الأحد، 24 أغسطس 2008

فاصل ... ونواصل

سلام عليكم
أنا عارفة إن فيه ناس كتير مقروفة منى علشان إتأخرت فى كتابة البوست الجديد .. بس بجد بجد بجد كان عندى ظروف وكنت مشغولة موووت .. معلشى بقى خلاص مش هنعملها زعلة يعنى .. إنتوا ما صدقتوا ولا إيه؟؟
المهم بقى إن اللى رجعنى تانى بسرعة جدا وخرجنى من مشغولياتى الكتيرة ( ولا يا بت يا ميوشة وبقى عندك مشغوليات) إن شفقة هانم وإحسان بك بعتولى تاج .. إنتوا طبعا عارفين البكوات والهوانم دول .. محدش يقدر يأخرلهم طلبات وإلا هنروح ورا الشمس يا ولدى
ماشى.. يا سعادة البيه .. يا ستو هاااانم .. انا بجاوب على التاج أهو .. ربنا يخليكو لينا وميحرمناش منكم أبدا
بسم الله .. نبتدى الجلسة
1_بدأت التدوين من إمتى؟ودخلت العالم ده إزاى؟
أنا فاكرة اول يوم بدأت فيه الكتابة فى المدونة كان أخر يوم فى شهر مارس .. لأ اليوم اللى قبل الأخير باين .. شوفوا هو كان بالظبط يوم 30/3 .. تقدروا تقولوا إنى دخلت العالم ده بالصدفة .. لإن الدكتورة / غادة عبد العال صاحبة مدونة ( عايزة أتجوز ) هى اللى طلعت الموضوع ده فى دماغى .. وفضلت تقولى مفيش أسهل من عمل مدونة و إنتى دمك خفيف والكلام ده .. المهم اليوم اللى إتقابلنا فيه قالتلى على موقع (بلوجر ) قالتلى إدخلى الموقع وهتلاقى كل حاجة سهلة بعد كده .. بعد ما روحت دخلت على النت ولاقيت الخطوات بتشدنى خطوة ورا خطوة لاقيت عندى مدونة جميلة .. وكمان ماما شجعتنى تشجيع رهيب وهى اللى كانت عمالة تقولى إكتبى على النت إعملى مدونة .. بس للأسف ماما كانت رافضة إسم المدونة فى الأول .. بس إقتنعت بعد كده
**********************
2- إيه كان إنطباعك فى البداية؟
بصراحة انا كنت فرحانة جدا .. وفى نفس الوقت مخضوضة جدا .. مش عارفة هيبقى إيه رد فعل الناس على اللى هكتبه .. كانت حياتى مجموعة من الأسئلة .. ياترى هيعجبهم ؟؟ ياترى حد هيقرا اللى أنا بكتبه أصلا؟؟ طيب لو قروه ومعجبهومش هيعملوا فيا إيه؟؟ إيه اللى أنا عملته ده إنتى عبيطة ولا ايه تعملى مدونة إنتى فاكرة نفسك زى د/ غادة؟؟
بس بصراحة مع أول تعليقات جاتلى حسيت بتشجيع كبير الحمد لله مفيش نقد وصلنى فى الأول كان كله تشجيع وده اللى خلانى الحمد لله أستمر فى التدوين
***************************
3- مين أول واحد بتهتمى بتعليقاته على بوستك الجديد؟
ممممممممم.. والله انا كل تعليق بيتكتب عندى فى أى بوست جديد بيعملى علامة فى بيتى .. قصدى علامة فى مدونتى .. بحب أوى التعليقات اللى بتبقى لسه لأول مرة بتزونى .. بحب أى تعليق يضحكنى .. عبد الله غنيم .. ودعاء مواجهات .. واحدة مفروسة .. مس سوسة .. شفقة وإحسان .. blue -wave..ياااااه كتير بجد لو عديت هظلم ناس كتير بحبهم وغاليين عليا جدا
**************************
4-إيه أهم حاجة إتعلمتيها فى عالم التدوين؟
إتعلمت إن مش انا لوحدى اللى مكبوتة .. وفيه زيى كتير فى عالم المكابيت .. إتعلمت كمان إن الفضفضة دى شيئ جميل .. مفيش أحسن من إن الواحد يلاقى ناس يتكلم معاهم ويحكى الكوارث اللى هو عمالها على طبيعته .. والأحلى إنه يلاقى مشاركة من الناس دى .. ده كويس، ده جميل .. أنا كل بوست بكتبه بحس إنى قولت زيادة عن اللزوم وببقى مستنية أول تعليق على احر من الجمر علشان على الأقل أشوف الإنطباع الأول هيبقى عامل إزاى؟
************************
5- إيه أكتر حاجة كرهتيها؟
هههههههههههه.. لا انا الحمد لله مكرهتش أى حاجة فى التدوين أو بسبب التدوين لغاية دلوقتى .. رغم إن المدونة عملتلى مشاكل كتيرة مع أصحابى.. يعنى مثلا لما أنزل بوست مع بيبا .. إيمو تتصل " إنتى مكتبتيش عنى ليه؟؟" .. أو يتصلوا بيا يشتمونى .. يعنى مرة بعد بوست بتاع إمتحان العربى.. لا قيت ميرو بعتالى مسج بتقولى "بقى أنا نكتى بايخة يا زباااالة" .. أدى أخرة اللى جرالى من التدوين والمدونة .. عاااااااااااااااااااااا
**********************
6-حاسس إن التدوين له تأثير عليك ؟
يااااااااااااه.. أكيد له تأثير وتأثير كبير كمان.. أنا لسه قريب كان حد بيسألنى وبيقولى المدونة بتمثلك إيه؟؟ ملقتش رد أرد بيه غير إنى قولت "دى بنتى " .. أيوة فعلا أنا حسيت إنى أم ومسؤلة عن كائن حى .. بلبسه وأسرحله شعره وأمكيجه وأطمن عليه كل يوم .. حتى اليوم اللى مش بعرف أدخل فيه على البلوج ببقى عاملة زى المجانين ( هو أنا مجنونة أصلا .. بس الحالة بتزيد أكتر شوية) .. ربنا يخليلى مدونتى حبيبتى .. قولوا أمين
*********************
7- تهدى التاج لمين ؟
أه .. أصعب سؤال .. أهديه ل

