكم وبوست واحد واحد بقى هيورم

خالتى (1) : بقى ليكى نفس يا ميوشة تهزرى فى الظروف دى؟؟

أنا : ظروف إيه؟؟ هو حد مات؟؟

خالتى(2) : بعد الشر عليكى يا حبيبتى

أنا : عليا !!! هو انا مت وأنا مش واخدة بالى ولا إيه؟

البيج بوس : بس يا ميوشة .. قفلى على السيرة دى .. إدخلى يالا غيرى هدومك

دخلت على أوضتى - يا سلام عليكى يا ميوش مؤدبة من يومك وبتسمعى الكلام- لاقيت الواد عمور إبن خالتى عمال ينادى عليا

أنا: عايز إيه يا واد إنت ؟ مش كفاية أمك موتتنى من كلمتين

عمور ( وهو مسخسخ من الضحك) : ما إنتى مش فاهمة .. مش إنتى كنتى بتذاكرى إمبارح فى بيت جدى؟

أنا : أيوة مظبوط كل ده علشان كنت هناك إمبارح ؟ طيب ما أنا هناك على طول إيه المشكلة يعنى؟

عمور : تعالى معايا وأنا أقولك

روحنا أنا وعمور على بيت جدى وهو كالتالى .. البيت كله 3 أدوار الدور الأول صالونات وسفرة وحركات من دى.. الدور التانى أوض النوم بسلم داخلى للدور الأول .. أما الدور الأخير فهو السطح اللى فيه بقى اللعب والمرجيحة

روحنا البيت لاقيته عادى جدا مفيش فيه حاجة مش طبيعية .. لكن لما طلعنا الدور التانى لاقينا المأساة..
أولا الأوضة الكبيرة بتاعة جدو الله يرحمة كانت مفتوحة على الأخر وكل حاجة فى الأوضة مقلوب كيانها .. أنا كنت حاسة إنى بتفرج على برنامج خلف الأسوار .. وكنت أنا الكاميرا فى مسرح الجريمة

طبعا الدور التانى ده بعد وفاة جدو وتيتا نادرا ما بنطلعه فلما طلعنا أنا وعمور أول حاجة خدت بالى منها أثار رجلين كوتشى مقاسه لا يقل بأى حال من الأحوال عن 49 أبدا أبدا.. يا لهوى لو دى رجل بنى أدم أمال جسمه عامل إزاى؟
المهم عمور خد دور المحقق كونان وقعد يشرحلى الموقف

عمور :شوفى يا ستى فيه واحد نزل من السطح على المواسير لغاية ما وصل لشباك أوضة جدو .. وبعدين كسر الشباك بالطوبة دى زى ما إنتى شايفة .. ودخل الأوضة .. وكان فاكر إن فيه فلوس علشان كده مطلع كل الإدراج والدواليب بالمنظر ده

أنا : يا عم بطل برنامج لكى يا سيدتى ده .. لخص .. سرق إيه؟؟

عمور : سرق التليفزيون والسجادة الكبيرة والمروحة .. وبعدين فتح باب الدور هنا وطلع السطح من السلم بمنتهى الإحترام .. ولا كإنه صاحب البيت .. وكل الشواهد بتقول إن الكلام ده حصل إمبارح بليل لإن خالتو اللى هى مامتك كانت هنا إمبارح الصبح ومكنش فيه حاجة .. ميوشة إنتى سرحانه فى إيه؟؟

(فضلت قاعدة هناك كام ساعة كده لغاية ما سمعت صوت كده غريب .. انا قولت أكيد دى البت نونا الرخمة جاية ترخم عليا هنا كمان
أنا : يا نووووونااا .. إمشى من هنا أحسنلك .. مش طالباكى دلوقتى خالص )

