فى بيتنا ... حرااااااامى

"يا ترى يا ماما عايزانى فى إيه؟"

الجملة دى فضلت تلعب فى دماغى طول ما إحنا ماشيين رايحين زييزو النتن.. وأول ما وصلنا هناك كلمت ماما على طول.. بس اللى بجد إستغربتله صوت ماما الغريب.. كان صوتها كإنها كانت بتعيط

أنا : أيوة يا ماما يا حبيبتشى

ماما حبيبتى : أيوة يا ميوشة إنتى بتتكلمى كده ليه؟

أنا : معلشى يا ماما أصلى باكل.. المهم فيه إيه؟

ماما حبيبتى : مفيش يا ميوشة .. أنا بس بطمن عليكى .. إنتى كويسة؟؟

أنا : الحمد لله باكل زى الفل أهو.. مالك يا ماما .. أوعى يكون فيه حد كلمك وقالك إنه خطفنى وعايز فدية ولا حاجة

ماما حبيبتى : هو حد يقدر يخطفك .. ده هو اللى هيدفع لنا فلوس علشان نرضى ناخدك تانى.. بس الحمد لله بدل الظرف شغال عندك كده تبقى كويسة

أنا : طب مش هتقوليلى فيه إيه بقى؟

ماما حبيبتى : يووووووه.. إنتى بتتكلمى كتير كده ليه .. رصيدى هيخلص

أنا : يا ستى أنا اللى متصلة

ماما حبيبتى : ماهو لما رصيدك بيخلص أنا اللى بشحنلك.. مع السلامة بقى وخلى بالك من نفسك

إيه ده إيه ده.. من إمتى دش الحنية ده يا ماما .. هو الشبشب أعلن إعتزاله بجد ولا إيه؟؟

*****************************

بيتى حبيبى .. اللى بحس فيه بالدفا والأمان.. أه صحيح بمناسبة الدفا .. البيت المرة دى كان فيه دفا زيادة عن اللزوم .. لا لا مجبناش دفاية ولا حاجة.. بس البيت كان فيه ناس كتير اليوم ده ، أول ما دخلت الصالة لاقيت ماما قاعدة فى الصالة هى وإتنين من خالاتى وولاد خالاتى معاهم .. وبابا قاعد متنرفز .. من الأخر القاعدة كده شكلها ميطمنش

أنا : سلام عليكم

صوت جماعى: سلام عليكم ورحمة الله وبركاته

أنا : متجمعين عند النبى إن شاء الله .. إيه اللمة الجميلة دى.. ده أنا لو قعدت سلمت عليكم وبوست واحد واحد بقى هيورم

خالتى (1) : بقى ليكى نفس يا ميوشة تهزرى فى الظروف دى؟؟

أنا : ظروف إيه؟؟ هو حد مات؟؟

خالتى(2) : بعد الشر عليكى يا حبيبتى

أنا : عليا !!! هو انا مت وأنا مش واخدة بالى ولا إيه؟

البيج بوس : بس يا ميوشة .. قفلى على السيرة دى .. إدخلى يالا غيرى هدومك

دخلت على أوضتى - يا سلام عليكى يا ميوش مؤدبة من يومك وبتسمعى الكلام- لاقيت الواد عمور إبن خالتى عمال ينادى عليا

أنا: عايز إيه يا واد إنت ؟ مش كفاية أمك موتتنى من كلمتين

عمور ( وهو مسخسخ من الضحك) : ما إنتى مش فاهمة .. مش إنتى كنتى بتذاكرى إمبارح فى بيت جدى؟

أنا : أيوة مظبوط كل ده علشان كنت هناك إمبارح ؟ طيب ما أنا هناك على طول إيه المشكلة يعنى؟

عمور : تعالى معايا وأنا أقولك

روحنا أنا وعمور على بيت جدى وهو كالتالى .. البيت كله 3 أدوار الدور الأول صالونات وسفرة وحركات من دى.. الدور التانى أوض النوم بسلم داخلى للدور الأول .. أما الدور الأخير فهو السطح اللى فيه بقى اللعب والمرجيحة

روحنا البيت لاقيته عادى جدا مفيش فيه حاجة مش طبيعية .. لكن لما طلعنا الدور التانى لاقينا المأساة..
أولا الأوضة الكبيرة بتاعة جدو الله يرحمة كانت مفتوحة على الأخر وكل حاجة فى الأوضة مقلوب كيانها .. أنا كنت حاسة إنى بتفرج على برنامج خلف الأسوار .. وكنت أنا الكاميرا فى مسرح الجريمة

طبعا الدور التانى ده بعد وفاة جدو وتيتا نادرا ما بنطلعه فلما طلعنا أنا وعمور أول حاجة خدت بالى منها أثار رجلين كوتشى مقاسه لا يقل بأى حال من الأحوال عن 49 أبدا أبدا.. يا لهوى لو دى رجل بنى أدم أمال جسمه عامل إزاى؟
المهم عمور خد دور المحقق كونان وقعد يشرحلى الموقف

عمور :شوفى يا ستى فيه واحد نزل من السطح على المواسير لغاية ما وصل لشباك أوضة جدو .. وبعدين كسر الشباك بالطوبة دى زى ما إنتى شايفة .. ودخل الأوضة .. وكان فاكر إن فيه فلوس علشان كده مطلع كل الإدراج والدواليب بالمنظر ده

أنا : يا عم بطل برنامج لكى يا سيدتى ده .. لخص .. سرق إيه؟؟

عمور : سرق التليفزيون والسجادة الكبيرة والمروحة .. وبعدين فتح باب الدور هنا وطلع السطح من السلم بمنتهى الإحترام .. ولا كإنه صاحب البيت .. وكل الشواهد بتقول إن الكلام ده حصل إمبارح بليل لإن خالتو اللى هى مامتك كانت هنا إمبارح الصبح ومكنش فيه حاجة .. ميوشة إنتى سرحانه فى إيه؟؟

(فضلت قاعدة هناك كام ساعة كده لغاية ما سمعت صوت كده غريب .. انا قولت أكيد دى البت نونا الرخمة جاية ترخم عليا هنا كمان
أنا : يا نووووونااا .. إمشى من هنا أحسنلك .. مش طالباكى دلوقتى خالص )

عمور : يا ميوووووووووووووشة

أنا :أيوة يا عمور إفتكرت حاجة حصلتلى إمبارح .. الحرامى ده يا عمور كان هنا إمبارح وأنا سمعت المعمعة دى كلها.. وكنت فاكرة نونا هى اللى بتعمل الأصوات دى

(العيل اللى جوايا قعد يقولى قومى إديها على دماغها وعلميها الأدب .. وفى نفس الوقت ضميرى اللى بيصحى فى أوقات ملهاش لازمة خالص ده عمال يقولى " يابنتى ده أخر يوم كنى شوية على مذاكرتك الله يرضى عليكى " )

عمور: أيوة ما إحنا عرفنا

أنا : عرفتوا منين؟

عمور : بصى كده

ببص على السلم لاقيت أثار رجلين عمو الحرامى على السلم .. عمو الأمور ده كا ناوى ينزل .. ونزل فعلا حوالى 6 سلمات .. بس واضح إنه سمعنى وأنا بنده على نونا إمبارح لما كنت فاكراها هى اللى عاملة الصوت فقام غير رأية وقرر إنه يسرق الدور التانى بس ويسيب الدور الأول ليوم تانى

عمور : شوفتى يا ميوشة .. لسه ربنا كاتبلك تعيشى و تزهقينا فى عيشيتنا شوية

أنا : لأ يا عمور هو واضح إن الحرامى ده خريج معهد مجرمين قسم سرقة .. لو كان كمل بقى كان قتل كمان

عمور : أو ممكن يا ميوشة إنه لما شافك قرر يتوب لربنا .. هو إنتى بقى اللى بيقولوا عليها وشها علم إبليس الفضيلة.. نيهاهاهاها

أنا : عاااااااااااااا .. حتى الحرامى .. إخص عليك يا حرامى شمت الأعادى فيا.. إهئ إهئ

عودا أحمد ( مين احمد ده؟؟)

خلاص أنا زهقت من وجع الدماغ والوش ده كله .. علشان كده قولت لماما إنى أروح أذاكر فى بيت جدى اللى لازق فى بيتنا على طول .. بس البيت هناك على الأقل فاضى بعد ما جدى وجدتى توفوا .. وهناك بقى محدش هيعرف يكلمنى لا على التليفون ولا على النت.

