الأربعاء، 9 يوليو 2008

مليون دولار



تانى يوم الإمتحان صحيت من النوم وأنا مفعمة بالنشاط والحيوية .. أخيرا النهاردة الخميس يومى المفضل فى الإمتحانات.. علشان مش هيبقى عليا إمتحان تانى يوم .. الجمعة عندنا أجازة ومش بنمتحن فيه .. علشان كده الإمتحان هيبقى يوم السبت اليوم الوحيد اللى قبله يومين أذاكر فيهم مش يوم واحد . أنا بقى قررت أحتفل باليومين دول .... يعنى بقالى إسبوع بحاله بذاكر .. خلاص فرهدت،أخد يوم راحة بقى .. وبكرة أبقى أذاكر المادة الجاية اللى لسه معرفهاش.


صحيت من النوم قمت ناطة من على السرير جرى وجريت على حبيبى وروح قلبى (كيمو).. متفهمونيش غلط .. كيمو ده يبقى الكمبيوتر بتاعى .. رحت للكمبيوتر وفتحته وأنا عمالة أسمع صوت الى إإإآى أأوووؤؤ .. بتاع الفتح ولا كإنها معزوفة لبيتهوفن ( مين الراجل ده؟؟)

المشكلة بقى إن ماما حبيبتى سمعت هى كمان الصوت ودخلت عليا الأوضة وأنا متلبسة بالجرم المشهود


ماما حبيبتى : صباح الخير يا ميوشة اللى اللى صحاكى بدرى كده مش عوايدك يعنى


أنا : أصل النهاردة أجازة


ماما حبيبتى : أجازة؟؟ أجازة إيه ؟؟ هو إنتوا لحقتوا تمتحنوا؟؟


قعدت من أول تانى أحكيلها على اليوم الأجازة اللى أنا إكتشفته


ماما حبيبتى : أنا قولت برضة،عوضى عليك يا رب .. إبقى قابلينى لو فلحتى ، وبعدين قايمة جرى على سى كيمو بتاعك ده.. طيب إغسلى وشك الأول بدل ما إنتى معمصة كده وشكلك يقرف


وقامت ماما حاطة المرايا قدام وشى .. أنا أول ماشفت اللى فى المرايا صرخت .. كان كائن إسطورى أشبة بميدوسا وشعرى واقف وعينى مقفولة .. الله يكون فى عون اللى بيبصوا فى الوش ده كل يوم


أنا : حاضر يا ماما هغسل وشى .. علشان خاطرك إنتى بس


ماما حبيبتى : هو غسيل الوش كمان محتاج واسطة وخاطر ؟؟ إن الله مع الصابرين


بعد بقى غسيل الوش وكورس النضافة ده .. فتحت الإيميل بتاعى.. أه ما أنا عندى إيميل .. أمال إيه؟؟ قوم إيه ألاقى عندى إيميل.. أه والنبى عندى إيميل .. ببص على الإسم لقيت كلمة بالإنجليزى غريبة كده .. كونجراتييلاشن .. طيب بالله عليكم دى كلمة . بعد الإستعانة بالقاموس إكتشفت إن الكلمة دى معناها (مبرووك) .. مبروك .. مبروك على إيه؟؟ هى النتيجة طلعت؟؟ ولما يمكن أكون إتخطبت وأنا مش واخدة بالى ولا حاجة ؟؟ يارب أكون إتخطبت .. يارب أكون إتخطبت .. فضلت أقول الكلمة دى وأنا بفتح الإيميل ومستنية بقى صورة العريس تظهر قدامى .. لكن سبحان الله ظهرلى حاجة تانية خالص


الإيميل كان فيما معناه إن شركة معينة كانت بتعمل حاجة زى قرعة كده بين المستخدمين وأنا طلعت فى القرعة دى وكسبت.. كسبت كام؟؟

