الاثنين، 9 فبراير 2009

أرجوك اصرفلى هذه الروشتة


أنا: صباح الخير يا بابا


البيج بوس: أهلا بالأستاذة الرايقة .. إيه النشاط ده كله؟؟ خير جايه بدرى النهاردة ليه؟؟

أنا: أهو بقى قولت أخر يوم هتتشرف صيدليتك المتواضعة بتشريفى أنا أه .. فقولت أجى بدرى بقى

البيج بوس : والله كتر خيرك يا ستى .. صحيح أنا نسيت إن النهاردة أخر يوم أجازة.

أيوة بالضبط .. النهاردة أخر يوم فى الأجازة .. الأجازة اللى كل الناس بتستناها وبيبقى نفسها فيها .. بابا والحمد لله نجح إنه يخلينى أتمنى إنها تخلص بسرعة.. أخيرا هلبس تانى وأنزل الكلية بتاعتى.. أخيرا هحضر المحاضرات لدكاترة مش بسمع من كلامهم ولا كلمة علشان ببقى حاطة السماعات فى ودنى بسمع ماتش الأهلى .. أخيرا هاكل عند زيزو النتن تانى .. ده أنا بطنى وجعتنى جدا من أكل البيت النضيف ده ..يععععع.. أخيرا هتجتمع شلة الأنس تانى .. بعد ما إستندلت أحلى إستندال فى الأجازة ومحدش فينا شاف خلقة التانى خالص .. ياااااااااااه.. الأجازة خلصت .. الأجازة خلصت .. هيه هيه هيه هيه


المهم وإحنا عمالين بنتكلم لاقينا شاب صغير داخل جرى علينا فى الصيدلية وهو بينهج وقعد يزعق ويقول " يا دكتور الحقنا يا دكتور.. الأسطى عبده شكله تعبان أوى .. ووقع منا وأغمى عليه"

بابا خد جهاز السكر معاه لإن الأسطى عبده ده مريض بالسكر وكتير بتجيله غيبوبة سكر .. وراح مع الولد ده .. وقالى إنه هيروح الورشة بتاعة الأسطى عبده اللى جنبنا دى وهيجى على طول ومش هيتأخر .. بصراحة هى دى كانت بقى اول مرة اقعد فيها لوحدى فى الصيدلية .. بس قلتتله مش مشكلة ولو حصلت اى حاجة هبقى ارنله على الموبايل.


بابا خرج من هنا وشوية لاقيت واحدة داخلة عليا الصيدلية وفى ايدها روشتة



الست : لو سمحتى يا دكتورة عايزة اصرف الروشتة دى


ايه ده ؟؟ انا .. بصيت حواليا كده ملقتشى حد غيرى .. انا دكتورة .. لووووووووولى.. ياما إنت كريم يارب .. اهو بقيت دكتورة من غير لا كلية طب 7 سنين ولا فارما ولا سحر ولا شعوذة.. فينك يامه تشوفى بنتك ميوشة بقت دكتورة.. أنا قولت بقى بما إنى بقيت دكتورة خلاص أترسم بقى .. كنت أنا ساعتها قاعدة على المكتب بتاع بابا .. ولاقيت قدامى النضارة بتاعه اللى بيلبسها وبتنزل على مناخيره دى .. قمت واخداها ولابساها أنا كمان .. إشمعنى هو يعنى .. إحنا الاتنين دلوقتى بقينا دكاترة زى بعضينا.. وبعدين إيه المشكلة يعنى لما أصرف روشتة .. ماهو الدوا مكتوب بالإنجليزى .. وأنا إن شاء الله بعد 3 سنين وترم هبقى مدرسة إنجليزى قد الدنيا .. مش هعرف يعنى اصرف حتة روشتة