المهم فضلت قاعدة هناك كام ساعة كده لغاية ما سمعت صوت كده غريب .. انا قولت أكيد دى البت نونا الرخمة جاية ترخم عليا هنا كمان

أنا : يا نووووونااا .. إمشى من هنا أحسنلك .. مش طالباكى دلوقتى خالص

لكن مفيش رد خالص.. أه يا نونا يا ........ ، العيل اللى جوايا قعد يقولى قومى إديها على دماغها وعلميها الأدب .. وفى نفس القت ضميرى اللى بيصحى فى أوقات ملهاش لازمة خالص ده عمال يقولى " يابنتى ده أخر يوم كنى شوية على مذاكرتك الله يرضى عليكى "

ولأول مرة فى كتاب حياتى يا عين أسمع كلام ضميرى .. أه والله قعدت اكمل .. اصل المسرحية شدتنى أوى بصراحة فقولت مبدهاش بقى أقعدى كمان شوية ..فضلت فى الشقة لوحدى .. البيت الكبير .. بيت العيلة .. البيت ده اللى عشت فيه احلى ذكريات طفولتى أنا و أولاد خالاتى وخلانى.. ياااااااااااااااااه .. كانت أيام جميلة .. الله يرحمك يا جدو .. الله يرحمك يا تيتا

الساعة بقت 12 أنا بقى قولت كفاية كده مش هفترى على اعصابى يعنى.. أنا بكرة عندى إمتحان .. مش بس إمتحان ده كمان فيه خناقة بعد الإمتحان وبعدين غدواية بعد الخناقة .. يعنى جدولى مشغول ولازم أنام علشان ابقى فايقة ورايقة كده بكرة إن شاء الله

************************************

بيبا (لاول مرة تخرج مكشرة من الإمتحان): ميوشة يا ميوووووووووشة

انا : أيوة يا بيبا .. مالك ؟؟ فين الإبتسامة العريضة ؟؟ إنتى عكيتى فى الإمتحان ولا إيه؟؟

بيبا : إمتحان إيه وبتاع إيه دلوقتى؟؟ميوشة قولى بقى بجد إنتى جاية معايا ولا لأ؟؟

أنا : يا رب إرحمنى برحمتك .. اسكتى يا بيبا بدل ما أضربك .. عيال هبلة

ميرو : ميوووشة .. بيباااااااااااا .. خدنا الأجازة ..خدنا الاجااااااااااااازة


أنا : أيوة يا ميرو بس بعيد عنك فيه هنا ناس غم وحالفين يغمونا فى عز فرحتنا.

ميرو : أه لسه حكاية الأكل دى .. طيب اللى يحللك المشكلة دى تعمليلو إيه؟؟

أنا : بجد يا ميرو بجد عندك حل ؟

ميرو: بس وطى صوتك لغاية ما كلهم يطلعوا من الإمتحان .. عندى ليكم مفاجاة

أنا : يا مسهل يا رب


بعد حوالى 5 دقايق كانت شلة الانس إجتمعت على خير .. المهم إن مفيش حد جاب سيرة الإمتحان خالص .. وبيبا وإيمو مادين بوزهم شبرين وكل واحدة مدية ضهرها للتانية ومستحلفينلنا .. يا رب يا ميرو يكون عندك حل بجد

موها: شوفوا يا بنات أنا وميرو اكتشفنا إمبارح حاجة مهمة جدا

وقامت موها مطلعة من جيبها ورقة جرنال مطبقة يجى ميت تطبيقة عاملة زى الساحر اللى بيطلع من جيبه كتاكيت .. المهم فردت ورقة الجرنال دى علشان نلاقى خبر مكتوب بالبونط العريض .. الخبر كان بيقول إن فى حملة تفتيش على الوجبات السريعة قفشوا حمار حصاوى أمور وحليوة كده فى تلاجة محلات " أم حمادة للوجبات السريعة "


ساسو : حمار .. ياى .. بيعمل ايه الحمار ده فى التلاجة هناك؟؟

ميرو : كان واخد المدام بتاعه وبيتزحلقوا على التلج .. نيهاهاها

أنا : إيه ده يعنى كنتى يا ست إيمو عايزة تغدينا حمير بانية النهاردة

ميرو : لأ انا مش عايزة حمير أنا عايزة كلاب

طبعا كلنا فى الوقت ده كنا مش قادرين نمسك نفسنا من الضحك .. وخصوصا بيبا اللى كان باين عليها كل معالم الإنتصار .. وإيمو كل معالم اليأس والخيبة .. وطبعا بعد الموضوع ده كل الإجماع كان بيأيد (كوك باب) .. أهو قضا أخف من قضا .. وكلنا خدنا بعضينا ورحنا على (كوك باب )

وقفنا تاكسى وقلناله كلنا فى نفس واحد (كوك باب لو سمحت ) .. الراجل بصيلنا بإستغراب كده وقال " مين اللى هيركب " .. قولناله وإحنا بنقتحم التاكسى " كلنا إن شاء الله "

أنا وميرو ركبنا قدام والباقيين إتحشروا ورا مع بعضيهم .. عمو السواق فضل يبص بمنتهى البلاهة وبعد ماركبنا فضل يضحك وقالنا " أنا عمرى ما عملت العاملة دى .. بس والله لا أوصلكم .. فكرتونى بعيالى .. هاهاهاها"

المهم طول السكة كانت بيبا قاعدة على حجر إيمو .. لأ ومش مكفيها كده .. دى زيادة فى الغتاتة كل شوية تبصلها وتنهق .. والسواق يضحك .. وأخييييييييييييييييرا وصلنا .. (كوك باب)

دخلنا كلنا المحل الدافى .. حسينا بجسمنا بيعمل تتتتتتتتش .. تش من كل حاجة .. من البرد ومن المذاكرة ومن الحمار اللى ربنا نجانا من أكله ده .. الحمد لله

أول ما دخلنا إستقبلتنا واحدة كده أمورة وصغنتوتة وإداتنا المنيو .. المهم إحنا لسه بنفتحها من هنا ولاقينا أسماء عجيبة وغريبة من هنا .. قاعدنا نبص على أى سندويتش نقدر نستنبط من إسمه مكوناته إيه .. ابدا مش عارفين.. بصينا لبيبا بصة فيما معناه " حللنا الورطة دى يا هانم " البت تنحت وبلمت .. وبعدين قامت رايحة بكل ثقة للبنت اللى على الكاشير وقالت

بيبا : لو سمحتى إحنا عايزين النهاردة نجرب صنف جديد

البنت (بتتكلم كإنها مبرمجة ) : يا سلام النهاردة يوم حظ حضرتك لإن فيه سندويتش لسه نازل جديد ومكسر الدنيا

بيبا : طيب كويس إيه السندويتش ده ؟؟

البنت : هاجنم

بيبا : مين ؟؟ لا لا يا انسة إحنا مش بناكل المنكر ده

البنت بصت لبيبا من فوق لتحت كده وقالتها بلهجة (إنتى جاية تشتغلى سواقة ) : يا انسة ده سندويتش فراخ بالمايونيز

بيبا : والله .. طيب كويس .. ( وقامت بصلنا وقالت ) حد هياكل الأخ ده؟؟

طبعا كلنا وافقنا على الاقل الفراخ دى حاجة عارفينها ده فيه أسامى ساندويتشات تانية مجرد إسمها يجيب مغص كلوى .. المهم بيبا طلبت 6 هاجنم ده وجريت علينا على طول وإحنا عمالين نهنيها على شجاعتها دى .. والله البت جدعة .. بس لسه بيبا بتاخد نفسها لاقت البنت بتنادى عليها

البنت : يا أنسة لو سمحتى تعالى علشان أكمل الأوردر

أنا : بيبا .. إيه البودر اللى هتكمله ده .. هو إنتى بتحطلها مكياج ولا إيه؟؟

بيبا : بودر إيه بس؟؟ أنا فاكرة اننا خدنا الكلمة دى قبل كده فى الكلية .. المهم أنا مش هروح تانى .. حد تانى يروح

إيمو : يعنى جايبانا هنا وفى الاخر مش عارفة تطلبى ساندويتشين على بعض جتك القرف.

