الجمعة، 1 أغسطس 2008

خدلك كمان نفسين.. إحنا ورانا حاجة


رونى : يالا يا ست ميوشة قوليلى ذاكرتى قد إيه لغاية دلوقتى؟


أنا : أبدا يا رونى قعدت حوالى نص اليوم أعرف إسم المادة .. وبدأت مذاكرة من حوالى أربع ساعات



رونى : ما شاء الله .. أربع ساعات بحالهم .. إيه التفوق ده كله؟ وياترى انجزتى إيه فى الوقت العظيم ده كله؟



أنا : بصى يا رونى يا أختى .. أنا قريت أول عشر صفحات على قد ما أقدر.. ومفهمتش منهم أى حاجة .. ولا لاقيت فيهم كلمة (سيكومهلبية) اللى بيبا قالتلى عليها


رونى : (سيكومهلبية) عليكى وعلى بيبا يا شيخة .. ورينى فين العشر صفحات دول .. يالهوتى .. بقالك اربع ساعات بتذاكرى فى مقدمة الكتاب؟



أنا : إيه مقدمة الكتاب دى ؟؟ التتر يعنى.



رونى : تتر إيه بس هو إنتى بتذاكرى مسلسل بكار؟ المقدمة دى اللى الدكتور بيعرف فيها الكتاب وبيقول هو بيتكلم عن إيه؟



أنا : عاااااااااااااااا .. حرام والله .. يعرف الكتاب قى عشر صفحات .. هو فاكر نفسة هيقدم برنامج هالة شو ؟



رونى : على فكرة المقدمة عشرين صفحة مش عشرة .. على العموم إهدى يا ميوشة .. وقوفك على دماغك بالمنظر ده مش هيحل المشكلة .. إن شاء الله هنحاول نجمع اى حاجة مع بعضنا .. بس مقدرش أوعدك بالإمتياز



أنا : إمتياز إيه بس يا بنتى؟؟ أنا لو لاقيتنى ممكن أجيب أمتياز فى مادة.. محلش فيها حاجة



رونى : طيب تعالى بقى فى الأوضة جوة نقفل على نفسنا شوية



دخلت أنا ورونى الأوضة عندى ومسكت هى الكتاب بتاعى اللى كانت درست زيه قبل كده .. وطلعتلى كام نقطة كده علشان أذاكرهم .. المشكلة إنى فعلا مش عارفة أستوعب علم النفس ده خالص .. دى حتى رونى بدأت تطلع فيا عقد دراستها عليا



رونى : إنتى من جواكى نفسيا مش عايزة تستجيبى للمادة .. هدى نفسك وحاولى تحبيها



رونى : متقرقضيش ضوافرك كده .. ده ممكن يتحول لمرض مزمن



رونى : إنتى متنحة كده ليه ؟؟ ركزى فى الكتاب



رونى : ميوووشة .. إنتى نمتى!!!!!



أنا : معاكى .. والله معاكى



المهم بعد كام ساعة كده طلعنا أنا ورونى من الأوضة .. رونى طالعة وراسها فوق وحاسة بالفخر وبالإنجاز اللى عملته فيا .. محسسانى إنها مثلا زى الدكتور اللى كان فى قصة كونغو اللى إخترع جهاز علشان يخلى القردة (إيمى) تعرف تتكلم .. أما أنا فكنت طالعة راسى لتحت ومش قادرة أرفعها من كتر الوش اللى دخل جواها .



رونى : شوفى يا خالتو .. واضح إن ميوشة بتعانى من فوبيا علم النفس .. ده شكله نوع جديد من الفوبيا .. هدور عليه فى المراجع ولو مش موجود هبقى أخد ميوشة الشهر العقارى وأعمل براءة إختراع



أنا : إلهى تجيلك فوبيا المية يا شيخة ومتعرفيش حتى تغسلى وشك .. وتمشى فى الشارع تهرشى وتغنى (أنا عندى حساسية.. أنا عندى حساسية)



