الاثنين، 9 يونيو، 2008

يا ترى ده تاج ولا سلطانية؟؟



أول تاج يجيلى كمدونة .. جالى من عبد الله صاحب مدونة( واحد إنسان ) .. بصراحة أنا كنت مأجلة كل حاجة لحد بعد الإمتحانات .. بس لاقيتنى قدامى 4 أيام على الإمتحان الجاى .. وبعدين بصراحة التاج عجبنى أوى وجه على مزاجى ، فقطعت فترة الإنقطاع دى وقولت أجاوب التاج وبعدين أرجع للإمتحانات تانى

*************************************


1-هل سبق ان فكرت في افعال مجنونه ؟


بصراحة كتييير .. أغلب الوقت


2- هلى نفذت أحد هذه الافعال؟



ساعات كتير بعملها


3-ماهو رد فعل من علم بهذه الأفعال؟ وهل علم بها أحد؟


المشكلة فى العمايل المجانينى بتاعتى دى إنى لازم أقول لماما حبيبتى عليها -ده لو هى أصلا مكنتش قدامها- ودايما رد فعلها ( إنتى مش هتكبرى بقى .. فيه واحدة زيك تعمل كده ) .. أما بقى شلة الأنس فمفيش غير كلمة واحده

( والله إنتى بت مجنونة )


4-ماهو إحساسك بعد أن قمت بأحدى هذه الأفعال المجنونة؟


يااااااه إحساس جميل .. وخصوصا لو بغرض الإنتقام من حد .. أصل انا شرانية بعيد عنك


5-هل ندمت على فعل جنونى كاد أن يودى بحياتك؟؟


بالعكس انا مندمتش أبدا على حاجة مجنونة عملتها .. بس دايما اسمع ( لو كان مش عارفة إيه حصل كان زمانك فى خبر كان) .. وبعدين أنا مؤمنة إن الحياة تجارب ومادام الموت لابد منه ..يبقى مش لازم أموت وأنا نفسى أعمل حاجة


6-هل سبق أن وقفتى أمام المرآه لتقولى لنفسك إن مجنونة؟؟


إحم .. إيه الإحراج ده!!.. بس بصراحة ساعات بتحصل


لحد كده تاج عبد الله خلص بس دعاء مواجهات زودت عليه سؤالين ( علشان تبقى كملت)


7- ما هى الأفعال المجنونة من وجهة نظرك؟؟؟


الأفعال المجنونة من رأيي هى الأفعال اللى تبقى جريئة ومحدش يتوقعها منك وخصوصا لو كنتى بنت .



8-إذكر أمثلة لتلك الأفعال المجنونة وسبب تسميتك لها بالمجنونة وهل هى مجنونة فعلاً ولا إنت موسعها حبتيين؟؟؟


ههههههههه.. أنا هروح فى داهية .. فيه حاجة أنا عملتها وأنا صغيرة أوى لسه مثلا فى تانية إبتدائى بس كل ما حد من شلة إبتدائى يشوفنى بيفكرنى بيها .. هى حاجة عبيطة بس ساعتها كل الناس شكو فى قواى العقلية .. ودى الحاجة اللى إفتكرتها على طول أول ما إتكلمت عن الجنان


كان فيه اليوم ده حاجة كده زى لجنة بتمر على الفصول فى مدرستنا وتشوف كل فصل متزوق بقى ومحطوط فيه زينة والحركات دى .. أنا بقى كان ماما وبابا لسه راجعين من الحج .. وكانوا جايبيين معاهم بخور غريب جدا .. عود بخور بس كبير جدا لدرجة تخوف .. أنا قعدت أتحايل على ماما علشان تدينى عود البخور ده معايا المدرسة .. وفى الاخر (تحت التهديد) ماما وافقت أخيرا .. وخدته معايا وقولت للأستاذة بتاعى ممكن نولع البخور فى الفصل علشان لما اللجنة دى تيجى فصلنا تلاقى ريحته حلوة .. الأستاذة أصلا شافت منظر العود كان قلبها هيقف وقالتلى يا بنتى ده خطر إننا نولعه فى الفصل ممكن يقع ولا يحرق حاجة ده ضخم أوى.. والعيال قعدت تتريق عليا

