كل سنة وانت طيب يا جميييييييل

سنة حلوة يا جميل .. سنة حلوة يا جميل

سنة حلوة يا مدونتى حبيبة قلبى

سنة حلوة يا جمييييل

يااااااااااااااااااااه .. سنة.. سنة كاملة .. اه والله .. مدونة يوميات طالبة فاشلة تمت النهاردة سنة كاملة

سنة كاملة وأنا بكتب يومياتى الفاشلة أنا وشلة الأنس

سنة عرفت فيها أصحاب بجد .. أحلى اصحاب .. ناس اتعرفت عليهم شخصيا .. وناس همووووت واشوفهم واقابلهم ..ناس أتأثرت بيهم جدا جدا.. وناس عجبتنى دماغهم .. وناس لغاية دلوقتى مش عارفة ايه الحل فى دماغهم دى بالظبط

المهم إنى أقدر اقول إنها كانت فعلا .. سنة حلوة يا جمييييييييل

وبالمناسبة دى شلة الأنس كانت عايزة تقول كام كلمة كده للمدونة اللى كانت مكان تجمعنا التانى (بعد سلم الكلية طبعا)

ميرو :عيد ميلاد البلوج ؟؟ يعنى المفروض أعمل ايه يعنىبمناسبة عيد ميلاد البلوج ده .. اقوم أرقص عشرة بلدى؟؟ ده أنا مبحتفلش بعيد ميلاد أبويا.. احنا يابنتى ناس على قد حالنا ومنعرفشى الكلام ده .. بس على العموم لو فيه تورتة ولا حاجة ساقعة أكيد هاجى يعنى..نيهااهاهاهاهااهاها

إيمو : كل سنة والبلوج طيب وعقبال ما أشوفه عريس .. وبرده هفضل اكتب فيه وهفضل زى القمر وعيونى " اللى هى أجمل عيون" هتفضل زى ما هى .. ملحوظة " أنا متواضعة جدا ..وإن شاء الله هنزل صورتى علشان تعرفوا بنفسكم" وأخيرا ربنا يخلينى ليكم.. لإنكم من الأخر من غيرى ما تساوش حاجة " تواضع .. تواضع يعنى"

الإمضاء: أجمل بنات العالم " مطلوب عريس ضرورى"

موها: كل سنة والمدونة طيبة.. وعقبال مليووووون سنة.. وأنا طبعا هبقى لسه برشاقتى وصحتى إن شاء الله .. وأكون السنة الجاية أتجوزت على طول كده .. ويكون عندى 6 عيال وانتى هتعنسى طبعا انتى والشلة كلها.. اه صحيح أنا شعارى دايما فى الحياة " من تواضع لله رفعه"

بيبا: بلوج ايه وبتاع ايه ؟؟ انا فاضية للكلام الفارغ ده ؟؟ يا بنتى انا ورايا ابحاث ومذاكرة بالهبل.. بس برضة اهو عشرة سنة.. كل سنة وانت طيب يا بلوج .. مع إننا طلعنا فيك متخلفين و أخرنا غدا من عند زيزو النتن وحاجات تانية كتير.. بس برضة كنت لذيذ وساعات بتضحك.. متهيألى عطلتينى بما فيه الكفاية يا ست ميوشة .. امشى بقى أنا مش فاضية .. وعلى فكرة متتوقعيش هدية يعنى.

أما عن ساسو : بلوج ؟؟ بلوج ايه؟؟ مادة عندنا دى ولا ايه؟؟

يوووووووووه انا ناقصة مواد على دماغى .. يا شيخة امشى بقى أنا عايزة أروح .. هموووووت واناااااااااااااام

وأخيرا .. كل سنة وأبنى حبيبى .. اول فرحتى طيب وعقبال السنة الجاية ان شاء الله

*******************************

بمناسبة عيد ميلاد المدونة .. احب اعزمكم كلكم على أول بوست باللغة العربية ليا منشور على مدونة

وياريت تراعوا إنى مش سيبويه يعنى .. وان دى محاولتى الاولى

لو عايز تقراه ادخل هنا

أه يا نوم يا نوم.. يا نوووووم

ادعوكم كلكم يا شباب فى بيتى التانى(كلام رومانتيكى ) حيث نتناول الرومانسيةمن منظور تانى خالص

