الثلاثاء، 22 يوليو 2008

خدلك نفس ..من علم النفس


يوم الجمعة جه.. طبعا لكم أن تتخيلوا إنه ماكنش مفعم بنفس نشاط وحيوية اليوم اللى قبله .. بالعكس كان مفعم بالكسل والملل والشلل .. طبعا ماهو يوم مذاكرة بقى.. كفاية بس إن اليوم الجميل ده إبتدى بمكالمة إيمو ليا

إيمو: صباح الصبوحة يا ميوشة

أنا : صباح الصبوحة؟؟ ده إيه الصباح المنعكش اللى شادد وشه ده.. صباح النور يا ستى. أخبارك إيه؟؟

إيمو : والله يا بنتى أنا كنت كويسة وعال العال لغاية ما بصيت فى جدول الإمتحانات وعرفت المادة اللى علينا بكرة

أنا : أه صحيح .. إحنا علينا إيه بكرة؟؟

إيمو : مادة إسمها غريب كده .. إسمها علم نفس ( إيمو قالتها بتفح الفاء)

أنا : نفس ؟؟ إيه علم النفس ده .. بيعلمونا فيه إزاى نتنفس ده ولا إيه؟؟

إيمو : والله يا أختى ما أعرف ، أنا من خبرتى فى الحياة إستنتجت إن المادة دى غالبا هيعلمونا فيها إزاى نقطع نفس العيال فى الفصل .. يعنى الواد اللى يكلمنا كده ولا كده نكتم نفسه .. بس بإسلوب علمى متحضر

أنا : هو إحنا فى كلية تربية ولا كلية ريا وسكينة .. عيال إيه الى هنكتم نفسهم يا بت يا محنونة إنتى .. ونكتم نفسهم بإسلوب علمى كمان .. ربنا يا ختى ما يحرمنا من ثقافتك الواسعة

أما بقى ميرو فكان رأيها مختلف

أنا : أيوة يا ميرو عرفتى مادة بكرة؟؟

ميرو : أيوة طبعا .. شوفى يابنتى أنا هجيبلك الخلاصة .. المادة دى تبع الأنفاس .. يعنى اللى نفسه أطول هو اللى هينجح فيها

أنا : إزاى يعنى ؟؟ هيجيبه مثلا حوض مية ويغطسوا دماغنا فيه واللى يعيش هو اللى هينجح ولا إيه؟؟

ميرو : ممكن .. وممكن كمان يجيبوا شيشة واللى يشد أطول نفس يجيب الإمتياز على طول

أنا : يا سلام يا سلام .. ولما نيجى نسلم ورقة الإجابة للمراقب نقوله كلمة السر ( مساء الخييييير)؟

ميرو :لأ يا فاشلة .. مش للدرجة دى .. كده يتعملك محضر غش وتدخلى لجنة خاصة.. بس هقولك يا ميوشة نصيحة غاليه.. حاولى تذاكرى أى حاجة مهمة فى بلدنا ليها علاقة بالأنفاس

أنا : زى إيه يعنى ؟؟

ميرو : يعنى مثلا مترو الأنفاس .. نفس الشهيد أحمد حلمى.. وباقى الأنفاس بقى

أنا : هو أحمد حلمى بقى شهيد .. لأ وأذاكر نفسه كمان؟؟ ربنا يخليكى ليا يا ميرو هى دى الصداقة ولا بلاش

ميرو : إسمعى بقى قبل ما نقفل (مرة واحد نفسه إتقطع معرفش يربطه تانى ) نيهاهاهااها

أما بقى روقان الشلة كلها

ساسو : صباح الخير يا ميوشة هى الساعة كام دلوقتى؟

أنا : إحنا العصر يا استاذة

ساسو : وبتصحينى دلوقتى ليييييييه؟؟

أنا : معلشى أصل - بعد إذن حضرتك يعنى - فيه علينا إمتحان بكرة

ساسو : يووووووه يا ميوشة إحنا فين وبكرة فين لسه بدرى .. إمشى بقى أنا عايزة أنام

أما التوتر .. فليه طريق واحد

موها : ميوشة هنعمل إيه فى المادة دى ؟

أنا : إنتوا أصلا مش مدينى فرصة أفتح الكتاب علشان أعرف المادة دى فيها إيه؟؟

موها : أنا قلقانة ومش متفائلة خالص .. المادة دى مش طبيعية .. أنا عارفة إنى هروح بكرة مش هعرف أحل أى حاجة خالص .. أنا عارفة .. أنا عارفة إنى هشيل المادة دى