بيبا : طب روحى إنتى يا ختى يا بتاعة الحمير

إيمو تقدمت من البنت دى وقالتلها

إيمو : أيوة انا مع حضرتك

البنت : حضرتك عايزة الطلبات عادى ولا كومبو

إيمو : خليها كومبو .. بس الله يخليكى إبقى إبعتى مع السندوتشات بطاطس وبيبسى


البنت ( بعد ما تنحت شوية ) : حاضر .. وياترى تحبو البطاطس عادية ولا فريتس


إيمو : ها.. هى البطاطس كمان بقت مش عادية .. ويخلق مالا تعلمون


أنا لاقيت إيمو متنحة كده قولت أروح أساندها .. أهو تلاقى حد جنبها .. انا وبقيت الشلة رحنا وقفنا وراها


البنت : الفراخ عادى ولا سبايسى ؟؟


إيمو : ااااااااااااه..مممممممم


البنت : مسطردة ولا لأ ؟


البنت : عايزين بيكالز؟؟


البنت : هنا ولا تيك أواى ؟؟ تحبوا ديزيرت؟؟


البنت دى كانت بتسأل بسرعة رهيبة حتى مش مديالنا فرصة نجاوب .. ده لو كنا فاهمين الكلام اللى بتقوله ده أصلا .. بس المشكلة إنى بضرب بعينى كده على إيمو لاقيت البنت يا عينى بتنهار وخلاص هيغمن عليها .. ومفيش على لسانها غير كلمة واحدة.." حد يسكت الست دى"


بعد ما لمينا أشلاء المعركة .. وقومنا إيمو من على الأرض .. لا قينا إننا عندنا خساير تقدر بفتاتين ( بيبا وإيمو )


المهم خرجنا من (كوك باب ) ده بخفى حنين .. يعنى من الاخر لا طولنا ام حمادة ولا كوك باب .. سبحان الله .. المشكلة إتحلت من تلقاء نفسنا .. لإننا بعد ما طلعنا من (كوك باب ) .. بيبا وإيمو إترموا فى حضن بعض وقعدوا يبوسوا بعض.. يا سلام على الصداقة .. طبعا كلنا إتأثرنا بالمنظر ده وبعض فاصل من المحبة والأخوة لاقونى بقولهم .. يالا بينا .. قالولى " على فين؟؟"

أنا : انا بقى هغديكم غدواية من اللى هى

موها : فين يا ميوشة؟؟


أنا : تعالوا ورايا .. تااااااااكسى .. مطعم (زيزو النتن ) لو سمحت

كلهم : عاااااااااااااااااااااااااااااااااااااااااا

المشكلة إن بعد الصرخة الجماعية دى سواق التاكسى إتخض وسابنا وجرى .. وخبطنا المشوار كله مشى على رجلينا.. بس اللى مجننى بجد إن ماما حبيبتى .. فى أثناء المشوار ده بعتتلى رسالة على الموبايل بتقولى " كلمينى أول ما توصلك الرسالة .. حالاااااااااااااااااااااا" .. خير يا ماما .. ياترى فيه إيه؟؟

يتبع...................

فاصل ... ونواصل

سلام عليكم

أنا عارفة إن فيه ناس كتير مقروفة منى علشان إتأخرت فى كتابة البوست الجديد .. بس بجد بجد بجد كان عندى ظروف وكنت مشغولة موووت .. معلشى بقى خلاص مش هنعملها زعلة يعنى .. إنتوا ما صدقتوا ولا إيه؟؟

المهم بقى إن اللى رجعنى تانى بسرعة جدا وخرجنى من مشغولياتى الكتيرة ( ولا يا بت يا ميوشة وبقى عندك مشغوليات) إن شفقة هانم وإحسان بك بعتولى تاج .. إنتوا طبعا عارفين البكوات والهوانم دول .. محدش يقدر يأخرلهم طلبات وإلا هنروح ورا الشمس يا ولدى

ماشى.. يا سعادة البيه .. يا ستو هاااانم .. انا بجاوب على التاج أهو .. ربنا يخليكو لينا وميحرمناش منكم أبدا

بسم الله .. نبتدى الجلسة

1_بدأت التدوين من إمتى؟ودخلت العالم ده إزاى؟

أنا فاكرة اول يوم بدأت فيه الكتابة فى المدونة كان أخر يوم فى شهر مارس .. لأ اليوم اللى قبل الأخير باين .. شوفوا هو كان بالظبط يوم 30/3 .. تقدروا تقولوا إنى دخلت العالم ده بالصدفة .. لإن الدكتورة / غادة عبد العال صاحبة مدونة ( عايزة أتجوز ) هى اللى طلعت الموضوع ده فى دماغى .. وفضلت تقولى مفيش أسهل من عمل مدونة و إنتى دمك خفيف والكلام ده .. المهم اليوم اللى إتقابلنا فيه قالتلى على موقع (بلوجر ) قالتلى إدخلى الموقع وهتلاقى كل حاجة سهلة بعد كده .. بعد ما روحت دخلت على النت ولاقيت الخطوات بتشدنى خطوة ورا خطوة لاقيت عندى مدونة جميلة .. وكمان ماما شجعتنى تشجيع رهيب وهى اللى كانت عمالة تقولى إكتبى على النت إعملى مدونة .. بس للأسف ماما كانت رافضة إسم المدونة فى الأول .. بس إقتنعت بعد كده

**********************

2- إيه كان إنطباعك فى البداية؟

بصراحة انا كنت فرحانة جدا .. وفى نفس الوقت مخضوضة جدا .. مش عارفة هيبقى إيه رد فعل الناس على اللى هكتبه .. كانت حياتى مجموعة من الأسئلة .. ياترى هيعجبهم ؟؟ ياترى حد هيقرا اللى أنا بكتبه أصلا؟؟ طيب لو قروه ومعجبهومش هيعملوا فيا إيه؟؟ إيه اللى أنا عملته ده إنتى عبيطة ولا ايه تعملى مدونة إنتى فاكرة نفسك زى د/ غادة؟؟

بس بصراحة مع أول تعليقات جاتلى حسيت بتشجيع كبير الحمد لله مفيش نقد وصلنى فى الأول كان كله تشجيع وده اللى خلانى الحمد لله أستمر فى التدوين

***************************

3- مين أول واحد بتهتمى بتعليقاته على بوستك الجديد؟

ممممممممم.. والله انا كل تعليق بيتكتب عندى فى أى بوست جديد بيعملى علامة فى بيتى .. قصدى علامة فى مدونتى .. بحب أوى التعليقات اللى بتبقى لسه لأول مرة بتزونى .. بحب أى تعليق يضحكنى .. عبد الله غنيم .. ودعاء مواجهات .. واحدة مفروسة .. مس سوسة .. شفقة وإحسان .. blue -wave..ياااااه كتير بجد لو عديت هظلم ناس كتير بحبهم وغاليين عليا جدا

**************************

4-إيه أهم حاجة إتعلمتيها فى عالم التدوين؟

إتعلمت إن مش انا لوحدى اللى مكبوتة .. وفيه زيى كتير فى عالم المكابيت .. إتعلمت كمان إن الفضفضة دى شيئ جميل .. مفيش أحسن من إن الواحد يلاقى ناس يتكلم معاهم ويحكى الكوارث اللى هو عمالها على طبيعته .. والأحلى إنه يلاقى مشاركة من الناس دى .. ده كويس، ده جميل .. أنا كل بوست بكتبه بحس إنى قولت زيادة عن اللزوم وببقى مستنية أول تعليق على احر من الجمر علشان على الأقل أشوف الإنطباع الأول هيبقى عامل إزاى؟