أتمنى انكم تشرفونا هناك

*************************

بكرة الكلية .. بكرة الكلية

فضلت اقول الجملة دى طول ما انا فى الصيدلية ولغاية ما روحت البيت .. وانا عمالة افكر إن الكلية بكرة .. مش عارفة إيه الفرحة العارمة اللى كنت فيها دى.. صحيح إنى بعترف إن المذاكرة عدوى الأول والأخير .. لكن برضة ده ميمنعش ان اصحابى ودكاترتى اللى غالبا لسه معرفشى اساميهم لغاية دلوقتى وحشونى برضة.. ده غير إنى قررت قرار حاسم جازم كاظم حاتم.. إنى ناوية إن شاء الله إنى ادخل الترم ده دخلة جد.. أيوة يا جماعة .. أنا ميوشة زى ما أنا .. بس من بعد الزنقة الزرقة اللى اتزنقتها فى امتحانات الترم الاول.. قررت إنى ادخل الترم التانى وانا بكامل لياقتى الذهنية وابقى مستعدة لمواجهة كل تحديات العصر .. من أجل مستقبل أفضل لأولادنا ( والله ولا بتوع الإنتخابات يا بت يا ميوشة)

بس بينى وبينكم .. أنا قولت أذاكر من الأول علشان لما النتيجة تطلع ولما ماما حبيبتى والبيج بوس يكتشفوا الخيبة التقيلة اللى هتظهر فى النتيجة إن شاء الله.. يبقى عزائهم الوحيد (حلوة عزائهم دى) إنى بحاول اشد حيلى اهو فى الترم التانى علشان أعوض.

المهم قبل ما أنام .. قعدت اوضب حاجتى ولا كإنى رايحة المدرسة .. وطلعت طقم كده باين عليه العلم والوقار -متسألوش ازاى؟- بس انا كل ما البس الطقم ده الكل يقولى انتى شكلك كده مدرسة.. قشطة هو ده التأثير المطلوب.. لا لا بلاش طرحة فاتحة.. ده احنا بكرة رايحين لزيزو النتن .. وهنعوض كل اللى فاتنا فى الأجازة .. من الأخر هتبقى مدبحة.. ولو رحت بطرحة فاتحة هيبقى منظرى مش ظريف خالص.

تمام كله تمام . وضبت شنطتى وكل حاجة .. وايه كمان قدامى حوالى 6 ساعات علشان أنام واقوم بكرة فايقة.. تمام.. تصبحوا على خير يا أهل الداااااااااار.. حد عايز منى حاجة قبل ما انام؟؟ يا ريت محدش يطلب منى حاجة لإنى تعابانة ومش قادرة افتح عينيا خاااالص

نونا الرخمة: ميوشة إلحقى .. الفيلم اللى انتى كنتى مستنياه طلع النهاردة .. مش بكرة.. هيبدأ اهو

أنا : بجد.. أنا جاية أهو

تانى يوم صحيت .. ده لو كنت نمت اصلا..وانا مفعمة بالطاقة والحيوية وعلى اتم الإستعداد لبداية الترم التانى.. لبست واتشيكت على الأخر.. وقمت لبست النظارة النظر اللى من ساعة ما عملتها ملبستهاش 3 مرات على بعض.. بصراحة انا عايناها للمناسبات اللى بحب ابان فيها مثقفة بقى وكده.. وبعدين فجأة يا اخى متعرفش ايه اللى حصلى..خير اللهم اجعله خير.. اللى جالى فى ودنى وقالى:

كلمى بيبا يا ميوشة وشوفيها صحيت ولا لأ .. لحسن تكون راحت عليها نومة

جريت على التليفون .. وطلبت بيبا.. التليفون فضل يرن .. ويرن .. ويرن .. ويررررررررررن.. فين لاقيت الست هانم بترد وهى نايمة

بيبا: الووو

أنا : ايوة يا بيبا.. شوفتى كان قلبى حاسس إنك راحت عليكى نومة

بيبا : راحت عليا نومة.. هو احنا ورانا حاجة اصلا.. توزيع اللبن علينا النهاردة ولا ايه؟؟

انا : هى هى هى.. لأا يا ظريفة عندنا كلية

بيبا : كلية ايه؟؟ انتى عبيطة ؟؟ هو انتى فاكرة نفسك لسه فى الاعدادية ولا ايه.. هو حد بيروح الكلية ى اول يوم ده.. ده الدكاترة نفسهم مش بيروحوا

انا : ايه ده .. يعنى مش هتروحى النهاردة؟

بيبا: عاااااااااااااااا.. منك لله صحتينى من النوم.. اجرى نامى يا بت .. واياكى تتصلى هنا تانى .. فاهمة؟

