الأحد، 9 نوفمبر 2008

دعى شعرك ياخد نفسه


بعد وقوف فى الصيدلية لحوالى 4 ساعات روحت البيت وأنا مجهدة إجهاد فظيع .. أسمع برضة حد يقولى " ليه يعنى ؟؟ ده إنتى معملتيش حاجة غير إنك كنتى قاعدة بس" .. أرد أنا بقى وأقول لأ يا رزل .. أنا كنت قاعدة على الكتب والمكتب ده فى الدرج .. والدرج يعنى الفلوس .. يعنى أنا اللى مستهدفة فى القعدة دى كلها .. لو أى حرامى دخل علينا الصيدلية هيطلع المطواة فى وشى انا ( باين الحرامية بقى مفيش وراهم غيرى الأيام دى)... روحت البيت يادوب كلت وإتقلبت نمت فى ساعتهاا خخخخخخخخخخ


تانى يوم صحيت وعلى مضض (غالبا مضض ده جوز مضمضة) .. وقمت لبست وإتشيكت .. أنا كان مالى ومال الشغل يعنى الأجازة اللى الواحد المفروض بيصحى فيها المغرب ولا حاجة أصحى أنا الضهر ، والله ده حرام ..المهم نزلت الصيلية .. ولما وصلت هناك لاقيت بابا كان بيعمل حاجات فى المعمل جوة.. وكانت الصيدلية فاضية وقتها


أنا : إستعنا على الشقا بالله .. يافتاح ياعليم يا رزاق يا كريم


البيج بوس : إيه يا معلم حنتيرة.. جاى تفتح ورشتك بدرى كده ليه؟؟ ده العصر لسه مأذنش


انا: أكل العيش مر يا أبو ميوشة .. وربنا بيقول إسعى يا عبد وأنا أسعى معاك


البيج بوس : وهو إنتى كده بتسعى يا حبيبتى .. ده إنتى بتتمخترى .. بتزحفى .. حرام عليكى يا شيخة


أنا : شوف يا بابا أنا فى أجازة .. وبعدين انا مقدرش أنزل قبل الغدا أبدا أبدا


البيج بوس : خلاص لو هتنزلى متأخر كده يبقى هتسهرى معايا الليل كله


أنا : عاااااااااااا.. بس أعمل حسابك هيبقى فيه أوفر تايم


البيج بوس : .........................


فضلت قاعدة هناك أتفرج على الدنيا .. وكل شوية يجى عيان ويمشى عيان .. أصحاب بابا وزمايله .. أشكال كتير من البشر مكنتش أتوقع إنى أقابلها أبدا .. ياعينى عليك يا بوس ده إنت طلعت بجد حمال القسية .. فبعد كام عيان كده ورا بعض الصيدلية رجعلها الهدوء تانى .. وحبيت أعمل فى بابا حركة جدعنة كده فقولتله " تشرب شاى" .. قالى " ياريت" .. وفى طريقى للمعمل جوه علشان أعمل شاى .. شميت ريحة غريبة جدا .. ريحة فكرتنى ب"أسنس شادية " بتاع أحمد زكى .. طول عمرى بتفرج على الفيلم ده ونفسى أعرف إيه الريحة دى.. وأخيرا عرفتها


تماسكت شوية وسندت على الحيطة لإن تأثير الريحة دى كان قوى اوى .. وبصيت ورايا تانى علشان اعرف الريحة دى جاية منين؟؟ لاقيت واحدة داخلة الصيلية ضاربه شعرها أحمر ومسيباه علشان تعاقب بيه خلق ربنا اللى مش بيغضوا بصرهم .. لأ ومش بس كده دى حتى البرفان الرائع ده كمان علشان تبقى الحكاية(صوت وريحة) .. مش دى المشكلة .. المشكلة اللى بجد إنها سابت بابا اللى كانت جاتله صاعقة من هول ما رأى وجاتلى أنا وقاعدت تنادى عليا " لو سمحتى يا أنسة "