قمت من على المكتب ومشيت بكل ثقة ناحية الست دى وأخدت منها الروشتة وبصيت عليها كده ... يا نهار مش فايت .. ايه ده كله ؟؟ ايه ده كله؟؟ أنا طول اسمع إن خط الدكاترة وحش جدا .. لكن ده مش خط اصلا .. ده عيل صغير إدوله قلم وقالوله إرسم بابا يا حبيبى .. ايه الشخابيط دى .. والله حرام .. أنا حاسة إنى اتعميت .. المهم لاقيت عينى وجعتنى أوى وبرفع ايدى علشان أمسح عينى .. لاقيت ايدى اتخبطت فى النضارة بتاعة بابا .. هو إنتى يا شيخة منك لله .. الله يحرق دى منظرة .. كنت هتعمى بسببك يا شيخة .. شلت النضارة وقولت بقى الحياه هتبقى بمبى .. لكن للأسف الحياة لا بقت بمبى ولا برتقالى حتى .. دى إسودت خالص .. الشخابيط اللى على الروشتة صحيح بقت كلام .. بس كلام الدكتور اللى كاتبه اصلا ميعرفشى يقراه .. يا ساتر يا رب .. دى أدوية دى ولا تعاويذ سحرية .. اللهم احفظنا.


المهم إنى وأنا بقرا الروشتة حسيت بنفس إحساس عمو شامبليون وهو بيفك رموز حجر رشيد .. بس يا بخته .. اكيد الفراعنة كان خطهم أحلى من الخط اللى انا بقراه ده دلوقتى .. اللهم ما صلى على النبى هو الحرف الأولانى ده إيه ؟؟ ما مسهل يارب .. شكلها فرجت .. انا متهيألى إنى شفت دوا حروفة شبة الحروف دى .. أيوة صح هو الدوا ..هو ده .. هيه هيه هيه هيه


جريت على طول جبتلها أول صنف .. ورحت علشان احاول إنى افك رموز تانى صنف .. يارب عدى الروشتة دى على خير علشان لما بابا يجى بقى اتنطط عليه وأقوله بنتك بقت دكتورة فى اسبوعين لا غير.. دخلت المعمل علشان الست متشوفنيش وأنا محتاسة كده .. فلاقتها عمالة تنادى عليا


الست : يا دكتورة .. لو سمحتى يا دكتورة


أنا : أيوة يا مدام


الست : لو سمحتى .. أنا لسه جاية دلوقتى من عند دكتور العيون .. وهو اللى إدالى الروشتة اللى مع حضرتك دى


أنا : طيب وانا مالى


الست : يا دكتورة .. هو قالى إنه كاتبلى نوعين قطرة ومرهم عيون .. ممكن أعرف حضرتك جايبالى دوا الإسهال ده ليه؟؟!!!


أأأأأأأخ .. يا كسفتك يا ميوشة .. يا حوستك يا ميوشة .. يا شماتة أبوكى فيكى يا ميوشة


أنا : يا مدام .. حضرتك شكلك تعبان .. طيب قويللى بأمانة إنتى مش عندك إسهال؟؟


الست : إسهال إيه يا دكتورة بس؟؟


أنا : هو الإسهال مفيش غيره .. هو اللى مخليكى رايحة جاية على الحمام طول الليل ومش عارفة تنامى .. وطبعا قلة النوم دى بتوجع العين .. إسألينى انا


الست : ايه الكلام الغريب ده .. أنا معنديش اسهال


أنا : معقولة ..يبقى عندك إمساك .. أنا عندى لبوس إنما ايه ..يجنن


الست : لبوس ايه يا دكتورة انتى.. قال دكتورة قال .. والله العظيم كده إنتى شكلك معهد فنى صحى .. فين الدكتور مدير الصيدلية دى


أنا : انتى بتزعقى ليه يا مدام .. الحق عليا عايزة مصلحتك


الست : أنا غلطانة إنى جيت هنا اصلا .. دى الصيدليات على قفا مين يشيل


طبعا طبعا طبعا .. مين اللى دخل الصيدلية فى عز المعمعة دى .. أكيد طبعا هو بابا .. اللى برقلى وزغرلى زغرة خرمتنى .. وقام داخل الصيديلة جرى وقال بصوت عالى


البيج بوس: أنا أسف يا مدام جدا .. هى فتكات كده دايما تسيب شغلها وتضايق الزباين .. إجرى يا بت يا فتكات امسحى المعمل يالا


أنا : مين ده؟؟ أنا ؟؟


زقنى فى المعمل وقال


البيج بوس : يالا بسرعة يا بت يا فتكات والا هنادى لأبوكى يجى يضربك


أنا : عاااااااااااااااااااااااااااااااااااااااااا.. والله لهقول لماما .. عااااااااااااااااااااااااااا


هناك 44 تعليقًا:

dramaqueen يقول...