عمور : يا ميوووووووووووووشة

أنا :أيوة يا عمور إفتكرت حاجة حصلتلى إمبارح .. الحرامى ده يا عمور كان هنا إمبارح وأنا سمعت المعمعة دى كلها.. وكنت فاكرة نونا هى اللى بتعمل الأصوات دى

(العيل اللى جوايا قعد يقولى قومى إديها على دماغها وعلميها الأدب .. وفى نفس الوقت ضميرى اللى بيصحى فى أوقات ملهاش لازمة خالص ده عمال يقولى " يابنتى ده أخر يوم كنى شوية على مذاكرتك الله يرضى عليكى " )

عمور: أيوة ما إحنا عرفنا

أنا : عرفتوا منين؟

عمور : بصى كده

ببص على السلم لاقيت أثار رجلين عمو الحرامى على السلم .. عمو الأمور ده كا ناوى ينزل .. ونزل فعلا حوالى 6 سلمات .. بس واضح إنه سمعنى وأنا بنده على نونا إمبارح لما كنت فاكراها هى اللى عاملة الصوت فقام غير رأية وقرر إنه يسرق الدور التانى بس ويسيب الدور الأول ليوم تانى

عمور : شوفتى يا ميوشة .. لسه ربنا كاتبلك تعيشى و تزهقينا فى عيشيتنا شوية

أنا : لأ يا عمور هو واضح إن الحرامى ده خريج معهد مجرمين قسم سرقة .. لو كان كمل بقى كان قتل كمان

عمور : أو ممكن يا ميوشة إنه لما شافك قرر يتوب لربنا .. هو إنتى بقى اللى بيقولوا عليها وشها علم إبليس الفضيلة.. نيهاهاهاها

أنا : عاااااااااااااا .. حتى الحرامى .. إخص عليك يا حرامى شمت الأعادى فيا.. إهئ إهئ



هناك 49 تعليقًا:

Amgad يقول...

مش ممكن منذ ساعة واحده
وانا اللي داخل بالصدفة بعد غيبة عن البلوجرز وانقطاع شوفي اللي هو
كان في حاجة بتناديني بتقولي ادخل نت حالا لسبب ستعرفة
واديني عرفت لما دخلت حمدالله علي سلامة كتاباتك يا ميوشة
واستني لما اقراه وارجع اقولك
وكويس اني مغبتش بقي الفترة اللي فاتت دي
مفاتنيش حاجه
والفترة اللي جاية اعزريني فيها
تحياتي علي مقرا واجي

Amgad يقول...

يخرب عقلك يا ميوشة
ده من وقتها يا بنتي والموضوع ده
حاصل طيب كان فين ده كله من زمان
ولا شاطرة تنقطينا
وبعدين انتي بتذاكري ازاي
في بيت الاشباح ده
يا قلبك بيت مهجور
وبيت اموات كمان
هو عموما كويس انك كنتي هناك
عشان الحرامي ميكملش وكان سرق العفش والكنبة والموكيت
هههههههههههههههه
بس تعرفي بقي انا كان نفسي تتواجهي بيه
وكنت احب اعرف فعلا ايه ممكن
يبقي وصفك لمشهد رعب زي ده
باسلوب الكوميك بتاعك
عموما متغيبيش علينا بقي كتير تاني
واستمري
تحياتي
امجد

maiosha يقول...

amgad
...........
ههههههههه
شوفت يا أمجد .. قدراتى الميوشية بتجر الناس على هنا على طول .. ميوشة شو مش هتقدر تعمل أى حاجة .. هنشلك هنشلك

أما بخصوص البيت .. فالبيت الكبير ده ليه عندى معزه خاصة لدرجة لا يمكن تتخيلها
بيت أشباح بقى بيت أموات بيت حرامية ولا يفرق معايا الكلام ده .. أنا قاعدة قاعدة

حرام عليك يا مفترى .. بقى كنت عايز الحرامى ينزلى .. ده أنا ستر ربنا إنى مقومتش أدور على الصوت جاى منين .. كان زمانى بكتبلكم من فوق دلوقتى

حاول متغيبش كتير بقى متعملش زييى .. وإن شاء الله تكون ظروف خير

كل سنة وإنت طيب

shahieno يقول...