أنا : مين انا؟


هى : أيوة إنتى


أنا : لأ أنا مش دكتورة .. أنا هنا بكنس الصيدلية


هى : نيهاهاهاهاها.. شربات .. مع إن مش باين عليكى .. نيهاهاها


أنا : خلاص بطلى ضحك الله يكرمك أنا أسفة .. الدكتور واقف يعنى


هى : حضرتك الدكتور .. على فكرة إنت فيك شبة من حسين فهمى


البيج بوس : متشكر يا فندم .. أخجلتم تواضعنا


أنا : تواضع مين اللى خدلتيه ده يا ست إنتى إنتى بتبصبصى لأبويا


هى : هو باباكى .. مع إنه شكله مش مرتبط


أنا بصيت على بابا .. لاقيته هو هو متغيرش .. شكله مش مرتبط إزاى .. ده شكله مرتبط رباط أزلى أبدى .. المهم خدت بابا على جنب كده وقلتله يروح هو يعمل الشاى لغاية ما أشوف الست دى عايزة إيه .. وقمت راجعلها تانى


هى : لو سمحتى أنا كنت عايزة شامبو ( ليف سلك ) للشعر الدهنى


أنا : حاضر يا مدام .. بس هو لحضرتك


هى : أيوة ليا


أنا : شوفى حضرتك إختيارك للشامبو ده ممتاز إنتى مينفعكيش غير شامبو ليف سلك فعلا .. أما حكاية شعر دهنى دى فإفترى .. إنتى شعرك جاف وناشف وحالته حالة .. يعنى محتاجة شامبو للشعر الجاف


هى : انا شعرى جاف؟؟


أنا : أيوة طبعا دى حاجة يحس بيها اى كفيف .. وبعدين هو أنا بشتمك يعى إيه المشكلة لما شعرك يكون جاف؟


هى : أوووه على فكرة إنتى متعبة أوى هتيلى الدكتور اللى شبة حسين فهمى ده أتفاهم معاه


أنا : لأ معلشى ملكيش دعوة بحسين فهمى ده .. أصله عنده مسلسل وراح يكمل تصويره .. هتخدى للشعر الجاف ولا لأ؟


هى : لأ .. يا ساتر ده أنا هتحجب ولا اخد منك حاجة .. يا ساتر


الست قامت سايبانى وماشية.. ولا كإنى كلبة .. ولما بابا طلع سألنى عملت إيه ؟؟ وحكيتله على اللى حصل .. المهم قعد طبعا يهزئنى علشان مسمعتش كلامها ومجبتلهاش اللى هى عايزاه .. وإنى لو إستعملت الموضوع ده مع كل الناس هنقفل الصيديلة بعد ساعة الا ربع والكلام ده كله


أنا : يا بابا ما تضايقش بص للجانب المشرق فى الموضوع


البيج بوس : إللى هو إيه؟؟


أنا : إنى عقدت الست دى .. وهتسيبنى من هنا وتروح تتحجب من هنا .. يالا خدنا ثواب.. دى البشرية كلها هتدعيلى


البيج بوس : يا رب صبرنى .. خلفتى يا رب مش خلفة حد تانى .. أنا اللى عملت كده فى نفسى


هناك 61 تعليقًا:

Teawater يقول...

أول تعليق ل شيموو
اتنظريني

Teawater يقول...

كفايه ان باباكي مقتلكيش يا ميوشه يخرب عقلك خربتي بيته وضيعتي الزبونه
تصدقي دمك خفيف اوي يا ميوشه عن جد حسيتك صحبتي من زمان وخدت عليكي بسرعه تقبلي مروري

نعكشة يقول...

ههههههههههههههههههه

اللي جابلك يخليلك يا بيج بوس

انتي تحفة
:D

لا بجد سكرة

انا بتتفقع مرارتي من ال\روايح اللي بيحطوها
و ياسلام بقة لو احنا في مكان مخنوق
بتبقى عايزة ترمي نفسك من اقرب شباك

برغم اعتراضي
بس فية ناس بتليق عليهم موضة الاسد دية

وبعدين يلا خدتي ثواب

و باباكي خد ثواب برضو
انة لسة مستحمل
قصدي لسة صابر
قصدي ربنا يخليكوا لبعض
:D

سلام عليكي يا قمر

Mafrousa يقول...