مليوووووووووووووووووون دولاااااااااااااااااااااااااااار

أنا قريت الرقم جاتلى صدمة نفسية عصبية .. مليون دولار .. ممكن بجد .. ممكن واحدة زى شخصى المعفن تبقى مليونيرة.. مليون دولار دول يعملوا يجى 6 مليون جنية مصرى .. ده بالميت كمان .. خلاص أنا هيغمن عليا .. مش قادرة .. يا أصحابى يا اهلى يا جيرانى أنا عايز أخدكو فى أحضانى .. مش قادر على فرحة قلبى .. مش قادر أبدا يا حبايبى


جريت على ماما حبيبتى لاقيتها قايده التكييف فى أوضيتها ونايمة نومة بعد الغدا اليومية ( الكلام ده كان بعد الغدا )


أنا : ماما .. مامااااااااااااااا .. إلحقينى يا ماما .. إمسكينى يا ماما


ماما حبيبتى : إيه ؟؟ فيه إيه؟؟ إيه اللى جرى ؟؟ حد حصله حاجة؟


أنا : أيوة يا ماما أنا .. انا حصلى


ماما حبيبتى: حصلك إيه يا حبيبتى مالك؟؟


أنا : مش هتصدقى ياماما جالى إيميل بيقولى إنى كسبت مليون دولار


ماما حبيبتى ( وهى بتحاول تمنع إيديها تسلم على وشى ) : حسبى الله ونعم الوكيل بقى مصحيانى من النوم علشان الهبل ده


انا: هبل ؟؟ هبل إيه بس يا ماما ؟ بقولك مليون دولار


ماما حبيبتى : ايوة هبل ونصب كمان.. إنتى تكسبى مليون دولار ؟؟ طيب أنا راضية ذمتك ده منظر يبقى معاه خمسة جنيه حتى؟؟


وطبعا ضيرتلى ظهرها .. وقالتلى جملتها الشهيرة ( جتها نيلة اللى عايزة خلف )


أنا بقى بعد كورس الإحباط ده قررت إنى لازم أقاوم ولا للإستسلام .. وروحت تانى علشان أشوف إزاى أقدر أستلم المليون دولار دول.. لاقيت إنى لازم فى خلال 30 دقيقة أتصل بالرقم المجانى بتاع بلدى علشان ياخدوا بياناتى .. الرقم مجانى الحمد لله.. رصيدى مش هيضيع .. ببص على التايمر اللى موجود على الشاشة لاقيت فاضل ربع ساعة بس .. يالهوى الجايزة هتروح منى.. جبت التليفون جرى وإتصلت بسرعة قبل ما الوقت يخلص .. ردت عليا واحدة كتكوتة بتتكلم بالإنجليزى .. طبعا قالت كلام كتير مفهمتش منه غير كلمة فيزا .. أكيد بتسالنى على فيزا .. أنا مبقاش على لسانى غير


نو فيزا نو.. نو فيزا .. تقولى طيب مامتك أو باباكى عندهم.. أرد أنا وأقول (نو فيزا.. نو نو)


البت قامت قايلالى متشكرين وقامت قافلة السكة فى وشى .. أه يا....... ، يعنى خلاص مفيش أمل مفيش مليون دولار مفيش اى حاجة .. اعمل إيه ؟؟ أعمل إيه .. التايمر قدامى عمال يعد مش فاضل غير 4 دقايق بس .. قولت أجرب تانى يمكن نتفق مش لازم مليون دولار .. كفاية نص ..طب ربع . المهم جيت أتصل تانى ..لقيت صوت بنت برضة بس صوت بقى انا حافظاه .. وبتقول


(رصيدك الحالى لا يكفى لإتمام هذه المكالمة ) .. عاااااااااااااااااااااااااااااا


**********************************


قى قاعدة صفا بليل كده قعدت أحكى لماما بعد ما صحيت بقى حكاية المليون دولار .. ورصيدى اللى طار .. وبعد الضحك والتريقة .. ماما قالتلى


ماما حبيبتى: تصدقى يا بت يا ميوشة .. هتصدقى إن شاء الله .. إنتى لما قولتيلى على موضوع المليون دولار ده لما نمت قعدت أحلم بيه؟؟


أنا : حلمتى بإيه ؟؟


ماما حبيبتى: حلمت إنك كسبتى المليون دولار وحولتيهم 6 مليون مصرى.


