السبت، 28 يونيو 2008

التوقعات المرئية..من بيسو أذية

تحديث

***************************

أخييييييييييييييييييرا .. تم نشر بوست ليا فى مدونة على حريتنا.. بعنوان ( تليفونى بيرن)

مستنياكم هناك

****************************


فوقت من الحلم الجميل بالجايزة -الحلم اللى دام حوالى 4 ساعات- على صوت الست أختى الرخمة (نونا) وهى بتقول


نونا الرخمة : الله الله يا ست ميوشة .. هو الإمتحان بتاع بكرة هيبقى عن سقف الأوضة ولا إيه؟؟


أنا فوقت لنفسى لاقتنى فعلا بقالى حوالى 4 ساعات باصة للسقف وبضحك .. منظر مغرى لأى دكتور أمراض نفسية وعصبية بيدور على زباين جدد للسراية الصفرا


أنا : هو إنتى يا بنتى مش فى ثانوية عامة .. ماتروحى تقعديلك على كتاب ينفعك فى مستقبلك المظلم ده وتطلعى من نافوخى


نونا الرخمة : هاهاها .. يا حبيبتى أنا معنديش ترم يعنى إمتحانى كمان 6 شهور .. أ أ أه


الجملة دى غالبا بيطلع معاها لسان الأنسة نونا اللى قاله عنه فى الجرايد إن طوله 3.5 متر ولكن التليفزيون بيأكده إنه 4 متر.


أنا: حسبى الله ونعم الوكيل ..ليكى يوم تتذلى فيه زيي وتقعدى غصب عنك على الكتاب لغاية ما يلزق فيكى



نونا الرخمة (وهى بترقص) : بنات كتير كده من سنى.. بيغيروا منى

أنا : إمشى يا بت من هنا بدل ما أسخطك قرد .. مع إنى إتأخرت فى الموضوع ده وواضح إنك إتحولتى من غير ما أسخطك


نونا الرخمة : يا ماااااااااامااااااااا .. ميوشة بتقول عليا قردة .عاااااااااااااا


المهم بعد الفاصل الإعلان الظريف بتاع نونا ده ( هذا البرنامج برعاية إيريال جولدن الجديد ) .. قررت إنى أذاكر بقى .. يالا يا ميوشة شدى حيلك حققى الحلم اللى عمالة تحلمى بيه من ساعتها .. يالا .. ميووشة ميووشة أوه أوه ( إيه ده أنا إتأثرت بإيريال أوى)


فضلت اذاكر وأذاكر وأذاكررررررخخخخخخخخ .. بالضبط زى ما توقعتوا نمت روحت فى سابع نومة .. بس الشهادة لله كنت ذاكرت حوالى ساعة إلا ربع .. ساعة إلا ربع متواصل بذاكر ، وبعدين يعنى أنا هضيع عنيا علشان إمتحان .. الإمتحان يتعوض إنما عنيا لأ


فضلت نايييييييييمة لغاية ما صحيت .. بس مش بشبشب ماما زى كل مرة .. لأ ده أنا صحيت بحتة قلم على وشى سمع أخر الدنيا .. أنا لسه قايمة بقى علشان أمسك اللى عمل العملة دى أفرمة .. ألاقى قدام عنيا وش صغنتوت بيضحك ببق مفيهوش غير سنتين تحت وريالة عمالة تنزل .. طبعا أنا شفت المنظر ده مقدرتش أعمل حاجة غير إنى أضحك وأشيله وأبوسه ولا كأنه لسه ضاربنى بالقلم على خلقتى دلوقتى .. مين ده ؟؟ ده الأستاذ (بيسو أذية )

إحنا وخالتو جيران .. وأولاد خالتى طبعا إخواتى وعايشين طول عمرنا مع بعض .. جت الدكتورة سوسة ( الإبنة الكبرى لخالتى ) إتجوزت وعملتها وجابتلنا الأخ بيسو .. ورغم إن الأستاذ بيسو ده يادوب لسه داخل فى سنة واحدة .. إلا إنه بيتمتع بكل مواصفات التشرد اللى توديه سجن أبو زعبل وهو حاطط رجل على رجل .. ما شاء الله عليه ممشينا على العجين منلخبطوش .. يعنى أدى عينة لما يعوز يصحينى من النوم مفيش عنده غير قلم على الوش على طول .. قومى يا ماما إحنا معندناش دلع .. إحنا حاليا كلنا بنحاول إننا نستمتع بالأيام اللى هو مش لسه بيتكلم فيها على قد ما نقدر ، لإنه لو بدأ كلام .......... ربنا يستر على اللى هيحصلنا

صحيت بقى من النوم وطلعت علشان أسلم على سوسة وطبعا سألتنى السؤال المعتاد


سوسة : خلصتى مذاكرة يا ميوشة ؟؟

أنا : طبعا يا بنتى إنتى بتتكلمى فى إيه ؟؟ أنا مخلصة من قبل ما أبدأ أصلا.