دخل الحرامى وانا بذاكر شوف قلة أدبة
وانا عالة نفسى بذاكر وانا عاملة نفسى بذاكر

Unknown يقول...

ههههههههههههههههههههههههههههه
انت تحفة والنعمة يا بنتى والله ودمك خفيف موت بجد والنعمة الشريفة انت تحفة..بس كنت سبتينى على الحرامى دة وانا اظبطه عشان خاطرك

2ensan wnsan يقول...

يا عيني عالحرامي ابو جزمه مقاس تسعه واربعين دا الحمد لله انه ما قابلكيش والا كانت نهايته قربت

والحراميه الصغيرين كانوا هيضيعوا ويتيتموا ومستقبلهم يتغير من السرقه للتسول

عالعموم الحمد لله انك بخير وان الحرامي بخير ..

يا رب يا رب التلفزيون يبوظ والسجاده تتسرق والحاجه اللي سرقها ما يتهناش بيها

maiosha يقول...

shahieno
..............
هههههههههههه
ماشى يا سيدى ليك حق

بس بينى وبينك أنا فعلا كنت عاملة نفسى بذاكر
ههههههههههههه

نورتينــــــــــــــــــــــــى

maiosha يقول...

enjy
.................
ربنا يخليكى والله يا إنجى .. بس بصراحة أنا شوفت أثار رجله بس إتخضيت .. أومال لو كنت قابلته هو شخصيا

وعلى العموم هو واضح إنه لما شافنى إعتزل المهنة خلاص

maiosha يقول...

2ensan wansan
..............
بقى كده ماشى ماشى

إنت شكلك كنت متفق مع الحرامى ده أصلا
بس فعلا الحرامى ده هيموت بغيظة لإن المروحة كانت بايظة أصلا
ده بكده هيضطر يبيع التليفزيون والسجادة علشان يجيب مصاريف تصليح المروحة

Lady E يقول...

الحمد لله على سلامتك يا ميوشة

المهم انه كان يوم لذيذ ومقلبش بتسمم علشان اكلتو في المطعم اللي يفتح النفس عالاكل زيزو النتن

كل سنة وانتي طيبة يا قمرايا وعيد سعيد عليكي ان شاء الله

فرنسا هانم يقول...

ههههههههه
الحرامى خريج معهد المجرمين
هههههه
طيب ده التنسيق بتاعه كام فى الميه
ههههههه
حلوه يا ميوشه
كل سنه وانتى طيبه
والحمد لله ان الحرامى خلع لوحده

حبيبـــــــة القمـــــر يقول...

هههههههههههههههه
وحشتني حكاياتك ونوادرك يا ميوشه
كويس ان الموضوع عدى على خير والراجل قرر انه يكتفي بهذا القدر
واضح ان صوتك جاب نتيجه

كل سنه وانتي طيبه ياقمر

Teawater يقول...
أزال المؤلف هذا التعليق.
Teawater يقول...

ههههههههههههههههههههههههههههههههههه
اولا يا قمر حمداً لله على السلامه
تحفه القصه ديه تحفه بجد يا ميوشه كنت باموت على روحي من الضحك وانا بافراها بس قوليلي هو الحرامي كان بلدوزر عشان يشل كل الحاجات ديه ولا كان شايلهم في الجزمه
هههههههههههههههههههههههههههههههههه

Empress appy يقول...

ههههههه طيب والله قلبك جامد ولا عليه مراوح يا بنتى انا لو سمعت دبه نمله هقوم ابص واشوف فيه ايه
يالا ربنا يوفقكوا وتمسكوه كل سنه وانتى طيبه يا رب

blue-wave يقول...