************************

5- إيه أكتر حاجة كرهتيها؟

هههههههههههه.. لا انا الحمد لله مكرهتش أى حاجة فى التدوين أو بسبب التدوين لغاية دلوقتى .. رغم إن المدونة عملتلى مشاكل كتيرة مع أصحابى.. يعنى مثلا لما أنزل بوست مع بيبا .. إيمو تتصل " إنتى مكتبتيش عنى ليه؟؟" .. أو يتصلوا بيا يشتمونى .. يعنى مرة بعد بوست بتاع إمتحان العربى.. لا قيت ميرو بعتالى مسج بتقولى "بقى أنا نكتى بايخة يا زباااالة" .. أدى أخرة اللى جرالى من التدوين والمدونة .. عاااااااااااااااااااااا

**********************

6-حاسس إن التدوين له تأثير عليك ؟

يااااااااااااه.. أكيد له تأثير وتأثير كبير كمان.. أنا لسه قريب كان حد بيسألنى وبيقولى المدونة بتمثلك إيه؟؟ ملقتش رد أرد بيه غير إنى قولت "دى بنتى " .. أيوة فعلا أنا حسيت إنى أم ومسؤلة عن كائن حى .. بلبسه وأسرحله شعره وأمكيجه وأطمن عليه كل يوم .. حتى اليوم اللى مش بعرف أدخل فيه على البلوج ببقى عاملة زى المجانين ( هو أنا مجنونة أصلا .. بس الحالة بتزيد أكتر شوية) .. ربنا يخليلى مدونتى حبيبتى .. قولوا أمين

*********************

7- تهدى التاج لمين ؟

أه .. أصعب سؤال .. أهديه ل

عبد الله غنيم ( واحد إنسان ونسان )

(دعاء مواجهات)

أمجد ( محدش فاهم حاجة)

blue-wave ( كلام من القلب )

***********************

تحديث

أهدى التاج كمان لأخويا المصرى (مش عاجبنى)

كفاية كده بقى دلوقتى .. صدعتكم بما فيه الكفاية

سلام بقى

إمتحان الدراما .. هيسيب علامة فى معدتك

ملحوظة مهمة أوى :

أنا حسيت إنى طولت فى الإمتحانات دى .. وإنتوا زهقتوا كمان .. علشان كده قررت أختصر وأدخل على أخر إمتحان على طول .. أخر يوم مذاكرة

*****************

أخييييييييييييراا.. خلاص .. فاضلى زلطة وأخلص من الإمتحانات ودوشتها .. هيه هيه.. لأ وكمان إيه . مسألتش عن إسم المادة .. ماهى أخر مادة بقى فلازم أبقى عارفاها هى بالذات دونا عن كل المواد التانية

عندى بكرة إمتحان دراما .. الدراما دى يعنى المسرحيات بتاعة شكسبير بقى وبرنارد شو وكل الناس اللى مجرد حفظ أساميهم عايز مخ على مخى .. أصلا المادة إسمها دراما .. يعنى كمان خد هم وغم للركب ..بس بجد مش مصدقة نفسى .. معقولة بكرة خلاص هخلص أخر أيام الكبت والخنقة .. خلاص هندخل حقبة زمانية تانية ننعم فيها بالحرية والسلام ( متسألونيش جايبة الكلام ده منين) .. أخيرا بكرة هقدر أتفرج على (سبيس تون) براحتى .. وحشنى توم وجيرى مووت .. جايالك يا محقق كونان .. رونى مش هتعرف تبعدنى عنك تانى .. تيمون وبومبا وحشتونى وحشتونى وحشتوونى .. ياااااااااه .. أخيرا هقعد على كيمو حبيبى براحتى .. من غير نظرات ماما حبيبتى الذرية .. بكرة الأجازة .. بكرة الأجاااااااااااااااازة

تررررررررن ترررررررررررن ( الرنة دى مش غريبة عليا)

أنا : ألو

ميرو : ميوشة .. بكرة الأجازة يا ميوشة

أنا : أيوة يا ميرو اخيرا .. أنا مش مصدقة نفسى

أنا وميرو فى نفس واحد : هيييييييييييييييييييييييييييييييييييييييه

ميرو : ميوشة سيبك من الكلام ده دلوقتى وركزى معايا

أنا : معاك يا كبير خير .. فيه حاجة؟

ميرو : طبعا إحنا متفقين من قبل الإمتحانات ما تبدأ أصلا إننا هنتغدى مع بعض أخر يوم إمتحان اللى هو بكرة إن شاء الله

أنا : أيوة طبعا .. ده أنا رايحة إمتحان بكرة ده اصلا علشان الغدواية دى

ميرو : طب حضرى نفسك للخناقة بقى

أنا : خناقة إيه يا ميرو كفى الله الشر ؟

ميرو : بصى يا قطة .. طبعا إنتى عارفة إن بيبا بتحب التيك اواى تضرب أى سندوتشين كده على السريع ونخلص

أنا : ايوة عارفة

ميرو : أما إيمو بقى فميدخلش دماغها غير المحمر والمشمر ومحشى البتنجان

أنا : اموت أنا فى البتنجان

ميرو : لذلك فيه خناقة قوية بين الفريقين بيبا عايزة تروح (كوك باب) وإيمو عايزة تروح ( أم حمادة )

أنا : أوبا .. صحيح .. طب وهنعمل إيه؟؟

ميرو : أنا قولت أكلمك علشان أنبهك لإن الموضوع ده من الصبح .. وكلموكى لاقوكى لسه نايمة

أنا : إيه الورطة دى ؟ طيب أنا أعمل إيه دلوقتى ؟ دبرينى يا ميرو

ميرو : يا ختى لما أدبر نفسى انا الأول .. أنا بلغتك وخلاص .. يلا سلام

أه يا ميرو يا .............. لأ بلاش شتيمة .. البت طيبة برضة ونبهيتنى .. أعمل إيه أعمل إيه ؟؟ المصيبة إنى فى الأكل معنديش ياما إرحمينى .. أنا لو عليا نفسى أكل فى الإتنين بصراحة.. يا سلام ده يبقى قشطة جدا

هتعملى إيه يا ميوشة؟؟ هتروحى ( كوك باب) مع بيبا .. ولا ( أم حمادة ) مع إيمو .. طبعا دى إمخاخ ضلمة وأنا عارفاها كويس .. لو إخترت مكان يبقى إخترته علشان واحدة فيها .. يبقى بحب واحدة فيهم ومش بحب التانية .. إيه الزنقة دى بس يا ربى .. هو أنا ناقصة.. أعمل إيه ؟؟

تررررررررررررررررررررن

أنا : ألو

بيبا : أيوة يا ميوشة .. بقولك إيه عايزاكى فى موضوع مهم

أنا ( من غير ما أحس ): معاكى يا بيبا طبعا .. لو روحتى فين أنا معاكى

بيبا: بجد يا ميوشة يا حبيبتى .. ربنا يخليكى ليا هى دى الأصحاب ولا بلاش .. أمووووووه

أنا : عيب يا بيبا تشكى فى إخلاصى ليكى .. إنتى الحب الحب .. إنتى الأنتيخ

بيبا : خلاص بقى يا ميوش علشان بتكسف .. سلام بقى

يا لهوى .. إيه اللى أنا عملته ده .. أنا وعدت بيبا ولا إيه .. عااااااااااا.. اعمل إيه بس يا خواتى

تررررررررررررررن

أنا : ألو

إيمو ( بجعورة عالية) : ميووووشة إنتى هتروحى مع بيبا بجد

انا : يا دى النيلة هى لحقت تقولك ؟؟

إيمو : ردى عليا إنتى هتروحى مع بيبا ؟

أنا : يا هبلة .. أنا بقولها كده وخلاص .. أنا معاك طبعا يا باشا .. (كوك باب )إيه وكلام فارغ إيه ؟؟ مفيش غير ( أم حمادة) ده أنا حتى لو خلفت ولد هسميه حمادة .. يتربى فى عزو حمادة عزو

إيمو : اه كنت بحسب ماشى سلام

لأ مش معقول .. إيه الجنان ده ؟؟ العيال إتهبلت مرة واحدة كده .. لأ بجد فيه حاجة مش طبيعية حصلتلنا .. إحنا إتحسدنا ولا إيه ؟؟

تررررررررررررن .. طيب والله ما أنا رده .. وأدى سلك التليفون كمان

إستغفر الله العظيم حتى الغدواية مش هنعرف نتهنى بيها .. نهايتة .. قررت أنا بقى اهرب من الأزمة دى بالمذاكرة .. قمت سميت الله كده ودورت على الكتاب .. الحمد لله لاقيته.. أتارى المادة دى كتابين.. كل كتاب فيه مسرحية.. واحدة لشكسبير (إستغلستها بصراحة ) والتانية أصغر منها شوية إسمها ( بيت الدمية )

والله قصة لذيذة ناهيك عن بطلة المسرحية نورا اللى طول المسرحية بيعاملوها على إنها عيلة صغيرة وهى زى الشحطة عندها كام عيل .. وناهيك كمان على إنها كانت هتودى نفسها فى داهية علشان تنقذ حياة جوزها اللى طلع ندل فى الاخر .. بس عجبنى أوعى أخر فصل لما إدت لجوزها الكلمتين الجامدين فى جنابه وسابتله البيت ومشت .. هى دى الست القوية .. أصل بصراحة جوزها ده ندل ندل يعنى.