ميووووووووووووووووووووووووووشة
وحشتينى يا قمرة
انتى فزييييعة
اسلوبك بجد بيخليني على طول مبتسمة
بصي يا قطة هيه نصيحة صغيرة
اوعااااك تمسكي الصيدليه يا امي
مش حتلاقي تاكلى
هههههههههههههههههه
اما الست اللى ضاربة شعرها فى الخلاط
ريحي الزبون يا ميوشة
ههههههههههههههههههههه
اما بقا موضوع حسين فهمي
ده لو صحيح؟؟؟؟؟؟؟
قولى لباباكي انا مستعدية آجي مكانك
ههههههههههههههههههههههههه
ربنا يخليهولك
انتى جميلة

nona يقول...

انا اول مرة ازورك بس ما بطلتش حك من ساعة ما دخلت
بس اية دة اللهم لا حسد دمك زاى السكر يا بت الاية
انا من هنا و رايح هلزق عندك
على فكرة الله يكون فى عون البيج بوس
اكيد بعد ما اشتغلتى معة هيبيع الصيدلية بجد هههههههههههههههههههههههههههههه

شفـقــة و إحســــان يقول...

يا تحفة انتى بجد فظيعة بس قعدتك كده فى الصيدلية هتبقى بخسارة
عموما كويس انها الصيدلية بتاعتكم وانك ما بتشتغليش عند حد لانه كان زمانه طردك من زمان
ولو ان برضوا باباكى صعبان عليا
اقولك اقعدى فى البيت احسن
بس تعرفى انتى اخدتى ثواب فى الست دى
هههههههههه
بينى وبينك سؤال رفيع كده
هو الاب اللى المفروض باباكى شبه حسين فهمى بجد؟؟

دينا حامد يقول...

والله دمك زي السكر وموتيني من الضحك
فعلا ربنا يكون في عونك هتشوفي كائنات غريبة ماكانتش ظاهرة قبل كده
بس برافو عليكي خليتيها تتحجب وترحم الشعب من فروة ال مش هاخد ذنوب :d
عايزه اعرف باقي اللي هيحصل لك ونفرح فيكي

تحياتي

mohamed ghalia يقول...

رب صبرنى .. خلفتى يا رب مش خلفة حد تانى .. أنا اللى عملت كده فى نفسى
فعلا شكل الصيدلية هتفل على إيديكى
ربنا يستر
بس حقيقى اسلوبك رائع
بقلنا كتير مضحكناش كده
تحياتى
ليكى تاج عندى يا ميوشة

صباح الصباح يقول...

هوة يا بنتى انتى اجازاتك غير كل البشر

اجازة اية اللى دلوقتى؟؟

انتى عندك التوقيت الزمنة بايظ حبتين

ههههههههههههههههه

wafaa يقول...

الله يكون ف عونك يا حاج حسين
ههههههههههههههه
عندك بنت تنفع ف الاجرام الدولى

romansy يقول...

الله يكون فى عون الحاج حنتيره البيج بوس
حرام عليكى عاوزه تصحى المغرب وكمان عاوزه تطيرى الزباين
الله يكون فى عونه

maiosha يقول...

teawater
.............
أنا اللى بجد تشرفنى صداقتك جدا يا شوشو

نورتينى

maiosha يقول...

نعكشة
.............
متفكرنيش بالريحة دى يا أختى .. يا لهوى لو كنت شمتها فى مكان مقفول

ربنا يسترها معانا

maiosha يقول...