يااااااااااااااة
كل دا يحصل وانتى ولا هنا؟؟؟
عموما حمدالله على سلامتك
وبجد بجد اتكتبلك عمر جديد
اسف اتكتب للحرامى عمر جديد:))
ومعلش فداكم اللى راح بس ابقوا خدوا بالكم من البيت دا بعد كدا
كل سنه وانتى طيبه

Mafrousa يقول...

هههههههههههههههههه
حرامي يا ميوشة؟؟؟ هههههههههه حرامي
يا قلبك
انتى جامده... صلبه.....حديد...
ههههههه
اموت و اعرف لو كنتى عرفتي ان فيه حرامي ساعتها كنتى عملتى اييييييييييييه؟؟؟؟
كيد كنت عملتى بيبي على روحك ههههههههههههههه
\و حشتينى يا قمرايه يا بنبونايه
و كل عيد و انتى طيبه
و اوعي تفرقعي بمب
:-*

maiosha يقول...

lady e
............
يا جميل زيزو النتن ده بقى الشعار الرسمى لمعدتنا خلاص

والنبى لو عملنا سندوتشات إيه بالذى هناكلها كلها ونقول كمـــــــان

وإنتى طيبة يا اجمل ليدى فى الدنيا كلها

maiosha يقول...

فرنسا هانم
.................
بجد مش مصدقة نفسى
فرنسا هانم بذات نفسها عندى فى المدونة
لووووووووووولى

ثانية بس علشان أفرش المدونة رمل .. معلشى الورد غالى أوى اليومين دول

والله لو أعرف إن الحرامى هو اللى هيخليك كنت أجرت كل يوم حرامى ينط على المدونة

كل سنة وإنتى طيبة يا أحلى وأجمل فرنسا

maiosha يقول...

حبيبة القمر
...............
ههههههههههه
على رأيك يا بوبا إذا كان سمع صوتى بس خاف ومشى .. أمال لو كان قابلنى وجها لوجه .. هههههههه

كان حجز أول طيارة رايحة السعودية وراح عمل عمرة

كل سنةو إنتى بألف صحة وسلامة

maiosha يقول...

teawater
.............
الله يسلمك يا قمر

والله مش عارفة لغاية دلوقتى هو شال الحاجات دى كلها إزاى لوحده .. بس واضح إنه كان فاتح الباب والشباك وكان عايش بقى وبيطلع حاجة حاجة بمزاج عالى جدا

كل سنة وإنتى طيبة

maiosha يقول...

appy
...........
أقولك الحق يا أبى ... بس أوعى تفتنى عليا
أصلى بصراحة كنت واكلة أكلة محشى جامده ومكنتش قادرة اقوم من مكانى .. فقولت بقى عيش وسيب غيرك يعيش .. أنا كلت محشى والحرامى جاب فرش جديد لشقته

وكل عيد بقى وإنتى طيبة

maiosha يقول...

blue-wave
.................
هو واضح كده إنى أنا والحرامى إتكتبلنا عمر جديد
الحمد لله إن محصلش صدام بينا إحنا الإتنين .. كان هيبقى يوم عالمى

كل سنة وانت طيب

maiosha يقول...

واحدة مفروسة
..............
أه يا مفروسة يا اختى .. حرامى والله العظيم
لأ لو كنت قابلته مكنت ش هلاقى وقت أعمل أى حاجة .. انا كنت هصعب عليه اكيد ويودينى أى مستشفى
أما بقى مرحلة البيبى دى فجت بعد كده لما رحت الشقة تانى بقيت كل ما أسمع صوت كده ولا كده .............

والله إنتى وحشتنى أكتر

بس معلشى مقدرش أوعدك إنى مفرقعش بومب
ده أنا جبت بتحويشة العمر كلها بمب وصواريخ

طااااااااااااااااااااااااااخ

صباح الصباح يقول...