المهم بقى وأنا فى قمة الإنسجام مع المسرحية ألاقى تنتنتنتنتنننننننن كام رسالة على الموبايل من نمر الشلة كلها بصيغة واحدة

( إدخلى على النت حالا ) .. يا ولاد اللذينا .. معرفوش يطولونى فى التليفون هيزنقونى فى النت

دخلت على النت علشان أشوف الأزمة الكونية اللى حصلت علشان كلهم يتلموا اللمة دى .. أستر يا رب

دخلت على النت لاقيت الحلوين كلهم مترصدين زى الأسد ما بيترصد للفريسة بتاعه

بيبا : ميووووشة .. دلوقتى وإنتى قدامنا كلنا حددى موقفك

أنا : موقفى من إيه بالضبط؟؟

إيمو : هتروحى معايا ولا مع بيبا ؟؟

موها : هو إنتوا خلاص إتقاسمتوا حزبين؟؟

بيبا : إيمو هى اللى مصممة

إيمو : لأ بيبا هى اللى راكبة دماغها

ميرو : طيب إنزلى من على دماغك يا بيبا لحسن يوجعك .. هههههههههه

كلنا فى نفس الوقت حطينا سمايلى وش أحمر

ميرو : إيه يا إخوانا ؟ أنا قولت اطرى القعدة يعنى

أنا : بصى أنا مع الاغلبية

بيبا : مفيش أغلبية .. كل واحد هيقول رأيه من دماغة .. ده غير إن ميرو وموها وساسو مش هيقولوا غير لما تقولى إنتى الأول

أنا : إيه ده .. إنتوا بتلوا دراعى ولا إيه .. طب إيه رأيكم بقى إنى مش هروح لا ده ولا ده

ساسو : أمال هتروحى فين ؟

أنا : هناكل زى ما بناكل كل يوم .. عند حبيبنا وعشرة عمرنا ( زيزو النتن )

كلهم : إييييه ؟؟

موها : حتى أخر يوم هيبقى فول وطعمية

ميرو : أنا اصلا عمرى ما كلت من عند الراجل ده ولا عمرى هاكل عندى .. برستيجى ميسمحليش

موها : برستيج مين يا حلوة .. ده إحنا قاتلينو سوا بالأمارة رميناه فى الترعة

ساسو : هو مين ده اللى رميتوه؟؟

أنا : ببببببببببببببببببببس.. يا ساتر عليكم .. إسكتوا

إيمو : لا نتن ولا معفن .. هى ( أم حمادة )

بيبا : لأ ( كوك باب )

أنا : بقولكم إيه إنتوا خنقتونى .. من أخر بقى أنا مش عايزة قلبة دماغ .. يا إيما ترسوا على بر .. يا إما بلاها الأكلة دى اصلا .. يا هبلة منك ليها إحنا علينا إمتحان بكرة

ساسو :أه صحيح . هو إحنا علينا إمتحان إيه ؟؟

موها : بدل ما تفكروا فى الأكل فكروا فى علاج الزهايمر بتاع ساسو ده الاول

أنا : إنتوا باين عليكم فايقين ورايقين ..انا ماشية.. النت ده بفلوس .. سلام

أكيد هيتبع بعنى .. أمال هنتعلق كده

خدلك كمان نفسين.. إحنا ورانا حاجة

رونى : يالا يا ست ميوشة قوليلى ذاكرتى قد إيه لغاية دلوقتى؟

أنا : أبدا يا رونى قعدت حوالى نص اليوم أعرف إسم المادة .. وبدأت مذاكرة من حوالى أربع ساعات

رونى : ما شاء الله .. أربع ساعات بحالهم .. إيه التفوق ده كله؟ وياترى انجزتى إيه فى الوقت العظيم ده كله؟

أنا : بصى يا رونى يا أختى .. أنا قريت أول عشر صفحات على قد ما أقدر.. ومفهمتش منهم أى حاجة .. ولا لاقيت فيهم كلمة (سيكومهلبية) اللى بيبا قالتلى عليها

رونى : (سيكومهلبية) عليكى وعلى بيبا يا شيخة .. ورينى فين العشر صفحات دول .. يالهوتى .. بقالك اربع ساعات بتذاكرى فى مقدمة الكتاب؟

أنا : إيه مقدمة الكتاب دى ؟؟ التتر يعنى.

رونى : تتر إيه بس هو إنتى بتذاكرى مسلسل بكار؟ المقدمة دى اللى الدكتور بيعرف فيها الكتاب وبيقول هو بيتكلم عن إيه؟

أنا : عاااااااااااااااا .. حرام والله .. يعرف الكتاب قى عشر صفحات .. هو فاكر نفسة هيقدم برنامج هالة شو ؟

رونى : على فكرة المقدمة عشرين صفحة مش عشرة .. على العموم إهدى يا ميوشة .. وقوفك على دماغك بالمنظر ده مش هيحل المشكلة .. إن شاء الله هنحاول نجمع اى حاجة مع بعضنا .. بس مقدرش أوعدك بالإمتياز

أنا : إمتياز إيه بس يا بنتى؟؟ أنا لو لاقيتنى ممكن أجيب أمتياز فى مادة.. محلش فيها حاجة

رونى : طيب تعالى بقى فى الأوضة جوة نقفل على نفسنا شوية

دخلت أنا ورونى الأوضة عندى ومسكت هى الكتاب بتاعى اللى كانت درست زيه قبل كده .. وطلعتلى كام نقطة كده علشان أذاكرهم .. المشكلة إنى فعلا مش عارفة أستوعب علم النفس ده خالص .. دى حتى رونى بدأت تطلع فيا عقد دراستها عليا

رونى : إنتى من جواكى نفسيا مش عايزة تستجيبى للمادة .. هدى نفسك وحاولى تحبيها

رونى : متقرقضيش ضوافرك كده .. ده ممكن يتحول لمرض مزمن

رونى : إنتى متنحة كده ليه ؟؟ ركزى فى الكتاب

رونى : ميوووشة .. إنتى نمتى!!!!!

أنا : معاكى .. والله معاكى

المهم بعد كام ساعة كده طلعنا أنا ورونى من الأوضة .. رونى طالعة وراسها فوق وحاسة بالفخر وبالإنجاز اللى عملته فيا .. محسسانى إنها مثلا زى الدكتور اللى كان فى قصة كونغو اللى إخترع جهاز علشان يخلى القردة (إيمى) تعرف تتكلم .. أما أنا فكنت طالعة راسى لتحت ومش قادرة أرفعها من كتر الوش اللى دخل جواها .