رونى : معلشى يا خالتو .. ده إضطراب بسيط فى المخ .. أهم حاجة دلوقتى إنها تنام ..وبلاش النهاردة بالذات تتفرج على المسلسل بتاع (لمحقق كونان) ده .. متخليش الكلمتين اللى عماله أحشرهم فى دماغها من ساعتها يخرجوا



ماما حبيبتى : حاضر يا حبيبتى .. أنا مش عارفة البت ميوشة بقت عاملة كده ليه ؟؟يا نهار زى بعضه.. هى إحولت؟؟



رونى ( وهى بتدارى وشى) : عادى يا خالتو ده رد فعل طبيعى ..دلوقتى عينها ترجع زى ما كانت .. ويمكن تخضر كمان.. مين عارف؟؟



ماما حبيبتى : ميوشة إنتى شايفانى يا حبيبتى؟؟


حقولى بعد كده إنى كنت مستربعة على الأرض وناكشة شعرى ومطلعة لسانى ( تخيلوا نفس منظر ميدوسا بس كمان مطلعة لسانها وحولة)


أنا : مين سى لطفى لا مؤاخذة .. أصل أنا عندى شعرة .. ساعة تروح وساعة تيجى.. ها


ماما حبيبتى : لا حول ولا قوة إلا بالله .. حاضر ساعة تروح وساعة تيجى .. قومى معايا بقى


ماما قومتنى هيلا بيلا ورمتنى على السرير وأنا كل شوية أقولها .. ها .. وقامت مغطيانى وقالتلى


ماما حبيبتى : تصبحى على خير يا ميوشة.. وربنا يكملك بعقلك


أنا : رااااااااااااااحت


*****************************************


( ميوشة .. ردى عليا يا ميوشة .. أنا رونى .. ردى عليا يا بت .. هفضل أرن كده كتير )


أنا : أيوة يا رونى


رونى : أيوة يا ميوشة عملتى إيه فى الإمتحان؟؟


أنا : ده كان طويل أوى.. كان اربع اسئلة


رونى : وحلتيهم كويس؟؟


أنا : أنا حليت أول سؤالين بس


رونى : عاااااااااااااااا.. حرام عليكى .. المهم عملتى إيه فيهم؟؟


أنا : أول سؤال مش متأكده من إجابته أوى ..وقعدت أخبط فيه


رونى : والتانى؟


أنا : لأ التانى ده بقى بتاعى حليته ميه ميه.. كان بيقول عرف علم النفس


رونى : ده السؤال ده كبير أوى حلتيه فى كام صفحة؟؟


أنا : صفحة مين .. انا حليته فى سطر ونص ( هو العلم الذى يدرس النفس البشرية وتفاعلتها مع أفعال الإنسان وسيكومهلبيته ).. ألووووووو.. ألوو رونى .. رحتى فين؟؟....رووووووووونىىىىىىىىىى

هناك 34 تعليقًا:

blue-wave يقول...

ههههههههههههههههههههههه
بجد مش ممكن
انتى ليه مش بتنزلى بوست كل يوم؟؟
اقولك
اعملى دايركت لينك وابعتيلى اى كلام بتقوليه
انا متأكد ان حتى كلامك العادى تحفه
وبجد انتى عرفتى علم النفس احسن تعريف ولو انا من الدكتور اديكى امتياز وعليه طبق مهلبيه:)))

غير معرف يقول...

انا شربت علبة سجاير

مش نفسين

انشاء الله حتكوني معيدة ورئيسة قسم السيكو مهلبية

2ensan wnsan يقول...

سيكو مهلبيه

كل واحد يخلي باله من سيكو مهلبيته يا جرعان


المهم نقعد نقول كده وفي الاخر نجيب الامتياز المتين ولا فشل ولا حاجه ماشي ماشي

Mafrousa يقول...

هههههههههههههههه
تصدقى؟؟؟
انتي مالكيش تعليم
لألألألألأ
انتى تقعدي فى البيتو معاكي أوره و تقوري اي حاجه تقابليها
كوسه بقا بتنجان....اي حاجه

نعكشة يقول...

ههههههههههههههههه

ينهارك

حرام عليكي
جبتي للبنت سكسافونيا في الشحاليل


يا عيني يا روني ياختي


ربنا يصبرهم عليكي في البيت

سلام عليكم

almasry يقول...