واحدة مفروسة
..............
جرى إيه يا مفروستى .. أريح الزبون إزاى؟؟ هو أنا حلاق؟؟؟

وبعدين بابا مين اللى شبة حسين فهمى ده .. دى الست دى واضح إن الريحة اللى بتحطها دى أثرت على عصب البصر بتاعها

طب أنا راضية ذمتكم .. واحد شبة حسين فهمى .. يخلف زينات صدقى إزاى؟؟

maiosha يقول...

nona
............
بجد نورتينى ونورتى المدونة كلها

وأتمنى متكونش أخر زيارة

maiosha يقول...

شفقة هانم وإحسان بك
....................
أخيرا حد إقتنع بوحهة نظرى.. مش مهم نبيع المهم الثواب

والله العظيم ابويا ما شبة حسين فهمى ولا يقربله من قريب ولا بعيد
أبويا أنا شبه حسين فهمى .. تيجى إزاى دى؟؟

maiosha يقول...

دينا حامد
............
يا سلام عليكى يا دينا وعلى نيتك اللى زى العسل
بقى عايزة تعرفى باقى اللى حصل علشان تفرحى فيا

ماشى الله يسامحك

عااااااااااااااا

maiosha يقول...

mohamed ghalia
..................ز
نورتنى يا محمد بتعليقك الجميل

وإن شاء الله تشوف الرد على التاج قريب جدا

أبو العريف يقول...

ميوشه بجد افكارك رائعة والبوست جميل جدااوربنا يقدرك وتتوبي خلق الله مش الحجاب بس ولا الصراصير والحاجات دي وماتقفليش الصيدليه
اما بالنسبه للمدونه المشتركه فانا هجز الافكار والقواعد الجامده اللي انتي بتقولي عليها و انت لو عندك افكار جهزيها وانا هبعتلك المره الجايه تصوري لشكل المدونه وانتي قولي رأيك وكملي عليه انا عندي تخيل هبعتهولك منتظر الرد

maiosha يقول...

صباح الصباح
..............
يا ناس الله يخليكم إفهموا وجهة نظرى

أنا مش بحكى يوم بيومه .. أنا بعمل زى فلاش باك كده علشان لما أوصل لأيامنا دى يبقى إنتوا عندكو خلفية عن اللى حصل قبل كده

تمام؟؟

maiosha يقول...

wafaa
............
إجرام دولى؟؟هههههههه
والله حرام
دا أنا غلباااااااااااااااانة

maiosha يقول...

romancy
..............
أكيد بابا هيحب البوست ده أوى

ده خد كمية دعا بسببه

بالهبل

maiosha يقول...

حد مش فاهم حاجة
.................
أوك ماشى كده تمام
بس زى ما قلتلك لازم تكون قواعد ثابتة ولازم تشوف حد تانى متحمس للفكرة وعايز يشترك كمان

مستنية التصور الجامد ده

صباح الصباح يقول...

ياااااة

زى فلم تيتانيك كدة

طب مش تقولى يا شيخة

لخبطتينى

هوة انا هالاقيها منك واللا من الشغل

ههههههههههههههه

ragabhpl يقول...

وبعدين












يعنى انتى بتحكى لينا همك ليه








مقال جميل





دعواتك

3ala asm masr يقول...

خير ما فعلتى والله
انا عايزاكى تستمرى عالنظام ده لحد ما تكرهى كل البنات فى شعرها
ده انا بشوف مناظر تحسى انهم عفاريت بس متنكرين

maiosha يقول...

صباح الصباح
..............
أيوة بالظبط زى التيتانيك كده


شوفت اللتيتانيك؟؟

maiosha يقول...

ragabhpl
.............
عادى يعنى .. على أساس اللى يشوف بلاوى الناس تهون عليه بلوته

maiosha يقول...

3ala asm masr
..............
هههههههههههه

لأ بس هى المرة دى جت معايا كده.. حظ يعنى

ومش كل مرة تسلم الجرة

دعاء مواجهات يقول...

ههههههههههههههههههه

ربنا يعينه

يابنتى انتى هتخليه يقفلها خاالص

انتى تحغه يابنتى

بحبك

maiosha يقول...