ها هاى هاى هاى

دة ولا عصابة القناع الاسود يا بنتى

وكانوا هيخطفوكى
اللة دة جو اكشن وانا بحبة جدا
هوة انا يعنى ممكن اجى اتفرج انشاللة حتى اتخطف؟

انتى فين يا بنتى من زمان؟؟

كل سنة وانتى طيبة

romansy يقول...

كل سنه وانتى طيبه
عيد سعيد عليكى وعلى المسلمين جميعا
باليمن والخير والبركات

غير معرف يقول...

هههههههههههههههههههههههههه
و الله أنتى بجد ملكيش حل
الحمد لله أن ضميرك صحى فى وقت له لازمة و مروحتيش تدى البت نونا فوق نافوخهاو إلا مكناش شفنا منك بوست تانى أو كنتى أتخطفتى و أمك مرضيتش ترجعك تانى
و حمد لله على السلامة
كفارة يا شيخة كنتى فين ده أنا كنت كل ما أدخل الاقى عم أحمد اللى أنتى مش عارفاه ده قاعدلى

كل سنة و انتى طيبة يا عسل

shabfa2re يقول...

beeeep beeeep
happy eiiiiiid

FreeKiller يقول...

هههههههههههههههههه

الله الله الله
طيب و الله كويس
اهو الحرامي خااف و مشي
مقررش يكمل لتحت

هههههههههههه
و كويس انك ما طلعتيش تطردي نونا

حمد الله عالسلامة
بس الغريبة ان حنيه الاهل متبانش غير ساعت الزنقة
هههههههههههه

كل سنةو انتي طيبة
مدونه ممتازة
بهنيكي

FreeKiller يقول...

المدون الزميل المحترم
بعد التحية
ندعوكم لحضور ملتقى مدوني الشرقية الأول
يوم الأحد 5-10 الساعة الرابعة مساءً
بمقر النادي الإجتماعي بالزقازيق بشارع مدير الأمن أمام حزب الوفد
و الدعوة عامة لجميع المدونين من أي حتة ف مصر
وللمزيد من التفاصيل يرجي زيارة اللينك التاااااالي
http://goharyblog.blogspot.com/

و كل عام و انتم بخير

mohamed ghalia يقول...

هو فى حرامى يقدر يجى جانبك برده دا إنتى كنتى تديله درس فى فنون القتال عن طريق اللسان هههههههههه
ربنا يحفظك
تحياتى

maiosha يقول...

صباح الصباح
.............
يا سلام عليك يا سيدى هى جت عليك يعنى
تعالى عادى
بس متتعشمش أوى الحرامية عندنا مش بيخطفوا .. بيسرقوا بس

مع ميوشة شو مش هتقدر تاكل كحك العيد

maiosha يقول...

romansy
........
كل عام وإنت بألف صحة وسلامة

maiosha يقول...

أنا ودماغى
................
أه الحمد لله
أو تخيلى كنت قابلته وحدف التليفزيون فى وشى ولا حاجة
كان زمانى دلوقتى بعمل يوميات طالبة عورة

معلشى بقى إتأخرت علشان رمضان إنتى عارفة بقى رمضان وأكل رمضان

كل سنة وإنتى طيبة

العيد فرحة مااااااء

maiosha يقول...

shabf2re
..........
beeeeeeeb beeeeeeeeb
w enta sa3eed

maiosha يقول...

freekiller
..............
أه الحمد لله
فعلا حنية الأهل بتظهر فى أوقات غريبة

يعنى ماما دايما تعاملها معايا بالشبشب زميل الكفاح
أو مرة أشوف الحنية دى

بس سيبك إنت شعور جميل برضة وكل الناس كده خايفة عليك

يالا كل سنة وانت طيب

العيد فرحة ماااااااء

maiosha يقول...

mohamed ghali
..............
بقى كده .. ماشى ماشى

على العموم كل ده هيطلع عليكم إن شاء الله هنا فى المدونة

كل سنة وإنت طيب

متاكلش الكحك كله

أبو العريف يقول...