الله يخرب بيت علم النفس



بصى نصيحه من أخ فاشل زيك حضرتك



الغى اللى انتى مش فاهماه انا عارف انك هتلغى نص الكتاب ان مش كان كله لكن مش مشكله هتتسلك بعدين



تحيـــــاتى
المصــــــرى

عروسة ننوسة يقول...

شكلك شاطرة اوى يا ميوشة
بس انا زعلانة كده برضوا اسمى مش مكتوب

Unknown يقول...

ايه ده يا ميوشا
انتي حياتك كلها كده
انا خايف علي صحة ماما والله ربنا يخليهالك طبعا

بس هي امتحانات ايه دلوقتي ولا انا اللي مش متابع ولا في ايه

سيبك انتي المهم انتي عامله ايه
ابقي طمنيني عليكي

تحياتي ليكي يا قمره

Unknown يقول...

سيكومهلبيته يا مفترية يا جبارة حراااااااااااااااااااام كدة والله باقولك ايه سيبك مش مهم ايه يعنى سيكو مهلبيته ييييي........
ايه اللى انا باقوله دة حرام عليكى ضيعتى الحبة اللى كانوا فاضلين يا شيخة حرام عليكى

Amgad يقول...

ايه ده يا بنتي انتي فظيعة بجد اسلوبك هايل ودمك خفيف اوي وحياتك واخداها ببساطة اوي
زي مقال بلوو ويف حاولي تكتبي اي حاجه بس متسيبيناش ملطوعين كل ده
احكي اي موقف وخلاص وصدقيني هتلاقي رد فعل يهوس

Alkomi يقول...

انتي حياتك كلها امتحانات كدة و مذاكرة

يا بنتي اللي يشوفك مايشوفكيش و انتي بتدعي انك تخلصي امتحاناتك

bastokka طهقانة يقول...

ملكيش حل
تجنني فعلا

اوروفوار

funckydoctor يقول...

ههههه
الظاهر ان العسل والطحينة بوظوا الفيوزات عندك :D
المهم المتلازمة الى عندك ده هى بتاعت الاستبحس النفساوى :D
سلاموز

maiosha يقول...

سلاااااااام عليكم

يا شباب وحشتونى موووووووووت

أنا أولا بعتذر عن التأخير فى الردود .. بس والله غصب عنى
أصلى كنت مسافرة

وإن شاء الله هتابع من النهاردة وهبدأ الردود

maiosha يقول...

blue-wave
............
يا رافع معنوياتى
بقى عايزنى أنزل بوست كل يوم .. ده أنا كده عايزة أدخل كلية كمان مع كليتى

والله يا سيدى أنا كل ما بكتب بوست جديد بحس إنه أسخف بوست كتبته .. لكن ردودكم دى هى اللى بتشجع الواحد إنه يكمل كتابة

ياريتك كنت الدكتور بتاعى .. مش علشان الإمتياز
لأ أنا طمعانة فى طبق المهلبية

maiosha يقول...

afew good men
...................
نورت البلوج والله

بس أعمل حسابك ده أخر بوست نسمح فيه بالتدخين بعد كده هحط ممنوع التدخين داخل المدونة.. لحسن ندفع غرامة ولا حاجة

يارب من بقك لباب السما

maiosha يقول...

wa7ed 2ensan
................
هيه هيه .. عبد الله جه

بقى بتسيحلى يا عبد الله ماشى ماشى
حسابك معايا بعدين

هنبقى نشوف يا استاذ هتعمل إيه فى الكلية .. يالا شمر من دلوقتى وإستعد علشان أنا مراقباك

maiosha يقول...

واحدة مفروسة
................
إنتى بتقولى فيها يامفروسة
أنا اللى مصبرنى على الكلية دى إن عندى أمل حد يشوفنى فيها ويعطف عليا ويتقدملى ولا حاجة

بس تقولى إيه بقى يا مفروستى

الرجالة مبقاش عندهم نظر

maiosha يقول...