طبعا انا إتضايقت إزاى يعنى يتريقوا عليا .. انا بقى فضلت أمخمخ .. وإستنيت اللحظة المناسبة ..تررررن ده جرس الفسحة أول ما الفصل كله راح الفسحة قمت أنا بمنتهى البراءة فضلت قاعدة شوية فى الفصل .. وأول ما الفصل فضى عليا طلعت الكبريت (متشردة متشردة يعنى) وولعت العود وحطيته فى الفصل وقفلت الشبابيك والباب ورحت الفسحة وأنا على شفايفى ضحكة خبيثة.

بعد الفسحة بقى اللى هى حوالى ربع ساعة باين .. ربنا ما يوريكوا .. غالبا أول واحدة دخلت الفصل أغمى عليها .. والبنات قعدت تكح وكانت كارثة سودا .. والمدرس جرى على الشباك علشان يفتحة وقام مزعق وقال مين اللى عمل كده؟؟ طبعا الفصل كله (خونة) قام باصص عليا .. ورحت يومها للناظر اللى أول حاجة قالهالى

( هو إنتى مجنونة؟؟)


ليه سميتها مجنونة .. متهيألى مفيش طفلة عاقلة تعمل كده!


أما بقى هى مجنونة فعلا ولا أنا مزوداها حبتين .. فده إنتوا اللى تحكموا عليه


9- اخيرا اهدى التاج لمين؟؟


عايزة أهدى التاج لfuncky doctor


واحدة مفروسة


ودرش اللى عامل دوشة


dramaqueen


ودكتور بهدوء

هناك 66 تعليقًا:

محمد الكومي يقول...

احجز اول كومنت و بعدين اعلق بمزاااااااج

wa7ed 2ensan wnsan يقول...

يخرب بيت الجنان اللي في الدنيا

هو دا الجنان ولا بلاش

موقف البخور دا زي العسل

بس عادي على فكره انه يطلع من الاطفال

انا بقى كنت هولع في البيت كله مش في المدرسه

الحمد لله عدت على خير والبيت لسه تمام والحمد لله

بس والله دماغ مجانيني كده


على فكره دا اخر كومنت لحد يوم 18 الجاي فيزيا بقى وكده ادعيلي

emo يقول...

هههههههههههههههههههههههه
اجبات منونة
بس تحفة ربنا معاكى يا حببتى

دعاء مواجهات يقول...

ازيك ياقمر

ردوود زى العسل

ضربة شمس فتحت

ادخلى علشاان تبقى معانا

http://darbetshamss.blogspot.com/

هتبقى اجمد مدونة فالارض

يللا..

maiosha يقول...

محمد الكومى
..................
أهلا بالأستاذ اللى خلص إمتحانات .. وبتحجز تعليق كمان .. معاك تذكرة بقى ولا لأ؟؟ أنا هشوف إسمك فى الكشف عندى لو لسه مدفعتش تمن حجز التعليق هكهرب الكومنتات عندى واللى هيدخل من غير ما يدفع هيتكهرب

maiosha يقول...

wa7ed 2ensan
..................
يا عبد الله أنا فعلا ولعت فى البيت قبل كده وأنا صغيرة إنما كان أول مرة الموضوع ده يخرج عن إطار البيت.. شوفت حد قبل كده يخنق أصحابه ..عقل إجرامى

فيزيا.. يا ساتر يا رب .. الحمد لله أنا كنت أدبى
الله يكون فى عونك بجد.. أنا أساعد فى الإنجليزى أه إنما الفيزيا دى معرفش فيها غير إن فيه (الصوت ..والضوء) وفيه واحد فيهم أسرع من التانى

مستنياك يوم 18 تقولى اخبار الفيزيا إيه؟؟ ربنا يوفقك إن شاءالله

maiosha يقول...

emo
...............
واحشانى جدا والله يا إيمو ..فينك من زمان؟؟

إيه رأيك بقى فى الجنان الرسمى ده .. مع إنى أعقل واحدة فى عيلتنا

ربنا يخليكى أيوة إدعيلى لأحسن أنا هرجع فترة الإعتكاف دى تانى

أم حبيبه يقول...