أنا : تمام .. حلو أوى .. مع إنه حلم .. إهئ إهئ


ماما حبيبتى : إستنى بس.. وبعدين إنتى بقى يا ميوشة بقلبك الطيب الكبير وزعتى علينا الفلوس .. أنا مليون وباباكى مليون وأختك مليون . وإنتى التلاتة الباقيين .. أنا بقى خدت المليون بتاعى . ونزلت الشارع وإديت للشحاتة اللى على أول الشارع دى فلوس وإشترتلها شقة صغيرة بدل ما هى بتنام فى الشارع كده .. ورحت لسوسن قريبتنا اليتيمة دى .. فرحها قريب .. نزلت معاها وإشترتلها حاجات جهزها الناقصة والبنت كانت طايره من الفرحة .. أى والله كانت فرحانة خالص.. والزبال إشترتله جلابية جديدة وجبت لولاده لبس جديد.. ولا أم صلاح كله كوم واللى أم صلاح عملته كوم .. دفعتلها الفلوس اللى كان إبنها مديون بيهم .. الست كانت هتموت من الفرحة ومكنيتش عارفة تعمل إيه ؟؟ يااااااااااااااااااه .. والله كان حلم جميل


أنا : بس إنتى كده مش هيتبقالك فلوس يا ماما خالص .. ياااااااااه يا ماما ده إنتى طيبة اوى


ماما حبيبتى : يا بنتى مش حكاية طيبة ولا حاجة ، بس أنا بحب إن لما ربنا يفرجها عليا أفرجها على اللى حواليا .. مش مهم الفلوس المهم اشوف الفرحة فى عنين الناس


أنا : لا لا يا ماما إنتى فهمتى غلط خالص أنا مش قصدى على كده


ماما حبيبتى : أمال قصدك على إيه ؟؟


أنا : أنا قصدى إنك طيبة علشان حلمتى أصلا إنى هديكم فلوس .. أنا لو خدت الفلوس دى .. ولا هعرفكم بعد كده .. أنا هبقى مليونيرة .. قال أديكم فلوس قال


ماما حبيبتى.. لأ مقالتش حاجة .. هى جريت ورايا بالشبشب .. هو أحسن رد .. أه خلاص كفاية .. إنتى شوفتينى كسبتهم يا ماما يعنى .. عاااااااااااااااااااااااا.. إلحقونى

هناك 66 تعليقًا:

Alkomi يقول...

هههههههههههههههههههه

دانتي غلبانة اوي

انا جالي 25 مليون جنيه استرليني

يا بنتي دي حوارات عشان تحوليلهم مبالغ مالية

و بعدين دي اول رسالة

هما رك ما عرفوا ايميليك استني من ده كل يوم خصوصا انك رديتي

ممكن اديلك باسوورد ايميل من ايميلاتي اللي مشغلهم عندي بالاجرة

هتلاقي بييجي فيه اسبوعيا من ده كتير

طيب اقوللك حاجة تانية

اللي بيبعت يقولك انا مدير بنك و في واحد مات و مالوش ورثة و عملت تحويل باسمك قبل تاريخ وفاته و لو قبلت هنقسم الوديعة

بس احلى حاجة موضوع ميدوسا ده

قوليلي بقى ثقافتك اجريجي و لا احمد خالد توفيق ؟

Unknown يقول...

ازيك يا ميوشه
وحشتني مدونتك بجد

عارفه انا بجد معجب اوي بشخصيتك المرحه دي
انا بقيت اجيلك مخصوص عشان اشوف فاصل من الهزار الصادق اللذيذ
انا قريت البوست كله ويا بختك بوالدتك
ست طيبه اوي ربي يخليهالك

ربنا ينجحك يا اجمل طالبه
وتحياتي ليكي

2ensan wnsan يقول...