دعاء مواجهات
.............
والله العظيم أنا اللى بحبك وبموت فيكى

وبجد يا دودو أنا بستنى زيارتك دى على احر من الزيت الحار

تسلم إديكى على الرد يا قمر

أبو العريف يقول...

بصي بقي بالنسبه للمدونه المشتركه انا بقول عندي افكار كتيره جداا جايزمش هقدر اصيغها علي شكل مدونه لوحدي
واكيد كلكم عندكم افكار جميله نقدر مع بعض نعمل مدونه جميله و بعدين من الافكار دي نقدر نعمل الاسس اللي انتي قولتي عليها وانا علي الاراء وانتي عليك بقي الاعضاء لاني تقريبا معرفش حد ومع بعض هنقدر نكمل المسيره

اول حاجه عايز اقولها ان فكرة مدونه مشتركه دي في حد ذاتها اساس نقدر نبني عليه المدونه
والمدونه لازم تكون مكونه من 4 او 5 اعضاء جادين تكون افكارهم متقاربه يعني دماغهم واحده من الاخر
ثانيا
المدونه لازم تكون مجنونه يعني طاقه وفيها افكار مختلفه ومواضيع جديده ومختلفه وعلشان كده انا اخترتك معايا
بعد كده
متخيل ان البوست يكون بيتكون من كذا موضوع او نقدر نسميه " ركن" او ويندو او اي حاجه تانيه
بس المهم ان اي واحد ممكن يكتب في اي ركن حسب الموضوع اللي مجهزه وبعد ما يكمل البوست يتنشر

ودي شوية افكار عن الاركان اللي ممكن يتكون منها البوست ودا رأي ومستني رأيك
ركن فضفضه
ودا ركن او بارت كل واحد عايز يفضفض او يحكي اي موضوع يكتبه

ركن المصطبه
ودا بقي ركن الحكاوي ايا كان نوع الحكايه او القصص القصيره وانا عني حبة قصص من حكاوي جدي نفسي احكيهم

ركن shots او ضرب نار

ودا عباره عن طلقات من جمل صغيره لها معني زي اللي بيكتبها انيس منصور بس طبعا علي قدنا
انا ساعات بكتب حاجات من دي
وممكن كمان يكون نقد لازع لاي وضع مش عاجبنا وبرضه في جمل قصيره
ركن البلد دي

ودا طبعا ركن كل ما يخص بمصر هنتكلم فيه عن بلدنا واحوالها وجمالها وحبنا ليها وكرهنا للي بيحصل فيها و بالنسبه ليه انا دلوقت بعيد عنها وعندي كلام كتير قوي نفيس اقولهلها وبالنسه للركن دا انا عندي بوست جامد جدااا و هو عباره عن رد علي اغنيه ما شربتش من نيلها ودي حته منها علشان اديكي فكره

ما شربتش من نيلها 00000 لا دا انا شارب من كيعاني
جربت تغنيلها 00000دانا بيغني علي زماني
جربت في عز ما تحزن تمشي في شوارعها وتحكيلها
جربت لكني لقيتها بصرمه قديمه وجات رزعاني

ما مشتش في ضواحيها 0000 م المشي انا ورموا كعبابي
مكبرتش فيها 00000 دانا عجزت في عز شبابي
كده يعني
وطبعا الموضوع دا مش هيبقي مجرد تسليه لا لازم يكون لينا رأي في اللي بيحصل حوالينا

وطبعا لازم يكون عندنا الركن الخاص بميوشه ودا الركن اللي دمه خفيف ودا طبعا مش لازم يعطلها عن مدونتها بس ممكن تكتب في مواضيع مختلفه

ركن موهوب افني او عبده مواهب

ودا بقي علشان اي حد عنده اي موهبه
او اي خواطر او اي رسمه ممكن يقدمها حتي لوكانت بسيطه
ودا لاننا بنكتب حاجات ممكن ما نكونش حاسين انها حلوه مع انها بتكون جميله جدااا

