الأربعاء، 18 فبراير 2009

أه يا نوم يا نوم.. يا نوووووم



ادعوكم كلكم يا شباب فى بيتى التانى(كلام رومانتيكى ) حيث نتناول الرومانسيةمن منظور تانى خالص

أتمنى انكم تشرفونا هناك


*************************


بكرة الكلية .. بكرة الكلية

فضلت اقول الجملة دى طول ما انا فى الصيدلية ولغاية ما روحت البيت .. وانا عمالة افكر إن الكلية بكرة .. مش عارفة إيه الفرحة العارمة اللى كنت فيها دى.. صحيح إنى بعترف إن المذاكرة عدوى الأول والأخير .. لكن برضة ده ميمنعش ان اصحابى ودكاترتى اللى غالبا لسه معرفشى اساميهم لغاية دلوقتى وحشونى برضة.. ده غير إنى قررت قرار حاسم جازم كاظم حاتم.. إنى ناوية إن شاء الله إنى ادخل الترم ده دخلة جد.. أيوة يا جماعة .. أنا ميوشة زى ما أنا .. بس من بعد الزنقة الزرقة اللى اتزنقتها فى امتحانات الترم الاول.. قررت إنى ادخل الترم التانى وانا بكامل لياقتى الذهنية وابقى مستعدة لمواجهة كل تحديات العصر .. من أجل مستقبل أفضل لأولادنا ( والله ولا بتوع الإنتخابات يا بت يا ميوشة)

بس بينى وبينكم .. أنا قولت أذاكر من الأول علشان لما النتيجة تطلع ولما ماما حبيبتى والبيج بوس يكتشفوا الخيبة التقيلة اللى هتظهر فى النتيجة إن شاء الله.. يبقى عزائهم الوحيد (حلوة عزائهم دى) إنى بحاول اشد حيلى اهو فى الترم التانى علشان أعوض.


المهم قبل ما أنام .. قعدت اوضب حاجتى ولا كإنى رايحة المدرسة .. وطلعت طقم كده باين عليه العلم والوقار -متسألوش ازاى؟- بس انا كل ما البس الطقم ده الكل يقولى انتى شكلك كده مدرسة.. قشطة هو ده التأثير المطلوب.. لا لا بلاش طرحة فاتحة.. ده احنا بكرة رايحين لزيزو النتن .. وهنعوض كل اللى فاتنا فى الأجازة .. من الأخر هتبقى مدبحة.. ولو رحت بطرحة فاتحة هيبقى منظرى مش ظريف خالص.

تمام كله تمام . وضبت شنطتى وكل حاجة .. وايه كمان قدامى حوالى 6 ساعات علشان أنام واقوم بكرة فايقة.. تمام.. تصبحوا على خير يا أهل الداااااااااار.. حد عايز منى حاجة قبل ما انام؟؟ يا ريت محدش يطلب منى حاجة لإنى تعابانة ومش قادرة افتح عينيا خاااالص


نونا الرخمة: ميوشة إلحقى .. الفيلم اللى انتى كنتى مستنياه طلع النهاردة .. مش بكرة.. هيبدأ اهو


أنا : بجد.. أنا جاية أهو


تانى يوم صحيت .. ده لو كنت نمت اصلا..وانا مفعمة بالطاقة والحيوية وعلى اتم الإستعداد لبداية الترم التانى.. لبست واتشيكت على الأخر.. وقمت لبست النظارة النظر اللى من ساعة ما عملتها ملبستهاش 3 مرات على بعض.. بصراحة انا عايناها للمناسبات اللى بحب ابان فيها مثقفة بقى وكده.. وبعدين فجأة يا اخى متعرفش ايه اللى حصلى..خير اللهم اجعله خير.. اللى جالى فى ودنى وقالى:

كلمى بيبا يا ميوشة وشوفيها صحيت ولا لأ .. لحسن تكون راحت عليها نومة


جريت على التليفون .. وطلبت بيبا.. التليفون فضل يرن .. ويرن .. ويرن .. ويررررررررررن.. فين لاقيت الست هانم بترد وهى نايمة


بيبا: الووو


أنا : ايوة يا بيبا.. شوفتى كان قلبى حاسس إنك راحت عليكى نومة


بيبا : راحت عليا نومة.. هو احنا ورانا حاجة اصلا.. توزيع اللبن علينا النهاردة ولا ايه؟؟


انا : هى هى هى.. لأا يا ظريفة عندنا كلية


بيبا : كلية ايه؟؟ انتى عبيطة ؟؟ هو انتى فاكرة نفسك لسه فى الاعدادية ولا ايه.. هو حد بيروح الكلية ى اول يوم ده.. ده الدكاترة نفسهم مش بيروحوا


انا : ايه ده .. يعنى مش هتروحى النهاردة؟


بيبا: عاااااااااااااااا.. منك لله صحتينى من النوم.. اجرى نامى يا بت .. واياكى تتصلى هنا تانى .. فاهمة؟

طاخ


الله الله الله .. ايه ده بقى؟؟ مش هنروح ازاى يعنى؟؟ لا مش ممكن .. ما هو انا مش هصحى بدرى والبس واجهز نفسى علشان منزلشى .. واذا بيبا مش عايزة تروح فى خمسة تانيين لسه فى الشلة هيروحوا.. يالا بقى عليا وعلى اعدائى


تررررررررررررررررررن


أنا : الو


موها : ايوة يا ميوشة.. كويس انك صاحية


انا : ايوة طبعا .. مش عندنا كلية النهاردة .. ده النهاردة اول يوم


موها :ما أنا بقول كده برضة .. بس ميرو وايمو مصممين ميروحوش النهاردة.. وانا خايفة مروحش الاقى عندنا محاضرة .. وانا اصلا عايزة انام ومش قادرة اروح الكلية وفى نفس الوقت قلقانة لحسن حد من الدكاترة ياخد الغياب ولا يدينا بحث ولا امتحان ولا..


أنا : بس يا بت يا مجنونة انتى.. امتحان ايه اللى فى اول يوم ده.. يادى النهار.. يعنى انتوا كمان مش رايحين؟؟


موها : شكلنا كده


أنا : عاااااااااااااااا. انا بكرهكم.. روحى نامى احسن.. لو رحتى الكلية كده اكيد هيطردوكى اصلا.. سلام


طب انا اعمل ايه استسلم يعنى.. لا .. لا هوان ولا استسلام .. نازلة الكلية يعنى نازلة الكلية .. خلاص .. انا مش فاضلى غير انى البس حاجة فى رجلى وانزل السلم واروح الكلية .. يالا يا ميوشة تشجعى.. ميوشة ميوشة .. اوه اوه


بس قولت اعمل اخر محاولة قبل ما انزل كده .. يمكن يا عالم.. اتصلت بنمرة ساسو على الموبايل .. ولاقيت زى ما توقعت بالظبط اللى بيرد عليا بيقول " الهاتف الذى طلبته ربما يكون مغلقا "


مستحيل .. انا نازله .. نازلة .. انا نااااااااااااااااااااااااااااااااااايمة.. خ خ خ خ خ خ خ خ خ خ


تصبحوا على خير.. بلا كلية بلا بتاع


هناك 36 تعليقًا:

أبو العريف يقول...

يا صلاة النبي احسن اول تعليق

أبو العريف يقول...

ميوووووشه
كان لازم يا باشا تتصلي بيهم من بالليل عشان ما تقوميش وتتعبي نفسك وتلبسي الطرحه الغامقه
وبعدين ايه يعني لو كانت فاتحه كانت هتغمق عند عبده النتن
وعلي فكره انا عمري مارحت الكليه اول يوم
وبيني وبينك ولا اول شهر وحياتك انا اسمع بس ان جدول المتحانات نزل افكر بقي اتصل بالبشر اللي معايا ف الكليه وعلي ما يفتكروني تكون الامتحانات خلصت

Mafrousa يقول...