يخرب عقلك يا ميوشة
عسل والله العظيم

غير معرف يقول...

هههههههههههههههههه

و الله صحيح صدق اللى قال عليكى فتكات

ده كويس اوى إنك عايشة لحد دلوقتى ده أنا لو من باباكى كنت قلتلك أنا مش أبوكى أنا لقيتك قدام المعبد اليهودى أمشى يا بتتتتتت





و الله العظيم أنتى عسل بجد

maiosha يقول...

dramaqueen
............
ليه بس كده هيخرب عقلى أكتر ماهو مخرووووووووووووب؟؟

maiosha يقول...

انا ودماغى
...............
إنتى تقولى فيها .. ياريتها كانت هترسى على المعبد اليهودى وبس
بس ستر ربنا إن ماما تدخلت فى الموضوع وهدت الحكاية شوية.. كان بابا ولع فيا بجاز

Teawater يقول...

هههههههههههههههههههههه
بس تصدقي انا مرة قريت روشته وطلعت صح
توووحفه يا ميوووووووشه وبتشوقينا ليكي
ياريتك تكتبي علطول
ومتغبيش عننا

Mafrousa يقول...

ههههههههههههههههههههههههههه
ههههههههههههههههههههههههههههه
طيب كويس يا فتكات انك اديتيها دوا اسهال
هههههههههههههههههههههههههههههههه
الحمد لله ان الست مش اخدته و حطته فى عنيها قطرة و لا مرهم
هههههههههههههههههههههههههههههههه
كويس انك مش اديتيها مرهم البواسير
هههههههههههههههههههههههه
انا حموت من الضحك يا شيخة
هههههههههههههههههههههه

اعترفي يا فتاكات انتى بقا بتروحي الصيديلية تمسحيها
هههههههههههههههههههههههه
مش تقفى مع باباكي فيها
ههههههههههههههههههههههه
و ظهر الحق
و كمان اسمك فتكات مش ميوشة
هههههههههههههههههههههههه
هههههههههههههههههه
كويس انه مش دوا تركيب

انتى مشكلة
بس تصدقى خسارة انك مش دكتورة
فيكي كل المؤهلات اللى تكوني بيها دكتورة
هههههههههههههههههه

Nostor Azzuro يقول...

جامدة كيك
بجد دمك خفيف
مدونتك اذيذة

mohamed ghalia يقول...

ههههههههههههههههههههه
يلا بقيتى دكتوره فى اسبوعين إنشلا محد حوش
وبعدين أدام إنتى مع الحكومة اطمنى قولى لماما
دمتى بكل الود

بس خلاص ... يقول...

اطلعى من دول يافتاكات .. وكمان بتدلعى نفسك وتقولى ميوشه ... وكمان البيج بوس الامور الحليوه ده مستلفاها وعملاه بباكى ... ايوه انا فاكراكى لما رحت لك الصيدليه واديتينى ليسيد على انه دواء للكحة
ههههههههههههههههههههههههههههههههه بجد بجد انا ضحكت لما كنت هموت وحوشت باقى الضحك لما ابقى فاضيه اضحك براحتى ...

بنت الغربة يقول...

ايه الدماغ العاليه دى
ايه العسل ده ياميوشه...بجد سكر
وباباكى كان عنده حق فى اللى عمله
ده كان لازم يخنقك
ازاى تعملى كده ....افرضى اديتيها دوااا غلط ..وجرى لها حاجه وحشه والعياذ بالله....
احمدى ربنا انها جت على قد دوااا الاسهال ....
بجد سلميلى على بابا قوى ...وربنا يكون فى عونه...
على فكرة انا برضه كنت زيك كده باحب ايام الجامعه قوى
وباحاول دلوقتى ااقابل المتبقى من شلة الفساد ....بعد 10 سنين تخرج
ونلملم شملنا تانى فى الاجازة...
ومتوقعه اشوف مناظر رايقه ..
تحياتى ياقمر

Ahmed يقول...