أنا : هو أنا كنت ناقصاكى إنتى كمان يا أنسة توتر إنتى مش لما نبقى نمتحن الأول نبقى نشوف هننجح ولا لأ روحى ذاكرى أحسن من القلق ده

مش عارفة ليه المادة دى بالذات اللى إحنا كلنا شايلين همها .. لأول مرة تحصل الإجتماعات دى كلها فى يوم واحد وفى زمن لا يتخطى الساعتين.. بجد مادة غريبة .. سيبك من إسمها المريب.. أصلا الكتاب غريب جدا .. دى مادة تربوى .. يعنى المفروض مادة ثانوية ، لكن الكارثة إن الكتاب بتاعها أكبر من كتب التخصص
أنا لاقيت نفسى كلمت الشلة كلها النهاردة إلا بيبا حسيت بتانيب ضمير والله ( مين اللى صحى الاخ ده كمان دلوقتى ) أصلا البت دى وحشتنى بقالى يوم كامل مكلمتهاش .. وكمان ال........

ترررررررررررن تررررررررررن

أنا : ألو

بيبا : أيوة يا ميوشة . أخبار علم النفس معاكى إيه ؟؟

أنا : إيه .. علم النفس ( بيبا هى الوحيدة اللى نطقتها صح ) إيه علم النفس ده ؟؟

بيبا : يا لهوى يانا .. إنتى لسه نايمة فى العسل .. المادة اللى علينا بكرة

أنا : إيمو قالتلى إن إسمها علم نفس .. المادة بتاعة الأنفاس

بيبا : ههههههههه .. أنفاس .. ربنا يقطع نفسكوا يا مسطولة إنتى وهى .. يا ميوشة ده علم النفس .. علم النفس والفلسفة بتوع الثانوى .. مش فاكراهم

أخ ... بعد ما بيبا قالت الكلمتين دول رجعتبالذاكرة سنتين ورا .. وأنا واقفة قدام بابا بالضفاير والفستان ( إيه على طول لما حد بيفتكر بيكون بضفاير وفستان إشمعنى أنا؟ ) وكنت عمالة أقوله
لا يا بابا علم نفس لأ يا بابا .. أنا هاخد فلسفة وإقتصاد وإحصاء .. لكن علم نفس لأ لأ.. أنا بكره علم النفس يا بابا

طول عمرى بحس إن علم النفس ده بيجيب المرض النفسى . وإن الدكاترة النفسيين مرضى نفسيين (مع الإعتذار للدكاترة يعنى . على راسى يا باشا )حتى أى دارس عادى للمادة أو مدرس ليها .. تحس إن فيه شوية سلوك ملمسة عنده .. علشان كده طول عمرى واخده موقف من علم النفس وعمرى ما درسته قبل كده لحد النهاردة .. باين كده إن كل عقدى من علم النفس والدكاترة والمدرسين هتطلع عليا النهاردة

بيبا : ميوشة إنتى رحتى فين؟؟ إنتى نمتى ولا إيه؟؟

أنا : لأ معاكى بس الصدمة شديدة عليا شوية.. أنا معرفش أى حاجة عن الأخ علم النفس ده

بيبا : أه ما أنا عارفة علشان كده قولت أطمن عليكى.. بصى يا حبيبتى علم النفس ده بيدرس النفس البشرية وتفاعلتها مع أفعال الأنسان وسيكولوجيته

أنا : ماشى ماشى .. أفعال الإنسان وسيكومهلبيته .. كملى أنا معاكى

بيبا : سيكومهلبيته ؟؟ لأ واضح جدا إنك معايا .. بصى يا ميوشة حاولى كده تمسكى الكتاب وتقرى منه أى كلمتين ولو معرفتيش حاجة كلمينى .. معظم الكلام ده كنا واخدينو فى الثانوى .. سلام