اكتب كلام علي الورق
مايهمنيش
لو يتقري
ما يتقريش
بس المهم ان الكلام يكون من القلب
له معني
يكون صادق
يكون مش بس لقمة عيش
ليه اسجن كلمتي فيا واسيبها تموت
بلاش اكتمها
ما اكتبها
واسيبها تعيش

وبعدين عندي فكره جميله
بما ان البوست بالشكله دا ممكن يكون طويل حبتين
ممكن نعمل فزوره دمها خفيف والحل يكون في اخر البوست
زي " ليه السمك بيخاف في الجنيه "
" لانه فيه 100 قرش "
وكدة يعني

واسف اني طولت عليكي
وعايزك تقولي رأيك وتضيفي طبعا ونبدأ في التنفيذ وانتي خبره في التدوين وهتبدأي
سلام

بس خلاص ... يقول...

ميوشة .. انتى زى العسل والله العظيم .. بجد البج بوس عرف يخلف ..حتى لو قفل الصيدليه بسببك ...المهم انتى بتخلينى اموت من الضحك كل لما ادخل عندك ... على فكرة دى مش اول مرة ادخل عندك بس كل مره اقول استنى لما اشوف ايه اللى هيحصل بكرة ...
على فكرة انا محتاجالك فى محل فى اول الشارع عندنا زباينه كتير وعامل لنا ازعاج ودوشه محتاجينك يومين بس علشان نفضيه من الزباين ونريحه ويقفل ...فكرى فى العرض ياميوشة .. المقابل مغرى جدا
بس على فكرة عايزة اسألك سؤال .. اجازة ايه دى الى فى شهر اكتوبر ونوفمبر ده عز الدراسه يابنتى
انتى قلبتى لى الدنيا خالص

سلسبيل يقول...

ميوشه
..
اخيرا لاقيت حد زيي فاشل
لا وكمان ف صيدله
احمدك يارب
بصراحه البيج بوص ربنا يكون في عونه اكيد بيشوف كتيييييييير
بس بجد اسلوبك لذيذ خالص ومدونتك كلها زي العسل
تحياتي

غير معرف يقول...

ههههههههههههههههههههه
طب و انتى مالك
على العموم أنتى حرة اللى بيشيل قربة مخرومة بتخر على دماغه
يعنى لو عملتى كدة مع كل زبون البيج بوس مش حيلاقى يأكلكم حتروحى لأم شعر أحمر و تقوليلها عليا الطلاق انتى شعرك عمره ما كان جاف و تديها اللى هى عايزاه

كيكى عوووووو يقول...

جنينتى البيج بوس ياشيخة
الراجل يعمل فيكى اية بس
هههههههههههههههههههههههه
انا لو منه اطردك فورااااا
وحلوة اوى حكاية الجانب المشرق
انا بقترح من موقعى هذا
نطلعك فى التليفزيون وتعملى برنامج عن الشعر وتوبى مصر كلها
ههههههههههههههههههههه
وحشانى اوى ياسكر انتى
عووووووووووووووووووووووووو

أية عفيفي يقول...

ههههههههههههههههههههههه

اكيد زمان الصيدليه اتقفلت

ربنا يكون فعونكم بجد بتقابلوا اشكال والوان من البشر

بس هو الريحه الفززززززززززيعه كانت من شعرها ولا البرفانات العجيبه الى مستخدماها:D

dramaqueen يقول...

مش ممكن يا بنوتة
انتى كتلة عسل على سكر على خفة دم
ربنا يستر وترجعى تزاكرى لاحسن كدة الموضوع جاى بخسارة على البيج بوس

ربنا يخليكى له وميحرموش منك ابدااااااااااااااا

maiosha يقول...