طاخ

الله الله الله .. ايه ده بقى؟؟ مش هنروح ازاى يعنى؟؟ لا مش ممكن .. ما هو انا مش هصحى بدرى والبس واجهز نفسى علشان منزلشى .. واذا بيبا مش عايزة تروح فى خمسة تانيين لسه فى الشلة هيروحوا.. يالا بقى عليا وعلى اعدائى

تررررررررررررررررررن

أنا : الو

موها : ايوة يا ميوشة.. كويس انك صاحية

انا : ايوة طبعا .. مش عندنا كلية النهاردة .. ده النهاردة اول يوم

موها :ما أنا بقول كده برضة .. بس ميرو وايمو مصممين ميروحوش النهاردة.. وانا خايفة مروحش الاقى عندنا محاضرة .. وانا اصلا عايزة انام ومش قادرة اروح الكلية وفى نفس الوقت قلقانة لحسن حد من الدكاترة ياخد الغياب ولا يدينا بحث ولا امتحان ولا..

أنا : بس يا بت يا مجنونة انتى.. امتحان ايه اللى فى اول يوم ده.. يادى النهار.. يعنى انتوا كمان مش رايحين؟؟

موها : شكلنا كده

أنا : عاااااااااااااااا. انا بكرهكم.. روحى نامى احسن.. لو رحتى الكلية كده اكيد هيطردوكى اصلا.. سلام

طب انا اعمل ايه استسلم يعنى.. لا .. لا هوان ولا استسلام .. نازلة الكلية يعنى نازلة الكلية .. خلاص .. انا مش فاضلى غير انى البس حاجة فى رجلى وانزل السلم واروح الكلية .. يالا يا ميوشة تشجعى.. ميوشة ميوشة .. اوه اوه

بس قولت اعمل اخر محاولة قبل ما انزل كده .. يمكن يا عالم.. اتصلت بنمرة ساسو على الموبايل .. ولاقيت زى ما توقعت بالظبط اللى بيرد عليا بيقول " الهاتف الذى طلبته ربما يكون مغلقا "

مستحيل .. انا نازله .. نازلة .. انا نااااااااااااااااااااااااااااااااااايمة.. خ خ خ خ خ خ خ خ خ خ

تصبحوا على خير.. بلا كلية بلا بتاع

أرجوك اصرفلى هذه الروشتة

أنا: صباح الخير يا بابا

البيج بوس: أهلا بالأستاذة الرايقة .. إيه النشاط ده كله؟؟ خير جايه بدرى النهاردة ليه؟؟

أنا: أهو بقى قولت أخر يوم هتتشرف صيدليتك المتواضعة بتشريفى أنا أه .. فقولت أجى بدرى بقى

البيج بوس : والله كتر خيرك يا ستى .. صحيح أنا نسيت إن النهاردة أخر يوم أجازة.

أيوة بالضبط .. النهاردة أخر يوم فى الأجازة .. الأجازة اللى كل الناس بتستناها وبيبقى نفسها فيها .. بابا والحمد لله نجح إنه يخلينى أتمنى إنها تخلص بسرعة.. أخيرا هلبس تانى وأنزل الكلية بتاعتى.. أخيرا هحضر المحاضرات لدكاترة مش بسمع من كلامهم ولا كلمة علشان ببقى حاطة السماعات فى ودنى بسمع ماتش الأهلى .. أخيرا هاكل عند زيزو النتن تانى .. ده أنا بطنى وجعتنى جدا من أكل البيت النضيف ده ..يععععع.. أخيرا هتجتمع شلة الأنس تانى .. بعد ما إستندلت أحلى إستندال فى الأجازة ومحدش فينا شاف خلقة التانى خالص .. ياااااااااااه.. الأجازة خلصت .. الأجازة خلصت .. هيه هيه هيه هيه

المهم وإحنا عمالين بنتكلم لاقينا شاب صغير داخل جرى علينا فى الصيدلية وهو بينهج وقعد يزعق ويقول " يا دكتور الحقنا يا دكتور.. الأسطى عبده شكله تعبان أوى .. ووقع منا وأغمى عليه"

بابا خد جهاز السكر معاه لإن الأسطى عبده ده مريض بالسكر وكتير بتجيله غيبوبة سكر .. وراح مع الولد ده .. وقالى إنه هيروح الورشة بتاعة الأسطى عبده اللى جنبنا دى وهيجى على طول ومش هيتأخر .. بصراحة هى دى كانت بقى اول مرة اقعد فيها لوحدى فى الصيدلية .. بس قلتتله مش مشكلة ولو حصلت اى حاجة هبقى ارنله على الموبايل.

