الأحد، 12 أبريل 2009

مس تربية 1



أخيرا وبعد طول معاناه .. أقدر اعلن إن شلتنا المبجلة راحت الكلية أخيرا وبعد مرور حوالى إسبوعين -إذاماكنش أكتر يعنى- من بداية الدراسة .. أصل إحنا لاقينا إن حرام الأجازة تبقى إسبوعين بس. ليه يعنى؟؟ ده إحنا قاعدنا نمتحن حوالى شهر .. يعنى على الاقل لازم ناخد قدهم أجازة كده وراحة

نزلت أول يوم الكلية ورحت على هناك على طول علشان أنا باقى الشله كنا متفقين إننا نتقابل هناك . اول ما دخلت الكلية لاقيت إعلان غريب اوى!!كان إعلان عن مسابقة إسمها ( مستر&مس تربية) .. فى المسابقة دى هيختاروا بنت من الكلية تبقى مس تربية وشاب يبقى مستر تربية .. طبعا أنا تنحت قدام الإعلان كده شوية واستغربت إن محدش بيبص عليه غيرى .. وطلع إنه محطوط كده بقاله حوالى 3 أيام وإحنا قاعدين فى البيت.

بصراحة رغم غرابة اللقب ( مس تربية) إلا إنى عرفت إن الإعلان ده معمول عشانى .. طبعا لو أنا مبقتش ملكة جمال كلية تربية مين اللى هيبقى يعنى؟؟ أكيد أنا الملكة .. أنا اتخلقت علشان ابقى ملكة أصلا .. وقعدت أبص للوشوش حواليا كده .. لا لا لا .. كلها وشوش كئيبة كده ومقروفة .. والنبى دى مناظر ملكات دى .. دول أخرهم ملكات مملكة النحل .. خلاص انا قررت .. هدخل المسابقة وهبقى الملكة .. نيهاهاهاهاها

جريت فى الخباثة على مكتب رعاية الشباب علشان أسجل أسمى واخد التعليمات ومعاد الإختبار وكده يعنى.. وهناك قالولى إن فيه بكره حاجة كده زى إختبار اولى .. الله أكبر .. إختبار كمان.. شكل الموضوع بجد وجدانى يا بت يا ميوشة.. وبعدين إحنا بقى لا يهمنا إختبارات ولا الكلام ده خاااااالص .. أنا وثيقة من الفوز.. وثيقة من الفوز
بعد ما سجلت إسمى .. رحت للسلم -مكاننا المفضل فى الكلية.. لازم دايما نبقى قاعدين زى الشحاتين كده- وملقتش هناك غير بيبا وموها .. ولما سألتهم الباقيين فين قالولى إنهم كلموهم دلوقتى وزمانهم فى السكة ..فضلنا مستنيين شوي لغاية ما كلهم اتجمعوا.. ايه ؟؟ بتقول ايه؟؟ انا سامعة واحد فيكم بيقولى مقلتيش على المسابقة ليه لشلة الانس؟؟ عيب عليك تسألنى سؤال زى ده على فكرة.. واقولهم ليه اصلا.. عايزهم يحقدوا على جمالى الفتاك .. وبعدين محدش فيهم كلهم جاب سيرة الإعلان يبقى الحمد لله مفيش حد فيهم خد باله منه, وبصراحة بقى كل ما كان العدد اقل كل ما الواحد فرصته فى الفوز تكبر.. لازم افاجئهم لما يلاقونى جايلهم فى يوم من الأيام لابسة التاج على راسى ومعايا لقب رسمى إنى ملكة .. ومش اى ملكة .. لأ ملكة جماااااال.

بعد ما شلتنا كلها إتجمعت والحمد لله .. عملنا أول حاجة أى طلبة بيعملوها اول ما يروحوا الكلية بتاعهم.. طلعنا على طول على زيزو النتن علشان الفطار.. وبعد الفطار طلعنا على محفوظ علشان البيبسى اللى سابنا طبعا - محفوظ مش البيبسى- وقعد يعاكس ايمو .
خلص اليوم الطوييييل المتعب الشاااااق فى الكلية بجولة بين محلات الطرح علشان نلاقى طرحة حلوة للبس ساسو الجديد .. واللى متعرفهوش عن ساسو بقى إن هى مش بس بطيئة فى قرارتها فى المذاكرة والنزول للكلية .. لكن فى اختيار الطرح كمان.. عااااااااااااااااااا