حد مش فاهم حاجة
...............
أولا : بسم الله ما شاء الله إنت واضح إن عندك افكار جامدة جدا .. وتصور جميل للمدونة .. بس فيه مشكلة

أنا حاسة إن ممكن تنفيذ التصور ده يبقى صعب شوية وخصوصا على مبتدئين .. لإنى على فكرة مش من اللى مخضرمين فى التدوين ولا حاجة .. أنا برضه أعتبر لسه مبتدأة
وحكاية الأعضاء اللى عليا دول برضة صعب جدا لنفس السبب أنا لسه مليش علاقات كتيرة أوى .. وحاجة كمان إنت صاحب الفكرة .. يعنى إنت اللى لازم تعرض أفكارك وتقفع الناس بيها

أخر حاجة بقى هو إعتذار لابد منه .. لإنى زى ما إنت شايف بدخل النت يوم وإتنين لأ لإنى الفترة دى فى الكلية كلها أبحاث وحاجات غريبة كده .. فعندى هم فوق دماغى .. إدعيلى أخلص منه

بالتوفيق إن شاء الله

maiosha يقول...

بس خلاص
..........
ممممممممم ... الزوار فى الخفاء
هههههههههههه
ماشى يا جميل مش مشكلة المهم إنى عرفتك أخيرا

حكاية المحل اللى عندكم دى بقى .. والله لو هيدفعوا أكتر من بابا( اللى هو لسه مدفعش حاجة أصلا) يبقى نمضى العقد على طول .. وأنا أوعدك 3 أيام وأجيب درفه

وحكاية الأجازة دى .. دى فلاش باك .. أنا بحكى مغامرات الكلية وأنا فى سنة أولى .. يعنى الأحداث دى مش بتحصل دلوقتى .. لأ دى حصلت قبل كده خلاص

نورتينى

maiosha يقول...

سلسبيل
...........
إذا كنت بتدور على الفاشلين فمتقلقش دول كتيييييييييييير

أما البيج بوس فعلا .. الله يكون فى عونه بجد أنا لما رحت مكانه عذرته

نورت المدونة

maiosha يقول...

أنا ودماغى
.............
عااااااااااا
ما هو بابا قالى كده برضة

جرى إيه ؟؟ إنتوا متفقين عليا ولا إيه؟؟
ماشى انا اللى غلطانة الحق عليا مش عايزة ابوظ للست شعرها أكتر ماهو بايظ

maiosha يقول...

كيكى
............
هيه هيه

هتطلع فى التلافازيون.... لوووووولى
ربنا يخليكى لينا يا ست كيكى .. وتشوفينى فى التليفزين قريب أمين يا رب

maiosha يقول...

ebtsama 7ayah
................
فى الواقع أنا مقدرش أديكى إجابة أكيدة .. لإننا إستعنا بأفضل عناصر من الطب الشرعى وطلبنا منهم يحللو عينة الريحة دى اللى فضلت موجودة فى الصيدلية 3 أيام حتى بعد ما الست مشيت

ولم يستدل أحد على مصدر الريحة بتاتا .. وقالوا إنهم مشموش ولا عايزين يشموا ريحة زى دى قبل كده

وإحنا عملنا اللى علينا والباقى على ربنا

maiosha يقول...

dramaqueen
...........
لأ مذاكرة إيه؟؟
بلاش مذاكرة
أنا هقعد فى الصيدلية مؤدبة خالص والله.. بس بلاش مذاكرة

عااااااااااااا

بس خلاص ... يقول...

ميوشة ياقمر
نورتى بجد بجد سعيده بيكى جدا ... والبج بوس عامل ايه له منى الف سلام ..ز
وحياتك ابقى هاتى معاكىالمرة الجاية زجاجة اسانس شاديه هديه عشانى

بس خلاص ... يقول...

ميوشة ياقمر
نورتى بجد بجد سعيده بيكى جدا ... والبج بوس عامل ايه له منى الف سلام ..ز
وحياتك ابقى هاتى معاكىالمرة الجاية زجاجة اسانس شاديه هديه عشانى

maha zein يقول...

ههههههههههههههههه
ماشي يا ست
برافو
جدعة
طالما كنتي بتكنسي الصيدلية كنتي خدتي الزعافة اللى علي راسها كنستي بيها

بقولك ايه اديني العنوان عشان كنت عوزة استشير حسين فهمي ...قصدي باباكي الدكتور فى استشارة طبية

بنت القسام يقول...