بابا خرج من هنا وشوية لاقيت واحدة داخلة عليا الصيدلية وفى ايدها روشتة

الست : لو سمحتى يا دكتورة عايزة اصرف الروشتة دى

ايه ده ؟؟ انا .. بصيت حواليا كده ملقتشى حد غيرى .. انا دكتورة .. لووووووووولى.. ياما إنت كريم يارب .. اهو بقيت دكتورة من غير لا كلية طب 7 سنين ولا فارما ولا سحر ولا شعوذة.. فينك يامه تشوفى بنتك ميوشة بقت دكتورة.. أنا قولت بقى بما إنى بقيت دكتورة خلاص أترسم بقى .. كنت أنا ساعتها قاعدة على المكتب بتاع بابا .. ولاقيت قدامى النضارة بتاعه اللى بيلبسها وبتنزل على مناخيره دى .. قمت واخداها ولابساها أنا كمان .. إشمعنى هو يعنى .. إحنا الاتنين دلوقتى بقينا دكاترة زى بعضينا.. وبعدين إيه المشكلة يعنى لما أصرف روشتة .. ماهو الدوا مكتوب بالإنجليزى .. وأنا إن شاء الله بعد 3 سنين وترم هبقى مدرسة إنجليزى قد الدنيا .. مش هعرف يعنى اصرف حتة روشتة

قمت من على المكتب ومشيت بكل ثقة ناحية الست دى وأخدت منها الروشتة وبصيت عليها كده ... يا نهار مش فايت .. ايه ده كله ؟؟ ايه ده كله؟؟ أنا طول اسمع إن خط الدكاترة وحش جدا .. لكن ده مش خط اصلا .. ده عيل صغير إدوله قلم وقالوله إرسم بابا يا حبيبى .. ايه الشخابيط دى .. والله حرام .. أنا حاسة إنى اتعميت .. المهم لاقيت عينى وجعتنى أوى وبرفع ايدى علشان أمسح عينى .. لاقيت ايدى اتخبطت فى النضارة بتاعة بابا .. هو إنتى يا شيخة منك لله .. الله يحرق دى منظرة .. كنت هتعمى بسببك يا شيخة .. شلت النضارة وقولت بقى الحياه هتبقى بمبى .. لكن للأسف الحياة لا بقت بمبى ولا برتقالى حتى .. دى إسودت خالص .. الشخابيط اللى على الروشتة صحيح بقت كلام .. بس كلام الدكتور اللى كاتبه اصلا ميعرفشى يقراه .. يا ساتر يا رب .. دى أدوية دى ولا تعاويذ سحرية .. اللهم احفظنا.

المهم إنى وأنا بقرا الروشتة حسيت بنفس إحساس عمو شامبليون وهو بيفك رموز حجر رشيد .. بس يا بخته .. اكيد الفراعنة كان خطهم أحلى من الخط اللى انا بقراه ده دلوقتى .. اللهم ما صلى على النبى هو الحرف الأولانى ده إيه ؟؟ ما مسهل يارب .. شكلها فرجت .. انا متهيألى إنى شفت دوا حروفة شبة الحروف دى .. أيوة صح هو الدوا ..هو ده .. هيه هيه هيه هيه

جريت على طول جبتلها أول صنف .. ورحت علشان احاول إنى افك رموز تانى صنف .. يارب عدى الروشتة دى على خير علشان لما بابا يجى بقى اتنطط عليه وأقوله بنتك بقت دكتورة فى اسبوعين لا غير.. دخلت المعمل علشان الست متشوفنيش وأنا محتاسة كده .. فلاقتها عمالة تنادى عليا

الست : يا دكتورة .. لو سمحتى يا دكتورة

أنا : أيوة يا مدام

الست : لو سمحتى .. أنا لسه جاية دلوقتى من عند دكتور العيون .. وهو اللى إدالى الروشتة اللى مع حضرتك دى

أنا : طيب وانا مالى

الست : يا دكتورة .. هو قالى إنه كاتبلى نوعين قطرة ومرهم عيون .. ممكن أعرف حضرتك جايبالى دوا الإسهال ده ليه؟؟!!!