رونى : شوفى يا خالتو .. واضح إن ميوشة بتعانى من فوبيا علم النفس .. ده شكله نوع جديد من الفوبيا .. هدور عليه فى المراجع ولو مش موجود هبقى أخد ميوشة الشهر العقارى وأعمل براءة إختراع

أنا : إلهى تجيلك فوبيا المية يا شيخة ومتعرفيش حتى تغسلى وشك .. وتمشى فى الشارع تهرشى وتغنى (أنا عندى حساسية.. أنا عندى حساسية)

رونى : معلشى يا خالتو .. ده إضطراب بسيط فى المخ .. أهم حاجة دلوقتى إنها تنام ..وبلاش النهاردة بالذات تتفرج على المسلسل بتاع (لمحقق كونان) ده .. متخليش الكلمتين اللى عماله أحشرهم فى دماغها من ساعتها يخرجوا

ماما حبيبتى : حاضر يا حبيبتى .. أنا مش عارفة البت ميوشة بقت عاملة كده ليه ؟؟يا نهار زى بعضه.. هى إحولت؟؟

رونى ( وهى بتدارى وشى) : عادى يا خالتو ده رد فعل طبيعى ..دلوقتى عينها ترجع زى ما كانت .. ويمكن تخضر كمان.. مين عارف؟؟

ماما حبيبتى : ميوشة إنتى شايفانى يا حبيبتى؟؟

حقولى بعد كده إنى كنت مستربعة على الأرض وناكشة شعرى ومطلعة لسانى ( تخيلوا نفس منظر ميدوسا بس كمان مطلعة لسانها وحولة)

أنا : مين سى لطفى لا مؤاخذة .. أصل أنا عندى شعرة .. ساعة تروح وساعة تيجى.. ها

ماما حبيبتى : لا حول ولا قوة إلا بالله .. حاضر ساعة تروح وساعة تيجى .. قومى معايا بقى

ماما قومتنى هيلا بيلا ورمتنى على السرير وأنا كل شوية أقولها .. ها .. وقامت مغطيانى وقالتلى

ماما حبيبتى : تصبحى على خير يا ميوشة.. وربنا يكملك بعقلك

أنا : رااااااااااااااحت

*****************************************

( ميوشة .. ردى عليا يا ميوشة .. أنا رونى .. ردى عليا يا بت .. هفضل أرن كده كتير )

أنا : أيوة يا رونى

رونى : أيوة يا ميوشة عملتى إيه فى الإمتحان؟؟

أنا : ده كان طويل أوى.. كان اربع اسئلة

رونى : وحلتيهم كويس؟؟

أنا : أنا حليت أول سؤالين بس

رونى : عاااااااااااااااا.. حرام عليكى .. المهم عملتى إيه فيهم؟؟

أنا : أول سؤال مش متأكده من إجابته أوى ..وقعدت أخبط فيه

رونى : والتانى؟

أنا : لأ التانى ده بقى بتاعى حليته ميه ميه.. كان بيقول عرف علم النفس

رونى : ده السؤال ده كبير أوى حلتيه فى كام صفحة؟؟

أنا : صفحة مين .. انا حليته فى سطر ونص ( هو العلم الذى يدرس النفس البشرية وتفاعلتها مع أفعال الإنسان وسيكومهلبيته ).. ألووووووو.. ألوو رونى .. رحتى فين؟؟....رووووووووونىىىىىىىىىى

خدلك نفس ..من علم النفس

يوم الجمعة جه.. طبعا لكم أن تتخيلوا إنه ماكنش مفعم بنفس نشاط وحيوية اليوم اللى قبله .. بالعكس كان مفعم بالكسل والملل والشلل .. طبعا ماهو يوم مذاكرة بقى.. كفاية بس إن اليوم الجميل ده إبتدى بمكالمة إيمو ليا

إيمو: صباح الصبوحة يا ميوشة

أنا : صباح الصبوحة؟؟ ده إيه الصباح المنعكش اللى شادد وشه ده.. صباح النور يا ستى. أخبارك إيه؟؟

إيمو : والله يا بنتى أنا كنت كويسة وعال العال لغاية ما بصيت فى جدول الإمتحانات وعرفت المادة اللى علينا بكرة

أنا : أه صحيح .. إحنا علينا إيه بكرة؟؟

إيمو : مادة إسمها غريب كده .. إسمها علم نفس ( إيمو قالتها بتفح الفاء)

أنا : نفس ؟؟ إيه علم النفس ده .. بيعلمونا فيه إزاى نتنفس ده ولا إيه؟؟

إيمو : والله يا أختى ما أعرف ، أنا من خبرتى فى الحياة إستنتجت إن المادة دى غالبا هيعلمونا فيها إزاى نقطع نفس العيال فى الفصل .. يعنى الواد اللى يكلمنا كده ولا كده نكتم نفسه .. بس بإسلوب علمى متحضر

أنا : هو إحنا فى كلية تربية ولا كلية ريا وسكينة .. عيال إيه الى هنكتم نفسهم يا بت يا محنونة إنتى .. ونكتم نفسهم بإسلوب علمى كمان .. ربنا يا ختى ما يحرمنا من ثقافتك الواسعة

أما بقى ميرو فكان رأيها مختلف

أنا : أيوة يا ميرو عرفتى مادة بكرة؟؟

ميرو : أيوة طبعا .. شوفى يابنتى أنا هجيبلك الخلاصة .. المادة دى تبع الأنفاس .. يعنى اللى نفسه أطول هو اللى هينجح فيها

أنا : إزاى يعنى ؟؟ هيجيبه مثلا حوض مية ويغطسوا دماغنا فيه واللى يعيش هو اللى هينجح ولا إيه؟؟

ميرو : ممكن .. وممكن كمان يجيبوا شيشة واللى يشد أطول نفس يجيب الإمتياز على طول

أنا : يا سلام يا سلام .. ولما نيجى نسلم ورقة الإجابة للمراقب نقوله كلمة السر ( مساء الخييييير)؟

ميرو :لأ يا فاشلة .. مش للدرجة دى .. كده يتعملك محضر غش وتدخلى لجنة خاصة.. بس هقولك يا ميوشة نصيحة غاليه.. حاولى تذاكرى أى حاجة مهمة فى بلدنا ليها علاقة بالأنفاس

أنا : زى إيه يعنى ؟؟

ميرو : يعنى مثلا مترو الأنفاس .. نفس الشهيد أحمد حلمى.. وباقى الأنفاس بقى

أنا : هو أحمد حلمى بقى شهيد .. لأ وأذاكر نفسه كمان؟؟ ربنا يخليكى ليا يا ميرو هى دى الصداقة ولا بلاش

ميرو : إسمعى بقى قبل ما نقفل (مرة واحد نفسه إتقطع معرفش يربطه تانى ) نيهاهاهااها

أما بقى روقان الشلة كلها

ساسو : صباح الخير يا ميوشة هى الساعة كام دلوقتى؟

أنا : إحنا العصر يا استاذة

ساسو : وبتصحينى دلوقتى ليييييييه؟؟

أنا : معلشى أصل - بعد إذن حضرتك يعنى - فيه علينا إمتحان بكرة

ساسو : يووووووه يا ميوشة إحنا فين وبكرة فين لسه بدرى .. إمشى بقى أنا عايزة أنام

أما التوتر .. فليه طريق واحد

موها : ميوشة هنعمل إيه فى المادة دى ؟

أنا : إنتوا أصلا مش مدينى فرصة أفتح الكتاب علشان أعرف المادة دى فيها إيه؟؟

موها : أنا قلقانة ومش متفائلة خالص .. المادة دى مش طبيعية .. أنا عارفة إنى هروح بكرة مش هعرف أحل أى حاجة خالص .. أنا عارفة .. أنا عارفة إنى هشيل المادة دى

أنا : هو أنا كنت ناقصاكى إنتى كمان يا أنسة توتر إنتى مش لما نبقى نمتحن الأول نبقى نشوف هننجح ولا لأ روحى ذاكرى أحسن من القلق ده

مش عارفة ليه المادة دى بالذات اللى إحنا كلنا شايلين همها .. لأول مرة تحصل الإجتماعات دى كلها فى يوم واحد وفى زمن لا يتخطى الساعتين.. بجد مادة غريبة .. سيبك من إسمها المريب.. أصلا الكتاب غريب جدا .. دى مادة تربوى .. يعنى المفروض مادة ثانوية ، لكن الكارثة إن الكتاب بتاعها أكبر من كتب التخصص
أنا لاقيت نفسى كلمت الشلة كلها النهاردة إلا بيبا حسيت بتانيب ضمير والله ( مين اللى صحى الاخ ده كمان دلوقتى ) أصلا البت دى وحشتنى بقالى يوم كامل مكلمتهاش .. وكمان ال........