اول مره ازور مدونتك و عجبتنى اوى الاجابات

هههههههههههههههههه

و بالذات السؤال اللى فى الموقف المجنون


رااائع

هى دى الاطفال و لا بلاش

maiosha يقول...

دعاء مواجهات
..................

مبروك يا دودو على المدونة .. أنا دخلت إمبارح لقيت طبعا حركة مجانينى من حركتكم ومكتوب ..الموضوع الأول محجوز

خلاص بدل فتح أنا هروح أشوفه دلوقتى

بس يا أختى فهمينى الله يخليكى.. إيه حكاية الضربشمسوية ده

أنا أه موسوعة متنقلة وكل حاجة بس المعلومة دى معدتش عليا قبل كده

maiosha يقول...

أم حبيبة
..................
المدونة نورت والله

ربنا يخليكى يارب .. وأتمنى تكرار الزيارة إن شاء الله

دعاء مواجهات يقول...

ازيك ياقمر

مفيش شرووط ياجميل

نتى ابعتى ع الميل والكلام التمام هيتنشر

وروحى يابنتى وانتى ضربشمساوية

بييييس

دعاء مواجهات يقول...

ضربشمسااوى ياجميل

يعنى واحد عايش بدماغة

ماشى وايدة ف جيوبة

بيشوف الحاجت بعيون مختلفة

بيسمع منير

ويبكى لشجن فيروز

ويعيش مع الست

ويفكر بدمااغ عالية

م الاااخر حد مختلف ااخر حاجة...

معانا انتى طبعا؟؟؟

واحدة مفروسة يقول...

maiousha
-----------
طيب انتى مجنونه و انا ماااااالي
هههههههههههههههههه
انا مفروسه وو بس ماليش فى امور الجناااااااااااااان
ههههههههههههههههههههههه

مجنونه و دمها خفيف
انا كنت باسمعها كتييييير
هههههههههههه
بس خلاص بعد الزواج بقيت مفرووووووووووسه
هههههههههههههه

واحدة مفروسة يقول...

maiousha
--------
طيب ده نظااام جنان و انا مالي بيه انا مفروسه و بس

ههههههههههه
بس مجنونه و عسوله

ههههههههه
ديه كانت كلمه باسمعها زماااان قبل ما اتجوز و اتفرس
هههههههههههههههههههههه

maiosha يقول...

دعاء مواجهات
.................
معاكى يا ستى طبعا هو أنا أقدر أقول حاجة .. معاكى معاكى

إستنينى إن شاء الله أبعتلك حاجة قريب

maiosha يقول...

مفروسة
...............
يا سلام المفروسة يعنى ميمنعش إنها تكون مجنونة .. قولى يا ستى حتى عن خبراتك القديمة فى الجنان

منكم نستفيد

حنين القلب يقول...

سورى والله بس انتى فعلا مجنونه
بس جنانك عسل
ربنا يوفقك وينجحك
سلام

maiosha يقول...

حنين القلب
..................
عادى يا ستى هى جت عليكى.. أمة لا إله إلا الله بتقول عليا مجنونة ..

والمصيبة إنى عارفة إنى مجنونة ومتعايشة مع الوضع عادى جدا

مجنونة بقى

دعاء مواجهات يقول...

ازيك يابنتى

يؤسفنى طبعا ان البلوج اتقفل حتى قبل ما يفتح

عاوزة تعرفى التفاصيل

ضيفى ميلى عندك وقولى انك انتى

وهبعتلك احكيلك

سلااام...

maiosha يقول...

دعاء مواجهات
...................
علم وجارى التنفيذ

نور يقول...