أأأأأأأخ .. يا كسفتك يا ميوشة .. يا حوستك يا ميوشة .. يا شماتة أبوكى فيكى يا ميوشة

أنا : يا مدام .. حضرتك شكلك تعبان .. طيب قويللى بأمانة إنتى مش عندك إسهال؟؟

الست : إسهال إيه يا دكتورة بس؟؟

أنا : هو الإسهال مفيش غيره .. هو اللى مخليكى رايحة جاية على الحمام طول الليل ومش عارفة تنامى .. وطبعا قلة النوم دى بتوجع العين .. إسألينى انا

الست : ايه الكلام الغريب ده .. أنا معنديش اسهال

أنا : معقولة ..يبقى عندك إمساك .. أنا عندى لبوس إنما ايه ..يجنن

الست : لبوس ايه يا دكتورة انتى.. قال دكتورة قال .. والله العظيم كده إنتى شكلك معهد فنى صحى .. فين الدكتور مدير الصيدلية دى

أنا : انتى بتزعقى ليه يا مدام .. الحق عليا عايزة مصلحتك

الست : أنا غلطانة إنى جيت هنا اصلا .. دى الصيدليات على قفا مين يشيل

طبعا طبعا طبعا .. مين اللى دخل الصيدلية فى عز المعمعة دى .. أكيد طبعا هو بابا .. اللى برقلى وزغرلى زغرة خرمتنى .. وقام داخل الصيديلة جرى وقال بصوت عالى

البيج بوس: أنا أسف يا مدام جدا .. هى فتكات كده دايما تسيب شغلها وتضايق الزباين .. إجرى يا بت يا فتكات امسحى المعمل يالا

أنا : مين ده؟؟ أنا ؟؟

زقنى فى المعمل وقال

البيج بوس : يالا بسرعة يا بت يا فتكات والا هنادى لأبوكى يجى يضربك

أنا : عاااااااااااااااااااااااااااااااااااااااااا.. والله لهقول لماما .. عااااااااااااااااااااااااااا

بوست لابد منه

سلام عليكم

عايزة بقى أسمع أحلى حمد لله على السلامة .. سلامة رجوع ميوشة لعالم التدوين

العالم اللى مش بتحس بنفسها إلا فيه .. ولا بتحس إنها عايشة إلا لما بتشوف تعليق من الناس اللى عرفوها وحبوها من غير حتى ما يشوفوها

أنا بصراحة كده يعنى كنت عايزة أحط الكلام ده فى أول البوست الجديد .. لكن حسيت إنى عايزة أرغى معاكم شوية قبل ما أكتب البوست الجديد .. وقولت خلاص يا ميوشة برى على نفسك شوية وإكتبى بوست لزوم الرغى و الحاجات دى وهنزل البوست الجديد على طول إن شاء الله

الأول طبعا مش محتاجين إنى أقولكم وحشتووووونى جدا جدا جدا .. والواحد مش بيعرف قيمة حاجة فعلا إلا لما بيتحرم منها.. وأنا عرفت قيمة المدونة بتاعتى فى فترة الإمتحانات اللى فاتت دى ( اللهى ما ترجع تانى يا رب) قولوا امين

ثانيا .. احب أشكر كل اللى دعالى وكل اللى سأل عليا أول سابلى تعليق .. مع إن فيه تعليقات موتتنى من الضحك.. هههههههههه.. زى مثلا كيكى بعتالى تقولى "معقولة لسه بتمتحنى .. دول الكفار خلصوا إمتحانات".. أنا قعدت أضحك على التعليق ده ضحك.. وبعدين مش تقولى يا كيكى الكفار دول إنتظام ولا إنتساب ولا إيه بالظبط؟؟

ثالثا بقى .. أنا فعلا إتأخرت بعد الإمتاحانات لإنى بصراحة قضيتها صياعة .. يعنى من ساعة ما خلصت إمتحانات وأنا كل يوم فى حتة.. بس أحلى يوم قضيته كان فى معرض الكتاب لإنى فى اليوم ده قابلت ناس .. ربنا عالم أنا حبيتهم قد إيه من قبل ما أشوفهم .. وكان اليوم ده هو أول لقاء لينا.. قابلت يومها ( دعاء مواجهات )..( و(كيكى)..(وإيمو).. أما الشباب فكان هناك (عبد الله غنيم ) .. والمفاجأة بقى اللى مكنتش أتوقعها (سووووووو ) بذات نفسه .. بجد بجد ده أجمل يوم قضيته فى الأجازة لغاية دلوقتى .. ويارب يارب اليوم ده يتكرر تانى وتالت وعاشر.. لإنى إن كنت بحبكم قيراط واحد فأنا دلوقتى بحبكم 24 قيراط .. وشوفوا بقى القيراط بقى بكام دلوقتى؟؟