اخيرا روحت البيت.. واول ما وصلت قولت لماما حبيبتى على المسابقة

ماما حبيبتى : يا سلام عليكى يا ميوشة .. والله لما شوفتك فرحانة كده قولت البت جابت النتيجة أكيد

انا :
نتيجة!! بقى انا بقولك هبقى ملكة .. ملكة جمال الكلية وإنتى يا ماما بتقوليلى نتيجة؟

ماما حبيبتى :
ملكة .. جتها نيلة اللى عايزة خلف

نمت يومها وانا فى دماغى كل احلامى عن المملكة بتاعتى .. وفستانى اللى هلبسه فى الحفلة .. ياترى هيلبسونا مايوهات فى الحفلة دى ولا ايه؟؟ يا لهوى اهو ده يبقى مقلب بقى.. خلاص ابقى اجيب مايوه شرعى بقى وخلاص.. هموت نفسى يعنى
أتخيل نفسى وانا داخلة على لجنة التحكيم وانا لابسه المايوه الشرعى بتاعى.. ايه يا بت يا ميوشة الجمال ده .. عسل والله..بس الطرحة دى مش لايقة على المايوه .. ممكن أبقى اجيبله طرحة ..خخخخخخخخخخخخخ
تانى يوم روحت الكلية .. وانا رائعة ومتألقة وجاهزة ومتجهزة تجهيز تام للاختبار بتاع المسابقة .. رحت المسرح بتاع الكلية وانا على وشى ابتسامة مشرقة .. بس للأسف الإبتسامة دى
إختفت وحل محلها تعبير الصدمة والصاعقة لما شوفت

"تيكا..!!؟؟"
يتبع...

هناك 37 تعليقًا:

emy يقول...

هيييييييييييييييي
اول تعليق
ميوشاااااااااااا
وحشااااااانى كتير جدا خالص

عاجبانى اوى حكاية المايوة الشرعى دى جدا
ههههههههههههههههههه
اشطاط عليكى ياعسل

mohamed ghalia يقول...

ههههههههههههههههههههه
أكيد طبعا هتكسبى معقول برده هيلاقوا ملكة غيرك هههههههههههه
فى إنتظار البقية

blue-wave يقول...

هههههههههههههههههههه
اكيد طبعا اكتساااااااااااح
هوا فيه حد زيك؟
بس ينفع تقطعى الحكايه فى اللحظه المشوقه دى؟؟؟
ماشى ماشى

Ahmed يقول...

ياسلااااااااام
انتي كده علقتينا وهنقعد مستنين قد ايه يعني

يلا يلا بسرعه عشان منحمضش

أبو العريف يقول...

ايه ده يا حجه
ينفع السسبنس والذي منه
بقي اللي نعمله في الناس يطلع علينا

ماشي يا ملكه
ادينا مستنين المسابقه

بس هو التاج راح فين
لا انا بعتلك تاج نحليه
مش تاج يخليكي ملكه

beba يقول...

ايه الشلوت اللي انتي وخداه ف نفسك ده انتوا معندكوش مرايات ف بيتكوا ولا ايه يا ماما قال مس تربيه قال وياتري مين بقي هيبقي مستر تربيه ؟؟؟؟ اكيد احمد رمزي طبعا هتبقوا couple يجنن ... بس سيبك انتي ايه البوست الجامد ده يا عم بجد تحفه

محمد فارس يقول...

الابنه الغاليه ميوشه
ان شاء الله تكسبي
بس برده لو ده حصل ما تتكبريش
علينا وخليكي فكرانه
ما احنا كلنا ملوك ولا انت مش واخده بالك تحياتي
باقولك ايه ماتيجي تقولي رأيك
في السقف بتاعنا بعد التعديل
في المدونه
لتفهميني غلط
مع تمنياتي لك بالنجاح الدائم
ان شاء الله

maiosha يقول...

ايمو
...........
يااااااااااااااه
واحشانى جدا جدا جدا يا ايمو
فينك يا بنتى من زمااااااااان

نورتينى يا قمر

maiosha يقول...

mohamed ghalia
...................
قولهم يا محمد
بس انا مش هسيب التاج يخرج من ايدى ابدا
اطمن .. ده انا جامدة اوى

maiosha يقول...

blue-wave
...........
هيه هيه
شوفوا بقى قلب المسابقة واى حاجة اهو الناس بتشجعنى

ربنا يخليكوا ليا ياااااااارب

maiosha يقول...

أحمد أبو العلا
.............
لأ متقلقش
مش هتلحق تحمض ولا حاجة
بس لازم شوية اثارة وتشويق

maiosha يقول...