لذيذ البوست

تحياتى

الجنوبى يقول...

طب تمام والله سعات الغتاتة بشتغل فل

بس اكيد هى غلطت فى العنوان اكيد كانت تقصد تدخل سويقة مش صيدلية

تحياتى لصبر باباكى

عمرو

أبو العريف يقول...

ماشي يا باشا ربنا يوفقك ويزيح عنك الابحاث وكل المواد المستعصيه بس برضه انا مصر انك تكوني في المدونه دي وحكايه الاعضاء ياله ربنا يحنن علينا ونلاقيهم حتي لو مش هنبدأ دلوقتي وانا كمان زيك تقريبا بدخل النت يوم الخميس بس لاني مشغول ومش بسهر الا يوم الخميس علشان بيبقي بعد منه الجمعه وربنا يوفقنا وقريب هقدر ادخل اكتر ونعمل المدونه اللي هنعملها هنعملها بس عايزك علي الاقل تكوني متحمسه للفكره وكلمي عنها اصحابك

بس خلاص ... يقول...

انتى فين يا ميوشه ... انا خايفة تكون ام شعر احمر والحرامى اياها شطوا سطوا مسلحا بالاسنسات ذات الريحة الثابتة وانتزعوا منك المدونه ده كده فى خطر علينا كلنا ..طمنينى الله يكرمك ... لو كان كده نقفل ونعزل بكرامتنا ..ارجو الافاده سريعا

maiosha يقول...

بس خلاص
...........
إنتى اللى نورتينى والله يا جميل

لأ لا أسنس شادية إيه؟؟ ده أنا عندى ليكى إزازة أسنس عنايات عيناها بقالى 9 سنين

حلال عليكى

Alkomi يقول...

ههههههههههههه

دي ممن يطلق عليهم البيسو كني يا ميوشة

بس انتي عملتي معاها الصح

حسستيني انك ليناو هية جمالات في مسرحية المتزوجون

وواضح انا باباكي ليه الجنة

Bongo يقول...

الصيدلية للجدعان هههههههههههههههه

ربنا يكون في عونك و في عون باباكي اكتر لأنه مش كفاية عليه الزباين
لأ انتي بردو بتقومي بالواجب هههههههههه

ربنا يوفقك يارب
تحياتي ,,
سلام

funckydoctor يقول...

ههههه
اه منك خربتيها وقعدتى على تلها
وابقى قومى بدرى شوية على الضهر بلاش العصر يعنى

بنوتة يقول...

أول زيارة لي
كدة هيحرم يشغلك معاه تاني يا ميووووووووووشة
والله دمك زي العسل
أتمنى أبقى أشوف تعليقك في مدونتي

Hanan Elshafey يقول...

بجد انتي سكر ربنا يكون في عونه اللي هيتجوزك بس اكيد مش هيبطل ضحك ربنا يسعدك كده علطول واقبلي دعوتي المتواضعه لزيارة مدونتي المتواضعه اللي هتنور بيكي

سندريلا يقول...

بجد كلامك عسيل ودمك خفيف ربنا يكرمك وتخلصى مذاكره عشان مش تتديقى اوى كده بس صدقينى بعد كده هتقولى ياريت الايام دى تعود تانى حتى لو جزء صغير منها

Phontary يقول...

ايييييييه ده
آه يا جنبي .. وجعني منكتر الضحك
هو في كده
يخرب عقلك

عن اذنك هاروح اكمل ضحك

sex سكس يقول...

انا اسمي سائد من فلسطين
بس حابب اقلك انك انتي انسانه كويسه اوي
ومش فشله زي مانتي مت خيله
بس الدنيا هي كده ممله
بتمنالك النجاح وتوفيق
واحنا في فلسطين بنحب المصرين اوي
وعلى فكره انا عندي موقع زيك
بتمنا زوري

http://saedd.blogspot.com/