همممممممم.. فيه إيه تانى .. أه نقطة أخيرة مهمة جدا.. ناس كتير سألتنى السؤال ده " هو إنتى التوقيت عندك فى المدونة غير توقيت البشر ليه؟؟" يعنى ببتدى الأجازة لما الأجازة بتخلص .. وأخلصها قبل ما تبتدى

عايزة بس أقولكم إن حكايات المدونة كلها فلاش باك .. يعنى أنا بحكيلكم من أول سنة أولى .. فبحكى بترتيب زمنى معين .. مش ماشية مع التوقيت بتاع دلوقتى.. أتمنى بس إنى أكون وصلت النقطة دى.

بس خلاص .. نرجع بقى للتدوين من تانى

نداء إنسانى

بسم الله الرحمن الرحيم

إخوانى البلوجرية .. أصحابى وأحبابى فى كل مكان

أى حد على سطح الكرة الأرضية أعرفه أو معرفوش

شلة الأنس بقيادة أفشل أعضائها " ميوشة " تناشدك من صميم وجدانكم

إنكم تفتكروهم بدعواتكم

وبتعتذر عن الفترة اللى جاية لإنها إن شاء الله هتكون فترة إنقطاع تام

نظرا لمرور الشلة كلها بفترة عصيبة جدا .. فترة إمتحانات الترم بعيد عنكم وعن السامعين

هتوحشووووووووووووونى جدا

أشوفكم فى أجازة نص السنة إن شاء الله

إدعولنا الله يخليكم

سلام عليكم

تاج السعادة

ياااااااااااااااااااه ...............عدى شهر بحاله من غير ما أكتب .. بجد وحشتونى جدا جدا .. بس أقول ايه بقى كنت مشغولة موت.. اصل إحنا وصل عندنا فى عيلتنا المتواضعة فرد جديد .. بس واد يجنن زى العسل .. كان واخد كل وقتنا الفترة اللى فاتت دى .. لا لا أنا مش عايزة اسمع مبروك حاف كده ..أنا عايزة عيدية لو سمحتم ولحمة كمان

كل سنة وانتوا طيبين بقى .. والعيد فرحة ... مااااااااء

****************

النهاردة ان شاء الله هجاوب على تاج بعتهولى .. محمد غالية .. اللى للأسف معرفتش أجاوبة غير دلوقتى .. وأنا بجد بعتذرله جدا جدا على التأخير

السؤال الأول:ماهى السعادة من وجهة نظرك؟

-بحس بقمة السعادة يوم الجمعة .. لإنى مش ورايا كلية ولا سكاشن .. ومش مضطرة إنى أظبط الموبايل ويرن وأقوم اطفيه وانام تانى ويضيع منى السيكشن

السؤال الثانى: كيف تصل إلى السعادة؟

-اول ما أخلص الامتحانات بتاع كل سنة

السؤال الثالث: هل السعادة وهم أم أنها حلم صعب؟

-السعادة دى وقت وبيعدى وخلاص.. وبعد ما يخلص ندور عليه تانى .. علشان يجى ويعدى تانى .. وهكذا

السؤال الرابع: هل السعادة طريق للنجاح ؟وضح؟

-بالنسبة للفشلة اللى زى أكيد لأ .. بس ممكن نعتبر النجاح طريق للسعادة

السؤال الخامس: ماهى أكثر اللحظات التى شعرت فيها بالسعادة؟

-بالنسالى لما طلعت نتيجة سنة أولى واكتشفت انى نجحت وهروح سنة تانية

السؤال السادس:هل ممكن أن تحقق كل شىء؟

-أكيد لأ طبعا .. يعنى أنا مثلا نفسى فى دراسة من غير امتحانات .. وأكيد مش هقدر أحقق ده غير لما ابقى وزيرة التربية والتعليم

السؤال السابع: السعادة تجعلك تقبل على الحياة أم لا؟

-أحنا مقبلين على الحياة بأى شكل .. غتاتة يعنى

السؤال الثامن: هل أحسست يوما انك وصلت لقمة السعادة؟

-اى وقت بحس فيه بالسعادة .. اكيد ده بالنسبالى بيبقى قمة السعادة

السؤال التاسع: لماذا تمر أوقات السعادة بسرعة؟

-مش عارفة بصراحة.. بس طول عمرى بعتبرها قلة أدب من السعادة

السؤال العاشر: هل ترى السعادة فى التدين؟

-إيه الإحراج ده؟؟.. بس أكيد كل ما بقرب من ربنا .. كل ما بحس بالسعادة أكتر.. لإن مفيش سعادة أكتر من سعادة قربك من ربك ومعرفتك لدينك