هههههههههههههههههههه
انتى زى العسل والله يا ميوشه ايه دا يا بنتى من صغرك كده وانتى مخليه النا س يغمن عليها امال لما كبرتى عملتى ايه
نفسى انا اشوف عود البخور ده
ردودك عسل زيك
سلام مؤقت يا جميل

funckydoctor يقول...

حلو موضوع البخور ده
هههههه
أنا قاعد أتخيل شكلك وانتى بتعملى كده
فعلا هافطس من الضحك
بقى طفلة بريئة تعمل كده
ما علينا
عموما بعيد عن الخناقة اللى عندى شكرا على التدبيسة ده

emo يقول...

هموشة وحشانى موووووت
ربنا معاكى ياقمر

ادم المصرى يقول...

عود بخور انتى فعلا غريبه بجد وكمديه جدا مووووووووت
هههههههههههه
بصى انا هنملك على باب المدونه بعد كدا يستى انا فين وفين لما بدحك مرسى اوى يقمر على البوست ده

بدعوكى لقرأت الجزاء التالت من اميره بكل النساء

maiosha يقول...

نور
..............
أنا لما كبرت ..مين اللى قالك إنى كبرت اصلا .. أنا لسه نفس عقلية تانية إبتدائى

maiosha يقول...

funcky doctor
....................
أه الخناقة.. لأ أحنا لسه مكملناش الخناقة .. بس لما أفضى كده من الإمتحانات وإنت كمان تخلص نفوق للخناق بقى

العفو إن مكنتش أنا ادبسك يعنى مين هيدبسك؟؟

maiosha يقول...

emo
................
لأ بقى مليش دعوة غنتى اللى واحشانى أكتر مليش دعوة إنتى أكتر

maiosha يقول...

أدم المصرى
................
معقولة إنت مبتضحكش كتير .. ده ردك أكتر رد ضحكنى

بما غنك بقى هتنام عندى إعمل حسابك إنك المدونة مفيهاش تكييف.. والله عايز تجيب تكييف تركبه عندى يبقى ربنا يخليك للشعب.. بس تعمل حسابك برضة إنك إنت اللى هتدفع فلوس الكهربا .. أه ما أنا مش بشتغل حرامية بعد الضهر أجيب فلوس منين يعنى؟؟

على العموم إنت تنورنى فى أى وقت .. وأنا هجرى جرى أشوف الجزء التالت

dramaqueen يقول...

ازيك يا ميوشة
ميرسى على التاج الجميل دة
واجاباتك زى العسل
انا باموت فى الجنان
انا فديكى الساعة لما اختى الصغيرة تاخد اللقب
اهلا بيكى فى عائلة المجانين

استنى بس اخلص امتحانات وترجع لى الذاكرة وافتكر اذا كنت مجنونة ولا لأ

maiosha يقول...

drama queen
...................
معقول الجميل بذات نفسه يقطع إعتكاف الإمتحانات ويجى يرد عليا

والله وحشتينى موت.. الله يحرق الإمتحانات اللى بتعمل فينا كده

طبعا مستنية إجابات التاج أول ما تنزليه إدينى الأوكيه

حنين.. يقول...

الله ير حم ايام الطفوله. ايام زمان, ايام اللعب والروقان, والمقالب, اللمهم يا جميل انا شايفه اللى انتى عملتيه جنونى بس بعقل, وانا لو منك كنت ولعت فى المدرس وبعدين فى الفصل وبعدين فى المدير, ياخساره دلوقتى معدش عارف يولع فى نفسه لانى ........ غلى, وتسلمى يا جميل على مواضيعك وتاجك

Gannah يقول...

ميوشا
مجنونة بس دمك زى العسل
خلصى امتحانات بقى علشان نشوف بوستاتك الجامدة
ربنا معاكى
تحياتى

maiosha يقول...

حنيين
.................
أنا مجنونة أه ..بس مش لدرجة إنى أولع فى الدنيا كلها بالمنظر ده .. وبعدين الواحد لما يبقى مجنون بعقل يبقى حلو برضة .. أحسن من إنى أروح فى داهية

maiosha يقول...

gannah
................
ربنا يخليكى يا جميل ..قولى إنتى بس يارب

شـمو نشـادر يقول...