نعكشة
...........
يا جماعة كلكم متعاطفين مع رونى ليه بس؟؟ هو أنا عملتلها حاجة؟؟

ده كل اللى حصلها صدمة عصبية بسيطة .. وهى دلوقتى فى مصحة للأمراض النفسية والدكتور قال إن فيه امل تخرج إن شاء الله فى خلال 3 سنين

هانت

maiosha يقول...

المصرى
............
يا سلام
يسلم كلامك يا مصرى
هو ده الكلام ولا بلاش
مش مذاكرة بقى وكلام فارغ

maiosha يقول...

عروسة ننوسة
...............
والله أنا كنت الإسبوعين اللى فاتوا مش بشوف النت كده إلا سرقة علشان كده المدونة مش متظبطة ومفيش ردود ومزرتش الناس اللى بموت فيهم

وبعدين حاضر يا ستى من عنيا الإتنين
إنتى تأمرى بس

maiosha يقول...

b2rash
...................
يا برقش
والله كلكم وحشتونى وربنا يعلم.. بس هى ظروف غبية بقى

يا برقش أنا بحكى عن سنة أولى الترم الاول .. لأ أنا دلوقتى فى الأجازة الحمد لله
متقلقشى إنت متابع كويس


منورنى دايما

maiosha يقول...

enjy
................
وسع يا جدع .. أحلى سلام لععلم النفس وبتوع علم النفس
والمنفسنين كلهم
نورتى يا قمر

زى الهوا يقول...

فكرتينى بايام زمان لما كنت طالبة وبذاكر كدة وبقف على دماغى برده , وكنت ارفه اختى معايا , كنت بخليها تقعد تقرالى وتفهمنى العربى لأنى ماليش فيه نهائى , تخيلى كنت بفخم الالمانى والعربى لأ

وكانت على لسانى جملة كل تلات ثوانى اقولها

( يااااااااالله ياولى الصابرين )

ماسكينهلبى لاخواتى لغاية دلوقتى لما اقولهم ذاكروا , يقوموا قايلنها

maiosha يقول...

amgad
...........
والله أنا مش عارفة أرد وأقول إيه؟؟
بجد ربنا يخليكم
بس إنتوا كده هتزهقوا منى موووت
خلى فيه فترات متباعده علشان متملوش منى بسرعة

وألف شكر على زياراتك وتعليقاتك المشجعة

maiosha يقول...

محمد الكومى
............
ماأنا لازم أعيشكم المأساة زى ماأنا عيشتها

إشمعنى أنا يعنى

maiosha يقول...

طهقانة
............
نورتينى يا جميل

maiosha يقول...

funcky doctor
...................
لووووووووووووولى .. ولا وبقى عندك متلازمة يا بت يا ميوشة

متشكرين يا دوكتور على التشخيص .. بس عالله تسألنى على الفيزيتة .. أنا فى الفوس معرفش حد

maiosha يقول...

زى الهوا
...............
للأسف يا جميل مش أنا اللى بقول الجملة دى

هم اللى بيقولوها
أى حد بتجرأ ويذاكرلى لازم يقول كده وإلا هيخبطنى بأى حاجة قدامه

Empress appy يقول...

انا درست كتير وقليل مش فاهمه ايه سيكوملبيته دي
ده علم جديد ههههههههه

maiosha يقول...

appy
..............
طبعا علم جديد عملوه علشان أنا بس أدرسه

إحنا عندنا السبق كله

نورتينى

دعاء مواجهات يقول...

ازيك ياقمر

يابتااع المهلبية انتى

يابت بطلى تمثيل بقى

والامتياز اللى جبتيها دى

جبتيها منين بس

ههههههههههههههههههههههه

وحشانى يابنتى اوى

بيس

SeNdReLLa يقول...

واااااو بجد كلامك رائع واسلوبك جامد موووت كانت فين مدونتك دى من زمان
خلاص كده انا بقيت فيها على طووول

شفـقــة و إحســــان يقول...

انتى فين يا قمر مستخبية ليه
عموما ليكى عندى تاج تعالى خديةقبل ما احسان يطمع فيه