الخميس، 5 فبراير، 2009

بوست لابد منه

سلام عليكم
عايزة بقى أسمع أحلى حمد لله على السلامة .. سلامة رجوع ميوشة لعالم التدوين
العالم اللى مش بتحس بنفسها إلا فيه .. ولا بتحس إنها عايشة إلا لما بتشوف تعليق من الناس اللى عرفوها وحبوها من غير حتى ما يشوفوها
أنا بصراحة كده يعنى كنت عايزة أحط الكلام ده فى أول البوست الجديد .. لكن حسيت إنى عايزة أرغى معاكم شوية قبل ما أكتب البوست الجديد .. وقولت خلاص يا ميوشة برى على نفسك شوية وإكتبى بوست لزوم الرغى و الحاجات دى وهنزل البوست الجديد على طول إن شاء الله
الأول طبعا مش محتاجين إنى أقولكم وحشتووووونى جدا جدا جدا .. والواحد مش بيعرف قيمة حاجة فعلا إلا لما بيتحرم منها.. وأنا عرفت قيمة المدونة بتاعتى فى فترة الإمتحانات اللى فاتت دى ( اللهى ما ترجع تانى يا رب) قولوا امين
ثانيا .. احب أشكر كل اللى دعالى وكل اللى سأل عليا أول سابلى تعليق .. مع إن فيه تعليقات موتتنى من الضحك.. هههههههههه.. زى مثلا كيكى بعتالى تقولى "معقولة لسه بتمتحنى .. دول الكفار خلصوا إمتحانات".. أنا قعدت أضحك على التعليق ده ضحك.. وبعدين مش تقولى يا كيكى الكفار دول إنتظام ولا إنتساب ولا إيه بالظبط؟؟
ثالثا بقى .. أنا فعلا إتأخرت بعد الإمتاحانات لإنى بصراحة قضيتها صياعة .. يعنى من ساعة ما خلصت إمتحانات وأنا كل يوم فى حتة.. بس أحلى يوم قضيته كان فى معرض الكتاب لإنى فى اليوم ده قابلت ناس .. ربنا عالم أنا حبيتهم قد إيه من قبل ما أشوفهم .. وكان اليوم ده هو أول لقاء لينا.. قابلت يومها ( دعاء مواجهات )..( و(كيكى)..(وإيمو).. أما الشباب فكان هناك (عبد الله غنيم ) .. والمفاجأة بقى اللى مكنتش أتوقعها (سووووووو ) بذات نفسه .. بجد بجد ده أجمل يوم قضيته فى الأجازة لغاية دلوقتى .. ويارب يارب اليوم ده يتكرر تانى وتالت وعاشر.. لإنى إن كنت بحبكم قيراط واحد فأنا دلوقتى بحبكم 24 قيراط .. وشوفوا بقى القيراط بقى بكام دلوقتى؟؟
همممممممم.. فيه إيه تانى .. أه نقطة أخيرة مهمة جدا.. ناس كتير سألتنى السؤال ده " هو إنتى التوقيت عندك فى المدونة غير توقيت البشر ليه؟؟" يعنى ببتدى الأجازة لما الأجازة بتخلص .. وأخلصها قبل ما تبتدى
عايزة بس أقولكم إن حكايات المدونة كلها فلاش باك .. يعنى أنا بحكيلكم من أول سنة أولى .. فبحكى بترتيب زمنى معين .. مش ماشية مع التوقيت بتاع دلوقتى.. أتمنى بس إنى أكون وصلت النقطة دى.
بس خلاص .. نرجع بقى للتدوين من تانى

هناك 18 تعليقًا:

دعاء مواجهات يقول...

حبيبة قلبى

نورتى البلوجات كلها

انا بجد مبسوووطة اوى انى شوفتك ياقمر

ياارب تتكرر تانى وتالت

بيس ياحبى..

maiosha يقول...

خلاص بقى أنا خلصت وفضتلكم

نيهاهاهاهااهاها

ضحكات شريرة متقطعة

محمد يقول...

دى أول مره أزورك
أنما بأذن الله تعالى مش هتكون آخر زياره
وأنا جاهز لمتابعة بوستاتك الجديده
بس لو سمحتى
وحضرتك بتنزلى البوست ممكن توزعى معاه
سندوتش لحمه وقطعه من تورتة شيكولاته
ومعنديش أى أعتراض أن يكون معاها مشروب شاى علشان أنا مش طماع
دمتى بكل الود والاحترام

Teawater يقول...