يا ربنا .. طيب اللى مخدش علم نفس فى ثانوى ينتحر يعنى ولا إيه؟؟ إستغفر الله العظيم.. مسكت الكتاب كده وبصيتله لاقيته بيبصلى باصة غريبة جدا.. شوية وكان هيطلعلى لسانه.. شوفتوا أدينى لسه مجرد ماسكة الكتاب ومن غير ما اقرا كلمة واحدة ودماغى لسعت على طول.. بس فيه حاجة مهمة .. علم نفس.. علم نفس .. أنا فاكره إنى أعرف حد تخصص علم نفس .. فى حد فى عيلتى بيدرس أو بيدرس علم نفس .. علم نفس.. علم نفس .. ياترى من اللاسع اللى فى عيلتنا.. يوووه مش فاكره

بسم الله الرحمن الرحيم .. سميت وفتحت الكتاب وقريت الصفحة الأولى والتانية .. التالتة لغاية الصفحة العاشرة ووقفت .. حاولت اعرف أنا فهمت إيه بالضبط من العشر صفحات اللى فاتوا دول.. ولا حاجة.. طلعت بإيبه منهم؟؟.. غبائى زاد شوية

مين اللى تخصص علم نفس فى عيلتنا .. يخرب بيت الزهايمر

ضميرى وجعنى .. قولت أقرا تانى .. وقعدت أقرا واقرا .. على إنى أفهم حاجة ابدا .. قعدت على الحال ده حوالى أربع ساعات .. لغاية ما لاقيت باب الاوضة بتاعى بيخبط

أنا : إدخل الله يخليك

رونى : ميوش .. أخبار إمتحان بكرة معاكى إيه ؟؟

أنا : متفكرنيش يا رونى الله يخليك دى مادة مقرفة ( للعلم رونى دى بنت خالتى وجارتى فى نفس الوقت.. أخت سوسة)

رونى : مادة إيه دى؟؟

أنا : إسمها علم نفس .. تعرفيها؟؟

رونى : ميوشة.. هو إنتى تعرفى أنا فى كلية إيه ؟؟

أنا : يا ختى بلا نيلة دا أنا لسه عارفة أنا فى كلية إيه من إسبوعين

رونى : أنا فى كلية إسمها كلية تربية .. سمعتى عنها قبل كده؟؟

أنا : كلية تربية؟؟ ... أه إيه ده دى كليتى إنتى معايا فى الكلية؟؟

رونى : أيوة يا حلوة بس أنا أكبر منك بسنتين

أنا : أيوة دى عارفاها دى

رونى : وفى قسم علم نفس

أنا سمعت الكلمة دى من هنا ونطيت على رونى وإتشعلقت فى رقبتها

أنا : بجد والنبى قسم علم نفس

رونى : أيوة والله .. يخرب بيتك يا ميوشة دا إنتى فى الباى باى خالص

أنا : أبوس إديكى وضوافر عنيكى لتشوفيلى حل فى المادة المنيلة دى .. أنا خلاص مش مش عارفة أعمل إيه فى المادة دى أنا خلاص جبت أخرى معاها


رونى : متقلقيش أنا هحللك المشكلة دى


يتبع .................

هناك 46 تعليقًا:

نعكشة يقول...

والله انتو مسخرة

ههههههههههههههههههههه

بجد اكنكوا واخدين نفسيييييييين

ربنا يوفقكوا يا رب

الحمد لله انك لاقيتي روني

بس انتي شكلك خطير


يعني ماشاء الله بتكتشفوا اسم المادة قبل الامتحان بيوم

لأ عال عال

ربنا يعزكوا
مستنية إية اللي حصل ف يالامتحان

دمتي سالمة

سلامٌ عليكي

maiosha يقول...

نعكشة
...............
نعكوشتى .. مساء الرواقة والفواقة
ده أنا لسه كنت بنضف بقى وبرش مية وبقول إستعنى على الشقا بالله

معلشى هى شلتنا بس مسطوله حبيتين
وبعدين كفاية على المادة يوم واحد إحنا هنقطع نفسنا يعنى

نورتينى يا جميل

Mafrousa يقول...

هههههههههههههه
التهييس عندكم عااااالي جدااااااا
ههههههههههههههه
علم النفاس ده اللى بيتاخد قفي غرزه...ولا على القهوه
ههههههههههههههههه
اما علم النفس ده علم جميل
يخليكي تتعرفي على نفسية اللي قدامك
و تقريه بوضوح
اقري الماده ديه..انا مش كنت كلية تربي...ولا كنت ادبي من اصله
بس بحب اي حاجه ليها غلاقه بالانفاس
هههههههههههه
بالنفس....

funckydoctor يقول...