ياشيخة
تعليم ايه و بتاع ايه؟
انتى مش الوظيفة موجودة؟؟
تتعلمى ليه و تذاكري ليه ؟
يا شيخة بلا وجع قلب
خليكي نايمة
ولما تصحى تبقى تروحي الصيدلية اكنسيها

maiosha يقول...

ابو العريف
.............
عندك حق انا غلظانة .. بس الثقة العامية بقىمنها لله خلتنى اثق فيهم وفى صحاينهم

ادى جزات اللى عايز ياخد الترم من اوله جد

maiosha يقول...

واحدة مفروسة
................
بينى وبينك يا مفروسة من ساعة ما روحت مع بابا الصيدلية فى الاجازة وهو نفسه الاجازة متجيش تانى

انا وبلا فخر طفشت حوالى نص زباين الصيدلية .. والنص التانى فى المستشفى

اقصوصه يقول...

ههههههههههههههه

هي دي اخرتها

طحتي من عيني خلاص!

Lady E يقول...

هههههههه جدعه يا ميوشة انا قولت بالاصرار اللي كنتي فيه ده كان لازم تنزلي وتروحي الكلية بس لاقيتك عملتي زي حلاتي ونمتي احلى حاجة عملتيها
انا بقى الترم ده حبيت اخده جد من اوله برضه وروحنا الكلية اول يوم واطردنا من الكلية قالولنا ايه اللي جابكو هو حد بيجي اول يوم نياهاهاها

maiosha يقول...

اقصوصة
...........
اه اخرتها لسه فى بدايتها

نورتينى

maiosha يقول...

lady e
............
هههههههههههههه
لا والله
ههههههههههه
ربنا يبشرك بالخير
طيب كويس انى مرحتش بقى
هههههههههههههههه

مذكرات مشاغب يقول...

ههههههههههههههههههههههههه
معاكي حق طبعا
كلية ايه وكلام فاضي ايه؟

تحياتي

بنت الغربة يقول...

ايه ياميوووشه العسل ده
ياشيخه نامى بلا وجع دماااغ
انا عايزة اعرف كلية ايه الرايقه دى اللى الطلبه ماحدش بيروووح اول يوم؟؟
ولا الدكاتره كمان؟؟؟
امال بيفتحوها ليه من اساسه؟؟؟؟
مايكبروا دماغهم ويفتحوها تانى يوم او تالت يوووم
انا كنت باحب الكليه جدا جدا ..
علشان اصحابى ...وعلشان مافيهاش مذاكرة...كلها رسم بس...
بس ياجميله ماينفعش لما تشتغلى تقولى انا مش رايحه اول يوم ...
واستنونى تانى يوم لما الم اصحابى..
ربنا معاكى ياقمر
وان شاء الله نتيجة الترم تطلع حلوة
تحياتى

dramaqueen يقول...

يابنتى اول يوم دة بس بننزل عشان نشوف اصحابنا وتانى يوم بنأجز
وبنبتدى محاضرات فى تالت او رابع يوم

ربنا يوفقك يا قمر

funckydoctor يقول...

ايوة كده
النوم أحلى من العسل :]
بي سمكن عندهم حق لأن أول يوم فعلان فى مصرنا الحبيبة بيكون أجازة عرفا :D

دعاء مواجهات يقول...

ههههههههههههههههههههههههههه

هتفضلى مشكلة كدة زى ما انتى

انتى بج مالكيش حل يابنتى

لا ان شاء الله تنجحى وبأغلاها تقدير

وحشاانى اوى يابنتت انتى

بحبك

ادعوكى لزيارة

http://mhlpyaaa.blogspot.com/

maiosha يقول...

مذكرات مشاغب
.............
ما انا قولت كده برضة
نورتنى

maiosha يقول...