السؤال الحادى عشر: هل أنت متفاؤل وعندك أمل؟ وضح؟

-أكييييييييييييييييد.. أنا مش فاضلى فى الدنيا دى غير الأمل.. ودايما بعتبر نفسى من اكتر الأشخاص المتفائلين اللى قابلتهم فى حياتى

السؤال الثانى عشر: إذا شعرت بالحزن ماذا تفعل؟

-أنا وشلتى الفاشلة كل ما نزعل .. بنااااكل.. بجد والله .. علشان كده صاحب محل زيزو النتن بيدعى ربنا كل يوم إننا نزعل .. مكسب ليه برضة

السؤال الثالث عشر: هل يستمر معك الحزن فترة ام ينقضى فى الحال؟

-فى الحال .. لمجرد إنتهاء سبب الحزن.. زى المحاضرة مثلا..

السؤال الرابع عشر: ما رأيك فى الأفراد المتشائمين؟

ياااااااااااى.. لأ بجد ليه أتشائم .. لما ممكن أبقى متفائلة .. وبعدين لما أتشائم هستفاد إيه يعنى .. غير ان وشى هيكرمش وهعجز بدرى ..ربنا خلقنا فى الدنيا للسعى .. ودايما بحس إن التشاؤم بيوقف السعى ده .

أخر حاجة بقى التاج ده هدية منى لأى حد عايزه .. بس إبقوا بلغونى إنكم جاوبتوه علشان أشوف مقاييس السعادة عندكم

وكل سنة وإنتوا طيبييييييييين

دعى شعرك ياخد نفسه

بعد وقوف فى الصيدلية لحوالى 4 ساعات روحت البيت وأنا مجهدة إجهاد فظيع .. أسمع برضة حد يقولى " ليه يعنى ؟؟ ده إنتى معملتيش حاجة غير إنك كنتى قاعدة بس" .. أرد أنا بقى وأقول لأ يا رزل .. أنا كنت قاعدة على الكتب والمكتب ده فى الدرج .. والدرج يعنى الفلوس .. يعنى أنا اللى مستهدفة فى القعدة دى كلها .. لو أى حرامى دخل علينا الصيدلية هيطلع المطواة فى وشى انا ( باين الحرامية بقى مفيش وراهم غيرى الأيام دى)... روحت البيت يادوب كلت وإتقلبت نمت فى ساعتهاا خخخخخخخخخخ

تانى يوم صحيت وعلى مضض (غالبا مضض ده جوز مضمضة) .. وقمت لبست وإتشيكت .. أنا كان مالى ومال الشغل يعنى الأجازة اللى الواحد المفروض بيصحى فيها المغرب ولا حاجة أصحى أنا الضهر ، والله ده حرام ..المهم نزلت الصيلية .. ولما وصلت هناك لاقيت بابا كان بيعمل حاجات فى المعمل جوة.. وكانت الصيدلية فاضية وقتها

أنا : إستعنا على الشقا بالله .. يافتاح ياعليم يا رزاق يا كريم

البيج بوس : إيه يا معلم حنتيرة.. جاى تفتح ورشتك بدرى كده ليه؟؟ ده العصر لسه مأذنش

انا: أكل العيش مر يا أبو ميوشة .. وربنا بيقول إسعى يا عبد وأنا أسعى معاك

البيج بوس : وهو إنتى كده بتسعى يا حبيبتى .. ده إنتى بتتمخترى .. بتزحفى .. حرام عليكى يا شيخة

أنا : شوف يا بابا أنا فى أجازة .. وبعدين انا مقدرش أنزل قبل الغدا أبدا أبدا

البيج بوس : خلاص لو هتنزلى متأخر كده يبقى هتسهرى معايا الليل كله

أنا : عاااااااااااا.. بس أعمل حسابك هيبقى فيه أوفر تايم

البيج بوس : .........................