والله دماغك تجنن ياموشه

أنا أول مره أزورك بس ان شاء الله مش هتكون اخر مره

برافو على باباكي بيعرف يتصرف بسرعه

وبعدين كنت عايزاه يعمل ايه يعني؟

على كل حال هيا بردوا فتكات مش وحشه
ههههههههههههه

وهو انت لما تحبي تنطي وتبقي دكتوره تقومي تخبطي في روشته؟ طب دا الدكاتره نفسهم مبيعرفوش يقروا الروشتات
تقريها انت؟

أنا شايف أن فتكات أرحم بكتير من الروشته ووجع الدماغ ده

أبو العريف يقول...

ايوه كده يا ميوشه والله وحشتينا جدااا والبوست يجنن كالعاده بس ما تغيبيش عننا

كيكى عوووووو يقول...

وأنا أقول ميييييييييييييييين الى شوفتها دى؟؟
الى كانت لابسة حلة فوق نفوخها دى

طلعت فتكات متنكرة فى شكل ميوشة
الحمدالله كشفت الزر**
الله يباركلك يا فتكات خشى كدة من عند الصالة يمين هتلاقى جردل وخيشة..ربنا مايقطعلك عادة يا اختشى
*************
وحشتينى علىى فكرة اوى هبقى اشحن واكلمك دة اذا شحنت يعنى..يديكى طولة العمر بقى
اموااااااااة
عوووووووووووووووو

maiosha يقول...

teawater
..............
ياسلام .. قريتى الروشتة وطلعت صح؟؟
يا لهوى .. ده يبقى النحس منى أنا بقى

عاااااااا

maiosha يقول...

مفرووووسة
...............
لا لا لا عيب عليكى يا مفروسة .. إزاى يعنى كانت هتاخد دوا الإسهال تحطه قطرة .. ما أنا كنت هكتبلها الإستعمال عليه طبعا

هو أنا جهلة ولا إيه؟؟

maiosha يقول...

Nostor Azzuro
.................
شكرا على تشريفك للمدونة

نورتناااااااا

maiosha يقول...

mohamed ghalia
................
طبعا إنت بتقول فيها

إحنا لينا بركة إلا الحكومة دى

maiosha يقول...

بس خلاص
.............
يا ناااااااااس يا هووووووه
أنا ميوشة والله
بقى هتكدبوا كل البوستات اللى فاتت دى وتصدقوا جملة بابا

أيوة ما أنا عارفة التفكير ده إكمنكوا فاكرينه بجد شبة حسين فهمى .. بقى خلاص كل اللى يقوله صح

ماشى ماشى .. المرة الجاية بقى مش هديكى ليسيد .. أنا هديكى فينيك

maiosha يقول...

بنت الغربة
...............
يااااااااااه يابختك والله

بقى خليصتى من هم الكلية ووجع الدماغ ده كله.. انا هحقد عليكى اهو

ان شاء الله تعرفى تجتمعى مع ما تبقى من شلة الفساد وتلاقيهم فى احسن حال

maiosha يقول...

Eng. Ahmed Abo El-Ella
........................
لأ وحظى أنا بقى بالذات متجليش روشتة طبيعية .. لأ دى روشتة ما يعلم بيها إلا ربنا

غالبا كانت مكتوبة باللغة الديموطيقية الشقيقة

يالا الله يسامحه الدكتور بقى

منورنى دايما

maiosha يقول...

أبو العريف
.............
لأ متقلقشى
إن شاء الله مش هطول فى الغيبة تانى

maiosha يقول...