صباح الخير يا تركيا

ايه يا بنتي دا كله مليون دولا بس دانا جالي حوالي عشره خمستاشر رساله باتنين مليون ونص استرليني احسبيهم بقى وكذا مليون بالدولار عادي جدا وكلهم بنفس الصيغه ملياردير مات وملوش وريث او واحده عايزه تنقل كل استثمارتها في بلدك الغلبانه والمفروض تبعت لهم رقم حسابك عشان تحول لك الفلوس وكده وانتي المفروض عرق الانتماء ينفض بقى وتبعتيلها رقم حسابك عشان استثمارات بلدك ..

وكل دي في الاخر اشتغالات نصيحه ما ترديش على الرسايل اللي هتجيلك بعد كده


بيس

blue-wave يقول...

والله دمك عسل يا ميوشه:))
بس كدا برضه؟
تاخدى ال 6 مليون لوحدك؟
ليها حق مامتك تجرى وراكى بالشبشب:))

shahieno يقول...

أولا مبروك يا مى على البلوج
ثانيا دة أول رد ليا على بوستاتك

ثالثا إستنى بس أنا بجرب هرد عليكى لما أتأكد إنه هيبعت

shahieno يقول...

إيه لسه بجرب عندك مانع؟؟

حلوة الصورة يا ميوش؟؟

Miss. Sosa يقول...

هههه لا طيبة طيبة

بس اوعى تصدقى ايميلات النت ديه فى ناس اتنصب عليهم فعلا من الموضوع ده خصوصا فيلم الراجل اللي مات ومالوش ورثة ده وعايزينك تقومي بدور اليتيم في الفيلم ههههههه الايميل ده بيجيلي منه كتير اوي

تحيــاتى

Darsh يقول...

هههههههههههههههههههه

يا نهار أبيض

ده انا كل ما أخش على الجانك و لا البالك على الايميلين الياهو و لا الهوت .... ما انا عندي أيملين و الله ...

كل ما أدخل عليهم الاقي يا إما جوايز كسبتها يا إما ناس عايزة تورطني في غسيل أموال و يدوني عمولة بتعدي الملايين

يا ميوشة نفشي للكلام ده كله

دول عالم نصابين و خاصة بتوع غسيل الأموال دول

almasry يقول...

مليون دولار؟


؟
؟
؟
؟
؟
؟

عبده الرايق يقول...

ههههههههههههههههههه
نو
نو
نو
انا بضحك عليكى
هما استفردوا بيكى وضحكوا عليكى بتوع الاتصالات دول
عوضنا على الله
انا بحييى امك انها استعملت معاكى السلاح الشبشبى علشان متصدقيش الناس دول تانى

كيكى عوووووو يقول...

عوووووووووووووووووووووووووو
انا جيت اتخديتى
............................
هههههههههههههههههههههههه
يامفترية...
مامتك ..عندها حق تظبطك
هههههههههههههههه
عووووووووووووووووووووو

maiosha يقول...

محمد الكومى
....................
25 مليون جنيه إسترلينى؟؟

يابختك.. ده أنا كانوا بس مليون دولار عمى
وعامل كمان إيميل للإعلانات بس .. يا جباروتك يا أخى

إجريجى.. وأحمد خالد توفيق؟؟ مين الناس دول؟؟ ولا أعرف حد يا حضرة الضابط
وميدوسا دى إسم الدلع بتاعى اللى كل الناس بيقولوهولى لما بصحى من النوم

maiosha يقول...

bar2sh
.................
ربنا يخليك يا برقش والله .. الحمدلله إن المدونة بتاعى بتعمل أى حاجة حتى لو كانت إبتسامة عند برقش

أما ماما بقى يا سيدى .. دى ليها مغامرات كتير.. أمال أنا طالعة لمين يعنى؟؟

maiosha يقول...

wa7ed 2ensan
.........................
صباح الخير فيتنام

ده والله أول إيميل يتبعتلى من النوع ده
بس حلوة بتاعة روح الإنتماء ده
يعنى إنت تتوقع إن واحدة زى ممكن يكون عندها رقم حساب أصلا

يعنى أول مرة فى حياتى أكسب حاجة تطلع إشتغالة

عاااااااااااااااااااااا

maiosha يقول...

blue-wave
....................
يعنى هو إنت كنت شفتى خدتهم .. إيهئ إهئ

أدى أخرة القر .. بصينلى كمان فى الكام مليون عمى اللى كنت هكسبهم

maiosha يقول...

shady - shahieno
......................