فضلت قاعدة هناك أتفرج على الدنيا .. وكل شوية يجى عيان ويمشى عيان .. أصحاب بابا وزمايله .. أشكال كتير من البشر مكنتش أتوقع إنى أقابلها أبدا .. ياعينى عليك يا بوس ده إنت طلعت بجد حمال القسية .. فبعد كام عيان كده ورا بعض الصيدلية رجعلها الهدوء تانى .. وحبيت أعمل فى بابا حركة جدعنة كده فقولتله " تشرب شاى" .. قالى " ياريت" .. وفى طريقى للمعمل جوه علشان أعمل شاى .. شميت ريحة غريبة جدا .. ريحة فكرتنى ب"أسنس شادية " بتاع أحمد زكى .. طول عمرى بتفرج على الفيلم ده ونفسى أعرف إيه الريحة دى.. وأخيرا عرفتها

تماسكت شوية وسندت على الحيطة لإن تأثير الريحة دى كان قوى اوى .. وبصيت ورايا تانى علشان اعرف الريحة دى جاية منين؟؟ لاقيت واحدة داخلة الصيلية ضاربه شعرها أحمر ومسيباه علشان تعاقب بيه خلق ربنا اللى مش بيغضوا بصرهم .. لأ ومش بس كده دى حتى البرفان الرائع ده كمان علشان تبقى الحكاية(صوت وريحة) .. مش دى المشكلة .. المشكلة اللى بجد إنها سابت بابا اللى كانت جاتله صاعقة من هول ما رأى وجاتلى أنا وقاعدت تنادى عليا " لو سمحتى يا أنسة "

أنا : مين انا؟

هى : أيوة إنتى

أنا : لأ أنا مش دكتورة .. أنا هنا بكنس الصيدلية

هى : نيهاهاهاهاها.. شربات .. مع إن مش باين عليكى .. نيهاهاها

أنا : خلاص بطلى ضحك الله يكرمك أنا أسفة .. الدكتور واقف يعنى

هى : حضرتك الدكتور .. على فكرة إنت فيك شبة من حسين فهمى

البيج بوس : متشكر يا فندم .. أخجلتم تواضعنا

أنا : تواضع مين اللى خدلتيه ده يا ست إنتى إنتى بتبصبصى لأبويا

هى : هو باباكى .. مع إنه شكله مش مرتبط

أنا بصيت على بابا .. لاقيته هو هو متغيرش .. شكله مش مرتبط إزاى .. ده شكله مرتبط رباط أزلى أبدى .. المهم خدت بابا على جنب كده وقلتله يروح هو يعمل الشاى لغاية ما أشوف الست دى عايزة إيه .. وقمت راجعلها تانى

هى : لو سمحتى أنا كنت عايزة شامبو ( ليف سلك ) للشعر الدهنى

أنا : حاضر يا مدام .. بس هو لحضرتك

هى : أيوة ليا

أنا : شوفى حضرتك إختيارك للشامبو ده ممتاز إنتى مينفعكيش غير شامبو ليف سلك فعلا .. أما حكاية شعر دهنى دى فإفترى .. إنتى شعرك جاف وناشف وحالته حالة .. يعنى محتاجة شامبو للشعر الجاف

هى : انا شعرى جاف؟؟

أنا : أيوة طبعا دى حاجة يحس بيها اى كفيف .. وبعدين هو أنا بشتمك يعى إيه المشكلة لما شعرك يكون جاف؟

هى : أوووه على فكرة إنتى متعبة أوى هتيلى الدكتور اللى شبة حسين فهمى ده أتفاهم معاه

أنا : لأ معلشى ملكيش دعوة بحسين فهمى ده .. أصله عنده مسلسل وراح يكمل تصويره .. هتخدى للشعر الجاف ولا لأ؟

هى : لأ .. يا ساتر ده أنا هتحجب ولا اخد منك حاجة .. يا ساتر

الست قامت سايبانى وماشية.. ولا كإنى كلبة .. ولما بابا طلع سألنى عملت إيه ؟؟ وحكيتله على اللى حصل .. المهم قعد طبعا يهزئنى علشان مسمعتش كلامها ومجبتلهاش اللى هى عايزاه .. وإنى لو إستعملت الموضوع ده مع كل الناس هنقفل الصيديلة بعد ساعة الا ربع والكلام ده كله

أنا : يا بابا ما تضايقش بص للجانب المشرق فى الموضوع

البيج بوس : إللى هو إيه؟؟

أنا : إنى عقدت الست دى .. وهتسيبنى من هنا وتروح تتحجب من هنا .. يالا خدنا ثواب.. دى البشرية كلها هتدعيلى

البيج بوس : يا رب صبرنى .. خلفتى يا رب مش خلفة حد تانى .. أنا اللى عملت كده فى نفسى