الف الف الف حمد لله ع السلامة
يا قمر نورتي المدونة من جديد
ووحشتينا يارب
عقبال ما نسمع بقا اخبار النتيجه

الحرامي يقول...

هلا هلا
علي رأي عمرو باشا دياب
كل دي امتحانات
علي ابامنا كنا بنمتحن في يومين كده علي طول ونفضي بقي للسرقه

ولعدين تروحي معرض الكتاب من غير ماتقوليلي
انالو اعرف كنت جيت سرقتكم
قصدي اتعلرفت عليكم
بس الحمد لله اني ما جيتش
حكم انا عارفكم كان ممكن تسلموني للبوليس

نعكشة يقول...

نورتي يا قمر

مستنيين الاصدار الجديد من الضحك المتواصل
اما بالنوسبة للأجازة
فإن شاء الله تبقى من اسعد الاجازات يا رب

سلام عليكِ

mohamed ghalia يقول...

أحلى حمدا لله على السلامة لأحلى ميوشه
المهم إننا اطمنا عليكى
دمتى بكل الود
فى إنتظار الجديد

واحدة مفروسة يقول...

حمدا لله على سلامتك
ايه يا ميوشة الغيبة ديه كلها
انا قلت سافرتي تجاهدى فى فلسطين
المدينة كانت مضلمة يا قمرة
عودا حميدا
تحياتي

maiosha يقول...

محمد
..........
أولا : نورتنى يا محمد ونورت المدونة كلها
ثانيا بقى : أحسن حاجة تخلى الدنيا تستاهل تتعاش فعلا إن الواحد يقابل ناس ذيك كده .. ميعرفوش يعنى إيه طمع أصلا .. كلهم قناعة وطلباتهم بسيييييييييطة وسهلة
ههههههههههههههه

طيب وياترى مش عايز تشرب بعد الشاى مثلا حاجة ساقعة؟؟

maiosha يقول...

teawater
................
نتيجة ايه بس .. ليه السيرة دى بقى؟؟

ده الواحد ما صدق ياخد الأجازة

maiosha يقول...

الحرامى
.............
هههههههههههه
ايه الاغنية دى .. عمرو دياب مقليش إنه غنى الاغنية دى قبل كده

ماشى حسابى معاك بعدين يا واد يا عمرو

اما بالنسبة للمعرض.. مخبيش عليك يعنى .. انا اعرف مخبر و قالى لازم ابلغه لو عرفت انك رايح فى حتة.. فخلى بالك .. انا من اول قلم هقر واعترف بكل حاجة

انا مش ضامنة نفسى

maiosha يقول...

نعكوووووووشتى
...............
وحشتيييينى مووووووووووت

إن شاء الله الإصدار الجديد قريبا
بس فيه حاجة عايزة أسألك عليها

هو إنتى شيلتى التعليقات من البلوج عندك ولا العيب عندى انا؟؟

ياريت اعرف بس يا نعكوشتى ربنا يخليك ..أنا مش بعرف اسيب عندك تعليقات خالص

maiosha يقول...

mohamed ghalia
...............
اهلا بالغالى

والله احلى تحية وحمد لله على السلامة

ربنا يخليك يا رب.. ونورتنى

maiosha يقول...

مفروستى
............
والله كان نفسى يا مفروسة.. بس اعمل ايه بقى بابا مش راضى

بس اسيبك مين ده؟؟ أنا على قلبكم

mohamed يقول...

ميوشه
أدينى رجعت تانى
ولا سندوتش أكلت
ولا شاى شربت
ولا ساقع شفت
المهم
أنى زرت
يعنى الواحب عملت
أنا والله مش طماع
الزياره والطلبات كلها على حسابى
مع تحياتى
عمو محمد
مدونة مشاعر وأفكار
مدونة شوية كلام

انا ودماغي يقول...

أهلا يا ميوووووشة

إزيك و علمتى إيه فى الإمتحانات


أكيد حاجة حلوة اوى أنك تقابلى الناس الجميلة دى

مستنين بوستاتك المطرقعة

أبو العريف يقول...

باشا وحشتنا يومياتك
مستنيين الجديد

blue-wave يقول...

الف حمدالله على سلامتك
ويارب منورانا كدا على طووووووووووووول