كيكى
...........
ياااااااى جردل يعنى إيه جردل

أنا معرفشى الحاجات الياى دى
معندكيش فليبينية ولا ايه

بقى أنا عايزانى أمسح بالخيشة والجردل يا كيكى .. عاااااااااااااااااا

ماشى ليكى يوم يا ظالم

أه وكمان الحجج الفارغة بقى لام أشحن هكلكمك والكلام ده
عارفاكى عايزة تستعطفينى بقى علشان أشحنلك على الهوا .. لا انسى يا حلوة
ومبتنفعشى معايا الحركات دى .. ده أنا بشحن لنفسى بالعافية اصلا .. ومقضياها شحاتة من تليفون ماما

اه صحيح نسيت

يامى

المـــفـــــــقــــــــوعـــــة مــرارتـهــا يقول...

روحي يابنتي وانا بادعيلك ان ربنا يفكها عليكي وتتعلطلاسم الدكاترة اللي فاكرين ان الدكتور لو خطه يبقي حلو هايبقي دكتور من غير دكة

حسام غانم يقول...

هههههههههههه

جااااااامد جدا

هو ده التصرف السليم اللي أنا كنت متوقعه

مصعب رجب يقول...

بما إن الزيارة من غير تعليق متبقاش زيارة فأنا قررت أسيب تعليق

ربنا يكون في عون الاتنين
والدك
والست صاحبة الروشتة
وبالمرة الاسطى حسنين السباك

مش قد الدكترة بتتدكترو ليه ؟
لو عرفتو تقروها قولولي .

تدوينة ظريفة
سلام

Lady E يقول...

هههههههههههههههه بجد انتي عسل يا ميوشة

ويلكم بيكي في التدوين مرة تانيه كنتي وحشاااااااااانا

الضاحكون يقول...

ههههههههههههههه
تستاهلى يا فتاكات
انتى يابنتى كان مفروض
تبيعى من غير روشته ولا يحزنون
انتى كنتى تمسكى كام علبه دواء
وتخرجى بره الصيدليه وتقدعى تنادى
باتين ونص وتعالى بص
قرب يازين
خد لك ازازتين
هههههههههههه
والله يا ميوشه دمك شربات
تسلم ايديكى

maiosha يقول...

المفقوعة مرارتها
................
أيوة يا مفقوعة قوليلهم يا ختى قوليلهم

maiosha يقول...

حسام غانم
...........
إيه ده
إنت متواطئ مع البيج بوس ولا ايه؟؟

maiosha يقول...

ابو اسامة
............
نورت المدونة
ومرحب بيك وبتعليقاتك فى اى وقت

maiosha يقول...

lady e
.............
منورانى دايما يا جميل

غنتوا وحشتونى أكتر واكتر

maiosha يقول...

الضاحكون
.........
إيه ده ؟ إيه ده؟؟
لحظة كده أراجع نفسى؟؟
ده بجد

مدونة الضاحكون بجلالة قدرها بتعلق عندى هنا

لأ وبيقولولى كمان دمك شربات

لووووووووووووولى
والله التعليق ده حزام على صدرى (هو حزام ولا وسام؟؟) لأخر حياتى البلوجرية

وعلى فكرة أنا جربت الفكرة دى بتاعتة تلاتة ونص .. بس البلدية جت شالت الدوا وقعدت يومين فى الحبس

عااااااااااااا

طالب فاشل من زمان يقول...

انا قلت بما اننا زمايل في الفشل فلازم اكتبلك تعليق مبني على اساس من الديمقراطية المتداخله مع بعض الحزبية لتكوين الهويات الحقيقه وغالبا مشربش الشاش اشرب ازوزة انا
ههههههههههههههه
لو فهمتي حاجة ابقي فهميني يا مرووشة
اول زيارة ومتابع بقدر الاستطاعه ( يقطع الدراسه وسنينها ) ومستني البوست الجاي على احر من التلج ( اصلهم غيروها ماخرا )

maiosha يقول...

طالب فاشل من زمان
.,.................
الف اهلا وسهلا بالفاشلين الجدد

أسمع بقى احلى ضرب نار

طااااااااخ طاخ طاخ

ايوة كده ربنا يكتر من امثالنا علشان نكون حزب الفاشلين .. ونعمل حلف جامد

انا مستنياك.. وحكاية الجمر والتلج دى بقى موصلنيش عنها اخبار.. بس انت ادرى

نورتنى

طالب فاشل من زمان يقول...