عبد الله غنيم ( واحد إنسان ونسان )
***********************
تحديث
أهدى التاج كمان لأخويا المصرى (مش عاجبنى)
كفاية كده بقى دلوقتى .. صدعتكم بما فيه الكفاية
سلام بقى

هناك 32 تعليقًا:

Rannon يقول...

إجابات جميلة ولذيذة

تحياتي :)

dramaqueen يقول...

ميوشة حبيبتى
واحشاااااااااااااااااااااااااانى اوى اوى اوى

اجاباتك سكر زيك يا سكر

سلام يا قمر

maiosha يقول...

rannon
...............
نورتينى يا رنون

maiosha يقول...

dramaqueen
..............
أهلا بالمصراوية كلهم
والله أقمر إنتى واحشانى أكتر
بوسة بقى على الطاير
أموووووووووووووووووه

صفا سارة يقول...

المدونة بتاعتك جامدة جدا وانا متابعاها من زمان بس ده اول رد ليا
تقبلى مرورى يا جميل

كيكى عوووووو يقول...

عوووووووووووووووووووووووو انا جيت اتخديتى
....................
واحشتينى بجد يا موشة
عاملة اييييييييييية
؟
كل سنة وانتى طيبة يا قمراتى
..........................
اجابتك..لذيذة بجد
.....................
بيقول البوس عبارة عن جراثيم وكدة

علشان كدة انا هديكى حبة جراثيم اد كدة
اموااااااااااااااااااااااااة
كبيررررررررررررررررررررررة
خالص
ههههههههههههههههههههههههههه
بجد امواااااااااااااااااااة كبيرة ليكى
عووووووووووووووووووووووووو

كيكى عوووووو يقول...

استنى نسيت حاجة










!














!











لا ولا حاجة بس برخم بس
شوفتى الخفة الى بقيت فيها
هههههههههههههههههههههههه
عوووووووووووووووووووووو

blue-wave يقول...

يا سيدى يا سيدى على الإجابات
تحفه كالمتوقع
انتى اصلا دمك زى العسل ومدونتك من المدونات اللى بكون مبسوط كل ما الاقى فيها بوست جديد
وميرسى انك جبتى سيرتى فى البوست:))
وعلى تمرير التاج مع انى جاوبته قبل كدا
تقبلى تحياتى

mohamed ghalia يقول...

maiosha
ربنا يخليلك بنتك يارب هههههههه
بجد اسلوبك لذيذ جدا فى الكلام
ربنا يحفظك
دمتى بود
كل سنة وإنتى طيبة
تحياتى وإعجابى

Mustafa Şenalp يقول...

çok güzel site. :)

دكتور بهــدوء يقول...

بجد بجد
وانا كمان دخلت عشان غاده عبد العال
البنت دي
رفعت عدد المدونين بشكل رهيب
ههههههههه
الله يكرمها

2ensan wnsan يقول...