يااااااااااااااه تصدق يا شيدو أنا كنت فقدت الأمل إنى ممكن أشوفك عندى فى البلوج .. مبروك الحساب الجديد

ياسيدى جرب براحتك البلوج بلوجك .. والله لو عايزنى أمشى وأسيبهولك خالص أمشى

أما الصورة تحفة طبعا مش عايزة كلام
أبو تريكة الفنان .. بس حاسب علشان هنا فى زملكاوية كتيير

maiosha يقول...

miss sosa
....................
إيه الفيلم الابيض وأسود ده .. بجد بيبعته يقولوا كده؟؟

أنا عمرى ما جالى إيميل زى كده أبدا

maiosha يقول...

darsh
................
يا خبر أبيض جرى إيه يا جماعة هو كلكم إتبعتلكم الإيميلات دى؟؟ ما شاء الله أو مرة ألاقى إجماع على حاجة بالمنظر ده

maiosha يقول...

almasry
..............
أه متفكرنيش
إهئ إهئ

maiosha يقول...

عبده الرايق
................

بقى بتحى ماما يا استاذ عبدة .. الله يسامحك .. ماما بتستعمل السلاح الشبشبى ده أكتر ما بتلبسه فى رجلها أصلا

maiosha يقول...

كيكى
................
يامى .. أيوة أتخديت خالص

والله حرام عليكم كلكم شمتانين فيا وماما عمالة تضحك عليا .. ليه بتعملو فيا كده .. إنتوا معندكوش إخوات بتنضرب ؟؟

Unknown يقول...

تصدقى يا بت يا ميوشة؟ هتصدقى ان شاء الله.............انت فظيييييييييييييييييييييييييييييعة والنعمة الشريفة انت عسل يا بت بس باين عليكى شريرة كدة ماتديش لمامتك الفلوس؟؟؟؟؟؟؟؟

كيكى عوووووو يقول...

عووووووووووووووووووووووو جيت تانى اتخديتى تانى
............................
اخوات بتضرب؟
ياما دة انا بتعلق كل يوم وقبل الفطار والعشاء كمان
............................
كدة خلتنى افضح نفسى
روحى يا شيخة وتعالى بسرعة
عووووووووووووووووووووووووووووو

maiosha يقول...

enjy
...............
أنا شريرة ده أنا طيبة جدا .. مش كفاية إنى قاعدة معاهم فى البيت ومنوراهم بطلعتى البهية رغم إنى كنت هكون مليونيرة .. واحدة زيي كانت المفروض دلوقتى تكون مدلعة مش بيجروا ورايا بالشبشب

maiosha يقول...

كيكى
.................
إيه ده؟ هو كل مجية بخضة جديدة ولا إيه؟؟
ده انا كده مرة كمان وشعرى هيقف ويتكهرب .. براحة عليا يا كيكى
وبعدين أنا عندى فلا البيت بيعلقونى لما بصعب عليهم التعليق ده بالنسبة لشبشب ماما عامل زى فسحة العيد كده

funckydoctor يقول...

هههه
أهلا بالميدوسا
قال مليون بتاع قال ما تخلينيش أقولهم على التلاتة جنيه اللى انتى محوشاهم فى الشراب مش عايزين نسيح لبعض :P
على فكرة الحداية ما ترميش كتاكيت واشمعنى انت يعنى
وابقى قوليلنا الشبشب طالك ولا لأ

زى الهوا يقول...

هههههههههههههههههههههههه

الناس النصابة خلصولك رصيدك , وبعدين انتى تلاقيكى ماغسلتيش وشك كويس بس , تفاءلى خير , إن شاء الله بكره لما تشتغلى تبقى مليونيرة , بس انتى ذاكرى بس وخلصىىىىىىى


بوست حلو , ودمك سكر

bastokka طهقانة يقول...

hhhhhhhhhhhh
عسولة قوي
تصدقي فعلا اليوم الوحيد اللي ولادي بيصحوا فيه بدري يوم الاجازة
و ايام الامتحانات و الدراسة بيطلعوا عنيا في الصحيان
يا سلام فكرة المليون زورار دي حلوة قوي

اوروفوار

اربعين سنة ستيوتند يقول...