طب بما انك دخلتي ورديتي كنتي حتى عدي على البلوج الجديد اللي عملته علشان ارد عليكي واديني افكراك ولا هوا على قد الرد على البوست وخلاص ولا انتي كمان فاشله هنا زي الدراسه ههههههههه مستني ردك في البلوج وتكوني اول واحده تشرفيني

maiosha يقول...

طالب فاشل من زمان
..................
لحظة كده!!
واضح إنك عندك مشكلة فى البلوج بتاعك
او علشان انت لسه جديد فى عالم البلوجرية مش لاقى التعليق بتاعى اللى انا كاتباه عندك فى البلوج الجديد من امبارح

حاول تتأكد من التعليقات عندك هتلاقينى اول تعليق

المتبهدلون في الأرض يقول...

ألّــه ؟؟


كده أنا عرفت ليه أنا الاسهال عندي ما خفش لما رحت صيدلية (برده كان الدكتور مش موجود فيها).. وإدوني قطرة إسهال وقالولي دي


تحطها في عينك (خخخخخخ)

Amgad يقول...

مش ممكن يا ميوشة
يخرب عقلك يا شيخة
انتي مصيبة اقسم بالله
البوست يهبل وكل حتة فيه بتوقع من الضحك والله كنت بقرا ونفسي ميخلصش
وانتي من الناس اللي انا مفوتلهاش فتفوتة م اللي كتبتيه طبعا حتي طول فترة غيابي كنت متابع ممتاز
وتقبلي عودتي وقوليلي ونبي فين زيزو النتن ده

الحرامي يقول...

اطلعي مندول يا ميوشه عامله فيها فتكات عشان تصعبي علي
كل الفيلم دا عشان ما اسرقكيش
لا دا بعدك
علي فكره انا كل مره من اول بوست اقول انا هسرق ميوشه وبعدين الاقي حد تاني اقول خليها البت دي لما اتزنق فغي الاحتاطي يعني لاني هسرقك هسرقك
لان كل موضوعاتك تستحق السرقه
حيرتيني معاكي
عاااااااااااااا

maiosha يقول...

المتبهدلون فى الأرض
...................
شوفتوا بقى
أدينى أرحم من غيرى بكتير

قطرة علشان الإسهال.. لا ده جهل بالعلم والصيدلة.. الإسهال ده عايزة شربة خروع يا استاذ

maiosha يقول...

amgad
............
حمدلله على السلااااااااااامة
ياااااااااااااه
امجودة رجع أخيرا
حمدالله على السلامة يا باشا

والله الواحد مش عارف يقول ايه؟؟ لما امجد بجلالة قدرة يقولى انا الكلام ده الواحد يعنى وشه يحمر ولا يعمل ايه فى نفسه يعنى

ربنا يخليك يارب

زيزو النتن؟؟ لا ده سر المهنة.. سايبينه للأجيال القادمة

ده فخر للأمة

maiosha يقول...

الحرامى
...........
يا سيدى إحتياطى احتياطى

تسيب المعلمين وتسرقنتى أنا.. حرام عليك يا مفترى
هو أنا حيلته غيرى.. ربنا يخليلك عيالك سيبلى عيالى

ربنا يخليك وييرزقك

حسنة قليلة تمنع بلازى كتيرة

!!!!!!!!!!!

Amgad يقول...

اخص عليكي
لا بجد زيزو ده فين
طيب اقولك اسمو الحقيقي ايه
وانا هعرفة

عماد خلاف يقول...

الحمد لله لقيت حد فاشل اجمل حاجة فى الدينا الفشل ساعتها بص تحس باى اى حاجة تعملها يعنى لو نجحت فى امتحان وانته عارف ومتاكد انك هاتسقط ساعتها ها تكون اسعد انسان بلاش رغى كتير المهم اناعمادخلاف عندى مدونة ياريت تزورها ياربى لا اتنين
http://emadkhalaff.blogspot.com/
بحلم ببكرة
دى التانية