سلام عليكم ..

ازيك يا ميوشه وايه اخبارك .. الف شكر عالتاج وان شاء الله هجاوب عليه قريب ..

الف شكر على ذكر اسمي في البوست ..

maiosha يقول...

صفا
........
يا سلام يا سلام على الناس اللى متابعة من بعيد كده

نورتينى يا جميل

maiosha يقول...

كيكى
..........
عاااااااا يا ماما

تانى يا كيكى بطلى تخضينى بقى يا شيخة
وإنت طيبة يا احلى كيكى فى الدنيا.. متنسيش تبقى تبعتيلى كده طبق كنافة ولا بسبوسة ينوبك فيا ثواب

لحظة مين اللى قال حكاية البوس والجراثيم دى .. يا خبر أبيض .. ده أنا كده جرثومة كبيرة متنقلة
ولا بهمك منهم يا باشا .. وأدى بوسة متينة منى أهى
أموووووووووووووووه

maiosha يقول...

كيكى
........
إيه ده كيكى تانى
عااااااا.. يابت إرحمينى خضتين فى الراس توجع

أه يا راسى

كل سنةوانتى طيبة

maiosha يقول...

blue-wave
..................
ربنا يخليك والله بجد
وبعدين ده أقل واجب لإن تعليقاتك انت بالذات بتدينى تشجيع رهيب

أبوا .. يادى الكسوف معلشى بقى .. على العموم لو عايز تديه لحد إنت حر براحتك.. ياااه منظرى وحش أوى
هههههههههههههههه

كل سنة وانت طيب

maiosha يقول...

mohamed ghalia
.................
أمين يا رب

ألف شكر يا محمد على دعوتك دى وعلى ردك الجميل
نورتنى

maiosha يقول...

mustafa senalp
.....................
هى الترجمة هتنزل إمتى؟؟

maiosha يقول...

دكتور بهدوء
............
أنا من قبل غادة أصلا مكونتش أعرف يعنى إيه بلوج والحركات دى كلها بجد هى اللى علمتنى كل حاجة إزاى أعمل البلوج وإزاى أروقه بقى الساعة والشات بوكس والكلام ده كله

ربنا يكرمها بحق اللى عملته فينا ده

maiosha يقول...

wa7ed 2ensan wansan
.....................
عبد الله
أنا تمام الحمد لله
أنا عارفة إن زمانك مشغول دلوقتى .. بس أنا لاقيتك بقالك زمان مكتبتش فقولت أغتت عليك شوية .. أصل أنا بعيد عنك غتتة

مستنية إجاباتك

Unknown يقول...

بجد عايز اشكر الدكتوره اللي كانت السبب في دخولك عالم التدوين


ميوشه وحشتيني اوي ووحشتني تعليقاتك

انا عارف اني مقصر لكن بجد عندي ظروف اتمني تسامحيني وترجعي تنوريني تاني


بالنسبة للتاج
لا تعليق (امتياز)

عروسة ننوسة يقول...

مبروك يا ميوشة انتى قمر ودمك زى العسل وفعلا تستحقى التاج

Amgad يقول...

ميرسي اوي يا ميوشة علي التاج
وتم حلة الحمد لله
خالص تحياتي

شفـقــة و إحســــان يقول...

سيدى يا سيدى على الاجابات

maiosha يقول...

bar2ash
...............
والله يا برقش إنت أكتر

هتلاقى بقى الرد بالتفصيل عندك فى البلوج

نورتنى

maiosha يقول...

عروسة ننوسة
.................

تسلميلى يا احلى عروسة فى الدنيا

maiosha يقول...

أمجد
............
أى خدعة يا امجد

أنا طيران على عندك علشان أشوف الإجابات

maiosha يقول...

شفقة هانم واحسان بك
...................

بجد... عجبكوا؟؟؟؟

almasry يقول...

كنت عاوز التاج ده مووووووووووووووووووووووت لكن بقى نصيبى كده على كل كالعاده جميله


تحيــــاتى
المصـــــــــرى

maiosha يقول...

المصرى
..............

والله العظيم لا يكون من نصيبك يا مصرى ولا تزعل

. يقول...

رمضان كريم
كل سنه و انتى طيبه يا ميوشه يا جميله

كأنني أنا يقول...

دي تاني مرة أجي هنا

عجبتني أوي المرة الأولى .. فكررتها. وبصراحه ماندمتش يا ميوشة..

شكلك حد جميل أوي .. وبنتك كمان جميلة أوي أوي :)