ما شاء الله عليك يا نت يا ميوشه والله تستاهلي الحته دي
لو هحكي عنها اقول ايه فيها
اقول ماشاء الله عليها
ملاك دي ولا من البشر
وعيونها دي ولا القمر
اول ما عينك تيجي عليها
هتحبها قوي وتموت فيها
اجمل هديه من القدر
يا روان يا حته من القمر
( ايه كاتبها لبت اخويا ...عندك مانع ) وانتظرو قريبا
عماشه في الادغال .. مدونه مجنونه

نعكشة يقول...

:D

انتي مسخرة
والله تحفة
سكرة يا بنتي

ماشاء الله عليكي

بس هوه الحرامي كان لابس كوتشي نوعة اية؟؟؟؟؟

شفـقــة و إحســــان يقول...

حرامى معقول
معلش يا ميوشة الشباب هيعملوا ايه مهما قاعدين من غير شغل والبطالة بقى عمله عمايلها
يعنى يعملوا ايه يقعدوا عواطلية
اظن ما يرضكيش اظاهر الحرامى مالقاش شغل الا فى بيتكم
تعيشوا وما تاخدوش غيرها
شفقة

Unknown يقول...

ميوشا ازيك

الحمد لله انك كويسة
انا بجد كنت عايز اعرف ماما كلمتك ليه
وفضلت قلقان لاخر البوست

لكن يلا بقي اللي ديته فلوس يخفي
المهم انكم كلكم كويسين

وبعدين مادام اوضة جدوا محدش بيسكنها ليه مستخدمتوش الحجات دي
ليه سايبينها في اوضة مقفولة

كنتي بيعيهم وهاتي بيهم سندوتشات هههه

لكن الحمد لله مفيش خساير في الارواح

وسرقه تفوت ولا حد يموت


تحيات اخوكي

برقوش

أبو العريف يقول...

...
جميل قوي يا ميوشه استمري بس خدي الحته دي
اكتب كلام علي الورق ....مايهمنيش
لو يتقري .....ما يتقريش
بس المهم ان الكلام يكون م القلب .
له معني ...يكون صادق
يكون مش بس لقمة عيش
ليه ادفن كلمتي فيه ...
واسيبها تموت
بلاش اكتمها ....مااكتبها
واسيبها تعيش

maiosha يقول...

عماشة فى الأدغال
.................
متشكرين أوى يا عماشة على الكلمتين دول
وربنا يخليلك روان

نورتنى

maiosha يقول...

نعكشة
..............
والله يا نعكوشتى مش عارفة بالضبط
هو واضح إنه عاملة مصنع يعمله هو لوحده

maiosha يقول...

شفقة هانم وإحسان بك
....................
يعنى هى البطالة دى متجيش غير على دماغى انا بس
يالا الله يسامحه

maiosha يقول...

برقش
.............
على رأيك يا برقوش
بس بينى وبينك انا كنت عاملة حسابى أخد التليفزيون ده لجهازى

أتجوز إزاى أنا بقى دلوقتى

عااااااااااااااا


إتبرعوا ولو بتليفزيون

maiosha يقول...

حد مش فاهم حاجة
..................
الله الله
إيه حكاية الشعر الأيام دى
الناس كلها بتكتب شعر الأيام دى

تسلم إيديك يا سيدى

نورتنى

توتا الكتكوتة يقول...

انتي عسولة اووووووووووووو يا ميوشة وقلبك جامد زيي تمام ومدونتك حلوة اوووي

come back to me يقول...

السلام عليكم
قبل اى حاجه ده اول تعليق منى
وبجد يا منوشه انتى فظيعه جدا وموهوبه ودماغك عاليه اوى
والمدونه دى بجد الى خلتنى اشترك عشان اقولك بجد
تسلم دماغك