هههههه
صباح الخيييييير
سيكومهلبية يا يعينى عليكم
المشكلة انك قعدتى نص اليوم تعرفى فى اسم المادة
مستنى اعرف اخدنى كام نفس فى الإمتحان :D

Mahmoud البطراوى يقول...

متعه ايام الامتحانات

ههههههههههههههههههه

اجمل حاجه فيها انك بتعرفى اسماء المواد

خطأ شائع انك تدخلى الماده من غير ما تعرفى اسمها بس انا ملاحظ انك تفاديتى الخطا ده
هههههههههههههه

مبروك النجاح مقدما

ممكن الحاجه الساقعه مقدما برضه ؟؟D:

momken يقول...

ههههههههههههههههه

انا هموت واعرف دماغ ايه دى
انتى بتضربى ايه بالظبط

تهيسيك سافر اوى
س روقان وجمال وحلاوة
الله ينور يا باشا
تسلم ايدك
فتسطينى من الضحك
وشغلتى مخى اوى

تحياتى

حبيبـــــــة القمـــــر يقول...

ياصباح الانفاس
والدماغ العاليه
انا يابنتي شاكه انك بتدرسي اساسا
انتي والشله اكيد اتسجلتوا في الكليه بالصدفه

مش ممكن الضياع دا
والزهايمر ماشاء الله مستوطن بدري بدري
علم النفس حلو صدقيني
بس انتي ركزي كده وواحده واحده
نفس نفس
متكتريش انتي مش ناقصه ضياع
ههههههههههههههه

ربنا يسعد ايامك ياميوشه
انتي وشلتك المهيسه دي

دعاء مواجهات يقول...

إزيك يافاشلة يامنيلة

إية يابنتى الفشلااان دا كلوو

لا حول ولا قوة إلا بالله

ربنا يعينك عليها

طبعا( دماغك ) دى

بيس ياقمر

اية يابت مشغولة ف اية اعترفى

انا هعرف بقى بطريقتى

نورتينى

بيس ياقمر..

maiosha يقول...

واحدة مفروسة
....................
والنبى يا مفروستى متفكرنيش إن كنت بكرها الأول قيراط فأنا بقيت أكراها بعد دخولى الكلية ديه 24 قيراط

وبعدين أعرف شخصية اللى قدامى إزاى؟؟
أنا لو ذاكرت المادة دى مش هيبقى عندى نفسية أصلا ..

maiosha يقول...

funckydoctor
...................
متفكرنيش باليوم ده

لسه لسه الصبر بكرة هتعرف الباقى كله

maiosha يقول...

بطوط حبوب
..............
ما أنا قولت كده برضة
قولت مايصحش أدخل المادة من غير ما اعرف إسمها
بس دوخونى إصحابى المقاطيع

أما الحاجة الساقعة دى.. فشكلها هتتكسر على دماغى بعد النتيجة

شفـقــة و إحســــان يقول...

وحشتينا اوى اوى يا ميوشة
انتى فين
ما حدش شاف ميوشة يا جدعان؟؟
شفقة

مسلم يقول...

اقولك حاجه بس ما تزعليش؟؟
أنا مش عارف اذا كنتي بتكلمي بجد ولا بتهزري

maiosha يقول...

momken
................
أهلا يا أستاذنا فى عالم ميوشة وشلتها

أنا يا سيدى بضرب وبلا فخر مج النسكافيه اليومى.. هو اللى بيظبطلى اليوم بتاعى زى ما إنت شايف كده

maiosha يقول...

حبيبة القمر
................
لا والله يا بنتى أنا بدرس فى الكلية دى.. هم قالولى كده

بس ربنا يخرجنى منها على خير

maiosha يقول...

دعاء مواجهات
.................
دودو نورتنى يا جدعان .. طاخ طاخ طاخ

حتى أنت يا بروتس .. أنا اللى كنت فاكرة إنك هتقوليلى برافو عليكى يا ميوشة إنك بتعملى اللى عليكى وبتعرفى أسامى المواد بتاعك .. تقولى عليا فاشلة كده؟؟


أما بقى موضوع انى مشغولة ده ..أمممممم
أصل يا ستى أنا بقيت مراءة عاملة .. البيج بوس قالى أنزل أشتغل معاه فى الاجازة
أه والله قال إيه مش عارف يقف على عربية البليلة لوحده.. من إمتى يعنى مش عارفة

يالا رضا الرب من رضا الأب

maiosha يقول...