أبو العريف
..............
ايه يا كبير الكلام ده.. عيب عليك يعنى ده أنا محسوبك
بس انا بقالى كتييييير مكتبتش يومياتى خالص
قولت انزل بالبوست ده وبعدين التاج على طول
متقلقش يا باشا أنا مقدرش ارفضلك طلب ابدا

maiosha يقول...

beba
..........
يا دى النهار اللى مش فايت
يعنى أسيبكم فى الكلية وأقول اخيرا هرتاح منكم ومن طولة لسانكم تطلعولى فى التعليقات كمان

أروح منكم فين بس يا ربى

وبعدين يا حبيبتى .. احمد رمزى ده عريسك المنتظر أن شاء الله.. ابقى بقى عبيه فى حقنة وخديه فى الورييد
ههههههههههههههههههه

إنما أنا مقبلش أقل من براد بيت

بقى أنا واخدة شلوت فى نفسى يا بيبا
على العموم أنا مش هرد عليكى هنا
لينا كلنا بتلمنا فى الاخر

امشى يا بت انتى ومشوفكيش فى التعليقات تانى

maiosha يقول...

محمد فارس
.............
لا لا متقلقش
مش هتكبر خالص .. وهبسط الشعب كله
والعيش هيوصل لغاية بيوتكم مش هيبقى فيه طوابير عيش تانى
ولكل مواطن اسبوع يصيف فى مارينا
وكروت شحن بعشرة جنيه
صوتولى بس وشوفوا انا هعمل ايه

بص شوف ميوشة بتعمل ايه؟

beba يقول...

براد بيت ده ايه يا بايره ده مش هيعبرك الا لما انجلينا جولي تحلقله ويبقي عنده 60 سنه ويبقي شبه عبد الوارث عثر وبرده مش هيرضي بيكي وبعدين احمد رمزي ده ايه اللي اخده ف الوريد ده يجبلي تسمم حاد ده كفايه الجل اللي ضاربه علي شعره وبعدين ما تخلنيش بقه اخرج عن اخلاقي الراقيه وامشي بقي عشان عطلتيني انا ماذاكرتش انهارده الا 5 فصول و6 شباتر.. هوه القر اللي هيجبني ورا.. يالهوي فاضل شهر ع الامتحان وماخلصتش المنهج الا3 مرات بس ااااااه هسقط

maiosha يقول...

beba
............
يا حبيبتى براد بيت ده لو شاورتله بصباع رجلى الصغير هيسيب كل الإمارا الملتحدة الامريكية دى وهيجيلى خاضعا زاحفا طائرا.. بس النفس يا اوختشى بعيد عنك

ايوة ياقطة دحى دحى .. الكتب هتولع من كتب المذاكرة.. كلنا كتبنا شكلها نظيفة وبنت ناس والغلاف بتاعها بيلمع وانتى كتبك بقت مقرفة من المذاكرة

ذاكرى يا ستى ذاكرى اللى عطاكى يعطينا

Mafrousa يقول...

هههههههههههههههههههههههههه
يعنى لازم تفرسينى يا ميوشة هانم
ما كملتيش القصة ليه؟؟ خلينا نعرف مس تربية و مستر تربية ديه ايه؟؟؟
يا خراااااابي لو يقصدوا المتفوقين دراسيا
هههههههههههههههههههههه
شأبك حيطلع على نونا
ههههههههههههههههههه
بس سيبك انتى فعلا اتخلقتى علشان تكوني ملكة
ههههههههههههههه
ملكة الشقاوة
نلكة الكسل و الهمكة
ههههههههههه
كملى اوام و ابقى تعالى قوليلي لاحسن اختك كبرت فى السن و بقت تنسي من فرستها
هههههههههههه
سلام

dramaqueen يقول...

ميرشة واحشانى يا قمر
انتى زى العسل واكيد زى القمر
مبروك مقدما
بس عايزة اعرف من تيكا
متتأخريش

shahieno يقول...

مبروك يا ميوش على البوست
مبروك يا مس
ومش مهم التاج يا ميوش المهم الصحة
والصحة تاج على رؤؤس الاصحاء
ومتعلقيناش كتير بقى يا مس
وإن شاء الله تكسبى بأكتساااح

MǿиY El-Shreef يقول...

ههههههههههههههههههههههههههه

ياعيييني يابنتي

ليه بس كده تقطعيها علينا

عندي احساس انه مقلب فظييع هههههههه

ربنا يسترها معاكي

SERVANT OF JC يقول...