بنت الغربة
..............
أنا برضة دايما اسأل السؤال ده
مادام محدش بيروح الكلية اول يوم .. طيب بيفتحوها ليه؟؟
ما يطولوا الاجازة شوية وخلاص

على العموم طولوها او لأ إحنا بنطولها بمزاجنا وخلاص

maiosha يقول...

drama queen
.................
عااااااااااااا
كل الناس طلعت عارفة الموضوع ده إلا انا؟؟

maiosha يقول...

funckydoctor
............
عرفا؟؟
هههههههههههه
دى حاجة تبع انفلونزا الطيور ولا ايه؟؟

هههههههههههه

maiosha يقول...

دعاء مواجهات
................
هيه هيه هيه
دودو

هل هلالك يا شيخة
عاش من شاف خطك
والله العظيم إنتى وحشتينى اكتر

وايه حكاية اللينك اللى فى الأخر ده ؟؟
بلوج جديد ولا ايه؟؟

انا رايحة اشوف ايه الحكاية دى

بس خلاص ... يقول...

ميوشة مين
حاسم جازم كاظم حاتم ده ياترى ده بتاع اللبن اللى بيصحى بدرى وعايزك تصحى معاه
ايوه كده انا احب الناس اللى تاخد قرارات حاسم جازم كاظم حاتم وتسيبه من غير قرارارت يستاهل علشان يبطل يصحى بدرى
نااااااااامى علشان اغطيكى الدنيا بررررررررررررررررد

طالب فاشل من زمان يقول...

معلش في الرد على البوست بس في عندي مشاكل في النت ومش عارف ادخل خالص الايام دي
بوست جامد جدا وفعلا اول يوم دا ناس كتير مش بتروح وفي ناس بتنفض اول اسبوع كله
ثانيا تستاهلي لان الثقه العمياء دي هتوديكي ورا الشمس
ثالثا خدي بالك من المذاكره زي الترم الاول بالظبط علشان النتيجه تكون مشرفه لرابطة الفاشلين اللي زينا
ومستني البوست الجديد على اخر من الجمر

Unknown يقول...

انا سخسيا لما بيبقى عندى محاضرات بدرى بعمل نفسى هبلة ومش بحضر
وبعدين حد يروح اول يوم يا شيخة
ايه ياشيخة ايه يا شييييييييخة

الضاحكون يقول...

هههههههههه
خايفه يدوكى امتحان فى اول يوم ؟؟
نو
نو
نو
مش غريبه خالص
احنا زمااااااااان ايام ما كنا فى الكليه
كان اول يوم نعرف فيه النتيجه وبعدين الامتحانات وبعدين المحاضرات وبعدين نتعرف على الدكاتره فى اخر الترم
ههههههههه
خليكى نايمه احسن يا ميوشه

عبده الرايق

ragabhpl يقول...

خخخخخخخخخخخ



هتصحى من النوم امتى


يلا هم اللى اتعلموا خدوا حاجه الاوجع الدماغ

maiosha يقول...

بس خلاص
............
لا لا مش بتاع اللبن إسمه هيثم مش حازم

ايوة غطينى ربنا يخليكى

maiosha يقول...

طالب فاشل من زمان
..................
إنت فين يا راجل من زمان
والبلوج بتاعك سايبه ليه؟؟
أنا عايزة اشوف شغلك الجامد
وأرجوك تشيل الحروف اللى لازم نكتبها علشان الرد يظهر عندك دى علشان بتعصبنى جدا ومش بعرف اسيب تعليقى

مستنية جديدك

أبو العريف يقول...

ميوشه
ايه يا بنتي النوووم دا كله
ايه الكسل ده
انت لا رحت الجامعه
ولا جيت البلوج
غايبه فين
اوعي تكوني مخطوفه
انا ممكن اجي ف التلفزيوك واغنيلك
عودي بليه
قصدي يا ميوشه

روئه مشاكل يقول...