شفقة هانم
.................
يا جدعان
أمانة عليكم اللى يلاقى واحدة إسمها ميوشة ميعديش بيها جنب أى قسم بوليس لحسن يمسكوها هناك وميرضوش يخرجوها تانى

maiosha يقول...

مسلم
..............
مساااااااااااء الخييييييييييييييير

حنين.. يقول...

يااااااااااااااه رجعتينى لايام الامتحانات. يا بنتى دا النتجيه خلاص قربت تطلع, وفكرتنى كمان ياقمره. بماده كان اسمها( علم اجتماع الادب)....... كانت مقرفه زى علم النفس كدا, بس انتى عثل وشلتك عثل, انا بقى اصحابى........ بيقروا الماده قبل يوم الامتحان ويا يفهموها يا مايفهموهاش.. ما بيهمهش, وانا .. اللى بقعد اهرى واكبت فى نفسى......... هستنى البوست الجى عشان اعرف عملتى ايه واخدتى كام نفس

maiosha يقول...

حنين
.............
نتيجة؟؟ والنبى دى سيرة تجبيها دلوقتى
بلا نتيجة بلا وجع دماغ
يحمدوا ربنا غنى رضيت ادخل الإمتحان المريض ده أصلا
هستنى نتيجة كمان

سبهللة يقول...

حلو البوست بس طويل حبيتين
ربنا يوفقكم وتنجحوا وبعدها تاخدوا نفس عميييييق
ههههههه

ادم المصرى يقول...

ههههههههههههههههههه بجد انا سعيد بى الروح التى تطير بينكم روح محبه وسرور وسعاده والاهم انكم وحشتونى اوى بجد فعلا والله العظيم وحشنى ووحشتنى المكان ده اوى يارب يديم الحب والصداقه دائما

حسن حنفى يقول...

هههههههههههههه
والله بوست مميز
تقبلوا مروري

almasry يقول...

انتى فسرتى علم النفس بس ... عاوزك تفسريلى علم نفس اعلامى .............. يعنى ايه سيكلوجية مشاهده وعنف ضد طفل وحاجات كلها مش جايبه حتى تقاويها.


تحيـــاتى
المصـــــــــ رى

blue-wave يقول...

يا نهار ابيض على الروقان
قبل الإمتحان بيوم ومش عارفين حتى اسم المادة
ولا عارفه ان بنت خالتك معاكى اصلا فى الكليه واكبر منك بسنتين
دا مش زهايمر يا ميوشه
دا خرف:))

زيزو الشقى يقول...

ادينى زورتك بتعليق وما زعلتكيش
والتعليق 2و3و4و5و6و7و8 الخ الخ الخ الخ
جاين فى السكة
بصراحة كلامك حلو قوى

وربنا يوفقكم يارب
ويوفقنا جميعن بأذن الله

السلام مع التحية
النجاح مع الأحترام


عز الدين

.:.-=- ELGaZaLy-=-.:. يقول...

طول عمرى بحس إن علم النفس ده بيجيب المرض النفسى . وإن الدكاترة النفسيين مرضى نفسيين (مع الإعتذار للدكاترة يعنى . على راسى يا باشا )حتى أى دارس عادى للمادة أو مدرس ليها .. تحس إن فيه شوية سلوك ملمسة عنده .. علشان كده طول عمرى واخده موقف من علم النفس وعمرى ما درسته قبل كده لحد النهاردة .. باين كده إن كل عقدى من علم النفس والدكاترة والمدرسين هتطلع عليا النهاردة
----------------------

انت شايف كدة يعنى با باش مهندس انا ملمس يعنى!!

وعلم النف هو علم الانفاس...

وهايجبلكو شيشة والى يشد اطول نفس
كدة يعنى..

ماشى يا ميوش...

بصى ببساطة شديدة علم النفس...هو علم دراسة سلوك البشر...
النفس بقى دة موضوع تانى..ربنا يوفقك لو احتاجتى حاجة فيها بلغينى

Amgad يقول...