ياااااااااه
ده انا علي كده جالي كتير
بس قلت احوش عشان العريس
اكيد مادام كل مرة فلوس
فيه مرة بعريس
عسسسسسسسسسسسسسسل

Princesa ... WHiSPeR يقول...

زماااااااااااان كانت بتجيلى الايميلات دى
دلوقتى بيبعتولى عرسان لما لاقونى مترفعه عن الفلوس ههههههههه
والله دمك سكر فى وصف الموقف

maiosha يقول...

funckydoctor
..................
صباح الصباح يا عم الحاج
هو إنت لسه هتسيحلى ما إنت سيحتلى خلاص
وبعدين الى قالك على موضوع التلاتة جنيه ده خدعك .. ده كلهم إتنين جنيه إلا ربع
وبعدين يا سيدى مكسبش ليه يعنى هم هيلاقوا أحسن منى علشان يكسب ده أنا قمر
بس بلاش الغيرة والحقد اللى فى قلبكم دول .. أول ما عرفت إنى هبقى مليونيرة باصتلى فى التلاتة جنية على طول

maiosha يقول...

زى الهوا
...............
أه خلصولى رصيدى .. ده أنا كنت لسه شاحنه بعشرة جنيه
تعاطفك لوحده مش كفاية إتبرع ولو بجنيه

maiosha يقول...

طهقانة
.............
شكلك كده يا طهقانة أم زى أمى تمام
أوعى تكونى بتجرى ورا أولادك بالشبشب برضة .. والله حرام أنا ورمت خلاص من لشبشب ده .. منه لله اللى إخترع الشباشب

maiosha يقول...

أربعين سنة ستيوتيد
......................
تفتكرى يا أختى .. ممكن فعلا يجى العريس

من بقك لباب السما
لووووووووووووولى.. زغروتة مقدما

maiosha يقول...

whisper tangoo
..................
إيه ده يعنى حكاية العرسان دى مش إشاعة بقى
طيب كويس الواحد بقى يجهز نفسه فى إنتظار العريس

oRiGiNaL HeArT يقول...

هههههههههههههههههه
فكرتينى بنفسى لما جالى اول ايميل من الايميلات اياها
بس لعد كدة جالى تبلد بقى
كل يوم والتانى يجيلى منهم بالهبل
:>

Soooo يقول...

ههههههههههههه

اسلوبك ساخر وحلو مووووووووووووووت

وفعلا انتي طيبه حتى لو ما اديتيش حد من اهلك ولا مليم
عارفه طيبه ليه
عشان صدقتي ان في حاجه ببلاش اليومين دول
قال مليون زورار قال

دول يجيبو كام علبة كولوباطرا بوكس ؟؟؟؟



ربنا يبسطك ويسعدك ويكرمك ويوفقك ويرضيكي دنيا وآخره على الكام ضحكه اللي ضحكتيهمني عالصبح




سلاموووووووووووز

حبيبـــــــة القمـــــر يقول...

ههههههههههههههههههههههههههههههههههههههههههههههههههههه
مش قادره والله
طول منا بقرا وانا متخيله منظرك
والفرحه ياعيني بتنط من عينك
وقلبك صوت ضرباته سامعينها الجيران
وعلى ايه
كله اونطه ونصب في نصب

ربنا يباركلك يابت ياميوشه
وربنا ضحكتيني
بس انتي طلعتي ندله ندله
انا لو منك وجاني مبلغ في اللذيذ كده
طبعا
طبعا
طبعا
هفلسع اكيد هههههههههههههههههههههههههههههههههه

حبيبـــــــة القمـــــر يقول...