هااااااااى ميوشه ازيك
عندك حق والله يابنتى الواحد وهو قايم الصبح بيبقى نفسه ياخد السرير معاه وهو ماشى
كل م بفكر انى لسه هقوم والبس واركب واروح محاضرات وكتابه وملل احس انى رايحه انتحر ومش راجعه تانى

شفـقــة و إحســــان يقول...

هو ده الكلام المظبوط
الايخخخخخخخخخخخخخخخخخخخخخخخخخ احلى من الكلية
بلا مذاكرة بلا بتاع احنا ناس فاشلة

noureldens يقول...

يارب تستفادى من مدونتى الاسلاميه دى هاتفيدك جدا


http://noureldens.maktoobblog.com/

حنين القلب يقول...

والله ما فيه فايده

ههههههههههههههههههههههههههه

يعنى برضه نمتى طيب ما كان من الاول
ولازم يعنى الكليه من اول يوم
مهو صحيح مش بيكون فيه حد اصلا

بس انتى عسسسسل والله

Unknown يقول...

اهو هو الفيلم
وقبليه هكتب بوست على المدونة
وبعديه هفلتر كام صورة كدة

وبسم الله ماشاء الله تانى يوم اكون نايم ومكتوبلى 5 ايام خصم فى الشغل

تسلمى على المدونة الرائعة

كيكى عوووووو يقول...

تيييييييييييييييييييييييييت
يابنت الايه قال وانا قلت خلااااص البت بقت مجتهدة وبقت فالحة اهى
ترووووووووووحى فى الاخر تناااااااامى
وانا كل ما اقراء اقول بارفو ياميوشة تستحقى راسلة تشجيع
***عموما انسى موضوع الرساله خالص
!!!!!
سؤال محشور فى زورى اية العلاقة بين الطرحة الفاتحةووعبدة النتن؟؟؟؟
عوووووووووووووووووو

هاني سعيد يقول...

هو انتى بتتكلمى جد ولا بتهزرى ؟ هو فى كدة؟ دا لو حقيقى يبقى خلاص عليه العوض ومنه العوض ههههههههههههه
انتى نموذج حى للفشل يا بنتى روحى وانتى فاشلة بالتلاتة؟ بس انا بجد مش متخيل الكلام دا بالله عليكى بتتكلمى جد ؟

رئيس منظمة الهكر يقول...

لالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالالااوعي تسمعي كلام الناس دة وتروحي الكلية من اول يوم وتذاكري جدا وربنا معاكي ويوفقك وانشاء اللة لما تنجحي تعزميني علي الحاجة الساقعة (رئيس منظمة الهكر العربية)

الواد كريم الى نفسه يبقى حاجه!!!!!! يقول...

لالالالالالالالالالالالالالالالالالالالالا يا ميوشه انا اكتر واحد باعانى من الفشل اولا لانى مابذاكرش خالص حته ليله الامتحان بقضيها اودام التليفزيون والى مضايقنى وغايظنى ان مش عارف هو انا ليه فاشل ومابذاكرش ده حته انا ماليش اى نشاطات فى الكليه ولا ليا اصحاب بجد مافيش الا شويه عيال كده بنكلم بعض تحت اسم المصلحه بس ع فكره البتاع الى انتى بتكتبيه عن قصه حياتك ده جامد وعجبنى واول نشاط قررت اعمله فى حياتى هو انى ارد واعلق عليه شدى حيلك فى احسن واحسن.انا بقه كريم من المنصوره فى كليه اداب سنه تالته فى قسم عقيم جدا جدا جدا جدا جدا بجد قسم يجيب الشلل وهو بلافخر قسم اللغه الفرنسيه ربنا مايحكمش بيه على حد قولى امين.وبتمنى اكون صديقك وصديق الشله الجميله بتاعتك يلا معلش تقلت عليكى بالتوفيق انشاء الله ومستنى منك الجديد