هو انا عايز افهم حاجه بس
هو في ايه
انتي بتتكلمي جد ولا بتهزري
انا مش قادر اتخيل اللي بتقوليه
الظاهر الصنف بتاعكو عالي اوي

بصي انا هعرض عليكي عرض جامد اوي
انا هشاركك معايا في التلاجة تحطي دماغك معايا
وانتي تشركيني معاكي في الصنف
المفروض تكتبي يوميات طالبة رايقة ع الاخر
طيب لو مش عارفة اسم المادة
هنقول ممكن
بس موضوع بنت خالتك ده وكلية ايه
بينلي انك بتعليها اوي
مساء الخييييييييير ...وفكري في العرض

2ensan wnsan يقول...

صباح الخيييييييييييييييييييييييييييير


كلمة السر بقى على فكره دا برضه نفس انطباعي عن علم النفَس برضه محبيهوش وانا في ثانوي وما اخدتهوش والحمد لله


بس الشله بتاعتك دي ما شاء الله كده


بيس

Unknown يقول...

امممممممممممممممممم كدة ممكن نخسر بعض انا علم نفس ومجنونة وممكن ابهدلك يا بت يا تحفة انت.........
بس والله عندك حق كل الناس بتوع علم النفس دول مجاذيب انا باعترف وباقر انى لاسعة ومهبوشة بس والله العيب فية مش فيه علم النفس دة طيب و ابن حلال بس انتوا بتاخدوا ارخم حاجة فيه معلش بقى يا ميس تعيشى وتاخدى غيرها

تجربه المحب يقول...

بجد لذيذه اوى مدونتك وبعدين انا حاسه بكلامك اوى
لأننا طلبه زى بعض وربنا يسترها معانا كلنا بس انا فاضلى سنه واحده بس واتخرج
وعقبال عندكم جميعا لما نختم مشوار الندامه ده على خير

j يقول...

السلام عليكم
نحن أسرة مركز خدمة المدونين العرب نظرا لأدراج مدونتكم ضمن البحث الألبى الملبى لطلبنا بيه جميع المشاركات من حميع أنحاء العالم وسيتم فى هذا المركز تقسيم وتصنيف الموضوعات حسب المشاركات المطروحة أذا تمت الموافقة أرسلى ألينا على البريد الألكترونى المدرج داخل المركز بريدك الألكترونى لأرسال اليكى الدعوة عبر البريد وتفعيل العضوية وبعد ذلك متيح لكى طرح جميع الموضوعات بكل حرية فى المركز وشكرا

maiosha يقول...

سبهللة
.................
نورتى المدونة يا سبهلله
معلشى حكاية الطول دى هراعيها المرة الجاية إن شاء الله

maiosha يقول...

أدم المصرى
.................
ربنا يخليك يا رب .. ومتحرمناش من زيارتك أبدا أبدا ابدا

maiosha يقول...

حسن حنفى
...............
منور يا ابو على

maiosha يقول...

almasry
...................
حرام عليك يا مصرى
هو أنا قادرة على علم النفس لوحده لما هقدر على علم النفس الإعلامى ده كمان
ربنا يقوينى بس على اللى أنا فيه

maiosha يقول...

blue-wave
...............
وأنا مالى مش كفاية إنى عارفة أصلا أنا فى كلية إيه .. كفاية عليا كده أوى
هنفترى بقى !!!

maiosha يقول...

زيزو الشقى
..............
منور يا زيزو
فينك من زمان يا راجل كنت مختفى فين؟؟

maiosha يقول...

elgazaly
...................
لا يا باشا
إنت مش ملمس ولا حاجة .. ده أنا اللى بقيت ملمسة بعد إمتحان المادة دى
وبعدين أكيد هحتاجك ده لسه فيه علم نفس فى سنة تانية وتالتة ورابعة
يا لهوووووووووووووووووووووووووى

dramaqueen يقول...

مش ممكن يا ميوشة تهبلى يا اختى
ربنا يخليكى لبابا وماما
ويخليكى ليا

ولكل الغلابة اللى نفسهم يضحكوا
باى يا قمرتى

maiosha يقول...

amgad
...............
ماشى يا أمجد أنا موافقة
أول ما التلاجة تفتح هجيبلك الصنف وأجى على طول

Amgad يقول...

انا في انتظارك

Ahmed Mostafa يقول...

ايام المتحانات
الله يلعنها دي ايام
بس حلوة النكتة بتاعة واحد نفسه اتقطع كنت هعيط فعلا

مدونة عيش وحلاوة

نونو يقول...

كنت فاكرة انى اشقى واحدة فى الدنيا
بس يلا مش مشكلةاحنا اخوات
دومتى فاشلة

غروب يقول...