بقولك ايه يابنتي
عشان انا اعصابي بتتعب والله
حروف التأكيد دي
جابتلي انهيار عصبي وحول في عيني
الغيها بليييييييييييييييييييييز

عروسة ننوسة يقول...

مليون دولار حته واحدة يا ميوشا ...هههههههههههههههههههه
انتى سكر بس بقولك ايه بالنص

maiosha يقول...

original heart
....................
يا رب متجليش إيميلات من دى تانى
علقتنى بحبال الهوا الدايبة

maiosha يقول...

soooo
..............
ربنا يكرمك إنت بجد على الكام دعوة الحلوين دول

ربنا يخليك ويسعدك بجد زى ما فرحتنى بالدعوات دى

maiosha يقول...

حبيبة القمر
.................
وحبيبتنا كلنا
يابنتى الندالة دى مبدأ فى الحياة
لو لم أكن نادلة لأكيد كنت هبقى أى حاجة تانية

بجد يا جميل أنا معرفش إن فيه الحروف دى .. طيب ما تكسبى فيا ثواب وتقوليلى ألغيها إزاى .. معلشى صحبتك جهلة

maiosha يقول...

عروسة ننوسة
..................
إنتى اللى سكر والله يا قمر

نورتينى.. ونورتى المدونة كلها

PrInCeSS BeRy يقول...

ازيك يا ميوشة عاملة اية جية اطمن عليكى باى يا قمر

شفـقــة و إحســــان يقول...

ياناااااس يااااا هووووووووووه
مايوش عمالة تحكيلكم عن اللي حصلها
وازاي اتنصب عليها
ومامتها حلمت معاها
ووزعت مليون جنيه في ساعة زمن وهي نايمة
وانتوا ولا انتوا هنا ؟؟


30 رسالة تعاطف جيالها ؟؟
مافيش تبرع واحد ؟؟
مش واخدين بالكم ان دي حملة تبرعات ؟؟
تعاطفك لوحده مش كفاية
اتبرع ولو بكارت شحن من أبو 10 جنيه


إلا صحيح يا ميوش
انت موبينيل ولا فودافون ولا اتصالات ؟؟
علشان التبرعات العينية
وتحبيها كروت ولا تحويل رصيد ولا شحن ع الطاير ؟؟


إحســــان يا اهل الاحسان
من سنترال دردشة اللي ع الناصية

غادة يقول...

ههههههههههههههههههه
ميوشه انتى عسل
كلنا كسبنا كده يا بنتى و نحلم بقى هنعمل بيهم ايه وكده وفى الأخر نكتشف انه نصب فى نصب
يلا تعيشى و تاخدى غيرها
على فكره مامتك زى العسل امال انتى طالعه لمين سلميلى عليها
سلام مؤقت يا جميل

Lady E يقول...

هههههههههه اه فعلا يا ميوشه ايه كونجراتيوليشن دي كمان بقى ده كلام برضه

طب امتحانتي في عمنا شكسبير ازاي ده كل كلامه زي كونجراتيوليشن كده

والحمد لله ان نو فيزا والا كانوا خلصولك رصيد الفيزا دول ما بيصدقوا

ان شاء الله يجلك العريس اللي بتتمنيه وبدل المليون دولار تكسبي مليون حسنة علشان دمك الخفيف ده وانك بتخلينا نبتسم ونضحك في وقت الابتسامه نادره فيه

ربنا يوفقك يا قمر

maiosha يقول...

pnicess bery
...................
أنا تمام يا جميل الحمد لله
إيه أوعى تكون طلعت إشاعة عليا إنى جالى إنفلونزا الطيور ولا حاجة؟؟
منتحرمش من سؤالك ابدا يارب

maiosha يقول...

شفقة هانم وإحسان بيه
...................
يا سلام .. من موقعى هذا أحب أوجه أحلى تحية للمدونين اللى عندهم نظر واقولهم ألف ألف شكر ونجاملكم فى الأفراح إن شاء الله

أنا موبينيل .. وياريت بقى الشحن يبقى على الهوا علشان الرسايل المجانية
وياريت الشحن ميبقاش أقل من 10 جنيه

يالا كل ما تبعت أكتر فرصتك فى الفوز تكتر ( فوز إيه؟) يا سيدى حسنات إن شاء الله

maiosha يقول...