عسول يا ميوشه ..
حلاوتك فى الجنان يا طاقق ..
اجاباتك لذيذه موز ..
تحياتى ..
أسامة أمين

دعاء مواجهات يقول...

زيك يابنتى

اعملى بقى شوية دعاية لمدونتنا

وابعتى اللينك لكل النااس الى تعرفيهم

وياريت تنزلى تحديث يكون احسن

بيس

maiosha يقول...

شمو نشادر
................
أنا مش مصدقة نفسى .. أسامة امين مرة واحدة
أنا والله على طول بسمع عنك بس دى أول مرة تشرفنى هنا
ربنا يخليك والله الواحد لما بيشوف التعليقات دى بيحس إن منعوياته ( أيوة هى كده صح) بترتفع.

maiosha يقول...

دعاء مواجهات
...................
ماشى يا دودو.. إنتى بس إستنى عليا بعد ما أفوق من الإمتحانات دى هتلاقينى إن شاء الله شعلة نشاط

أخلص بس .. إن شاء الله

شـمو نشـادر يقول...

ياه ايه الكلام ده ..

تسمعى عنى ؟؟ هو انا خلاص اتفضحت اوى كده ؟؟

استر يا رب .. انا حاسس ان انا هشرف عند حبايبنا قريب ..

على فكره الشرف لينا احنا يا ميوشه ..

تحياتى يا جميل ..

أسامة أمين

blue-wave يقول...

مدونه تحفه هاتبقى اول زياراتى دايما
تحياتى

maiosha يقول...

شمو نشادر
..............
مش معقول تانى .. رد تانى من أسامة
ياما إنت كريم يا رب

هو إنت فاكر إنك مفضوح وبس .. ده إنت سيرتك على كل لسان .. قصدى بلوج

والله أنا فرحانة جدا بالزيارات دى

ربنا يجبر بخاطرتك .. وحسنة قليلة تمنع بلاوى كتيرة وهنيالك يا فاعل الخير والثواب

maiosha يقول...

blue-wave
...................
شكرا على الزيارة الجميلة

نورت المدونة

دعاء مواجهات يقول...

انتى فين ياماما

مبعتتيش مواضيع لية


انا زعلااانة


بييس

bar2ash يقول...

احلي ميوشه في العالم

ميوشه اللي منفضالي
ومطنشاني


اجاباتك لذيذه
وانتي مش مجنونه بس لو في اكتر كنت قلته


ولعتي في الفصل يا ميوشه

موتي اصحابك
ههههههه



سلااااااام

maiosha يقول...

حبيبة قلبى دودو
....................
أنا مقدرش والله على زعلك أبدا يا جميل
بس أنا الأيام دى عاملة بجد إعتكاف.. أصعب مادتين هما اللى جايين دول .. أنا فاضلى 9 أيام بالضبط وأخلص بقى من الإمتحانات بس بجد هما دول أصعب 9 ايام فى الإمتحانات كلها

maiosha يقول...

برقش
..............
بجد بقى متقولوش كده أنا بضايق جدا لما حد يزعل منى وخصوصا لو كان غالى عليا.. والله والله أنا مزنوقة زنقة الكلاب -محدش لو سمحتم يسألنى الكلاب بتتزنق ازاى؟؟- أنا بس أخلص الكام يوم دول وهفوق واروق وهتلاقونى نطالكم كل يوم لغاية ما تقولى إرحمينا بقى وسبينا فى حالنا

شفقة هانم واحسان بك يقول...

التاج ده انا عايزة لفه...ماليش دعوة
مبروك التاج انتى تستاهليه
شفقة

Darsh يقول...