ترررررررررررن تررررررررررن

أنا : ألو

بيبا : أيوة يا ميوشة . أخبار علم النفس معاكى إيه ؟؟

أنا : إيه .. علم النفس ( بيبا هى الوحيدة اللى نطقتها صح ) إيه علم النفس ده ؟؟

بيبا : يا لهوى يانا .. إنتى لسه نايمة فى العسل .. المادة اللى علينا بكرة

أنا : إيمو قالتلى إن إسمها علم نفس .. المادة بتاعة الأنفاس

بيبا : ههههههههه .. أنفاس .. ربنا يقطع نفسكوا يا مسطولة إنتى وهى .. يا ميوشة ده علم النفس .. علم النفس والفلسفة بتوع الثانوى .. مش فاكراهم

أخ ... بعد ما بيبا قالت الكلمتين دول رجعتبالذاكرة سنتين ورا .. وأنا واقفة قدام بابا بالضفاير والفستان ( إيه على طول لما حد بيفتكر بيكون بضفاير وفستان إشمعنى أنا؟ ) وكنت عمالة أقوله
لا يا بابا علم نفس لأ يا بابا .. أنا هاخد فلسفة وإقتصاد وإحصاء .. لكن علم نفس لأ لأ.. أنا بكره علم النفس يا بابا

طول عمرى بحس إن علم النفس ده بيجيب المرض النفسى . وإن الدكاترة النفسيين مرضى نفسيين (مع الإعتذار للدكاترة يعنى . على راسى يا باشا )حتى أى دارس عادى للمادة أو مدرس ليها .. تحس إن فيه شوية سلوك ملمسة عنده .. علشان كده طول عمرى واخده موقف من علم النفس وعمرى ما درسته قبل كده لحد النهاردة .. باين كده إن كل عقدى من علم النفس والدكاترة والمدرسين هتطلع عليا النهاردة

بيبا : ميوشة إنتى رحتى فين؟؟ إنتى نمتى ولا إيه؟؟

أنا : لأ معاكى بس الصدمة شديدة عليا شوية.. أنا معرفش أى حاجة عن الأخ علم النفس ده

بيبا : أه ما أنا عارفة علشان كده قولت أطمن عليكى.. بصى يا حبيبتى علم النفس ده بيدرس النفس البشرية وتفاعلتها مع أفعال الأنسان وسيكولوجيته

أنا : ماشى ماشى .. أفعال الإنسان وسيكومهلبيته .. كملى أنا معاكى

بيبا : سيكومهلبيته ؟؟ لأ واضح جدا إنك معايا .. بصى يا ميوشة حاولى كده تمسكى الكتاب وتقرى منه أى كلمتين ولو معرفتيش حاجة كلمينى .. معظم الكلام ده كنا واخدينو فى الثانوى .. سلام

يا ربنا .. طيب اللى مخدش علم نفس فى ثانوى ينتحر يعنى ولا إيه؟؟ إستغفر الله العظيم.. مسكت الكتاب كده وبصيتله لاقيته بيبصلى باصة غريبة جدا.. شوية وكان هيطلعلى لسانه.. شوفتوا أدينى لسه مجرد ماسكة الكتاب ومن غير ما اقرا كلمة واحدة ودماغى لسعت على طول.. بس فيه حاجة مهمة .. علم نفس.. علم نفس .. أنا فاكره إنى أعرف حد تخصص علم نفس .. فى حد فى عيلتى بيدرس أو بيدرس علم نفس .. علم نفس.. علم نفس .. ياترى من اللاسع اللى فى عيلتنا.. يوووه مش فاكره

بسم الله الرحمن الرحيم .. سميت وفتحت الكتاب وقريت الصفحة الأولى والتانية .. التالتة لغاية الصفحة العاشرة ووقفت .. حاولت اعرف أنا فهمت إيه بالضبط من العشر صفحات اللى فاتوا دول.. ولا حاجة.. طلعت بإيبه منهم؟؟.. غبائى زاد شوية

مين اللى تخصص علم نفس فى عيلتنا .. يخرب بيت الزهايمر

ضميرى وجعنى .. قولت أقرا تانى .. وقعدت أقرا واقرا .. على إنى أفهم حاجة ابدا .. قعدت على الحال ده حوالى أربع ساعات .. لغاية ما لاقيت باب الاوضة بتاعى بيخبط

أنا : إدخل الله يخليك

رونى : ميوش .. أخبار إمتحان بكرة معاكى إيه ؟؟

أنا : متفكرنيش يا رونى الله يخليك دى مادة مقرفة ( للعلم رونى دى بنت خالتى وجارتى فى نفس الوقت.. أخت سوسة)

رونى : مادة إيه دى؟؟

أنا : إسمها علم نفس .. تعرفيها؟؟

رونى : ميوشة.. هو إنتى تعرفى أنا فى كلية إيه ؟؟

أنا : يا ختى بلا نيلة دا أنا لسه عارفة أنا فى كلية إيه من إسبوعين

رونى : أنا فى كلية إسمها كلية تربية .. سمعتى عنها قبل كده؟؟

أنا : كلية تربية؟؟ ... أه إيه ده دى كليتى إنتى معايا فى الكلية؟؟

رونى : أيوة يا حلوة بس أنا أكبر منك بسنتين

أنا : أيوة دى عارفاها دى

رونى : وفى قسم علم نفس

أنا سمعت الكلمة دى من هنا ونطيت على رونى وإتشعلقت فى رقبتها

أنا : بجد والنبى قسم علم نفس

رونى : أيوة والله .. يخرب بيتك يا ميوشة دا إنتى فى الباى باى خالص

أنا : أبوس إديكى وضوافر عنيكى لتشوفيلى حل فى المادة المنيلة دى .. أنا خلاص مش مش عارفة أعمل إيه فى المادة دى أنا خلاص جبت أخرى معاها

رونى : متقلقيش أنا هحللك المشكلة دى

يتبع .................

مليون دولار

تانى يوم الإمتحان صحيت من النوم وأنا مفعمة بالنشاط والحيوية .. أخيرا النهاردة الخميس يومى المفضل فى الإمتحانات.. علشان مش هيبقى عليا إمتحان تانى يوم .. الجمعة عندنا أجازة ومش بنمتحن فيه .. علشان كده الإمتحان هيبقى يوم السبت اليوم الوحيد اللى قبله يومين أذاكر فيهم مش يوم واحد . أنا بقى قررت أحتفل باليومين دول .... يعنى بقالى إسبوع بحاله بذاكر .. خلاص فرهدت،أخد يوم راحة بقى .. وبكرة أبقى أذاكر المادة الجاية اللى لسه معرفهاش.

صحيت من النوم قمت ناطة من على السرير جرى وجريت على حبيبى وروح قلبى (كيمو).. متفهمونيش غلط .. كيمو ده يبقى الكمبيوتر بتاعى .. رحت للكمبيوتر وفتحته وأنا عمالة أسمع صوت الى إإإآى أأوووؤؤ .. بتاع الفتح ولا كإنها معزوفة لبيتهوفن ( مين الراجل ده؟؟)

المشكلة بقى إن ماما حبيبتى سمعت هى كمان الصوت ودخلت عليا الأوضة وأنا متلبسة بالجرم المشهود

ماما حبيبتى : صباح الخير يا ميوشة اللى اللى صحاكى بدرى كده مش عوايدك يعنى

أنا : أصل النهاردة أجازة

ماما حبيبتى : أجازة؟؟ أجازة إيه ؟؟ هو إنتوا لحقتوا تمتحنوا؟؟

قعدت من أول تانى أحكيلها على اليوم الأجازة اللى أنا إكتشفته

ماما حبيبتى : أنا قولت برضة،عوضى عليك يا رب .. إبقى قابلينى لو فلحتى ، وبعدين قايمة جرى على سى كيمو بتاعك ده.. طيب إغسلى وشك الأول بدل ما إنتى معمصة كده وشكلك يقرف

وقامت ماما حاطة المرايا قدام وشى .. أنا أول ماشفت اللى فى المرايا صرخت .. كان كائن إسطورى أشبة بميدوسا وشعرى واقف وعينى مقفولة .. الله يكون فى عون اللى بيبصوا فى الوش ده كل يوم