نور
.............
يا جماعة كلكم معجبين بماما كده ليه؟؟
كل ما تقرا تعليق تبصلى من فوق لتحت وتقولى شوفتى أمك بقت مشهورة
دى بكرة تعمل بلوج لوحدها .. ومحدش يعرف يكلمها

maiosha يقول...

lady e
................
مين شكسبير ده ؟؟ أنا حاسة إنى سمعت الإسم ده قبل كده
فين فين؟؟ يكونشى ده اللى بيلعب فى مزارع دينا؟؟
ولا يكون واحد زميلنا فى الكلية.. هبقى أسأل وأقولك

أما حكاية العريس ده .. فيا مسهل يا رب

mohamed يقول...

هوه انتي خدتي من اللي تحت الحوض؟؟؟؟؟؟؟؟؟؟؟؟؟؟

شهد الملكات يقول...

ههههههههه
انتى دمك سكرررر
يارب اكون اتخطبت يارب اكون اتخطبت
ربنا يعوض عليكى فى المكالمة المجانية
و ايه النداله دى مش هتدى مامتك فلوس
عندها حق تضربك
معلش الضرب للجدعان
دى اول زيارة ليا و أكيد هتتكرر ان شاء الله
السلام عليكم

dramaqueen يقول...

يخرب عقلك يا ميوشة
سكر وكلامك يهبل من اول البوست لاخرة باضحك

تسلمى يا قمرى

maiosha يقول...

mohamed
...............
مش أبلة نظيرة هى اللى قالت إغسلى الفرخة بالدقيق؟؟

maiosha يقول...

بنت مصرية
...........
نورتى المدونة يا قمر
ده شرف ليا أنا إن المدونة عجبتك
ويشرفنى طبعا تكرار الزيارة
بس بلاش الزيارة الجاية تكون زى دى بإيد فاضية .. إدخلى عليا كده بكارت موبايل ولا حاجة

مستنياكى دايما تنورينى

maiosha يقول...

dramaqueen
..............
أخيرا أختى حبيبتى نورتنى
إنتى فين يا ست الكتكوتة.. مختفية فين بقالك كل ده؟
والله وحشتينى مووت وقلقتينى عليكى جدا
متبقيش تتأخرى عليا كده

تسلميلى يا قمر

. يقول...

ezayk ya a7la maiosha , 3amla eih? ya rab tekony bekhair

ادم المصرى يقول...

مشاء الله ربنا ميحرمكو من بعض ابدا ان شاء الله وينحك عشنها بس بوست بجد جامد جدا عجبنى اوى مدونتك وحشتنى جدا بس اعمل ايه بقه شغل وقرف معلش

موناليزا يقول...

هههههههههههههه
ده اقل واجب والله مامتك دى عسولة اوى ربنا يخليهالك
ويمكن عشان نيتك دى ماكسبتيش

maiosha يقول...

aliaawwe
............
إزيك يا قمر.. أنا الحمد لله تمام .. إنت أخبارك إيه؟؟
والله فيكوا الخير بتطمنوا عليا بعد العلقة

maiosha يقول...

أدم المصرى
...............
يا أدم مش تقول دعوتك دى موجهه لمين بالضبط
يعنى إنت بتقول ربنا ميحرمكوش من بعض
أنا وماما .. ولا أنا وشبشب ماما؟؟

والله إنت كمان وحشت المدونة وربنا يعينك ويقويك

maiosha يقول...

موناليزا
...............
يا سلام يعنى نيتى هى اللى مكسبتنيش
طيب خلاص الرة الجاية لو كسبت هبقى أدى لكل واحد 100 جنيه
يالا إنشاله ما حد حوش

مصعب رجب يقول...

عموما تستاهلي علشان كان المفروض توزعي 2.5 في المية ( النسبة الشرعية للزكاة )

وفي الآخر برضو مش ليكي بركة غير الست الوالدة

أبو العريف يقول...

تتجوزيني