هههههه

بجد صاحبة البلوج دا شكلها دماغ .. بس حلو .. يالا شدي اللحاف ونامي :)

SERVANT OF JC يقول...

علي فكرة يا ميوشا إنتي الأفضل ليكي إنك تكوني "مس تهييس" بدل من مس تربية.. خلي التربية لأصحابها يا بنتي .. دا انتي حتي كان شكلك اول مرة تدخلي فيها الكلية وقت لما شفتي الإعلان .. يالا أهو ممكن تكون المسابقة دي حافز ليكي ولغيرك من الطلبة الفاشلين علشان تيجيوا الجامعة ..هههه

بس بجد عاجبني جدا البلوج الفاشل دا

100% :)))

koketa يقول...

ههههههههههههههههههههههههههههه
هههههههههههههههههههههههههه
والله يا ميوشة انا ضحكت ضحك فى البوست ده
وأكيد طبعا ياقمر أنتى ملكة جمال الكلية
بس اسمحيلى يعنى
انا بصراحة مش عجبانى الفكرة يعنى ايه مس او مستر تربية هى الاقتراحات والمسابقات والنفسات خلصت وجت على الجمال الى هنعمل عليه مسابقة

نعكشة يقول...

تيكا مين؟؟

انا توقعت اول ما قولتي انك مقولتيش
انكوا هتلاقوا بعضكوا هناك

ههههههههههههههه


لو حصل هيبقى منظركوا مسخرة قدام بعض


بس صحيح مين تيكا دية؟؟؟

سلام عليكِ

maioya يقول...

اكيد اكيد
لقيت ان انتي المتسابقه الوحيده
ماهي تربيه كده
واساليني :lool:

maiosha يقول...

مفرووووووووستى
................
من عنيا الجوز ومناخيرى النوز
اول ما هنزل التكملة هجيلك هوااااااااااا

اموااااااااااااااه

maiosha يقول...

dramaqueen
............
انتى واحشانى اكتر بكتييييييييييير

تيكا؟؟ قريبا بالأسواق

maiosha يقول...

shahieno
............
يا سلام يا شاهينو لو كنت معايا فى الكلية .. كنت أنا وانت بقينا مس ومستر تربية
ههههههههههههههه

كانت هتبقى مسخرة
ههههههههههههههههههههه

لأ متقلقش مش هعلقوا كتير إن شاء الله

maiosha يقول...

MǿиY El-Shreef
.......................
ههههههههههههههههههههههه

ربنا يستر.. ادعيلى

maiosha يقول...

Servant of Christ
...................
لا لا لا .. إزاى تقول كده؟؟
انا رحت الكلية قبل كده أيام الامتحانات كتيييير

نورت المدونة

maiosha يقول...

koketa
.............
انا عارفة.. جمال ايه اللى انت جاى تقول عليه.. هو فيه جمال بعد جمالى تدور عليه؟؟
ايييييييييييييه

نورتينى

maiosha يقول...

نعكشة
...........
وحشانى موت موت موت موووووووت

بجد وحشتينى جدا يا نعكشة جدا ألى اقصى الحدوووووووود

تيكا.. هتعرفوا تيكا بالتفصيل قريب ان شاء الله فى البوست الجاى

اموااااااااااه

maiosha يقول...

maioya
...........
لا لا مش للدرجة دى
تيكا كانت هناك

Mafrousa يقول...

فطستينى على روحي من الضحك على تعليقك عندى يا بنوتة
ههههههههههههههه
اكيد فعلا حيجي يوم اللى الناس فيه تعرف تفرق بين مية السيفون و مية الشرب
هههههههههههههههههه
سلام
على فكرة حرجع تاني علشان اقرأ اللى انتى كاتباه هنا

Amgad يقول...

انتي بتعلقينا بالتيكا
مسيرنا نعرف
وبعدين مش ناوية تقوليلي فين زيزو النتن بقي

Amgad يقول...

ميرسي يا ميوشة علي سؤالك
ربنا يخليكي
انا موجود والله بس فيه مشكلة عندي
مع الموقع فمش بعرف اقرا اي حاجه جديدة
عشان كده في مشكلة في التواصل شوية
غير كده شوية مشغوليات تبع الكلية
هخلص بقي ونسيبلك حياة الطلبة بمرها وحلوها وفشلها من غير نجاحاتها :D
وميرسي مرة تانية علي سؤالك
ومسيلي علي نفسك

Teawater يقول...

ههههههههههههههههه
هي ديه كليه جامعه ايه بالظبط