يا نهار أبيض

ده انتي على فكرة يا ميوشة مش مجنونة خالص

ده انا على كده مدير السراية الفوشية

ده كله علشان عود بخور .... هو صحيح برج القاهرة بس عادي

على العموم انا الحمد لله خلصت الإمتحانات الكئيبة دي و رديت على التاج

شكراً يا ميوشة بقى عندي تاجين ... بقيت أخيراً موحد القطرين

Miss. Sosa يقول...

هههههههههه

انا مش شايفاه جنان خالص انتي نيتك كانت كويسة وكنتى عايزة تخلى الفصل ريحته حلوة

اومال لو كنتى ولعتى صوباع ديناميت كانوا قالوا عليكي ايه
ههههههههه

maiosha يقول...

شفقة هانم وإحسان بيه
............
والله يا شفقة هانم ما يغلى عليكى .. ده إنتى تنوريه وتجنينه أكتر ما هو مجنون

التاج هدية منى ليكى

maiosha يقول...

darsh
...................
هيه هيه هيه
أخيرا حد قالى غنى مش مجنونة .. والله رجعت للواحد امل فى عقله تانى

أما إنت بقى فالمجنون الكبير .. إحنا تلاميذك يا باشا .. هو أنا أجى حاجة جنبك

maiosha يقول...

miss.sosa
..................
مش كده والنبى .. ناس ظلمة ومفترية

ده أنا كانت نيتى صافية جدا .. هنعمل إيه بقى فى الظلم

ايمو يقول...

وحشانى يابنتى فينك من زمااااااااان

Cars Cars Cars يقول...

your answers are crazy
my greetings for ur answers from laughing heart

maiosha يقول...

إيمو
............
والله يا إيمو يا بنتى أنا بمر بأيام عصيبة .. أدعولى الأيام دى

كلها إسبوع إن شاء الله .. وأخلص بقى من الإمتحانات والقرف ده

maiosha يقول...

cars cars
.................
متشكرين مووووووووووووت على الزيارة دى

معلشى بقى أصل الإنجليزى بتاعى على قد حاله.. فقلت اللى نعرفه احسن من اللى مانعرفوش

ميرسى يا جميل على الزيارة وأتمنى متكونش الأخيرة

انا يقول...

"الزيارة من غير تعليق متبقاش زيارة"

بدون تعليق

:)

دعاء مواجهات يقول...

انتى اختفيتى فين

قلقانة عليكى

طمنينى يابنتى انك بخير

بيس ياقمر..

المـــفـــــــقــــــــوعـــــة مــرارتـهــا يقول...

يعني الحق عليكي انك جايبالهم عود بخور


لا عود ايه قولي شجرة بخور

كويس انك ماولعتيش في المدرسة
كان زمانك تسببتي في قطع عيش الناظرة
وكنتي مانمتيش الليل من احساسك بالذنب لحد دلوقتي

كاتب مصري يقول...

هل يمكنني دعوتك لمدونتي
تحيتي وأنتظر الزيارة
سأكون سعيد جدا لو لبيت الدعوة
مدونتي هنا
http://kanyatklam.blogspot.com
ولو كانت هذه هي المرة الاولى التي ازور فيها مدونتك فأعدك أن لا تكون الاخيرة أبدا
منتظرك

maiosha يقول...

أنا
.............
ههههههههه .. طيب براحتك يا سيدى

maiosha يقول...

دعاء مواجهات
.................
أه معلشى وناوية كمان أختفى لحد يوم الخميس كمان.. يوم زوال غمة الإمتحانات ..ربنا يعدى اليومين دول بقى

maiosha يقول...

المفقوعة مرارتها
....................
منورانى والله يا مفقوعة .. أيوة كده دافعى عنى ربنا يخليكى ليا يا رب

maiosha يقول...

كاتب مصرى
...............
من عنيا يا سيدى

هروح هناك على طول

almasry يقول...

من الآخر تتوقعى تنجحى؟؟؟؟؟؟؟؟؟؟

طمعانين فى زياره وتعليق ممكن؟


تحيــــــاى
المصــــــــرى

aliaawwe يقول...

بجد مرسى انتى بتخجلينى بذوقك فعلا و نورتى المدونه
thanks