أنا : حاضر يا ماما هغسل وشى .. علشان خاطرك إنتى بس

ماما حبيبتى : هو غسيل الوش كمان محتاج واسطة وخاطر ؟؟ إن الله مع الصابرين

بعد بقى غسيل الوش وكورس النضافة ده .. فتحت الإيميل بتاعى.. أه ما أنا عندى إيميل .. أمال إيه؟؟ قوم إيه ألاقى عندى إيميل.. أه والنبى عندى إيميل .. ببص على الإسم لقيت كلمة بالإنجليزى غريبة كده .. كونجراتييلاشن .. طيب بالله عليكم دى كلمة . بعد الإستعانة بالقاموس إكتشفت إن الكلمة دى معناها (مبرووك) .. مبروك .. مبروك على إيه؟؟ هى النتيجة طلعت؟؟ ولما يمكن أكون إتخطبت وأنا مش واخدة بالى ولا حاجة ؟؟ يارب أكون إتخطبت .. يارب أكون إتخطبت .. فضلت أقول الكلمة دى وأنا بفتح الإيميل ومستنية بقى صورة العريس تظهر قدامى .. لكن سبحان الله ظهرلى حاجة تانية خالص

الإيميل كان فيما معناه إن شركة معينة كانت بتعمل حاجة زى قرعة كده بين المستخدمين وأنا طلعت فى القرعة دى وكسبت.. كسبت كام؟؟

مليوووووووووووووووووون دولاااااااااااااااااااااااااااار

أنا قريت الرقم جاتلى صدمة نفسية عصبية .. مليون دولار .. ممكن بجد .. ممكن واحدة زى شخصى المعفن تبقى مليونيرة.. مليون دولار دول يعملوا يجى 6 مليون جنية مصرى .. ده بالميت كمان .. خلاص أنا هيغمن عليا .. مش قادرة .. يا أصحابى يا اهلى يا جيرانى أنا عايز أخدكو فى أحضانى .. مش قادر على فرحة قلبى .. مش قادر أبدا يا حبايبى

جريت على ماما حبيبتى لاقيتها قايده التكييف فى أوضيتها ونايمة نومة بعد الغدا اليومية ( الكلام ده كان بعد الغدا )

أنا : ماما .. مامااااااااااااااا .. إلحقينى يا ماما .. إمسكينى يا ماما

ماما حبيبتى : إيه ؟؟ فيه إيه؟؟ إيه اللى جرى ؟؟ حد حصله حاجة؟

أنا : أيوة يا ماما أنا .. انا حصلى

ماما حبيبتى: حصلك إيه يا حبيبتى مالك؟؟

أنا : مش هتصدقى ياماما جالى إيميل بيقولى إنى كسبت مليون دولار

ماما حبيبتى ( وهى بتحاول تمنع إيديها تسلم على وشى ) : حسبى الله ونعم الوكيل بقى مصحيانى من النوم علشان الهبل ده

انا: هبل ؟؟ هبل إيه بس يا ماما ؟ بقولك مليون دولار

ماما حبيبتى : ايوة هبل ونصب كمان.. إنتى تكسبى مليون دولار ؟؟ طيب أنا راضية ذمتك ده منظر يبقى معاه خمسة جنيه حتى؟؟

وطبعا ضيرتلى ظهرها .. وقالتلى جملتها الشهيرة ( جتها نيلة اللى عايزة خلف )

أنا بقى بعد كورس الإحباط ده قررت إنى لازم أقاوم ولا للإستسلام .. وروحت تانى علشان أشوف إزاى أقدر أستلم المليون دولار دول.. لاقيت إنى لازم فى خلال 30 دقيقة أتصل بالرقم المجانى بتاع بلدى علشان ياخدوا بياناتى .. الرقم مجانى الحمد لله.. رصيدى مش هيضيع .. ببص على التايمر اللى موجود على الشاشة لاقيت فاضل ربع ساعة بس .. يالهوى الجايزة هتروح منى.. جبت التليفون جرى وإتصلت بسرعة قبل ما الوقت يخلص .. ردت عليا واحدة كتكوتة بتتكلم بالإنجليزى .. طبعا قالت كلام كتير مفهمتش منه غير كلمة فيزا .. أكيد بتسالنى على فيزا .. أنا مبقاش على لسانى غير

نو فيزا نو.. نو فيزا .. تقولى طيب مامتك أو باباكى عندهم.. أرد أنا وأقول (نو فيزا.. نو نو)

البت قامت قايلالى متشكرين وقامت قافلة السكة فى وشى .. أه يا....... ، يعنى خلاص مفيش أمل مفيش مليون دولار مفيش اى حاجة .. اعمل إيه ؟؟ أعمل إيه .. التايمر قدامى عمال يعد مش فاضل غير 4 دقايق بس .. قولت أجرب تانى يمكن نتفق مش لازم مليون دولار .. كفاية نص ..طب ربع . المهم جيت أتصل تانى ..لقيت صوت بنت برضة بس صوت بقى انا حافظاه .. وبتقول

(رصيدك الحالى لا يكفى لإتمام هذه المكالمة ) .. عاااااااااااااااااااااااااااااا

**********************************

قى قاعدة صفا بليل كده قعدت أحكى لماما بعد ما صحيت بقى حكاية المليون دولار .. ورصيدى اللى طار .. وبعد الضحك والتريقة .. ماما قالتلى

ماما حبيبتى: تصدقى يا بت يا ميوشة .. هتصدقى إن شاء الله .. إنتى لما قولتيلى على موضوع المليون دولار ده لما نمت قعدت أحلم بيه؟؟

أنا : حلمتى بإيه ؟؟

ماما حبيبتى: حلمت إنك كسبتى المليون دولار وحولتيهم 6 مليون مصرى.

أنا : تمام .. حلو أوى .. مع إنه حلم .. إهئ إهئ

ماما حبيبتى : إستنى بس.. وبعدين إنتى بقى يا ميوشة بقلبك الطيب الكبير وزعتى علينا الفلوس .. أنا مليون وباباكى مليون وأختك مليون . وإنتى التلاتة الباقيين .. أنا بقى خدت المليون بتاعى . ونزلت الشارع وإديت للشحاتة اللى على أول الشارع دى فلوس وإشترتلها شقة صغيرة بدل ما هى بتنام فى الشارع كده .. ورحت لسوسن قريبتنا اليتيمة دى .. فرحها قريب .. نزلت معاها وإشترتلها حاجات جهزها الناقصة والبنت كانت طايره من الفرحة .. أى والله كانت فرحانة خالص.. والزبال إشترتله جلابية جديدة وجبت لولاده لبس جديد.. ولا أم صلاح كله كوم واللى أم صلاح عملته كوم .. دفعتلها الفلوس اللى كان إبنها مديون بيهم .. الست كانت هتموت من الفرحة ومكنيتش عارفة تعمل إيه ؟؟ يااااااااااااااااااه .. والله كان حلم جميل

أنا : بس إنتى كده مش هيتبقالك فلوس يا ماما خالص .. ياااااااااه يا ماما ده إنتى طيبة اوى

ماما حبيبتى : يا بنتى مش حكاية طيبة ولا حاجة ، بس أنا بحب إن لما ربنا يفرجها عليا أفرجها على اللى حواليا .. مش مهم الفلوس المهم اشوف الفرحة فى عنين الناس

أنا : لا لا يا ماما إنتى فهمتى غلط خالص أنا مش قصدى على كده

ماما حبيبتى : أمال قصدك على إيه ؟؟

أنا : أنا قصدى إنك طيبة علشان حلمتى أصلا إنى هديكم فلوس .. أنا لو خدت الفلوس دى .. ولا هعرفكم بعد كده .. أنا هبقى مليونيرة .. قال أديكم فلوس قال

ماما حبيبتى.. لأ مقالتش حاجة .. هى جريت ورايا بالشبشب .. هو أحسن رد .. أه خلاص كفاية .. إنتى شوفتينى كسبتهم يا ماما يعنى .. عاااااااااااااااااااااااا.. إلحقونى