ههههههههههه انا شاكه انك واحده اعرفها يا ميوش اولا انا بدرس نفس دراستك الله يقطعه عمو شكسبير على كريستوفر مارلو على الكل كليله

وعلى فكره صدفه غريبه اووووووى

لانى اسمي وسط اصحابي ساسو وبالفعل كنت ليله الامتحان اسال عن اسم الماده والله ههههههههههه

بس انا لو مكانك هروح طبعااااا دور باب احلى بكتيييييييرررررر وزولى وزنى 9 كيلو بس الحمد لله .ههههههههههه

باااااى

أبو العريف يقول...

اخوانا يا شلة متقاطيع
لو تسمحو بس ثوانــــي
انا حد معجب بيكو جــدا
افكاركو حلوه وعجبانـي
عامل مدونه مجنونــــــه
علشانكو برضه وعلشاااني
بس اسمحولي انضملكــــــو
وابقي معاكو وانا مكاني
هنعمل معا شله جميلــــه
ميوشه
هبدأ بميوشه ويالـــــــة
اسمع كلامي ومزازيكـــــي
وهقولها يا انجح فاشلــــه
ياللي الفشل مخلوق ليكــي
اما انت من بين الشلــــه
تسلملنا كده حكاويكــــي
وخديها من اخوكي نصيحـــه
اصل الشهامه وخدانـــــي
لو مره قاعدة جوه كتــاب
والدنيا مضيقه عليكــــي
فورا قومي قالعه الشرااب
وشمي ريحة رجليــــــــــكي
هتلاقي احساسك اتخـــــــدر
والدنيا وسمعت حواليكــــي
ويجوز كمان عقلك يقـــــدر
يفهم ماد صعبة عليكـــــي
ويفك طلاسيم مناهجهـــــــا
و علي المذاكرة يقويكـــــي
وبلاش تشمي مره كمـــــــان
اصل الزيادة وحشه عليكـــي
يزيد عالفشل حبة ادمــــان
عليه العوض يا اختي عليكــي
درش
وانت يا درش يا درووووشه
اوعاك تبطل يوم دوووشـــه
ادوشنا يا ابني كمان وكمـان
واسمع نصيحتي المرووشـــــــه
لو مره قاعد في الاوتوبيــس
عمال بتدوش في الركــــاااب
وعدي جنبك جوز نسانيــــس
بيبصو ليك بصة اعجـــــــاب
روّح اوااام غير شكــــــلك
او استخبي في اي دولاااااااب
دول فكرووك تامر حسنــــــي
جمهوره بقي- والشوووق غلااااب
من ما حكيتلنا عنـــــــــه
بهت عليك شكله الجذاااااااب
بس اوعي تزعل يوم منــــــي
بتمني اننا نبقي اصحااااااب
نعكووووشعه
نعكوشه بقي دي حدوتـــــــه
حكايتها كده مش طبيعيـــــه
في طيبتها طفله صغنطوطـــــه
وفي الشقاوة معديــــــــــه
احلامها شخابيط رسمتهـــــــا
ورسومها احلام مرئيــــــــه
تسلملنا وليها شخابيطهــــا
والشخبه في طبعها غيـــــــه
بس اسمعيني يا نعكوشــــــــه
وانتبهي للفقرة الجايــــــه
لو مره عاكستك الايـــــــام
و اتنعكشت بس شويـــــــــة
و القطر داس علي احلامـــــك
والدنيا رزعاكي بنيــــــــه
اوعاك تبطلي شخابيطــــــــك
وافعي علي الدنيا قضيــــــة

بصوا يا جماعة دي غنوه انا بهديهالكم
وبقتريح عليكم فكرة اننا نعمل مدونه مشتركه لاننا تقريبا نفس الافكار والاسلوب والدمااااغ مدوانتكم عجباااني جدا لذلك بقترح نشترك في مدونه مع بعض ونسميهامبدئياا ( شلة المقاطيع)ودي هتفيدنا جدااا لان كل واحد مننا هيعملها دعايه علي المدونه بتاعته وقراءة هيدخلوها وبالتالي هيتعرفوا علي الباقيين وعلي مدوناتهم وافكارهم واسف اني طولت بس يا ريت الفكره تعجبكوم وماتزعلوش من الاغنيه لو كانت ساخره شويه

ردو عليه