سوسة : إن شاء الله الإمتحان هيكون كويس جدا .. وهيكون وش بيسو حلو عليكى


بصيت على وش الأخ بيسو .. لاقيت الواد بيبصلى وهو مقروف ورافع حاجب ومنزل التانى .. الواد ده بيحتقرنى ولا إيه ؟؟ ده بيعاملنى معاملة منيلة أوى ..


سوسة : اقولك حاجة مش انا اللى هطمنك على الإمتحان .. هخلى بيسو هو اللى يطمنك ..بيسو ، ميوشة هتعمل إيه بكرة فى الإمتحان؟؟


أنا لاقيت الواد قام مغمض عينه (قال يعنى بيركز ) وقام باصلى وقال : نيعا كوونال بوووووووووووف


أنا : إيه ده هو أنا هقلب قردة بعد الإمتحان ولا إيه ؟؟

سوسة : إستنى بس يا ميوشة

أنا : أستنى إيه بس يا سوسة .. ما الكتاب بيبان من عنوانه .. أهو أول ما همسك الورقة هعمل بووووووف هتف عليها


ببص لبيسو لاقيته عمال يزعق ويخبط على دماغة


أنا : وهصوت فى اللجنة وهلطم على وشى


و بعدين قعد يسمك إيده ويشدها و مسك مفرش الترابيزة وقعد يقطع فيه


أنا : وأخيرا هقوم مقطعة الورقة وسايبه الإمتحان وماشية خالص .. يا سلام إنتى أول ما قولتيلى وش بيسو اذية ده وأنا عرفت اللى فيها


سوسة : متقوليش على إبنى أذية



أنا : صح ده مش اذية ده مجموعة من اسلحة الدمار الشامل اللى....


كان طبعا لازم أسكت .. أصل بيسو تسلق الكنبة اللى كنت قاعدة عليها وقام....بايسنى .. هى صحيح بوسة مشبعة بالريالة بس ميضرش .. والواد يرضة طلع حنين .. بيصربنى على اللى هيحصلى بكرة .. أنا بقى لاقيت الواد حنين كده صعب عليا اللى كنت عمالة اقوله عليه وسوسة قعدت تقولى ( شوفتى إبنى طيب إزاى وإنتى اللى مفترية ) .. شلتة وقعدته على حجرى ولسه جاية أبوسة قام طااااااااخ .. الواد رقعنى قلم وإتزحلق من على رجلى وطلع يجرى .. أنا قمت قالعة الشبشب و........


أنا : يابن اللذينا .. وحياة أمى ماهسيبك


سوسة : إبنى حبيبى

********************************


طلعت من الإمتحان تانى يوم على ضحكة بيبا المشرقة .. وكيس الكرانشى بتاع ساسو الأبدى .. وتكشيرة إيمو علشان محفوظ اللى مش راحمها فى الراحة والجاية .. وتوتر موها .. ونكت ميرو اللى مبتخلصش ومبضحكشى .. لاقيتهم كلهم بيقولولى فى نفس واحد ( أصل كلهم عارفين غلاوة المادة دى عندى) .. عملتى إيه؟؟


أنا : نووووووجاااكو شيتوفاريل بووووووووووووووووف

هناك 27 تعليقًا:

نعكشة يقول...

ممممممممممممممممممم


عال عال

لأ حالتك جديدة

4 ساعات باصة في السقف
و بوجاكوناجيو بوووووف

و بتجري بالشبشب ورا الاطفال الصغيرة

و فاكرة نفسك ممكن تسخطي الناس قرد

جميل جمييل

لأ ربنا يوفقك
إن شاء الله خير

.............

يا رب إن شاء الله يكون علي خير و تنجحي و تجيبي المجموع اللي يفرحك

دمتي سالمة

سلامون عليكي

Mafrousa يقول...

ههههههههههههههههههههه
انتي عفريته
و جميله
و ان كانت الصوره اللي فوق ديه بتاعه بيسو
فيا ماما يضربك بالقلم و لا بلشبشب و لا بلجزمه حتى...
ما شاء الله عليه تبارك الله فيما خلق

طبعا طبعا انا عرفت انتي عملتي ايه فى الامتحان
ههههههههههههههههههه
مايوش تبقى تيجي تزورينا عند عبده الرايق و فرنسا
وادخلى معانا فى التعليقات..
وانا ابعتلك دعوه تنضمى
بس بعت ما تخلصى كل التفافة اللي عندك
هههههههههههه

maiosha يقول...

نعكشة
.................
يا سلام عليكى يا نعكشة أول مرة تيجيلى عرفتى أصلى وفصلى على طول .. لا بجد الله ينور مية مية

إدعولى إنتم بس ربنا يكملها معايا بالستر

maiosha يقول...

واحدة مفروسة
..................
أنا أنضم لمدونة فرنسا والرايق بحالها .. دى فيها عمالقة الكوميديا البلوجرية .. أنا يا فسفوسة هنفع هناك

ربنا يخليكى ليا يا مفروسة يا رافعة معنوياتى .. وشكرا على دعوتك الجميلة اللى طبعا طبعا مرحب بيها فى أى وقت .. هو أنا أطول أبقى معاكم

Alkomi يقول...

اهو ده عيبه

كل واحدة خلصت امتحاناتها هتفعغد لنا عالبلوجر بقى و هات يا تدوين يالا ماهي مدونات من غير امتحانات

الهي يطلعلك امتحان قدرات من الثانوية العامة ماكنتيش خدتيه

Unknown يقول...

تدوينة جميلة اسلوبك حلو
وشيق
دمتى بود

blue-wave يقول...

يا نهار ابيض
انا ماضحكتش كدا من فترة
ربنا يكرمك دمك زى العسل بجد

Unknown يقول...

انت تحفة تحفة تحفة والنعمة انت تحفة لالالا بجد صدقينى انت تحفة والله من غير كسوف تحفة.......... سلمى لى على بيسو اذية

Lady E يقول...

بجد مدونة تجنن

والبوست ده بالذات تحفه جميل جدا

انا قرأته قبل كده بس كنت مشغوله وملحقتش ارد

و كنت بقعد مع نفسي واضحك على عمايل بيسو اذيه لان ابن عمي نفس عمر بيسو تقريبا وشقي جدا زيه

وكمان شرحك لحركات بيسو دي اللي بجد متميزة جدا وضحكتني جدا جدا

maiosha يقول...

محمد الكومى
...................
عااااااااااا .. أهو إنت ..إنشاله إنت يارب .. حرام عليك ليه بس الدعوة دى ده أنا لسه متهنتش بالأجازة
هو أنا زيك واخدة الأجازة من قبل ما أبدأ إمتحانات أصلا

maiosha يقول...

نهر الحب
...................
نورتى المدونة.. وشكرا على تعليقك

maiosha يقول...

blue-wave
..............
كده بتضحكوا عليا علشان باخد بالقلم الله يسامحكم

إهئ إهئ .. والله لأسلط عليكم بيسو

maiosha يقول...

إنجى
............
والله إنتى اللى ردك تحفة
وزيارتك ليا تحفة تحفة تحفة

نورتينى يا قمر

maiosha يقول...

lady e
.....................
معقول فيه واحد تانى على ظهر الكرة الأرضية زى بيسو أذيه

الله يكون فى عونك يا مصر

كـــيــــــــارا يقول...

هههههههههههههههههههه

ده ازيه بصحيح

دكتور بهــدوء يقول...

ميوشا
حتي انتشي خلصتشي لسا انا لوحدي
المهم اختك عملت ايه ف الثانويه
يارب تكون عرفت تطلع م العذاب بتاعهم ده

بحقدددددددد عليكو كلكو خلصتووووو

maiosha يقول...

نيمو
.............
أخيرا حد حس بمعاناتى

maiosha يقول...

دكتور بهدووء
..............
أيوووووووووون خلصت .. خلصت ..أأأأه

معلشى معلشى بكرة تخلص يا دكتور

بس إبقى قولى علشان اباركلك

funckydoctor يقول...

ههههه
كده هتوصلى أكيد وتجيبى مجموع
فينك محدش بيشوفك ليه

ليكوريكا يقول...

:)))

لا بجد موضوع فظيع

انا مبطلتش ضحك

بس امانه عليكي تقوليلنا الماده دي بالذات عملتي فيها ايه لما النتيجه تظهر

maiosha يقول...

funckydoctor
....................

طبعا طبعا لازم أوصل ما أنا متفوقة من يومى .. لو أنا مأخدتش نوبل.. مين هياخدها؟؟

maiosha يقول...

ليكوريكا
............
إيه الإحراج ده بس .. ماهو كله باين أهو.. ماهو بيسو خلاص قال كلمته.. وأنا رحت فى الباى باى

يعنى هعمل إيه فى المادة بعد كل اللى بيسو عمله ده .. الله جاب الله خد الله عليه العوض

بنت من زحل A girl from Saturn يقول...

ههههههههههههههههههه
دمك شربات جدا
ربنا معاكى وإن شاء الله تنجحى
وبجد انتى فى رحمة كلية تربية مش صعبة اوى
امال لو دخلتى كليتى كنت عملت إيه
كان زمانك انتحرتى

maiosha يقول...

nour
............
ربنا يخليكى ليا يا نور
أمين يا رب يسمع من بقك ربنا

المدونة نورت والله

maiosha يقول...

aliaawwe
.................

أهلا بيك فى عالم المدونين والبلوجرية

وإن شاء الله أزورك دايما

نورت المدونة

دعاء مواجهات يقول...

وحشتييييييييييييينى موووووووت

إموة إمووووووووووة

سلاام مؤقت

. يقول...

ميرسى على الكلام الجامد اللى انتى كتبتيه فى المدونه بتاعتى و بجد المدونه بتاعتنا ليها الشرف انك تزورينا
و مرسى جدا ليكى